Naglambo isip usa ka Misyonaryo panahon sa COVID-19
Ang inyong pagtutok makahimo sa tanang kalainan.
Kon dunay nangutana nako pipila ka bulan ang milabay kon unsa ang akong gihunahuna sa akong misyon, dili gayud nako matag-an ang panaw nga naghulat nako. Apan usa ka butang nga mao lang gihapon: Ako misyonaryo lang gihapon sa Ang Simbahan ni Jesukristo sa mga Santos sa Ulahing mga Adlaw—apan karon ako usa ka misyonaryo usab panahon sa pandemya.
Apan unsa ang kahulugan niana?
Nagpasabut kini sa pagtinguha sa pagbuhat sa kabubut-on sa Ginoo sa mas lawom nga paagi. Nagpasabut kini sa pagpaningkamot sa pagserbisyo sa Ginoo ug sa Iyang mga anak samtang nag-atubang og makanunayon nga kausaban. Nagpasabut kini sa dali nga pagpahiangay sa bag-ong mga sitwasyon. Nagpasabut kini sa pagkat-on nga mahimong mas makapailin-ilin, matugtanon, mapailubon, ug mahigugmaon sa matag adlaw.
Nagpasabut usab kini sa pag-atubang og daghang walay kasigurohan ug sa pagpangutana og daghan sama sa:
“Mapauli ba ang akong kompanyon ugma?”
“Mabalhin ba kaha mi ngadto sa laing area tungod sa kagaw?”
“Unsa ang mahitabo sa mga tawo nga among gitudloan kon kinahanglan nakong mobiya?”
Nagpadayon ang among pagtudlo sa ebanghelyo diha sa social media, apan dili kanunayng sayon—ug siguradong dili kini ang kasinatian sa misyon nga gihanduraw sa bisan hain kanamo. Bisan pa niana, ania gihapon kami, lig-on sa among desisyon sa pagserbisyo bisan asa, sa pagserbisyo sa Ginoo bisan unsa pa ang sitwasyon o sa paagi sa pagbuhat niini, sa pagtabang sa mga kasingkasing sa Iyang mga anak.
Nganong gipili gihapon nako ang pagserbisyo?
Oo, ang mga kalisdanan sa kinabuhi sa misyonaryo mao ang pisikal, mental, ug espiritwal—kaming tanan miagi og labing minus usa niini. Oo, nag-atubang kami og daghang kalisud ug mopadayon sa pag-atubang og dugang pang mga hagit, apan salamat ni Jesukristo, kinsa mihatag sa Iyang kinabuhi alang kanato, kami nasayud nga ang tanan niini angay lang.
Nakaamgo ko nga ang Langitnong Amahan nagpakabana kanatong tanan. Nasayud siya nga adunay mga misyonaryo kinsa dili makahimo sa pag-adto sa templo o makasulod sa missionary training center sa dili pa moadto sa ilang misyon. Nasayud siya nga adunay mga batan-on kinsa dili na makahigayon sa pagserbisyo diha sa mga yuta nga sila gitawag sa pagserbisyo. Ug gani kining mga misyonaryo nasayud nga ang Ginoo nahigugma ug nanalipud kanamo sama sa kanunay niyang gihimo. Ug nga ang among mga paningkamot igo na sa Iyang mga panan-aw. Kaming tanan nakat-on gayud nga kami makaserbisyo sa Ginoo ug makapaambit sa Iyang ebanghelyo bisan asang dapit ug sa bisan unsang kahimtang. Ug angay lamang kini.
Unsay nakapahimo nako sa pagpadayon?
Sa lisud nga mga panahon, akong nasayran nga adunay mga duha ka mga paagi sa pagtan-aw niini nga panahon:
-
Uban sa negatibo nga kinaiya, walay pailub nga magpaabut sa mga butang nga mabalik sa normal.
-
O sa usa ka bag-ong panglantaw, maghimo og mga tumong, magplano sa positibo ug personal nga paagi, paggamit niini nga sitwasyon isip usa ka oportunidad sa paghimo og mga kausaban nga dugay na natong gitinguha apan nalangay.
Naningkamot ko nga mopili sa ikaduhang opsyon. Samtang gihunahuna nako ang kasamtangang mga kahimtang sa kalibutan, naghunahuna ko kon ang COVID-19 mao ang usa ka oportunidad sa pagtabang nato nga makasabut pa og dugang sa atong mga relasyon o sa pag-awhag kanato sa pagbukas sa atong mga kasingkasing og dugang pa ngadto sa atong Tiglalang ug mahimong andam sa pagpaminaw Kaniya. Ug aron iprayoridad ang ebanghelyo labaw pa kay sa atong nabuhat kaniadto.
Dili lang kini usa ka lisud nga panahon alang sa mga misyonaryo—lisud kini alang sa tanan. Apan sama sa pagtawag ni Kapitan Moroni sa uban aron sa pag-apil sa kawsa sa kagawasan (tan-awa sa Alma 46), kita usab gitawag sa pagbarug ug dili mahadlok. Ug sa pag-ila nga ang atong Langitnong Amahan maoy tinud-anay nga magauban kanato sa kanunay, nagtugot kanato sa pagserbisyo uban sa tibuok natong kasingkasing, gahum, hunahuna, ug kusog, bisan unsa pa man (tan-awa sa Doktrina ug mga Pakigsaad 4:2).
Isip mga misyonaryo sa Ginoo, kami kinahanglan kanunay nga nakatutok sa among Manluluwas ug sa among mahangturong tumong. Atong hinumduman nga ang Langitnong Amahan nahigugma sa tanan Niyang mga anak ug gusto nga kitang tanan makabalik ngadto Kaniya.
Sa pagkatinuod, maingon man ka lisud ang mahimong usa ka misyonaryo diha sa panahon sa COVID-19, atong mahimo kining panahona nga usa sa labing maanindot sa atong kinabuhi. Sa hingpit nga katinuod, labing nindot kini para nako! Ug kining tanan tungod sa akong pag-focus, tungod kay kanunay kong naningkamot sa paghinumdom sa akong gugma sa Langitnong Amahan ug sa akong tinguha sa pagtabang Kaniya sa pagpundok sa nagkatibulaag nga Israel. Ug ako nasayud nga Siya moganti sa matag usa sa Iyang mga misyonaryo og malumo nga kalooy samtang kami mobuhat sa among labing maayo aron matuman kining tawag nga Siya mihatag kanamo.