Jilu Katak ko kōn Iakwe, Lan̄lōn̄, im Aenōm̧m̧an
Jān Brian K. Ashton
Rikakpilōklōk eo Kein Karuo ilo Būreejtōni eo Eutiej an Jabōt Jikuuļ
Jān juon kōnono ilo juon nokon in jota, “Mōņōņō, Aniliriab, im Men ko Reddik,” kar kwaļo̧k ilo Brigham Young University ilo Tijōm̧ba 5, 2017.
Ļoor bun̄tōn nee kein remaron̄ kōm̧m̧ane juon oktak eļap ilo mour eo am̧ im jipan̄ eok en̄jake leen ko an Jetōb.
Ke iaar juon rijikuuļ in kaļōj, eaar ļap aō kōļmenļo̧kjeņ kōn ilju im jakļaj eo aō. Ke iaar tōpar ilju im jekļaj eo—m̧eļeļe in mour ālkin kaļōj—Iaar katak jilu katak ko raorōk me raar kōm̧m̧ane juon oktak eļap ilo mour eo aō. Ikōņaan kwaļo̧k katak kein ippāmi kōn kōjatdikdik eo bwe eban aitok ami katak kaki āinwōt kar n̄a. Remaron̄ jipān̄ eok kappukōt eļap lan̄lōn̄ ilo mour in—im tokālik bōk mour indeeo ippān Jemedwōj Ilan̄.
1. Kappukōt Mōņōņō eo, Aenōm̧m̧an eo, im Jetōb Kwojarjar eo
Iaar ioon lio pāleō, Melinda, ke ij pād ilo iiō eo kein karuo in kaļōj, enan̄in jiljino allōn̄ ko ālkin aō kar ro̧o̧l jān mijen eo aō. Ekar m̧ōkaj aō jeļā bwe iaar kōņaan m̧areiki Melinda. Melinda, mekarta, eaar jab wōr an ejja en̄jake in. Ekar jab m̧ae ļalem iiō ko tok ālik ke ekar āliktata bōk juon uwaak bwe enaaj kar “EM̧M̧AN” eļan̄n̄e ekar m̧areiki eō.
Ium̧win iiō ko ļalem, Eaar juon iaan māllejon̄ ko reppen ilo mour eo aō. Iaar jeļā wōn eo ij aikuj m̧areiki, im Jetōb eo eaar kōketak eō, bōtaap iaar jab maron̄ topar kottopar eo.
Ejjab to ālkin aō kar kadiwōjļok, Melinda eaar kāālet n̄an etal n̄an mijen—ilo jidik in, iaar tōmak, n̄an etal ettoļo̧k jān n̄a. Eaar wōr iien ko ke eaar pād ilo mijen ke iaar jab m̧ōņōņō kōnke iaar kalimjōk wōt ta eo eaar ejjeļo̧k ippa. Mekarta, iaar katak jān jeje ko rekwojarjar im jar aolep raan, jerbal in jipan̄ ilo Kabun̄, im kajjieon̄ kōm̧m̧ani men ko me rej boktok Jetōb Kwojarjar eo n̄an mour eo aō.
Juon jibbon̄ tata in, juon Jabōt jibbon̄ eluukkun in m̧ōļo ilo Minneapolis, Minnesota, USA, ke iaar ettōr n̄an juon kweilo̧k an Kabun̄ in, iaar lōm̧ņak, “Ij aikuj in kar jab m̧ōņōņō kiiō. Āinwōt ejjeļo̧k men ej ilo̧k ilo wāween eo ikōņaan. Bōtaab ijjab m̧ōņōņō. Ij en̄jake ao m̧ōņōņō ilo ejjeļo̧k tōmak!”
Kiiō, ekōjkan aō maron̄ m̧ōņōņō eļan̄n̄e n̄aij en̄jake ta eo, n̄an n̄a, eaar juon mālijjon̄ epen?
