COVID-19: Juon Iien Em̧m̧an n̄an Bar Mije Unleplep in Gospel eo
Ilo aolep bwebwenato, eto an lōn̄ kain season ko reppen. Rainin, jej jelm̧ae apan̄ ko reļļap itok jān COVID-19. Kōm kar ron̄ elōn̄ alen: erkein rej iien ko me jab jeļā kaki. Elōn̄ iaad rej inepata kōn ājmour eo ad im ājmour eo an ro rejitōnbōro ippād. Jej aolep kar en̄jake apan̄ ko rejelet jeraam̧m̧an an laļ ko kajjojo im en̄jake ko me rej waļo̧k jān nan̄inmej in kōn kūj in. Ilo kalimjōkļo̧k menin jeminene kake. Im jerbal in mijenede im jerbal in tampeļ em̧ōj kabōjrake. Elōn̄ armej rej m̧weiūr kōn jerbal ko me roktak wāween im iien kōm̧m̧ani ilo m̧ōko.
Jelm̧ae juon ilju im jekļaj eo ejjab alikkar emaron̄ kōm̧m̧an juon en̄jake in mijak ak bolen ikūm̧kūm̧—bolen em̧ōj am̧ kar en̄jake menin. Ak ilo lukwōļpen aolep tarpok kein, ewōr kōjatdikdik! Jekdo̧o̧n jab alikkar im oktak ko, men ko raorōk im rej pedped in gospel eo rejjan̄in oktak:
-
Kweilo̧k in jar ko ekkā kōm̧m̧ani im ippān doon ko remaron̄ bōjrak jidik ak kōm̧m̧an jon̄an, ak mour kōn gospel eo ejjan̄in bōjrak! Jemaron̄ wōnm̧anļo̧k wōt im kabun̄ar, jerbal in karejar, im mour kake gospel eo ilo m̧ōko m̧ōd.
-
Anij ej pād ilo Lan̄ ko An.
-
Eo Nejin, Jisōs Kraist, ej dilepen jerbal in. Emeļeļe kōn apan̄ ko an laļ in im barāinwōt apan̄ ko an kajjojo armej. E ekar kallim̧ur, “I jāmin likūt kom̧ atajinemjen” (Jon 14:18). Ej jilkintok Jetōb Kwojarjar bwe en pād ippād.1
-
Anij ekar letok n̄an kōj rikanaan, rilolo, im rikwaļo̧k revelesōn ro. Im kōn er, E ekar litok im likūt men ko jej lukkuun aikuji n̄an jelm̧ae tōre in epen.2 Ļōmņak kōn laajrak in kein ekkatak ko rekāāl n̄an mije wōt m̧ōko, ekoba okoktak ko jet, me rekar jipan̄ kōj kōppopo n̄an iien in im n̄an mour im jerbal in karejar ilo wāween ko reutiejļo̧k im rekwojarjarļo̧k.3 Oktak kein rejjab jide—rekar likūt er ilo karōk jān Anij eo eobrak kōn jeļāļo̧kjeņ im iakwe.
Jekdoon tarpok ko, im kōn men kein ilo kōļmenļo̧kjeņ, jemaron̄ bar mije unleplep in gospel eo, eo me ekoba tōmak ilo Irooj Jisōs Kraist.
Ak ewi wāween ad maron̄ kōmourruuri tōmak eo ad? Jān jinoin, Irooj ekar kōtļo̧k rikaļoor ro an bwe ren kijenmej kōn apan̄ ko ilo an ejjeļo̧k uwaak n̄an aolep apan̄ ko. Okar in tōmak eo ad ej m̧ūlaļļo̧k n̄e jej aikuj kōjerbal anemkwōj in kāālet im wōnm̧aanļo̧k ilo ad jelm̧ae men ko jaje kaki ak rejjab alikkar. Elder Neil L. Andersen jān Doulul eo an Jon̄oulruo Rijilōk ro rej āliji menin, im ba, “Kwojjab jeļā aolep men, ak kwojeļā ebwe!”4
Bwebwenato in Nipai im ļaddik ro jein rej kajjieon̄ bōk brass pileij ko ej juon waanjon̄ak kōn menin. Rekar jeļā ta eo rekar aikuji n̄an kōm̧m̧ane: bōk pileij ko! Ekar bar wōr juon aer ļōmņak em̧m̧an kōn etke. Rej kar lukkuun jeļā ewi wāween n̄an kōm̧m̧ane. Ālkin an wōtļo̧k ruo kōttan (lale 1 Nipai 3:10–27), Nipai ekar jab bar pedped ioon maron̄ eo an make. Ijeļo̧kin an ebweer, ekar kajjieon̄ bar juon alen. Kile katak eo jemaron̄ keidi ilo naan ko an Nipai n̄an jekjek ko ad raan kein:
“Im Jetōb eaar tōl eō, jab jeļā m̧okta men ko in kar kōm̧mani.
“Mekarta iaar wōnm̧aanļo̧k” (1 Nipai 4:6–7).
Jekdoon elōn̄ kajjitōk ko me rejjan̄in uwaak ilo mour ko ad, eļan̄n̄e jej “wōnm̧aanļo̧k wōt” āinwōt Nipai, lōke Anij im ļoor rikanaan ro An im mije wōt tōmak, Enaaj tōl im ļōme kōj. Ilo jet tōre ilo jerbal in, kajjitōk in inepata ko ad me rejjan̄in uwaak renaaj erom̧ pedped in kōketak.
Jen kōļapļo̧k tōmak ko ad ilo Jisōs Kraist, ad lōke ilo Rikarejeran, im ad iakwe n̄an doon ilo ad jelm̧ae ilju im jekļaj. Ilo iien ko rekapokpok im reppen remaron̄ erom̧ jikin ko rekwojarjar n̄an kōj n̄an epaakeļo̧k E. Ilo ad kōm̧m̧ane menin, aenōm̧m̧an eo An enaaj kobrak jetōb ko ad, ilubwiljin poktak ko, im jenaaj lo kajoor im uwaak ko jej aikuji.