Pija ko KŌN Tōmak
Bob im Lori Thurston
Rekar jerbal ilo Cambodia Phnom Penh Mijen eo
“Ke kōm̧ro kar jeļā ke em̧ōj kūr kōm̧ro n̄an jerbal ilo Cambodia Phnom Penh Mission, kōm̧ro kar jan̄. Kōm̧ro kar m̧ōņōņō!” Brother Thurston ej ba. “Kōm̧ro ban karkāālet Cambodia, ak ej juon mennin letok! Juon kōjeraam̧m̧an!” Sister Thurston ej ba.
Thurston ro rej en̄jake juon ekkejel ainjuon n̄an armej in Cambodia ro. “Kōmij iakwe er, im kōm kar en̄jake an iakwe in jepļaaktok”. Sister Thurston ej ba. “Armej ro ilo Cambodia rekar kwaļo̧k n̄an kōm jouj eļap.”
Jān aolep eddo ko an Thurston ro ilo mijen eo aer, rej kaorōk tata iien em̧m̧an ko n̄an loļo̧k membōr ro ilo m̧oko m̧weer.
Sister Thurston ej keememejļo̧k an kalimjōk ro ekar jipan̄ er ilo Cambodia im ļōmņak, “Ikijoroor in lo eok ilo mour eo tokālik, ilo iien eo inaaj lukkuun maron̄ ba n̄an eok aolep men ko n̄aij en̄jake kōn eok im iakwe in aō n̄an kwe.”
Ilo mijen eo aerro jino in tata ippān doon, Bob im Lori Thurston rekar katak bwe jerbal in karejar eo eļap meļeļe in emaron̄ bōk jikin jekdo̧o̧n apan̄ ko an kajin im m̧anit ilo aer oktak kōnke kōj aolep jej ajri ro Nejin Anij.
Leslie Nilsson, Ripija
Bob:
M̧okta jān am̧ro Lori kar m̧are, jekar kōnnaan kōn jerbal in mijinede n̄e em̧ōj am̧ro jerbal. Kōm̧ro jim̧or kar jerbal in mijenede m̧okta o̧k. Lori ekar jerbal ilo Kobe, Japan, im n̄a iaar jerbal ilo Brisbane, Australia. Ke kōm̧ro kar pojak in kakkije jān jerbal, kōm̧ro kar kōnnaanik ajri ro nejūm̧ro ke kōm̧ro kōņaan jerbale elōn̄ mijen ko.
Kōm̧ro kar jeraam̧m̧an n̄an maron̄ kakkije jān jerbal ke kōm̧ro kar dik wōt. Ke kōm̧ro kar ron̄ ke mijenede ro rerūtto rejjab maron̄ jerbal ilo jet iaan jikin ko āinwōt laļ ejjab ļap menin jeraam̧m̧an ie kōnke kōn jekjek ko kōn ājmour im bar jet n̄ūrbōktak ko, kōm̧ro kar ļōmņak, “Ejan̄in de 60 ad iiō. Jej ājmour, kōnke menin kōjerbal kōm̧ro!”
Ikar kakkije jān jerbal ruo raan ālkin 56 raan in keemem eo aō. Kōm̧ro kar bōk kūr in mijen eo am ilo iien eo ke n̄aij jerbal wōt. Ke kōm̧ro kar kapeļļo̧k kūr eo am̧ro im jeļā ke em̧ōj kūr kōm̧ro n̄an jerbal ilo Cambodia Phnom Penh Mijen eo, kōm̧ro kar jan̄. Kōm̧ro kar laudin̄din̄!
Lori:
Cambodia ekar jab pād ilo ļōmņak eo am. Ikar ļōmņak kōm̧ro naaj kar etal n̄an Africa ak bar jet jikin. Kōm̧ro kar jino kajjitikin kōm̧ro make, “EM̧M̧AN, ta kaitoktok limo ko im̧aan n̄an kōjro?” Kōmij jāmin kar kālet Cambodia, ak ej juon mennin letok! Juon kōjeraam̧m̧an! Irooj emālōtlōtļo̧k jān kōj. Ekar jilkinļo̧k kōm̧ro n̄an ijo eļap kar aikuji kōm̧ro ie.