Uwaak eo loe ilo Galatia 5:22-23: “A leen Jetōb, yokwe , lan̄lōn̄, aenōm̧m̧an, meanwōd, jouj, em̧m̧an, tiljek, ineem̧m̧an, jatōr.”
Kōnke iaar kōm̧m̧ane men ko raar boktok Jetōb n̄an mour eo aō, iaar en̄jake iakwe eo an Anij. Iaar en̄jake lan̄lōn̄ im aenōm̧m̧an. Emaron̄ in kar aitok aō en̄taan im n̄aij m̧ōņōņō wōt.
An lōn̄ iakwe, lan̄lōn̄, aenōm̧m̧an ilo mour ko ad, ilo baam̧le ko ad, im m̧are ko ad rejjab itok jān an lōn̄ m̧wōd em̧ killep, wa ko rem̧m̧an, nuknuk ko rekāāl tata, tōprak ilo jerbal ak jabdewōt bar men ko jet laļ in ej ba rej bōktok m̧ōņōņō. Ilo m̧ool, kōnke en̄jake in iakwe, lan̄lōn̄ im aenōm̧m̧an rej itok jān Jetōb, en̄jaki ejjeļo̧k an ļo̧k ilo jekjek ko ad ilo kanniōk.
Jouj im meļeļe ke n̄aij jab ba bwe jān aolep iien m̧ōņōņō ak bwe jekjek ko ad ilo kanniōk rejjamin kōm̧m̧an bwe jen m̧ōņōņō. Ilo mool, Eļan̄n̄e jejjab edjon̄e meo̧, jejamin jeļā tōn̄al (lale Katak im Bujen ko 29:39; bar lale Moses 6:55).
Jej aikuj apan̄ jet iien. N̄an kakobaba, jet jekjek ko ilo ānbwin im kōlmenļo̧kjen remaron̄ kōm̧m̧an ad en̄taan im kōm̧m̧an bwe en pen ad en̄jake Jetōb eo. Ak eļan̄n̄e jej kajjieon̄ bwe en pād Jetōb eo ilo mour kein ad im jej lōke Anij, jemaron̄, aolep, m̧ōņōņō.
Ij kam̧ool jān en̄jake aō make ke menin em̧ool. Jān en̄jake eo aō ke Melinda eaar pād lo mijen eo an, Ij kile ke eļan̄n̄e n̄aij kōm̧m̧ani men ko Jetōb ej bōktok n̄an mour eo aō, ekoba kāālet n̄an tōmak im bōk men ko me renaaj tōprak ekkar n̄an an Anij kōņaan, ekkā aō m̧ōņōņō (lale Jekab 3:2).1
2. Jab Po ilo Menin M̧oņ ko
Setan ej letok m̧oņ kein n̄an pinej jenkwan aolep men Anij ej kōm̧m̧ani n̄an kajjieon̄ kapok kōj. Mekarta an Setan kajjieon̄ bwe jen reel, Rilo̧mo̧o̧r eo ej katakin kōj bwe “wōjke eo enana [ejamin] le kōn leen ko rem̧m̧an.” (3 Nipai 14:18). Kōnke Setan ej wōjke eo enana, ejjap maron̄ kōm̧m̧an bwe jen en̄jake “iakwe, lan̄lōn̄, aenōm̧m̧an, meanwōd, jouj, em̧m̧an, tōmak, ineem̧m̧an, [im] kōmmaanwa” (Galetia 5:22-23). ijello̧kin, Setan ekōņaan kōm̧m̧an bwe jen liejļōļ (lale 2 Nipai 2:27).
Innām ta eo Setan ej kōm̧m̧ane? Ej kajjieon̄ m̧oņe kōj.
