Rūm̧m̧an Ded ro
Kōm̧m̧ani Jokālet ko: Anemkwoj in Kāālet ņae Revelesōn
Rijeje eo ej jokwe ilo Utah, USA.
N̄e ej itok n̄an jokālet ko reļļap, ewi jon̄an ad aikuj pedped ioon Anij n̄an jiron̄ koj ta n̄an kōm̧m̧ane?
Kōmeļeļe ko jān David Green
Aolep raan kajjojo iaad jej jelm̧ae elōn̄ jokālet ko. Jet emakijkij wōt kōm̧m̧ani, āinwōt, “Ta eo ij aikuj kōņake?” “Ta kōraelep eo ij aikuj kan̄e?” “Ej ke iien wiaik juon wa kāāl, ak imaron̄ ke dāpij wōt wa eo waaō em̧or bar jidik?” Bōtaab ekanooj wōt emakijkij ad itok n̄an juon jokālet eļap—“Ij ke aikuj bar ro̧o̧l n̄an jikuuļ?” “Ij ke aikuj bōk jerbal in?” “Ij ke aikuj em̧m̧akūtļo̧k n̄an juon jikin kweilo̧k ekāāl?” “Ij ke aikuj wiaik juon em̧?” “Ij ke aikuj jerāik armej in?” “Ij ke aikuj m̧areik armej in?” im ko jet eierļo̧k.
N̄e jelm̧ae kōn jokālet ko reļļap, āinwōt ekkā ad—ilo jejjet—bōk jidik iien aitokļo̧k n̄an kōm̧m̧ane juon kālet. Jej ļoor naan kōkapilōklōk eo kar leļo̧k n̄an Oliver Cowdery ilo Katak im Bujen ko 9:8-9, ijo Irooj ej ba:
“Ak, lo, Ij ba n̄an eok, bwe kwōj aikuj ekkatak kake ilo ļōmņak eo am; innām kwōj aikuj kajjitōk Ippa eļan̄n̄e e jim̧we, im eļan̄n̄e e jim̧we Inaaj kōm̧m̧an bwe en māāņāņ būruōm̧ iloam̧; kōn menin, kwo naaj en̄jake bwe e jim̧we.
“Ak eļan̄n̄e ej jab jim̧we eban wōr am ejaake rot kein, ak enaaj wōr pok ilo am ļōmņak eo enaaj kōm̧m̧an bwe kwōn meļo̧kļo̧k men eo ebōd.”
Men̄e menin ej juon kapilōk em̧m̧an, n̄e ej itok n̄an jokāālet ko reļļap, jet iien eļap wōt ad kōjatdikdik ilo m̧ōttan eo ijo Anij ej jiron̄ kōj ta eo ejim̧we im ejjab bwe ilo m̧ōttan eo ijo Ej jiron̄ kōj n̄an ekkatak kake ilo ļōmņak ko ad. Ekanooj ļapļo̧k ad inepata kōttar an Anij kapene jokālet ko ad jon̄an jej kōtļo̧k bwe iien ko rem̧m̧an ren eļļāļo̧k jen kōj. Em̧ool jemaron̄ kile jerbal eo an anemkwoj in kālet eo, bōtaab jej mijak in kōm̧m̧ane juon jokālet me emaron̄ bōkļo̧k kōj jān “karōk” eo kar kōm̧m̧an m̧oktaļo̧k im ļōmņak bwe aolep men ijello̧kin an māāņāņ būruōm̧ ilowam̧ ak juon ainikien jān lan̄ ej meļeļe in bwe jokālet eo ad ebōd. N̄an elōn̄ iaad, mijak in jab kōnono kake ikōtaan anemkwoj in kālet im revelesōn an juon make ej tōl n̄an juon kajjitōk eaorōk: Ta jerbal eo an Anij ilo jipan̄ kōj kōm̧m̧ani jokāālet ko?
