Em̧ool Jekdo̧o̧n juon Ļan̄ Eban Kabōjrak Kōm
Koraima Santiago de Jesus
San Juan, Puerto Rico
Pija jān Suzanne Simmons
Jidik iien ālkin aō kar ro̧o̧l jān mijen eo aō, iaar bōk juon kūr n̄an etal n̄an juon iien tuuj. Ilo iien tuuj eo, iaar jaje ia eo iaar likūt taļboon eo aō ie im juon likao ekar jipan̄ eō kappukōte. Ke kōmro kōnono, kōmro kar kile ke kōmro jim̧or kar mijenede im ko̧mro kar kwaļo̧k elōn̄ ļōmņak ko im kōttōbar ko.
Jemjerā eo am eaar wonm̧aanļo̧k im eddokļo̧k, im kōm kar pojak n̄an m̧are. Ekar ettōņak eo am n̄an kar liāp ilo Washington D.C. Tampeļ eo m̧okta jān an kar kilōk n̄an bar kōkāāle ilo M̧aaj 2018. Bōtaab ālkin kōm̧m̧ane jokāālet jab in, kar mālijjon̄e kōm. M̧oktata, eaar jako jerbal eo aō im ejjeļo̧k wāween n̄an kakoņkoņ jāān n̄an em̧m̧akūt eo am n̄an tampeļ. Eo tok juon, juon lan̄ ekar ilo iaļ eo an n̄an eotōkļo̧k ilo Puerto Rico m̧okta jān raan in m̧are eo am.
Ke Ļan̄ eo Maria ekar bun̄, eaar lukkuun kakkure aelōn̄ eo am eaibojooj. M̧ōn wia ko raar kilōk. Ekar ejjeļo̧k jarom; dān, m̧ōn̄ā, im ekar pen elolo aikuj dikdik ko jet. Ekar jako aolep men ko kōm̧ro kar pepe kaki n̄an kojerbali ilo iien kōjota in kōm̧are eo. Ko̧m kar aikuj joļo̧k iien kōjota in kōm̧are eo, im eaar āinwōt alikkar kōmij aikuj in barāinwōt kabōjrak iien m̧are eo. Ito itak ilowaan im ilikin Puerto Rico eaar wōr jon̄an, im ejjeļo̧k juon eaar jeļā ewi aitokan. Iaar jino en̄jake ebweer, im iaar obrak kōn pere im pok.
Juon bon̄, lio jera im n̄a kar kōnono kōn jekjek eo am. Keļo̧k eaar jab alikkar, im ekar ejjeļo̧k am kōjota in m̧are ak nuknuk in m̧are, bōtaab Jetōb eo eaar kapen bwe kōmij aikuj in kar lōke Irooj. Men eo eaorōk tata eaar n̄an liāp ilo tam̧peļ eo. Kōm kar jar n̄an Jemedwōj Ilan̄ kōn jipan̄.
Ke baļuun ko raar bar jino kelo̧k jān Puerto Rico, kōm kar aikuj in bar kōm̧m̧ani karōk ko rekāāl kōn keļo̧k im bar jikejuuļi iien liāp eo am. Ekar ejjeļo̧k wāween am kar letok letak meļeļe ium̧win wiik ko ālkin ļan̄ eo, bōtaab cell phone eo an eo m̧ōttam eaar jerbal. Eaar kotļo̧k bwe am kojerbale n̄an kūrļo̧k tampeļ eo. Kōm kar maron̄ bar karōk aolep men ko bwe kōmin maron̄ wōt liāp ippān doon. Jet wiik ko m̧okta jān em̧m̧akut eo am̧, ro uwaan baam̧le eo im ro m̧ōttam kar letok juuj im nuknuk im jipan̄ kōm bok elōn̄ men ko n̄an m̧are eo am.
Kōm kar deļo̧n̄e tampeļ eo, kōm kar lukut aolep inepata ko am itulikim. Kōm kar jibwe pein doon n̄an deļo̧n̄e juon ilju im jeklaj eo am ippān doon. Em̧ool imaron̄ in ba iaar en̄jake pein Irooj ilo an tōl im kaenōm̧m̧an kōm ilo am kar lōke E, aolep men renaaj kar em̧m̧an. Rainin, kōm jeraam̧m̧an kōn juon nejim ļaddik eaiboojoj im kōmij juon baam̧le kar liāp n̄an aolep indeeo.