Kōm̧ro kar jerbale juon humanitarian mijen. Kōm̧ro kar jerbal ilo būroojāāk ko n̄an LDS Charities, kōm̧m̧ane riboot ko, im bar kajjitōk kōn jet būroojāāk ko rekāāl. Kōm̧ro kar bar etali j būroojāāk ko jem̧aan āinwōt aibōj laļ ko me raar deili ruo iiōk ko m̧oktaļo̧k. Kōm̧ro kar bar jerbal ilo wāween ko jet.
Kōm̧ro kar kobaļo̧k ilo kweilo̧k ko an stake im district n̄an jipan̄ katakin ritōl ro im mijenede ro, kōm̧ro kar etali jikin jokwe ko an mijenede ro im loļo̧k membōr ro ilo m̧ōko im̧weer. Kōm̧ro kar kōm̧m̧ani men dikdik ko n̄an jipan̄ mijen eo bwe en em̧m̧anļo̧k.
Aolep raan raar oktak jān doon ilo mijen eo am. Jet raan kōm̧ro kar pād ilo jikin ko remarmar, dān ak pedkat raar tōpar ilo bukiem. Raan ko jet kōm kar pād ilo mijen opiij eo. Ippān mijenede ro an Public Affairs, kōm kar loļo̧k Ministry eo an Cults im Religion. Ilo Cambodia, naan eo “cult” ejjab juon naan eo enana. Kabun̄ eo aer ej Buddhism—aolep men ko jet ļōmņak kaki juno cult. Kōm kar loļo̧k Ministry eo n̄an jipan̄ kwaļo̧k bwe Kabun̄ eo an Jisōs Kraist im Armej ro Rekwojarjar ilo Raan-ko Āliktata ej juon doulul em̧m̧an im maron̄ lōke.
Kōm kar ejaake juon jem̧jerā eo em̧m̧an ippāer, im eaar m̧ōkaj kūr n̄an jipan̄. Raar ko̧o̧ltok im ba, “Ewōr juon ibwijleplep, im kōmij aikuj m̧ōn̄ā n̄an 200 baam̧le ko ejjeļo̧k jikier. Rekar jeļā bwe remaron̄ kar kōjatdikdik ioon Kabun̄ in n̄an bōkļo̧k men ko n̄an ijo rej aikuj tata im jipan̄ kōn men ko ejjeļo̧k ippāer.
Ta eo kōm kar en̄jaki ilo Cambodia? Jabdewōt men komaron̄ ļōmņak kake, bolen kōm kar en̄jake! Em̧ōj am jijet ilo būļoor ko rejeram̧ōl tata—ekkā aer bwidej ak kooba—ilo im̧ōko rejerata tata. Em̧ōj am bar pād ilo m̧ōko reļļap im aiboojoj m̧ōn rijerbal ro an government. Aaet Bob ekar jerbal ilo būreejtōnji eo an branch ilo jidik iien.
Bob:
Mijen būreejtōn eo ekar ko̧o̧ļe eō im ba, “Iah, ikōņaan bwe kwon rikakpilōklōk eo kein karuo ilo juon branch.” Juon jimettan iiō tokālik, ikar pād ilowaan ruum̧ in liāp eo ilo Hong Kong China Tampeļ eo ippān branch būreejtōn eo ikar jerbal ippān. Ejkab tōn kar juon kōttan an delo̧n̄ tampeļ! E im baam̧le eo an rekar kakoņkoņ jāān im kajjieon̄ jiljilimjuon alen n̄an etal n̄an tampeļ, bōtaab ekar wōr juon jorrāān, ak juon iaer ekar nan̄inmej. Aolep iien juon men ej walōn̄tak. Ālkin jiljilimjuon iiō ko, rekar maron̄ in kakoņ 40 wōt taļa.