Juon m̧ōtta, juon eo ebun̄bun̄, kar m̧oņe. Eo m̧ōtta eaar jerbal in mijinede im kar juon mijinede eo em̧m̧an. Ke eaar ro̧o̧ltok jān mijen eo an, eaar kōņaan kommani aolep men dikdik ko me rekar bōktok Jetōb eo n̄an mour eo an im kar kōkajoor e ilo mijen eo an. Im ilo jidik iien, eaar kōm̧m̧ani.
Ijo wōt ke, eaar elolo m̧ōttan, elōn̄ iaaer raar mijenede ro raar jepļaaktok jān mijen, rej itok n̄an jar kajjojo Jabot ak tulikun m̧ōn jar eo rej mour āinwōt an laļ in mour. Āinwōt rekar m̧ōņōņō. Rekar kōm̧m̧an men ko “relimo”. Im wāween mour ko aer ekar jab bōk eļap jerbal āinwōt mour eo an.
Jidik kon jidik eaar bōjrak an kōm̧m̧ani men dikdik ko me rekar bōktok kajoor in jetob ilo mijen eo an. Eaar wōr wōt an naan in kam̧ool, bōtaab eaar ba n̄an n̄a ke eaar kōjem̧ļo̧ke, “Eļan̄n̄e ij pād wōt ilo kweilo̧k ko an Kabun̄ in, iaar em̧m̧an wōt—Ij pād ilo iaļ eo.” Mekarta, eaar ba, “Ilo jetōb, iaar jab niknik.”2 Ilo an kar mour āinwōt an laļ in in mour, juon kāālet ebwōd eaar tōl n̄an bar juon, im ejjab to eaar bōro̧ro.
Kāālet ko an rebōd āliktata rekar tōpar e. Eaar jab m̧ōņōņō, im eaar jeļā. Jeraam̧m̧an, eo m̧ōtta eaar kile ke kar lorak ilo m̧oņ, im eaar ukweļo̧k.
Bwebwenato in an ej kalikkar bwe jekdo̧o̧n eo em̧m̧an tata iaad emaron̄ ļorak ilo m̧oņ. Dedeen ke, bwebwenato eo an ej kwaļo̧k bwe jej aikuj jab m̧ūjkōk ad bōbrae jān m̧oņ. Jej kōttōbrak menin ilo ad kōm̧m̧ani men dikdik ko me rej bōktok Jetōb eo n̄an mour ko ad.
N̄aij in m̧ōņōņō in kwaļo̧k bwe eo m̧ōtta ej m̧ōņōņō, ej kajjieon̄ kōjpārok kien ko, im ej niknik ilo gospel eo ilo mour in kanniōk im jetōb.
M̧oņ ko an Setan rej itok ilo elōn̄ wāween ko. Inaaj kwaļo̧k wōt jejjo.
Setan ej kajjieon̄ kōm̧m̧an bwe jen likut men ko an kanniōk ioon men ko an jetōb. Jemaron̄ jeļā n̄e men ko raorōk jej aikuj kōm̧m̧ane rejjab jim̧we ilo an kile jon̄an ikutkut in ad ba, “Ilukuun boub, ak ilukkuun m̧ōk kiiō n̄an _________.” Kanne būļāān̄ eo: tal n̄an tampeļ, jerbal in karejar, ekkatak im lin̄ūri jeje ko rekwojarjar, kōm̧m̧ane jerbal eo aō ak jar.
Juon un eo me jej en̄jake ad boub ej konke Setan ej lukkuun kajjieon̄ in kōm̧ad kōj. Ej kōjerbale smartphone ko ilo peid, ratio ko ilo wa ko waad, tv ko ilo m̧o̧ko m̧ōd, im bar kōjerbal jet men n̄an kōm̧ad kōj aolep iien. Āinwōt juon tōprak, jej en̄jake ad boubļo̧k wot.
Bar juon tōprak kōn kōm̧ad in ej bwe edikļo̧k im dikļo̧k ad kejekļo̧kjeņ Setan ej jerbal n̄an kōm̧ad kōj konke ejeļā kejekļo̧kjeņ, eļaptata jeje ko rekwojarjar, ej tōlļo̧k n̄an eļapļo̧k oktak im revelesōn.