Jerbal eo an Anij ilo Kōm̧m̧an-Jokālet eo Ad
Bolen kajjitōk in ejejjōt uwaake kōn bwebwenato eo an jein im jatin Jared. Ewōr juon jon̄ak ekalimomo kōn eddokļo̧k eo ilo bwebwenato in me ej katakin kōj kōn wāween an Anij kōtmene kōj n̄an kōm̧m̧ani jokāālet ko. Ālkin kar kajepleklek kajin ko ilo Tower in Babel, Jared ej kajjitōk ippān eo jein jatin n̄an kajjitōk ippān Irooj eļan̄n̄e ren aikuj etal jān āneo, im eļan̄n̄e aaet, ia eo rej aikuj etal n̄an e (lale Ether 1:36-43). Eo jein jatin an Jared eaar kajjitōk, im Irooj eaar tōlļo̧k er n̄an iturin lo̧jet. Ilo aer kar em̧m̧akūt, Irooj ej kōnono n̄an er ilo juon kedo̧ im kōjebwebweik aolepān iaļ eo aer. Āliktata raar tōpar turin lo̧jet, ijo raar pād ie ium̧win emān iiō ko.
Ilo jem̧ļo̧kin iiō ko emān Anij ej jiron̄ eo jein jatin Jared n̄an jōk wa baaj ko im m̧aanjappopo n̄an kijoon lom̧aļo̧ eo. Ke eo jein jatin Jared ej kile bwe wa ko eaar ejjeļo̧k mejatoto ie, eaar ļoor jon̄ak eo jeļā kake kōn etal n̄an Anij n̄an kajjitōk ta eo ej aikuj kōm̧m̧ane. Āinwōt kar kōtmene, Irooj ej uwaak kōn lelok n̄an e dipdik in naan in kōmeļeļe ko n̄an kōm̧m̧ani ro̧n̄ ko ilo lōn̄ im lal in wa eo. Kile ke jon̄ak eo an revelesōn: Anij ej lelok juon karōk n̄an er, rej kajjitōk kajjitōk ko kōn ewi wāween kakūrm̧ool karōk eo, Anij ej uwaak kōn uwaak ko remelij im āliktata.
Bōtaab ālkin an kōm̧m̧ani ro̧n̄ ko ilo wa ko, eo jein jatin Jared ej kile bwe wa ko enaaj ejjeļo̧k meram ie. Eaar bar kajjitōk ippān Anij ta eo ej aikuj kōm̧m̧ane. Ijello̧kin an uwaak, ijo wōt ke, Anij ej kajjitōk “Ta kwo kōņaan bwe in kōm̧m̧an bwe en wōr ami meram ilo wa ko?” (Ether 2:23). Ijello̧kin an leļo̧k tipdik in naan in kōm̧eļeļe ko āinwōt An kar m̧okta, iien in Irooj ej kōttar an eo jein jatin Jared jokāālet ta eo en kōm̧m̧ane.
Kain uwaak rōt in jān Irooj ej bōlen men eo epen tata n̄an meļeļe n̄e kajjieon̄ kōm̧m̧an juon jokāālet. Kar katakin kōj n̄an jar im kōttar juon uwaak, kōn menin ekkā ad inepata n̄e ejjeļo̧k uwaak jej ron̄. Emakijkij ad ļōmņak eļan̄n̄e an jab alikkar juon uwaak ejejjet āinwōt juon “pok ilo am̧ ļōmņak” ej kwaļo̧k kāālet eo ad ebōd. Jet iien jej ļōm̧ņak jejjap armej jim̧we n̄an ron̄ uwaak eo ak eļan̄n̄e jejjap kajjitōk kōn “lukkuun kōttōpar” (lale Moronai 10:4). Bōtaab ewōr ļōmņak kein kajilu me jet iien jejjab ļōmņake—bōlen, āinwōt kar eo jein jatin Jared, Anij ej kōttar kōj n̄an kōm̧m̧ane jokāālet eo ad make.
