Lōke Lo̧mo̧o̧ren eo an Rilo̧mo̧o̧r

Jān Būreejtōn Henry B. Eyring

Rikapilōklōk eo Kein Karuo ilo Būreejtōnji eo Kein Kajuon

Jān juon kōnono ilo juon nokon, “Kajoor in Lo̧mo̧o̧ren eo” kar kōm̧m̧ane ilo Brigham Young University ilo Janwōde 15, 2008 eo.

Pimuur im Jerkakpeje eo an Rilo̧mo̧o̧r eo kar leļo̧k n̄an E kajoor eo n̄an kōkajoorļo̧k kōj ilo mālijjon̄ ko ad ak lomo̧o̧ren kōj jāni.

image of the Savior with arms outstretched

N̄an ro iaad em̧ōj an ro rejitōnbōro jako, iaļ eo im̧aan emaron̄ in kabūruom̧ōjm̧ōj im ajimakeke—em̧ool eļapļo̧k n̄an ro ejjeļo̧k aer jeļā im naan in kam̧ool an Pinmuur eo im Jerkakpeje eo an Rilo̧mo̧o̧r Jisōs Kraist. Kwoj keememej ke ruo iaan Rikaļoor ro An repere ilo iaļ eo ļo̧k n̄an Emmaus. Irooj jerkkakpeje eaar kepaakļo̧k er im kajjitōk etke rej būrom̧ōj. Luk ej letok uwaak eo n̄an kōj:

“Im re ba n̄an E, Kōn Jisōs ri Nazeret e, eo Ri Kanaan e kajoor ilo jerbal im naan im̧aan Mejān Anij im armej otemjej:

“Im kōjkan pris ro reḷap im irooj ro am raar ketak E bwe ren liaakḷọk E ñan mej, im raar debwāāl E.

“A kōm ar katmāne bwe E eo Enaaj lọmọọren ri Israel” (Luk 24:19-21).

Jej bōk kaenōm̧m̧an jān jeļā im naan in kam̧ool eo a bwe eaar E eo eaar lo̧mo̧o̧ren Israel. Eaar E eo eaar “[rupi]” to ko an mej” (Mosaia 15:23). Eaar E eo eaar erom̧ “leen eo ṃoktata iaan ro rej kiki” (1 Korint 15:20). Eaar E eo eaar kōm̧m̧an bwe en pidodo an bujen ko an tampeļ bwe ren liāpe kōj indeeo n̄an ro jej “iakwe er jān eto, im eto aer mej!”¹

Ilo tōre in iien Ijtō in, ikōņan kwaļo̧k jidik m̧ōttan ennaan eo jān nokon eo iaar kwaļo̧k jejjo iiō remootļo̧k kōn kajoor in lo̧mo̧o̧ren eo an Rilo̧mo̧o̧r. Eaar kōkajoorļo̧k eō ilo aō kar kōpooje im kwaļo̧ke. Ij jar bwe enaaj kōkajoorļo̧k eok ilo am̧ riiti.

Mour em̧ōkaj an jem̧ļo̧k n̄an jet im ālik tata n̄an aolepād wōj. Kajjojo iaad enaaj mālijjon̄e jān jelm̧ae mej eo an ro rejitōnboro ippād.

Raan eo ļo̧k juon iaar ioon juon em̧m̧aan ijjan̄in kar loe jān iien eo ke lio pāleen eaar mej. Ekar juon iien ejide bwe in ioone im bwebwenato ippān ilo juon iien iiaio im aļete. Eaar ettōn̄ dikdik ke ekar jibadōktok eō. Keememej mej eo an lio pāleen, iaar iak kanooj in kōkōm̧anm̧an aō iakweik: “Ejet am̧ pād?”

Ettōn̄ dikdik eo eaar jako, mejān eaar jino tutu, im eaar unoojdikdiktok, kōn ellowetak eļap, “Em̧m̧an aō pād. Bōtaab eļap an pen.”