Bar juon iaan m̧oņ ko an Setan ej itok ilo ļōmņak eo bwe jerbal ko an itulik elōn̄ļo̧k tokjāer jān ikdeleel eo an itulowa. N̄e ej ejjeļo̧k ippād ikdeleel eo n̄an kōm̧m̧ani men ko an Jetōb, jejjab en̄jake lan̄lōn̄ eo an gospel eo. Āinwōt juon tōprak, kōjpārok kein ko ej jino āinwōt n̄e jemaron̄ rāāp jāne, im Setan ijeļā bwe n̄e enaaj kōm̧m̧an bwe jen bōk wāween en̄jake in, jemaron̄ bōjrak ad kōm̧m̧ani men ko jej aikuj kōm̧m̧ani.
Setan ej bar m̧oņe koj bwe jen tōmak bwe lan̄lōn̄ im m̧ōņōņō rej itok jān mour eo epidodo ak jān limo aolep iien. Rejjab. M̧ool eo ej bwe ejjeļo̧k lan̄lōn̄ im m̧ōņōņō eļan̄n̄e ejjeļo̧k juon men n̄an anjo̧ ioon. (lale 2 Nipai 2:11-23).
M̧oņ eo an Setan āliktata inaaj kwaļo̧ke ej me ej kajjieon̄ bwe jen tōmak bwe nana, ippān mōņōņō ko an jidik iien, ej lukkuun m̧ōņōņō eo. Setan ejeļā, ilo iien in, jet en̄jake remaron̄ (1) kōm̧m̧an bwe jen ļōmņak bwe jej en̄jake le ko leen Jetōb, (2) pinej ikdeleel ko an n̄an leen ko, ak (3) en̄jake āinwōt kein pinej jenkwan ko rekkar.
N̄an waanjon̄ok, Setan ej kapoik kōj n̄an kappukōt ļōn̄ ijello̧kin iakwe. Emaron̄ kareel kōj kōn itok limo ijello̧kin niknik in lan̄lōn̄. Ej kajjieon̄ n̄an kōm̧ad kōj ijello̧kin an letok n̄an kōj aenōm̧m̧an. Emaron̄ kōm̧m̧an bwe jen make kawānōk koj make, ebanban, im kajjim̧we ilo ad jab ļōmņak kōn juon make, ikutkut pokake, im kalimjōk ekkar ilo jetōb. Kapo ko an remaron̄ kōm̧m̧an ad pok, eo enaaj tōl kōj n̄an ļōmņak ke kakure kien renaaj bōktok m̧ōņōņō.
3. Kōm̧m̧ani Men Dikdik ko
Ej ekkā an men ko reddik me rej bōktok Jetōb eo n̄an mour ko ad, dāpij kōj jān m̧oņ, im āliktata jipan̄ kōj bōk kajoor eo n̄an kōjparok kein ko im bōk mour indeeo. Rilo̧mo̧o̧r eo eaar katakin kōn pedped in katak in n̄an elder ro an Kabun̄ ilo Kirtland, Ohio: “Kōn menin, jab mōk ilo kōm̧m̧an em̧m̧an, bwe kom̧ij likūt pedped in juon jerbal eļap. Im jān men ko reddik ej jebarļo̧k men eo eļap.” (Katak im Bujen ko 64:33).
Etke men ko redik rej aorōk? Ilo eoon eo tok juon, Rilo̧mo̧o̧r eo ej kōmeļeļeik bwe “Irooj ej aikuj bōro eo im ļōmņak eo em̧ōņōņō” (Katak im Bujen ko 64:34). Etke Rilo̧mo̧o̧r eo eaar kobaik men ko redik ippān bōro im ļōmņak eo emōņōņō? Kōnke ilo ikutkut kōm̧m̧ani men ko redik, jej lelok būruwōd im ļōmņak n̄an Anij, eo ej karreoik im kōkwojarjar kōj (lale Helaman 3:35.
