Digital Wōt
Kwoj ke Mour kōn Gospel eo kōn Jimettan Kijejeto?
M̧wil ko ad n̄an eddo ko ad ilo Kabun̄ in rej lukkuun kōm̧m̧an juon oktak.
“Ij ke Aikuj in?”
Em̧ōj ke am̧ kar bōk ļōmņak in m̧okta? Ikar bōk ļōmņak in elōn̄ alen. Im iaar katak bwe kain in ļōmņak rōt in āinwōt ejjab aorōk ej juon kōkaļļe eaorōk kōn m̧wil eo aō. Em̧ool, jemaron̄ aolep leļo̧k jipan̄ im jerbal in karejar n̄an ro jet, jemaron̄ bōk im kakūrm̧ool kūr ko ad ilo Kabun̄ in, im jemaron̄ pād ilo kweilo̧k ko ad ilo Kabun̄ in. Em̧ool kōm̧m̧ani kōn jimettan kijejeto, men kein remaron̄ kōm̧m̧ane juon oktak ilo mour ko ad. Bōtaab ej ke kōm̧m̧an jon̄an maron̄ eo an Anij n̄an kōjerbal eok? Ej ke kōm̧m̧an jon̄an maron̄ eo an Anij n̄an ukōt eok? N̄an n̄a, ij ļōmņak ej.
Ļōmņak in ekōm̧m̧an aō ļōmņak kōn Lamen Lamuel, ro raar likūt Jerusalem, ro raar bar ro̧o̧lļo̧k n̄an bōk pileij ko, ro raar jipan̄ jōk wa eo, ro raar kōm̧m̧ane elōn̄ men ko ilo pokake—bōtaab raar kōm̧m̧an men kein ilo aer roo im jimettan kijejeto. Raar jab kōtļo̧k bwe en̄jake ko aer ren ukōt er n̄an em̧m̧anļo̧k. Ijello̧kin, raar iien otemjej alin̄ūrn̄ūr im wōr aer m̧wil ko renana ilo aolep jekjek ko raar lo er make ie. Im ālkin kile men jab in, iaar lukkuun jab kōņaan erom̧ juon Laman ak juon Lamuel.
Bōk juon iien n̄an lukkuun ļōmņak kōn un ko rej kōllowetak m̧akūtkūt ko am̧. Kwoj ke pukōtļo̧k ro jet kōn juon jibadbad ioon kōjeraam̧m̧an ko kwonaaj būki? Ak kwoj ke pukōtļo̧k ro jet kōnke kwoj m̧ool kwoj kōņaan kwaļo̧k meram eo im iakwe eo ippāer? Kwoj ke kōm̧m̧ane aolep men ko me rej menin aikuj n̄an kūr eo am̧ kōnke ej ta eo kōtmāne jān kwe? Ak kwoj ke kōm̧m̧ane kōnke kwoj kōņaan jerbal n̄an Irooj im ro ipeļaakūm̧?
Men kein rej jet kain kajjitōk ko ij kajjieon̄ kajjitikin eō make jān iien n̄an iien. Ij ke kōm̧m̧ane aolep men ko imaron̄i n̄an mour āinwōt juon rikaļoor em̧ool an Kraist kōn lukkuun kōttōbar? Ak būruwō ej ke lukkuun in jab pād ie? Ij ļōmņak kōn Bisop Gérald Caussé, Bisop eo Eutiej, eaar em̧m̧an an ba: “ Jej ke niknik ilo gospel in, ak jej ke lukkuun boub ilo Kabun̄ in?” (“Ej Kōn Aolep Armej,” kweilo̧k eo Eļap, Māe 2018, 112).
Niknik ņae Poub
N̄an n̄a, n̄e ij “poub” wōt ilo Kabun̄ in, ekar wōr aō en̄jake ko rejjab aorōk. Jab aorōk in emaron̄ juon tōprak in juon m̧wil eo edikļo̧k jān kaitoktok limo ak em̧ool jān kōtļo̧k jerbal ko edik aer aorōk ilo jikejuuļ eo aō n̄an aer karum̧wijļo̧k ippān ko me relukkuun in aorōk. Ewōr ippa en̄jake in jab itok limo in n̄e ij jijet ilo kweilo̧k in kwojkwoj eo im jab leļo̧k aō, n̄e ij ba jar ko aō bon̄ otemjeļo̧k im aō kōļmenļo̧kjeņ ej jino ļōmņak kōn men ko jet, n̄e ij m̧ōkaj in riiti jeje ko rekwojarjar aō ilo jab kejōkļo̧kjeņ kaki, n̄e ij pukōtļo̧k juon n̄an baj ba wōt iaar kōm̧m̧ane ijello̧kin n̄an m̧ool in kajjieon̄ m̧ōttāik er.