Eļap an lukkkuun in pen, āinwōt an elōn̄ iaami jeļā im aolepād wōj naaj jeļā juon iien. M̧ōttan eo epen tata kōn māllijon̄ in ej n̄an jeļā ta eo n̄an kōm̧m̧ane kōn būrom̧ōj eo, ajimakeke eo, im mej eo me jemaron̄ en̄jake āinwōt elan̄n̄e juon m̧ōttan ānbwinid em̧ōj an jako. Būrom̧ōj emaron̄ eddāp āinwōt juon metak eo ekutkut an waļo̧k. Im n̄an jet, emaron̄ in lōn̄ en̄jake ko an illu im kalijōkļo̧k.

Rilo̧mo̧o̧r eo Ejeļā Būrom̧ōj ko Ad

Pinmuur im Jerkakpeje eo an Rilo̧mo̧o̧r eo eleļo̧k kajoor n̄an E bwe en lo̧mo̧o̧ren kōj jān māllijon̄ rōt in. Jān en̄jake eo An, Eaar itok im jeļā kōn aolep būrom̧ōj ko ad. Emaron̄ kar jeļā kaki jān im̧we eo an Jetōb, bōtaap Eaar kāālet n̄an jeļā jān en̄jaki kōn E make. Bwebwenato eo in:

“Im lo, Enaaj ļotak jān Meri, ilo Jerusalem eo ej āneen ro jemād, enaaj juon virgin, juon jāpe e aorōk im kar kāālete, eo naaj kalur e im etta jān kajoor in Jetōb Kwōjarjar, im keotak juon ļaddik, aaet, em̧ool Nejin Anij.

“Im Jisōs enaaj wōnmaanļo̧k, en̄taan kōn metak ko im kaen̄tanaan ko im kapo ko otemjeļo̧k; im bwe naan eo en maron̄ kūrm̧ool eo kar ba e enaaj bōk ioon metak ko im nan̄inmij ko an armej ro an.

‟Im Enaaj bōk ioon mej, bwe E en maron̄ kōtļo̧k tok to rej lukwōj armej ro An; im Enaaj bōk Ioon m̧ōjņo̧ ko aer, bwe buruōn ren maron̄ obrak kōn tiriam̧o, ekkar n̄an kanniōk, bwe En maron̄ jeļā ekkar n̄an kanniōk ekōjkan jipan̄ armej ro An ekkar n̄an m̧ōjņo̧ ko aer.” (Alma 7:10–12).

Armej ro rem̧m̧an ibeļaakūm̧ renaaj kajjieon̄ n̄an m̧eļeļe kōn būrom̧ōj eo am̧ ilo jako eo an juon eo ejitōnbōro. Remaron̄ en̄jake būrom̧ōj kōn ippāer make. Rilo̧mo̧o̧r eo ejjab m̧eļeļe wōt im en̄jake būrom̧ōj eo am̧ ak barāinwōt ej en̄jake būrom̧ōj ko am̧ make me kwe wōt kwoj en̄jaki. Im eweppān An jeļā kwe. Ejeļā kōn būruōm̧.

Karuwaineneik Jetōb Kwojarjar eo

Rilo̧mo̧o̧r eo emaron̄ jeļā ewi iaan men lōn̄lōn̄ ko komaron̄ kōm̧m̧ane me enaaj jejjet tata n̄an eok ilo am̧ karuwaineneik Jetōb Kwojarjar eo n̄an kaenōm̧m̧an im̧ kōjeraam̧m̧an eok. Ejeļā ia eo em̧m̧an tata n̄an am̧ ijjino. Jet iien enaaj kōn jar. Jet iien enaaj kōn etal im kaenōm̧m̧an bar juon. Ijeļā kōn juon kōrā emej pāleen eo ewōr an nan̄inmej in kōm̧ōjņo̧ļo̧k eo eaar im̧we n̄an loļo̧k bar juon kōrā eo emej pāleen. Ikar jab pād ijo, ak ij lukkuun jeļā bwe Irooj eaar im̧we juon rikaļoor etiljek n̄an pukōtļo̧k bar juon im kōn menin ekar maron̄ jipan̄ erro jim̧ōr.