Karreo im kōkwojarjar in ej ukōt lukkuun piktokid, jidik kōn jidik, bwe en ļapļo̧k ad erom̧ āinwōt Rilo̧mo̧o̧r eo. Menin ej bar kōm̧m̧an bwe en peļļo̧k ļōmņak ko ad n̄an im̧we ko an Jetōb Kwojarjar, eo ej kōm̧m̧an bwe en pen m̧oņe kōj.
Iiō eo aō āliktata ilo high school, jema eaar katakin eō jemenere ilo m̧weo imōm. Kōnke un in katak eo an iiō eo ej Bok in Mormon, jema eaar kāālet bwe kōm naaj riit ippān doon, eoon illo̧k eoon, im kōmeļeļe kōn ta kom̧ kar katak. Ilo am riit, jema ekōn kajjitōk kajiitōk ko me rekar kōm̧m̧an bwe in ļōmņak kōn ta ko kōm kar riiti, im ej kōmeļeļeik eō men ko ijjab meļeļe. Ij keememej wōt ekkatak kōn Rilo̧mo̧o̧r eo im en̄jake ke Eaar lukkuun loļo̧k Rinipai ro im bwe maron̄ kar jeorļo̧k jerawiwi ko aō kōn Pinmuur eo An.
N̄aij kōkaļļeik pedped eo aō ilo jeje ko rekwojarjar n̄an iien kweilo̧k ko amro baba ippān doon. Iaar en̄jake juon men ke kōm̧ij riit. Im bōlen eo eaorōk tata, ikdeleel ko aō, ellowetak ko, im jerbal ko kar oktak. Ikōņaan erom em̧m̧anļo̧k. Iaar jino loe ia eo kar m̧oņe eō ie. Eaar ikutkutļo̧k aō ukweļo̧k. Ilo jem̧ļo̧kin iiō eo im̧aan tata in aō kaļōj, iaar riiti jeje ko rekwojarjar aolep raan.
Ilo iien in, Būreejtōn Ezra Taft Benson (1899-1994) kar kajjitōk ippān aolep mem̧bōr n̄an riit i Bok in Mormon eo aolep raan im mour kōn ta ko raar katak.3 Innām, ilo kakobaba n̄an jabdewōt ta eo iaar riiti, iaar riiti juon men jān Bok in Mormon eo.
Ilo mijen eo aō iaar katak lukkuun ewi wāwen ekkatak im kwojkwoj ioon jeje ko rekwojarjar. Iaar jab en̄jake wōt Jetōb Kwojarjar eo ilo aō riit, ak iaar bar jino en̄jake lan̄lōn̄ ilo aō etale jeje ko rekwojarjar im lo uwaak ko n̄an inepta ko aō im ko an rikkatak ro aō.
Ālkin mijen eo aō, iaar wōnm̧anļo̧k wōt im kwojkwoj ioon jeje ko rekwojarjar aolep raan. Kōnke imenine in ej karuwaineneik Jetōb Kwojarjar eo n̄an mour eo aō, iaar bōk tōl n̄an jipan̄ eō kōjerbal iien ko aō ilo wōr tokjān. Āinwōt juon tōprak, eaar em̧m̧an aō katak ilo jikuuļ im, tokālik, jikin jerbal. Eaar pidodoļo̧k n̄an kōm̧m̧an jokāālet ko rem̧m̧an. Eaar ļapļo̧k aō jar im kar niknik ilo kōm̧m̧ane jerbal ko aō. Kwojkwoj ioon jeje ko rekwojarjar aolep raan kar jab ņa mejļan aolep inepata ko aō, ak mour eaar pidodoļo̧k.