Jilu kattōn ilo mijen eo am, kōm kar maron̄ jipan̄ Armej Ro Rekwojarjar ilo Cambodia etal n̄an tam̧peļ. Kōm kar bōk elōn̄ branch būreejtōn ro me rekar kōm̧m̧ani intōrpiu ko n̄an peba in mālim an tampeļ ak rejjan̄in kar deļo̧n̄e tampeļ er make. Ilo Cambodia, mijenede ripālele ro rōrūtto rekōn jipan̄ baam̧le kein ilo aer kelo̧k n̄an tampeļ. Rej aikuji juon bwe en etal ippāerļo̧k kōnke rejjab jeļā kilen kelo̧k ilo baluun. Elōn̄ rejjan̄in kar iuwe ilo baj! Im kiiō rej aikuj kelo̧k n̄an Hong Kong im kōm̧m̧ane im ilo̧k ilo iaļ eo aer n̄an tampeļ. Ekar pen n̄an aer make kōm̧m̧ane menin ippāer make. Kōmij kam̧m̧oolol kōn Temple Patron Assistance Fund eo me ekar jipan̄ bōk eddoier.
Lori:
Erom juon membōr in Kabun̄ in ilo Cambodia emaron̄ juon men epen. Āinwōt juon laļ, ejjeļo̧k juon ļōmņak in Jabōt ilo Cambodia. Aolep ro rej itōk n̄an jar raar kōm̧m̧ani kaarmejet ko n̄an pād ie.
Barāinwōt, Cambodia ej jiljino bōjjāān Muslim im ruo wōt bōjjāān Rikūrijin—im aolep rej Buddhists. Oktak jān wāween mour in Buddhist n̄an Rikūrjin elukkuun in pen. Jet armej rej luuji wōt jerbal ko aer, im elōn̄ wōt kōttōn rej kowaan er jān ro jet ilo bukwōn eo aer.
Juon m̧ōttan jon̄oul ej bar juon men eļap. M̧an̄ ro an Buddhist renaaj itok aolep jibbon̄ im kajjitōk raij im jidik jāān, im armej ro reminene kōn menin. Bōtaab n̄an bōk kōļļa eo am̧ im bōk jidikin n̄an juon m̧ōttan jon̄oul ej juon men eļap.
Elōn̄ raar wōt kaen̄taanan ko retōr jān jon̄an ilo mour ko aer. Kōnke kar Khmer Rouge, juon ritōl in communist me ekar kakiene Cambodia ilo jem̧ļo̧k in ’70s ko, aolep ro ilōn̄ļo̧k 40 iiō elōn̄ aer bwebwenato kamijak. Ikar jab ioon jabdewōt iaan ro raar ļanootot jāne. Aolep ekar lōn̄ uwaan baam̧le ko aer me kar m̧an er. Mekarta elōn̄ men rekar iooni, ikar jab tōmak kōn wāween aer kijin̄en̄e, ewi jon̄an aer m̧ōņōņō in kar kajjieon̄. Bōtaap itulikin kijin̄en̄e eo aer, elōn̄ rej pere wōt er make. Elōn̄ rej tōmak ke rejjab aorōk ak wōr tokjāer ilo jabdewōt men.
Ekar kabwilōn̄lōn̄ n̄an loe ewi jon̄an an gospel eo an Jisōs Kraist jipan̄ er ebbōl. Ke rekar jeļā bwe raar jab em̧m̧an wōt ak raar barāinwōt juon ajri nejin Anij, rekar ba, “Kwoj kōjak? Kiiō elōn̄ men ko imaron̄ jipan̄ ie.”