Elōn̄ wāween ko Rilo̧mo̧o̧r eo emaron̄ jipan̄ ro rej būrom̧ōj, kajjojo iaaer rekkar n̄an er. Bōtaab komaron̄ jeļā bwe Emaron̄ im enaaj kōm̧m̧ane ilo wāween eo me ekkar tata n̄an ro rej būrom̧ōj im ro ibeļakier. Juon men emakijkij n̄e Anij ej lo̧mo̧o̧ren armej jān būrom̧ōj ej bwe rej en̄jake ettā boro āinwōt ajri ro Im̧aan Mājen. Juon waanjon̄ak em̧m̧an kōn kajoor in tiljek ettā bōro eo ej itōk jān mour eo an Job (lale Job 1:20–22). Bar juon men emakijkij, eo Job ekar barāinwōt pād ippān, ej eddāp in tōmak eo an ilo kajoor in Jerkakpeje eo an Rilo̧mo̧o̧r (lale Job 19:26).

Jenaaj aolep jerkakpeje, ekoba ro rejitōnboro ippam̧ me remej. Bar ippān doon eo ad ippāer ejjamin naaj wōt elaudin̄din̄ bōtaab ippān ānbwin ko me ejjamin naaj bar mej ak rūttoļo̧k ak erom m̧ōjņo̧ ilo kajjiōk.

Ke Rilo̧mo̧o̧r eo eaar waļo̧kļo̧k n̄an Rijjilo̧k ro An ālkin Jerkakpeje eo, Ekar jab kaenōm̧m̧an wōt er ilo aer būrom̧ōj ak barāinwōt aolepādwōj ro raar būrom̧ōj. Eaar kaenōm̧m̧an er im kōj ilo wāween in:

“Aenōm̧m̧an en pād ippemi. …

“Lo peiū im neiū, bwe en̄in ej N̄a: jibwe iō, im lale; bwe juōn jetōb ejjeļo̧k kanniekin im diin, einwōt ami lale iō ewōr” (Luk 24:36-39).

Irooj emaron̄ im̧we kōj n̄an pukōtļo̧k kōn kajoor in lo̧mo̧o̧ren eo jān būrom̧ōj eo ad ilo wāween eo ekkar tata n̄an kōj. Jemaron̄ kāālet n̄an jerbal n̄an ro jet n̄an Irooj. Jemaron̄ kam̧ool kōn Rilo̧mo̧o̧r eo, kōn gospel eo An, kōn jepļaaktok eo an Kabun̄ eo An, im kōn Jerkakpeje eo An. Jemaron̄ kōjparok kien ko An.

Aolep kāālet kein rej karuwaineneik Jetōb Kwojarjar eo. Ej Jetōb Kwojarjar eo emaron̄ kaenōm̧m̧an kōj ilo wāween ko rekkar n̄an kōj. Im jān im̧we eo an Jetōb, emaron̄ wōr ippād juon naan in kam̧ool kōn Jerkakpeje eo im juon kōļmenļo̧kjeņ ealikar kōn bar ippān doon eo eaibooj epād im̧aan. Iaar en̄jake kaenōm̧m̧an eo ke iaar reilaļļo̧k n̄an jebwe in lōb eo an juon eo iaar jeļā kajien—juon eo ijeļā bwe imaron̄ ilo juon iien ilju jekļaj jibwe ilo peiū. Jeļa kōn menin, iaar jab bōk kaenōm̧m̧an eo jān būrom̧ōj ak barāinwōt obrak kōn iakwe eo kōtmene kake.