Ilo Okwōj in 2005 eo, Būreejtōn Gordon B. Hinckley (1910-2008) kar kōm̧m̧ane juon kaketak n̄an riiti ak bar riiti Bok in Mormon eo m̧okta jān jemļo̧kin iiō eo.4 Kōnke iaar baj wōt riiti Bok in Mormon eo aolep raan, iaar tōpar ilo Ether ak Moronai. Ilo jokkun wōt juon, ke kar kadedeļo̧ke juon wiik ak ruo tok ālik, iaar kam̧ōj ke em̧ōj aō kōm̧m̧ane kōketak eo an Būreejtōn Hinckley.
Bōtaab innām juon rūkaki in loļo̧k m̧ōko etiljek eaar lotok baam̧le eo am. Eaar kajjitōk ejiet aō kar kōm̧m̧ane kūr eo an Būreejtōn Hinckley.
Iaar ba n̄an e ke eaar juon men eo em̧m̧an n̄an kar jino Bok in Mormon eo m̧okta jān kōketak eo an Būreejtōn Hinckley. Innām, kōn make kawāņōk, iaar kwaļo̧k ke em̧ōj aō kadedeļo̧k jerbal eo.
Jeraam̧m̧an, rūkaki in loļo̧k m̧ōko eo aō eaar lo men ko roktak. Ilo an kōm̧anm̧an an kajjim̧we eō, Jetōb eo eaar unoojdikdik n̄an n̄a bwee rūkaki in loļo̧k m̧ōko eo aō eaar m̧ool.
Kiiō ij aikuj kar riiti ruo jepta kajjojo raan n̄an bar kōjem̧ļo̧ke m̧okta jān jem̧ļo̧kin iiō eo. Ilo aō kar kōļapļo̧k jon̄an aō riiti Bok in Mormon eo, iaar kile bwe eļapļo̧k kajoor eaar itok n̄an mour eo aō. Eaar ļapļo̧k aō lan̄lōn̄. Eaar alikarļo̧k wōt aō kalimjōk men ko. Eaar ikutkutļo̧k aō ukweļo̧k. Iaar kōņaan jerbal in karejar n̄an im lom̧ooren ro jet. Eaar dik aō maron̄ po ilo m̧oņ im kapo ko an Setan. Eaar ļapļo̧k aō iakwe Rilo̧mo̧o̧r.
Ilo Nobōm̧ba eo kar kūr eō bwe in juon bisop ilo ward eo am. Kam̧ōj kōketak eo an Būreejtōn Hinckley eaar kepooj eō n̄an kūr eo. Jān iien eo, Em̧ōj aō kile bwe eļak ļapļo̧k aō boub ilo jerbal ak ilo m̧ōn jar eo, eļapļo̧k aō aikuj ekkatak jeje ko rekwojarjar, eļap tata Bok in Mormon eo.
Komaron̄ bōk ejja kōjeraam̧m̧an in wōt im kajoor in ilo mour eo am̧ eļan̄n̄e kwonaaj kwojkwoj ioon jeje ko rekwojarjar aolep raan. N̄aij kallim̧ur ke eļan̄n̄e kwonaaj kwojkwoj ioon jeje ko rekwojarjar, eļap tata Bok in Mormon eo, kwonaaj karuwaineneiktok Jetōb eo n̄an mour eo am̧ im kwonaaj make jar aolep raan, ikutkutļo̧k am̧ ukweļo̧k, im lo an pidodo kobaļo̧k ilo jar im bōk kwojkwoj eo aolep wiik.
N̄aij kam̧ool bwe ilo am̧ kōm̧m̧ani men ko redik im lōke Irooj, kwonaaj lo iakwe, lan̄lōn̄, aenōm̧m̧an, im mōņōņō jekdoon ta jekjek eo am̧. Ij bar kam̧ool bwe menin kar kōm̧m̧an bwe en pidodo kōnke kōn en̄taan eo an Jisōs Kraist. Aolep men ko rem̧m̧an rej itok kōn E (lale Moronai 7:22, 24).