Kōm̧m̧ane juon Jokālet
Ejjab to iaar ioon juon jekjek me eaar pen ilo wāween aō ļōmņak kōn anemkwoj in kāālet eo im revelesōn eo an juon make. Ke eaar epaakeļo̧k jem̧ļo̧kin graduate school eo aō, Eaar wōr jejjo jerbal ko kar litok n̄an eō ilo jikin ko reoktak im kar jab maron̄ kāālet ewi wōt iaer n̄an bōk. Āinwōt eo jein jatin Jared, Em̧ōj aō kar en̄jake elōn̄ iien ko me iaar jar kōn juon jokāālet eļap im Anij eaar uwaak kōn juon uwaak eo epen. Pedped ioon en̄jake ko im̧aanļo̧k, iaar jino jar im kajjitōk bwe Anij en jipan̄ eō kāālet ewi wōt jerbal eo ij aikuj bōke. Iaar bar kōm̧m̧ane ijo kuņaō kōn ekkatak kōn kajojjo jerbal ko im bōk naan in kapilōk ko jān elōn̄ armej. Bōtaab jekdo̧o̧n ewi jon̄an aō kar jar ak jitlo̧k, lan̄ ko raar ikōn̄, im iaar bōk ejjeļo̧k uwaak.
Iien eo n̄an kōm̧m̧an jokāālet eo eaar epaaktok, im iaar jino ikūm̧kūm̧. Em̧ool menin eaar kain jokāālet rōt eo Irooj ej aikuj kea kake, innām etke Eaar jab uwaak? Bōlen Ejjab kea kōn ewi wōt jerbal eo iaar kāālete, bōtaab Ej aikuj kea kōn ewi jikin eo iaar em̧m̧ūtļo̧k n̄ane ilo an ejjeļo̧k kajjitōk enaaj wōr tokjen ilo mour eo aō. Irooj eaar iien otemjej kea kōn jokāālet ko aō m̧okta, innām etke Ejjab jab kea kōn bar menin?
Ak jekdo̧o̧n ewi jon̄an aō kar kajjieon̄, ejjeļo̧k uwaak eaar itok. Iaar jino ļōmņak eļan̄n̄e iaar jab mour ilo wāween eo Anij ekōņaan bwe ij aikuj in kar mour kake ekōm̧m̧an bwe in jab maron̄ ron̄ uwaak eo An. Iaar barāinwōt ļōm̧ņak eļan̄n̄e iaar jab maron̄ ron̄ kōnke ijaje aō jab kōņaan ron̄ uwaak eo. Āliktata, raan eo m̧okta jān iien eo em̧ōj letok, ijeļā ke iaar aikuj kōm̧m̧ane juon kāālet, kōn menin iaar kojerbal ekajet eo aō im kar kōm̧m̧an juon jokāālet. Bon̄ōn eo iaar jar, kajjitōk eļan̄n̄e Enaaj jiron̄ eō eļan̄n̄e uwaak eo eaar bōd. Ekab de ejjeļo̧k uwaak eaar itok, kōn menin iaar etal wōt im bōk jerbal eo.
Jet allōn̄ tokālik, iļakkar baj kajjitōk kōn wōt jokāālet eo aō, kōn menin iaar kajjitōk kōn juon kōjeraam̧m̧an an priesthood eo n̄an bōk kam̧ool eo. Ilo kōjeraam̧m̧an eo kar jiron̄ tok eō ke iaar jab bōk uwaak n̄an jar eo aō kōnke Irooj eaar m̧ōņōņō kōn jabdewōt jokāālet ko iaar kōm̧m̧ani. Kōjeraam̧m̧an in eaar kapen kapilōk eo kar letok n̄an eō im̧aanļo̧kjān mijen būreejtōn eo aō, eo eaar jiron̄ eō bwe ekkā an jab aorōk jokāālet ta eo jej kalote. Anij ekōņaan bwe jen ekkatak kilen jutak ioon need make im jokāālet ekōjkan ad mour kon mour ko ad. Mijen būreejtōn eo aō eaar bar kakeememej eō bwe Anij, āinwōt Jemedwōj Ilan̄, eban iuun kōj im bōk iien ko rem̧m̧an kar kallim̧ur kaki eļan̄n̄e jej lukkuun m̧ool ilo ad kajjieon̄ pukōt ta eo n̄an kōm̧m̧ane.