Eļan̄n̄e armej in edik en kar mour n̄an iien eo ekeke mo̧o̧j, en kar aikuj lo̧mo̧o̧ren eo ilo bar juon kain māllijon̄ ko. Liin enaaj kar māllijon̄e n̄an tiljek wōt n̄an Anij ilo apan̄ ko an kanniōk im jetōb me rej itok n̄an aolep. Mekarta ānbwin eo ej juon kōm̧anm̧an eo eaiboojoj, kojerbale wōt ej juon men epen me mājlijon̄e kōj aolep. Aolep rej aikuj en̄taan jān nan̄inmej im men ko rej waļo̧k jān rūttoļo̧k.

“Kwon Ettā”

Kajoor in lo̧mo̧o̧ren eo jān māllijon̄ ko ad em̧ōj an bōk jikin. Ej jerbal ilo ejja wāween eo wōt an lo̧mo̧o̧ren eo jān māllijon̄ eo mej ej itōk ilo jelm̧ae mej an ro rejitōnbōro. Āinwōt an lo̧mo̧o̧ren jab in ejjab aolep iien men bwe mour an eo ejitōnbōro en mour wōt, lo̧mo̧o̧ren eo jān māllijon̄ ko jet emaron̄ jab kōm̧akūtļo̧k er. Irooj emaron̄ jab letok aenōm̧m̧an eo m̧ae iien jej kōļapļo̧k tōmak n̄an kōm̧m̧ane kāālet ko renaaj bōktok kajoor eo an Pinmuur eo n̄an jerbal ilo mour ko ad. Ejjab aikuji bwe jān jab itok limo eo bōtaab jān iakwe eo n̄an kōj.

Juon unin tōl n̄an bōk kajoor in lo̧mo̧o̧ren eo an Irooj jān jum̧ae ilo mour kar leļo̧k n̄an Thomas B. Marsh, ekar Būreejtōn eo an Doulul eo an Rijilōk ro Jon̄oulruo. Eaar pād ilo māllijon̄ ko reppen, im Irooj Eaar jeļā enaaj kar jelm̧ae elōn̄ļo̧k. En̄iin ekar kapilōk eo n̄an e me ij bōk n̄an n̄a make im ij lewaj n̄an eok: “Kwōn kōttāik eok; im Irooj am Anij enaaj tōl eok kōn peim, im lewōj n̄an eok uwaak n̄an jar ko am” (Katak im Bujen ko 112:10).

Irooj iien otemjej ej kōņaan tōl kōj n̄an lo̧mo̧o̧ren kōn ad eromļo̧k jim̧we. Menin ej aikuji ukweļo̧k. Im bwe ebōk ettā boro. Kōn menin ial eo n̄an lo̧mo̧o̧ren ej iien otemjej aikuji ettā n̄an an Irooj maron̄ tōl kōj kōn pein ia eo Ekōnan bōkļo̧k kōj ilo jorrāān ko ad im etal wōt n̄an ekwojarjar eo.

Māllijon̄ ko remaron̄ kōm̧m̧an illu ak ebweer. Ettā bōro eo me kwe im n̄a ej aikuji n̄an an Irooj tōl kōj kōn pein ej itok jān tōmak. Ej itok jān tōmak bwe Anij ej lukkuun mour, bwe Ej iakwe kōj, im bwe ta eo E ej kōņaan—epen āinwōt maron̄ in—naaj iien otemjej em̧m̧an tata n̄an kōj.

Rilo̧mo̧o̧r eo eaar kwaļo̧k n̄an kōj ettā boro. Em̧ōj am̧ riiti ekōjkan An kar jar ilo Jikin Kallib Gethsemane ke Eaar en̄taan kōn juon mālljon̄ ilo etad eļapļo̧k jān maron̄ eo ad n̄an keidi ak n̄an bōke, ak em̧ool n̄an n̄a n̄an kōmeļeļ in. Kwoj keememej jar eo An: “Jema, eļan̄n̄e kwōn kōņaan, Kwōn bōkļo̧k kab in jān eō: a enjab ankil aō ankilaam̧ wōt.” (Luk 22:42).

