Wāween eo Eļaptata ej kōn Iakwe an Anij

Jān Būreejtōn M. Russell Ballard

Ripenej Jenkwan Būreejtōn eo an Doulul eo an Jon̄oulruo Rijilōk ro

Jān kōnono eo an Eprōļ 1988 kweilo̧k eo eļap.

Anij ej kwaļo̧k An iakwe n̄an kōj ilo an letok tōl eo jej aikuji n̄an eddōkļo̧k im tōpar kōjatdikdik eo ad. E eo ejeļā elōn̄ wōt iaad, kōjatdikdik eo ad, im tōllo̧ke ko ad indeeo kar letok n̄an kōj kapilōk eo ekwojarjar im kien ko ilo bok in kōmelele ko An—jeje ko rekwojarjar. N̄e jej melele im ļoor naan in kōmeļeļe kein, mour ko ad ewōr aer jibadbad im wor meļeļe in. Jej katak bwe ad Rikōm̧anm̧an ej iakwe kōj im ikdeleel kōn m̧ōņōņō eo ad. Ilo kwaļo̧ktok epen keidi kōn iakwe kwojarjar in n̄an kōj, Eaar jilkintok Nejin Jitōnbōro Emake wōt, Jisōs Kraist.

“Bwe kōn an Anij yokwe laļ, Ear letok juon wōt Nejin Ear keotak, bwe jabdewōt eo ej lōke E en jab jako, a en mour indeeo.

“Bwe Anij eaar jab jilkintok Nejin n̄an laļ bwe en ekajet laļ; a bwe laļ en mour kōn e.” (Jon 3:16–17).

Jisōs ekar ļotak tok n̄an mour wabanban. Eaar mour kōn juon mour ewānōk, ilo an kar kōm̧m̧ane, kar kōkaļļeik ial eo n̄an ad ļoore. Jisōs Kraist eaar katakin rikaļoor ro An, “N̄a, meram in laļ; eo ej ļoor Eō e jāmin etal ilo marok, a enaaj an meram in mour.” (John 8:12).

Jemaron̄ jino meļeļe tum̧ūlaļ in iakwe eo an Kraist n̄an kōj n̄e jej ļōmņak bwe Eaar mōņōņō in pinmuur im en̄taan kōn metak eo kōn jerawiwi ko ad, “En̄taan eo eaar kōm̧m̧an bwe [E], em̧ool Anij, eo eutiejtata jān aolep, n̄an wūdiddid kōn metak, im n̄an bōtōktōk ilo aolepān Ānbwinnū, im n̄an en̄taan jim̧or ilo ānbwin im jetōb” (Katak im Bujen Ko 19:18).

Ijtō in, jen leļo̧k kam̧m̧oolol n̄an Anij kōn Pinmuur im Jerkakpeje eo an Nejin Jitōnbōro, Jisōs Kraist. Kōn E, jān E, im ilo E, jekjek eo ekar kitien an mour wabanban in emaron̄ in kōm̧m̧an bwe en indeeo, mour eo ewānōk, ilo naan ko rejjab maron̄ kwaļo̧k ad lan̄lōn̄.

Aolep menin bwilōn̄ ko an kōm̧anm̧an ko rej kwaļo̧k jidik kōn kajoor eo An ekwojarjar im an kwaļo̧k An iakwe. Ak menin bwilōn̄ eo eļap tata an aolep menin bwilōn̄ ko ej kōttar kōj. Enaaj waļo̧k n̄e, kōn kajoor eo An, jenaaj waļo̧ktok jān mej im lōb eo n̄an juon laļ kāāl me ejjamin naaj jako, ijo, eļan̄n̄e jej erreo, jenaaj pād Ippān im Jemedwōj ilo Lan̄ n̄an indeeo im indeeo.