Juon Visōn Ej Tōl Eō n̄an M̧ool eo
Ej kab m̧ōj aō antooneļo̧k statue eo?
Jejjo iiō rem̧ootļo̧k, ikar bwebwenato ippān mijenede ro, im ājmour eo an ekar jab em̧m̧an. Ekar lukkuun nana aō mour, im men eo ikar kōņaan n̄an en̄jake jet kain tōl ilo mour eo aō.
Ikar jab lukkuun en̄jake aō peran ak itok limo kōn jabdewōt men, eļaptata kabun̄ in me eļap an mijenede ro kōnnaan kake. Jekdoon, ikar āliklik ilo aō kar kāālet n̄an pād ilo iien kweilo̧k in kwojkwoj eo ej kab kar kein kajuon.
Jinō ekar itok ippa, im ke kōm kar tōpar m̧ōn jar eo, buruō ekar ikūm̧kūm̧ ke ikar loe juon statue gold erabōlbōl ilo ioon bōro̧waj eo. Ekar juon men eo eļap an aibojooj me ij kab ello! Mōn jar eo elukkuun lur im aenōm̧m̧an ilo kalimjōke im mejatoto in karuwainene jon̄an m̧wilū ekar oktak, im ikar kijoroor in deļon̄ ilowaan.
Ilo iien kwojkwoj eo, ikar kiil meja, im pija iin Jisōs ij loe ilo kōļmenļo̧kjeņ eo aō. Aō kar rūttotak, ikar baj jeļā wōt kōn Jisōs, ak ikar jab lukkuun itok limoū ilo E m̧ae kiiō. Ijjan̄in kar riit Baibōļ. Im ilo m̧ool ikar jab jeļā jabdewōt kōn etke Jisōs Kraist ekar mej ioon debwāāl ak etke E ekar wōr jon̄oulruo an Rijilōk ak etke elukkuun lōn̄ rikanaan rej katakin kake E.
Ak ilo iien eo, ikar en̄jake aō epaake E. Āliktata ekar lukkuun m̧ool ilo aō lale ļo̧k. Ikar en̄jake juon en̄jake in iakwe im juon ikdeleel ekajoor n̄an ekkatak eļapļo̧k. Ikar tōmak bwe E ej kein jipan̄ an m̧ool im iakwe me eto aō kar kappukote.
Jejjo raan tokālik, ikar kajjitōk ippān jinō kōn statue eo ikar loe. Ekar pok jidik ilo kalimjōke im ekar ba ejan̄in kar lo juon statue, ak ekar kōņaan ettōr im lale m̧ōn jar eo bar juon alen bwe en loe ālkin aō kar kōmeļeļe jon̄an aibojooj eo an.
Ak ke ekar tōpar m̧ōn jar eo, statue eo ikar lo jejjo raan rem̧ootļo̧k ejako. Ikar jab tōmak! Elōn̄ ke armej ekar kam̧akūti?
Ilo m̧ōn jar eo ilo wiik eo tok juon, ikar kajjitōk kōn statue eo. Ekar bwūlōn̄ im ekar ba bwe mōn jar ejjan̄in kar wōr statue ie. Ak ke ikar kōmeļeļeiki kōn statue me ikar loe, ekar ba, “O! Kwoj kōnnaan kōn statue eo an Moronai? Rejjab pād ilo m̧ōn jar ko, ak statue eo an ej pād ilo elōn̄ iaan tampeļ ko. Ekar ba n̄an n̄a bwe Moronai ekar juon rikanaan in Bok in Mormon im ekar ļap tokjen ilo Jepļaaktok.
Ikar kāālet bwe bolen ikar pijaikļo̧k ak antooneļo̧k statue eo. Ak ikar kappukot ilo Bok in Mormon ia eo elōn̄ etan Moronai ie. Ikar ekkatak bwe ekar luuji baam̧le eo an im ro m̧ōttan, im ekar metak kōn jerawiwi ko an laļ in, im jekdo̧o̧n aolep men kein, ekar ļoor wōt kien ko an Anij im kōjparok m̧ool eo. Ikar bar ekkatak bwe ekar bar waļo̧k n̄an Josep Smith elōn̄ kōttan n̄an leļo̧k n̄an e ennaan ko jān Jemedwōj Ilan̄. Ekkatak kōn Moronai im katak ko an im wāween n̄an kaitokļo̧k to ko n̄an ļoor Kraist im dāpij m̧ool eo me kar jipan̄ n̄a ekar lukkuun ukōt buruō n̄an gospel eo.
Āliktata ke ekar wōr aer iien ko n̄an loļo̧k Sapporo Japan Tampeļ, ikar lo juon statue in Moronai me ekar loe jinoin. Ekar ejja statue eo wōt me ikar lōn̄in m̧ōn jar eo. Ak men eo ikar loe ilo raan eo ekar jatōltōl kōn meram ilōn̄in aolep men ko ilo laļ. Ij tōmak bwe “statue rabōlbōl eo” ekar juon visōn jān Jemedwōj Ilan̄, ej karuwaineneik eō n̄an kappukot iakwe eo An im m̧ool eo an gospel eo an Jisōs Kraist me em̧ōj an jepļaaktok. N̄an ekkatak kōn rikanaan ro jān etto āinwōt Moronai im eo ekar kam̧ool kōn Kraist im rikanaan ro remour ro rej kōm̧m̧an ejja āinwōt in. N̄an kappukot tōl eo eto aō kar bar kapukote.
Ijeļā bwe Irooj ekar kōjepļaak tok gospel eo an Jisōs Kraist n̄an rikanaan Josep Smith im bwe ewōr ad rikanaan remour rainin ro rej tōl jān E n̄an bōktok n̄an kōj m̧ool im jipan̄ kōj jepļaak n̄an ippān Jemedwōj Ilan̄. Ijeļā bwe Jisōs Kraist ej juon kein jipan̄ in aenōm̧m̧an im lan̄lōn̄ ilo mour in im barāinwōt eo tok juon.
Meram eo an Jepļaaktok eo an gospel in im aolep kōjeraam̧m̧an ko em̧ōj an lukkuun ukōt mour eo aō, im āinwōt ilo raan eo jinoin tata in aō kar jar, ijeļā Jemedwōj Ilan̄ enaaj tōl mour eo aō āinwōt aō ļoor E im ribōkto bōktak ennaan ko An.