Im̧ōko Im̧ōd, Baam̧le ko Ad
Ļaddik eo Nejim Ej Nejin Jemedwōj Ilan̄
Rijeje eo ej jokwe ilo Arizona, USA.
Naan ko me rejjab aō raar deļo̧n̄e kōļmenļo̧kjen eo aō: “Kwoj ke ļōmņak kwoj iakwe e eļapļo̧k jān N̄a?”
Pija in rijeje eo im ļaddik eo nejin
Ļaddik jidikdik eo nejim em̧m̧an, Hayden, eaar ļāwōdetok laļ in ilo an kōļar būļu, jab menono, im epen an mour. Ejjeļo̧k jan̄. Ejjeļo̧k m̧akūtkūt.
Ke takto ro im nurse ro rej kaiūm̧tok ilowaan ruum̧ eo ilo aujpitōļ eo, iaar jeļā ke ewōr men eo. Ļeo pāleō im jem̧a raar m̧ōkaj im leļo̧k juon kōjeraam̧m̧an an priesthood, im kar m̧ōkaj in bōkļo̧k Hayden n̄an intensive care eo. Ejjab to kar kwaļo̧k bwe ewōr juon an jorrāān in menono eo ejeja. Ilo jet wōt raan ko kar kōm̧m̧ane jet m̧wijm̧wij in menono ko.
Kōn kajoor eo ekabwilōn̄lōn̄ an kōjeraam̧m̧an ko an priesthood eo, jitlo̧k, im jar ko, Hayden eaar anjo̧ ioon aolep men ko jab kōtmene im kar mour. Kōm kar lukkuun m̧ōņōņō n̄an bōktok ļaddik in nejim n̄an m̧weo m̧ōm̧ im jino mour eo am ekāāl ippān doon.
Hayden eaar bōktok eļap lan̄lōn̄ ilo mour ko am. Kōm kar kaorōke im iakwe. Bōtaab ke iien eaar eļļāļo̧k, iaar jino inepata bwe eaar jab eddōkļo̧k āinwōt kar kōtmene. Mekarta ke ro retijem̧ļok raar kam̧ool n̄an kōm ke ilo jem̧ļo̧kin enaaj em̧m̧anļo̧k, inepata eļap eaar wōnm̧anļo̧k wōt ilo an lukkuun pen aō jipan̄ ļaddik eo nejū.
Ļeo pāleō im n̄a kōm̧ro kar ekkatak n̄an katak aolepān men kōm kar maron̄ kōn nan̄inmej eo an Hayden. Kōm kar kōm̧m̧ane aolep men taktō ro rekar ba kōmin kōm̧m̧ani. Bōtaab ekar ejjeļok eddōkļo̧k.
Iaar jino m̧ōk im kūtōtō. Iaar akweļap ippān Jema Ilan̄ n̄an jipan̄ eō kappukōt juon eo emaron̄ jipan̄ Hayden, bōtaab jipan̄ eaar jab itok. Jekjek eo an Hayden eaar nanaļo̧k. Eaar jino dibūbbūb. Kōm kar mijak. Kōm kar ļōmņak bwe kōm naaj kar luuji.
Juon bon̄, eto aō emmej bwe ij kappok uwaak ko. Iaar je juon leta n̄an Hayden. Iaar ba n̄an e ewi jon̄an ao iakwe e im ewi jon̄an an ļap aō kajjieon̄ kōm̧m̧an bwe en pidodoļo̧k mour eo an. Iaar kallim̧ur inaaj kar joļo̧k aolepān mour eo aō kajjieon̄ kappukōt jipan̄ eo eaar aikuji.
Kūtōtō im jab jeļā ilo jidik iien kar kaobrak eō. Iaar būkwelōlō im kajjitōk ippān Jema Ilan̄, “Etke?” Iaar ļōmņak eaar jilkintok Hayden n̄an n̄a kōnke Ejeļā iban kar ebweer n̄an kajjieon̄ jipan̄ ļaddik eo nejū. Kōn menin etke iaar jab maron̄ lo jabdewōt uwaak ko? Etke kajjojo taktō ro rekāāl im kajjojo kōm̧adm̧ōd ko rekāāļ kar bōkļo̧k n̄an bar juon kabbōjrak? Jemedwōj Ilan̄ eaar jab iakwe Hayden ke?
Ijjamin naaj meļokļok iien jab eo. Juon en̄jake etōr jān jon̄an an iakwe em̧ōkaj an kar kalbubuik eō. Naan ko me rekar jab aō raar deļo̧n̄e kōļmenļo̧kjeņ eo aō: “Jerlyn, kwoj ļo̧mņak kwoj iakwe e eļapļo̧k jān N̄a ke?”
Iaar kā. Iien eaar bōjrak. Dānin kemjaaļaļ eaar jiōbļo̧k ilo meja—ejjab kōn kūtōtō āinwōt m̧okta, ak kōn kōjatdikdik, meļeļe, im iakwe.
Ilo iien jab eo, aolep men raar oktak. Būruwō eaar meraļo̧k. Kajjitōk ko aō raar oktak. Iaar meļeļe kiiō bwe Jema ilo Ilan̄ ej iakwe Hayden kōn iakwe eo eweppān. Kar jilkintok Hayden n̄an laļ in ilo juon ānbwin eaar ejejjōt nan aikuj ko an im iien em̧m̧an ko an n̄an eddōkļo̧k im ekkatak. Ewōr an make maron̄ ko reoktak, im kapan̄pan̄, ejja āinwōt kōj kajjojo. Iaar itok n̄an jeļā bwe ajri ro ewōr utam̧we ko ilo ānbwin raorōk im ajri jitōn bōro ro nejin Jemedwōj Ilan̄ me ewōr juon an mijen āinjuon ilo laļ in.
Ļeo pāleeō im n̄a kar jab m̧ūjkōk am̧ro bōk uwaak ko im kōjeraam̧m̧an ko, bōtaab rej itok ilo iien eo an Irooj, ejjab iien eo am make. Kar tōlļo̧k kōm n̄an bok ko rejim̧we, ritherapy ro, jikuuļ ko, im rūkaki ro n̄an jipan̄ Hayden ļe ilo mour in an ioon laļ in. Kōmij kajjeon̄ n̄an pukōt iaļ eo me Jemedwoj Ilan̄ eaar likut ilo jikin n̄an Hayden ijello̧kin iaļ eo kōm kar kōņaan bwe en etal ie ļo̧k. Kōmij kōm̧m̧ane aolep men kōm maron̄ n̄an jipan̄ Hayden tōpar maron̄ eo an ekwojarjar im mour kōn mour eo Jemen Ilan̄ eaar karōke n̄an e. Meļeļe eo a kōn karōk eo an Jemedwōj Ilan̄ em̧ōj an alikkarļo̧k kiiō me kōmij meļeļe bwe Hayden eaar Nejin m̧okta jān an kar nejim.