Digital Lamang: Batang-ong mga Hamtong

Pagbuntog sa Pagkawalay Kadasig

Pinaagi sa Mga Serbisyo alang sa Pagbarug sa Kinaugalingong Paningkamot

Ang tanan mawad-an og kadasig, apan ang kanunay nga pagkaguol bahin sa kapakyasan wala lang nagpugong sa imong pag-uswag apan usab dili maayo para sa imong mental nga kahimsog.

Hinimo-himo nga Istorya [Myth] #1: Kitang tanan natawo nga magmalipayon gayud.

Hinimo-himo nga Istorya #2: Dili gayud nato maangkon unsay atong gikinahanglan aron malipay, busa nganong maninguha pa man kita?

Ang resulta niining mga hinimo-himo nga mga istorya mao ang pagkawalay kadasig—kana nga pagbati nga atong maangkon kon dili nato makuha ang mga gilauman para sa atong kaugalingon, o kon wala gyud gani tay mga gilauman ug dawaton lang nato ang unsay anaa. Ang kapakyasan kasagaran moabut sa dili pa ang kawalay kadasig, bisan og mobati kita nga daw natawo kita nga kanunayng pakyas, nga dili gyud nato mabuhat ang unsay gilauman kanato, o nga gibuhat na nato ang pinakamaayo ug wala lang gyud gihapon nahitabo.

Apan ang kawalay kadasig kabahin na sa kinabuhi, ug kini mahimong mabungahon kon makat-on kita unsaon kini pagpahigayon. Busa ania ang 10 ka mga tip kon unsaon pagpauswag sa imong kawalay kadasig:

Ilha ang kapakyasan ug dawata ang responsibilidad nga kabahin ka niini. Oo adunay mga higayon nga naay mga panghitabo nga dili nato gusto nga mahitabo ug wala na tay mahimo pa, apan kasagaran, makabuhat pa unta kita og lahi nga butang. Tinguhaa ang pagkat-on gikan sa imong mga kapakyasan.
Pag-ampo mahitungod niini. Pag-ampo, dili kinahanglan nga ang tanan mamaayo aron magmalipayon ka pag-usab, apan aron makasabut, makakita sa leksyon, ug makakita og positibo nga kinaiya aron makapadayon ka.
Pagsulbad sa problema. Ang pagkabalaka makapaminos sa paglambo. Paninguhaa ang pag-usab sa imong panghunahuna gikan sa pagka-emosyonal nga bahin sa imong utok ngadto sa pagkamatarunganon [logical] nga bahin—aron ka makapundok sa imong mga kapanguhaan aron makahimo og plano.
Mag-ampo og usab. Kon ikaw aduna nay maayo nga plano nga makatabang aron sa pagbuntog sa kawalay kadasig, pag-ampo alang sa kompirmasyon nga ang imong plano maayo na. Tabangan ka sa Ginoo nga makapadayon lapas pa sa kapakyasan nga maoy hinungdan sa kawalay kadasig.
Buhata kutob sa imong mahimo. Kon nawad-ang kag trabaho, pagtrabaho og sama nga oras kada adlaw sa pagpangita og bag-o nga trabaho ingon nga nagbuhat ka sa imong daan nga trabaho. Kon ang problema usa ka relasyon, pagtrabaho aron sa pag-ayo sa naguba. Bisan unsa pa ang imong gibuntog—ilabi na kon usa ka sala ang hinungdan sa imong pagkawalay kadasig—pagtrabaho aron mausab ug makuha ang imong gagmay nga mga tumong.
Buhata kini usa ka lakang matag higayon. Bisan ang mga tumong nga kabahin sa imong plano kinahanglan nga gamay ug mopauswag kanimo sa eksakto nga direksyon.
Gamita ang imong mga kaila. Ang mga higala ug pamilya mga talagsaon nga kapanguhaan. Pahibaloa sila sa imong sitwasyon nga dili kaayo ingon ka madramahon. Ang tinuod nga mga higala maminaw ug moabag. Usahay ang maayo nga maminaw makapausab sa tanan.
Pangayo og panalangin sa pagkapari. Walay limit ang gidaghanon sa mga panalangin sa pagkapari nga imong madawat. Kon nanginahanglan ka og usa, pangayo og usa.
Lahutay uban sa pasensya. Usahay mataudtauran lang gyud ang malisud nga panahon nga molabay.
Ipha ang imong mga panalangin. Paghimo og lista sa tanang mga butang nga mapasalamaton ka. Idugang kini matag adlaw ug hibaloi nga sa katapusan, may kalipay nga nagpaabut kanatong tanan.

Oo, malisud ang kinabuhi. Lisud kini para natong tanan. Bisan pa man, ang atong pagtuo motubo samtang motubag kita sa atong mga pagsulay sa mapuslanon nga paagi. Mas makabati kita sa gugma sa Dios alang kanato tungod kay nag-uswag kita, nagbuhat kutob sa atong mahimo, ug nangayo sa Iyang tabang.