Eaar jeļā im lōke Jemen Ilan̄, Elohim eļap. Eaar jeļā bwe Jemen eaar kajoor-pōtata im jouj n̄an indeeo. Nejin Jitōnbōro ekar kajjitōk ilo naan ko rettā— āinwōt ajri ro redik—bwe kajoor in lo̧mo̧o̧ren eo n̄an jipan̄ E.

Bōk Peran im Kaenōm̧m̧an

Eo Jemen eaar jab lo̧mo̧o̧ren Nejin jān joļo̧k māllijon̄ eo. N̄an jeraam̧m̧an ko ad Eaar jab kōm̧m̧ane, bōtaab Eaar kōtļo̧k an Rilo̧mo̧o̧r eo kadedeļo̧k mijen eo an Eaar itok n̄an kōm̧m̧ane. Aeet jemaron̄ indeeo bōk peran eo im kaenōm̧m̧an eo jān ad jeļā kōn jipan̄ eo Jemen eaar letok:

“Im juon enjeḷ ej weaaktok ñan E jān lañ, im kakajoor E.

“Im ilo An en̄taan Ej kaļapļo̧k An jar: im An menokadu āinwōt eļap pilin̄lin̄ in bōtōktōk e wōtlo̧k ioon bwidej.

“Im ke Ej jerkak jān jar im itok ñan ro rū kaḷoran, Ej lo aer kiki kōn būroṃōj,

“Im E ba ñan er, Etke koṃij kiki? Koṃwin jerkak im jar bwe koṃwin jab deḷọñ ilo kapo” (Luk 22:43–46).

Rilo̧mo̧o̧r eaar jar kōn lo̧mo̧o̧r. Ta eo Eaar letok eaar jab juon deoor jān māllijon̄ ko bōtaab kaenōm̧m̧an eo ebwe n̄an eļļā jāne ilo aiboojoj.

Kean̄ eo An n̄an rikaļo̧o̧r ro An, ro er make raar māllijon̄, ej juon unin tōl n̄an kōj. Jemaron̄ jokāālet n̄an ļoor e. Jemaron̄ jokāālet n̄an jerkak im jar ilo tōmak eļap im ettā. Im jemaron̄ ļoor kain̄ eo kar kobaik ilo bok in Mark: “Koṃwin jerkak, jen etal” (Mark 14:42).

Jān menin, em̧ōj kapilōk eok n̄an eļļā jān māllijon̄ ko an mour in kanniōk im jetōb an mour. Kwonaaj aikuji jipan̄ eo an Anij ālkin am̧ kōm̧m̧ane aolep men ko komaron̄e kōn kwe make. Kōn menin jerkak im etal, bōtaab bōk jipan̄ eo An ilo iien eo em̧ōkaj tata, jab kōttar an ļapļo̧k jorrāān eo innām kwoj kab kajjitōk kōn lo̧mo̧o̧ren.

Ij kwaļo̧k n̄an kom̧ aō kam̧ool ekwojarjar bwe Anij Jemen ej mour im ej iakwe eok. Ijeļā men jab in. Karōk in m̧ōņōņō eo An eweppān, im ej juon karōk in mōņōņō. Jisōs Kraist ekar jerkakpeje, āinwōt ad enaaj barāinwōt. Eaar en̄taan bwe E en maron̄ jipan̄ kōj ilo aolep māllijon̄ ko ad. Eaar kōļļa wōņāān jerawiwi ko ad im ro aolep ajri ro nejin Jemedwōj Ilan̄ bwe jān maron̄ bōk lo̧mo̧o̧r jān mej im jerawiwi.

Ijeļa bwe ilo Kabun̄ eo an Jisōs Kraist, Jetōb Kwojarjar eo emaron̄ itok n̄an kaenōm̧m̧an im n̄an karreoik kōj ilo ad ļoor M̧aajta eo. Kōm̧m̧an bwe kwon bōk kaenōm̧m̧an eo An im jipan̄ eo ilo iien am̧ aikuj, ilo aolep idajon̄jon̄ ko im māllijon̄ ko an mour eo am̧.