Jet iien em̧ool ij en̄jake ebbweer n̄e ijjab lo jabdewōt eddōkļo̧k ilo mour eo aō—n̄e āinwōt ijjab aorōk im “poub” ilo gospel eo—im en̄jake kein rej pād wōt ippa m̧ae iien ij kile ta jorrāān eo. Jet iien ij aikuj in bōjrak, bar kobaļo̧k, im kajjitikin eō make, “Ij ke leļo̧k aō n̄an kūr in ak armej in ak jar in ak eoon in aolepān aō im būruwō kiiō?”
N̄e ij bōk kain revelesōn ak kōļmenļo̧kjeņ rōt in ejidimkij, ej iien eo oktak eo ej lukkuun waļo̧k ilo mour eo aō. N̄e ij m̧ool in jar n̄an lo ro jet ilo wāween eo Jemedwōj Ilan̄ ej lo er, n̄e ij jar kōn iien ko rem̧m̧an an jerbal in karejar, n̄e ij jar kōn tōl ilo kūr eo aō, ilo jerbal eo aō, im ilo mour eo aō raan-n̄an- raan, im eo aorōk tata, n̄e ij kōm̧m̧ane im̧we ko Ej litok n̄an n̄a, n̄e jerbal ko aō rej juon kōkaļļe in ikdeelel ko aō itulowa rej erom̧ em̧m̧anļo̧k—bwe ej iien eo ij niknik ilo gospel eo. Bwe ej iien eo ij en̄jake juon oktak em̧ool in m̧wilū, ilo būruwō, im ilo aō. Bwe ej iien eo ij lo men ko rekabwilōn̄lōn̄ rej mejaļļo̧k. Bwe ej iien eo ij en̄jake m̧ool in m̧ōņōņō ej deļo̧n̄tok ilo mour eo aō. Bwe ej iien eo ij m̧ool in kajjieon̄ oktak n̄an em̧m̧anļo̧k.
M̧akūtkūt ko ņae En̄jake ko
Ij ļōmņak jemaron̄ aolep ļōmņak kōn jet iien ko ilo mour ko ad n̄e m̧akūtkūt ko ad raar jim̧we, bōtaab ellowetak ko ad n̄an kōm̧m̧ani m̧akūtkūt ko raar jab jim̧we. Jet iien mour ej poub, jet iien jeban iien otemjej lukkuun in m̧ōņōņō ilo jekjek ko ad, im jet iien men ko remaron̄ jab iien otemjej kōm̧m̧an ilo wāween eo jej kōņaan bwe ren. Jejjab wānōk, bōtaab eļan̄n̄e jej kajjitōk ippān Jemedwōj Ilan̄ n̄an jipan̄ kōj leļo̧k aolepān kijejeto eo ad n̄an jet iien kam̧ōkm̧ōk ak men ko rebōk-iien jaar kajjitōk n̄an kōm̧m̧ani, jemaron̄ katak n̄an kōm̧m̧ani ilo juon wāween āinwōt an Kraist.
Imaron̄ ļōmņak kōn iien ko ke iaar jab kōņaan errā n̄an kōm̧m̧ane juon būroojāāk in jipan̄, n̄an wōt kar kameomeoik būruwō im ukōte ālkin en̄jake eo. Ak ke iaar bōk juon kūr im jekpen ņae kōn an bōk eļap iien jān iien eo aō, kar n̄an n̄a wōt n̄an lukkuun kanooj jan̄ ke kar kōtļo̧k eō kōnke iaar katak n̄an iakwe.
Jemaron̄ kwaļo̧k meram eo, kakūrm̧ool eddo ko ad, im bōk uwaan ko n̄an jar ko ad ilo jejjet tata eļan̄n̄e būruwōd rej ilo jikin eo ejim̧we. Eļan̄n̄e jej bōk iien n̄an etale m̧wil ko im ellowetak ko n̄an m̧akūtkūt ko ad im kōm̧m̧ane aolep men ko jemaron̄i “kōn juon bōro em̧ool, [im] lukkuun kōttōpar” (Moronia 10:4), jenaaj maron̄ in em̧m̧anļo̧k ad kile tōl eo an Jemedwōj Ilan̄, lo eļapļo̧k lan̄lōn̄, im kōm̧m̧an ekanooj ļapļo̧k oktak ilo mour ko ad im ilo mour ko an ro jet.