Juon Kūr n̄an Ricardo
Martin Apolo Cordova
Paraná, Brazil
Pija jān Katy Dockrill
N̄e ij ron̄ kōn juon m̧akūtkūt an Kabun̄ in, ij iien otemjej karuwaineneiktok 10 armej ro im rejjab uwaan Kabun̄ in n̄an kobatok. Iiō in aō kōm̧m̧ane menin. Ij kōm̧m̧an peba in kūr ko im ij likūt kajjojo ilo juon kilin peba mour im Jetōb bwe Jetōb en tōl eō. Innām n̄aij ajeji peba in kūr ko. Ejeja an aolep armej rein 10 kobatok, bōtaab jekdoon n̄e juon wōt ej kobatok, naij en̄jake bwe eļap tōprak eo aō.
Jet iiō remmootļo̧k, iaar kōpooj jon̄oul peba in kūr ko n̄an juon nokon in jota n̄an ripālele ro raar m̧are. Iaar ajije ruatimjoun n̄an armej ro ilo jikin jerbal eo ao im ekar pād wōt juon. Iaar jab jeļā wōn eo imaron̄ lelok n̄an e. Minit ko tokālik, Ricardo, juon bar rijerbal in wiakake, eaar eļļāļo̧k jān tebōļ eo aō. Iaar en̄jake im̧we n̄an karuwaineneik e, jekdo̧o̧n n̄e eaar kōwaan juon kūr jān bar juon iaan rijerbal ro n̄an kobaļo̧k ilo juon m̧akutkut an m̧ōn jar eo an. Iaar jab ļōmņak Ricardo en kar itok limo.
Ak ke Ricardo eaar eļļāļo̧k jān tebōļ eo aō bwe ilo an diwōjļo̧k, iaar bar en̄jake im̧we. Bōtaab eaar m̧ōkaj an diwōjļo̧k im ekar ejjeļo̧k aō iien konono ippān. Iaar jar bwe Ricardo en bar jepļaaktok eļan̄n̄e in kar aikuj in leļo̧k peba in kūr in n̄an e.
Ālkin aō jar, Ricardo eaar bar ro̧o̧ltok n̄an kajjitōk ippa juon kajjitōk. Ālikin wōt, Iaar ba, “Ricardo, kabun̄ en aō ej kōm̧m̧ane juon m̧akutkut n̄an ripālele ro raar m̧are. Kōmij tōn naaj kar kwaļo̧k en̄jake ko kōn wāween mour m̧ōņōņō aolep raan. Ālkin wōt, enaaj lōn̄ eeb. Eļan̄n̄e ij kūr tok eok, kwonaaj ke itok?”
“Aaet!” Ricardo eaar ba, bōtaab iaar jab lukkuun tōmak uwaak eo an.
“Ebwe bwe iaar kōm̧m̧ane ijo kuņaō,” iaar lōmņak.
Lio pāleō im n̄a kōmro ekar m̧ōkaj am̧ro tōkākļo̧k ilo m̧akūtkūt eo n̄an karuwaineneik armej ro ilo aer itaakļo̧k. Ejjab to, ikar lo Ricardo im lio pāleen, Regina. Iaar kwaļo̧k kajier n̄an lio pāleeō im ro jet raar kobatok. Ilo aolepān joteen eo, ekar āinwōt n̄e Ricardo im Regina relukkuun m̧ōņōņō. Iaar ilbōk ke raar ba renaaj kar itok n̄an jar ilo Jabōt eo n̄an katak eļapļo̧k.
Ricardo, Regina, im ajri ro ruo nejier raar katak eļapļo̧k. Āliktata, raar kobatok ilo Kabun̄ in. Tokālik, raar liāp ilo tampeļ. Ricardo eaar juon iien jiron̄ eō bwe e im lio pāleen raar ekōnono kōn jepel, innām bōtaab Irooj eaar tōltok Ricardo n̄an opiij eo aō.
Jān iien eo iaar kajjitōk ippān Anij n̄an jeorļo̧k aō bōd kōn aō kar ļōmņak bwe Ricardo eban kar uwaak e kūr eo aō. Iaar ekkatak bwe eaorōk n̄an karuwaineneik aolep. Kwoj jāmin naaj jeļā wōn eo enaaj eoron̄ eok.