Eo jein jatin Jared emaron̄ in kar kwaļo̧k enan̄in jabdewōt wāween n̄an kōmeram baaj eo, im emaron̄ kar em̧m̧an ppān Irooj. Katak eo an en̄jake eo ekar jab wōt n̄an kōkajoorļo̧k tōmak eo an eo jein jatin Jared ak bar n̄an ekkatak kilen kōm̧m̧ane juon jokāālet.
Kojerbal Anemkwoj in Kāālet
Jān juon kōļmenļo̧kjeņ an indeeo, kojerbal anemkwoj in kālet eo ej juon m̧ōttan eo eaorōk n̄an eddōkļo̧k an juon make. Ilo an jako, jejjab maron̄ kōm̧m̧an kain jokāālet ko me renaaj jipan̄ kōj tōpar aolepān kōjatdikdik eo ad. Eddōkļo̧k, āinwōt aolep men ilo gospel eo, ej itok “lain im bar lain, naan in kain̄i im bar naan in kain̄i” (2 Nipai 28:30). Anij ekōņaan bwe jen erom̧ armej ro repojak, jap armej ro rej kor in m̧akūtkūt, im Ej kōtmene kōj n̄an kōjerbal anemkwoj in kāālet eo ad n̄an mour kōn mour ko ad jon̄an eo em̧m̧antata jemaron̄e.
N̄e jenaaj ekkatak n̄an pukōt jokkun wōt juon eo ikōtaan anemkwoj in kāālet im revelesōn, jemaron̄ en̄jake m̧ool in eddokļo̧k eo ilo jetob. En̄in ej ta eo eaar waļo̧k n̄an eo jein jatin Jared, Ālkin ļōmņak kake, eaar jerbal n̄an ļōme 16 deka ko jān juon ejm̧aan im kajjitōk bwe Anij en un̄ur er im kōm̧m̧an bwe ren ebbōl (lale Ether 3:1-5). Ilo iien in, ke Anij eaar uwaak, aolep men raar oktak. Ijello̧kin an ron̄ ainikien Anij ilo juon kedo, eo jein jatin Jared eaar lukkuun loe Irooj, eo eaar jab waļo̧k wōt ilo nememein armej ak barāinwōt kwaļo̧k n̄an eo jein jatin Jared visiōn ko rekabwilōn̄lōn̄ kōn laļ in im aolep men ko me renaaj itok (lale Ether 3:6-26). Emaron̄ in kar pidodo bwe eo jein jatin Jared enaaj kar jab pojak ilo jetōb n̄an bōk visōn eo eļan̄n̄e eaar jab m̧okta en̄jake eddōkļo̧k eo an make me eaar itok jān kōm̧m̧ane jokāālet ko an make.
Ilo ad kōm̧m̧ani jokāālet ko, jej aikuj lukkuun ļoor naan in rōjan̄ eo an Alma n̄an “pepe ippān Irooj ilo aolep kōm̧m̧an ko [ad]” (Alma 37:37). N̄e Irooj ej aikuji kōj n̄an kōm̧m̧ane juon jokāālet eien juon, Enaaj kōm̧m̧an bwe jen jeļā im jipan̄ bōbrae kōj jen ad jōbwābwe. Bōtaab jej aikuj bar pojak n̄an bar jutak im wōnm̧aanļo̧k ilo tōmak, mekarta n̄e ewōr ak ejjelok uwaak ej itok. Toon wōt ad kōjparok bujen ko ad im m̧ool wōt n̄an gospel eo an Jisōs Kraist., jemaron̄ en̄jake lōke eo ilo jokāālet ko ad an kabun̄ me Irooj ej m̧ōņōņō kōn kijejeto ko ad.