Kabun̄ in enaaj lukkuun ebōl ilo Cambodia. Armej ro relukkuun em̧m̧an kar tōltok er n̄an Kabun̄ in. Armej ro Rekwojarjar ilo ijōņ rej bainier ro, im ro rej lukkuun kaorōk gospel eo rej jeraam̧m̧an ilo elōn̄ wāween ko kōnke rejeļā kōn Rilo̧mo̧o̧r eo. Ekanooj in kabwilōn̄lōn̄.
Elōn̄ membōr ro ad im ward ko rekajoor ilo turin juon jikin ņaetan “Trash Mountain,” ej juon jikin jokpej ijo me elōn̄ armej ro rej jokwe ie. Membōr ro ijōņ rej rikōm̧kōm̧ ro im rribbōk ro. Rej kōm̧m̧an aer jāān jān ricycle būļaajtik im aluminum me rej būki jān jikin ejjoļo̧k kopej eo. Rej jokwe ilo m̧ōko reddik ewaidikdik me em̧ōj am pād ie elōn̄ kattōn.
Bob:
Juon raan kōm̧ro kar ron̄ ainikien kōjan̄jan̄ eļļaaj, im kōm̧ro kar lo juon em̧ nuknuk kar kajutake. Ilo Cambodia, meļeļe in menin emaron̄ lōn̄ eņ ej m̧are n̄e ejjab juon em̧ōj an mej.
Lori:
Kōm̧ro kar jeļā tokālik ke juon kōrā eo ļalem ak jilijno nejin ajri ej kab mej. Ļeo pāleen ekar jab pād. Ajri ro rej kab rūj im kile bwe eo jinier em̧ōj an mej.
Juon nejin leddik eaar kanooj ļap an jan̄. Jān juon rukook, leddik eo ekar ba, “N̄a rūtto tata. Epād ippā aolep rein jatū. Ijjab jeļā ta eo inaaj kōm̧m̧ane.”
Ikar kanooj atbakwōje. Ta eo bwe in jab? Leddik in ejkab mej jinen. Ikar kōnono n̄an e ilo kajin pālle im ba, “Ijeļa ke kwojjab maron̄ meļeļe ta kein ij ba, ak N̄aij kallim̧uri eok bwe kwonaaj bar loe jinōm̧. Enaaj em̧m̧an. Kobban makeļo̧k iaam̧.”
Ekanooj lōn̄ en̄jake ko āinwōt in raar letok n̄an kōm juon ekkejel eo ainjuon ippān armej in Cambodia ro.
Kōm kar en̄jake ejja iakwe wōt jen er. Armej ro ilo Cambodia rekar kwaļo̧k n̄an kōm jouj eļap. Kōmij iakwe er kōnke rej ajri ro nejin Anij. Rej jeim im jatim.
Ippān jet armij, N̄aij keememejļo̧k aō kar ļōmņak, “Ikijoroor in lo eok ilo mour eo tokālik, ilo iien en inaaj maron̄ in jiron̄ eok aolep men ko n̄aij en̄jake n̄an kwe im iakwe eo aō n̄an kwe, im ta ij nebar eok kake, kōnke ijjab maron̄ ba kiiō.”
Mijen eo am eaar kōjeraam̧m̧an kōm ilo elōn̄ wāween ko. Jet armej rej ba, “Ijjab jeļā eļan̄n̄e imaron̄ jerbale juon mijen. Ijjab maron̄ etal jān ajri ro jibū.” Ekar wōr ļalem jibūm̧ro ļaddik ro ke kōm̧ro kar em̧m̧akūt iiō dettaer rej ļalem, emen, jilu, ruo, juon. Ruo jibūm̧ro leddik ro rekar ļotak ke kōm̧ro kar jako. Inaaj kōjparok Cambodian mijenede tāāk ko im liļo̧k n̄an leddik nin̄nin̄ ro jibū bwe renaaj jeļā bwe Būbū eaar jab pād kōnke Būbū eaar kōm̧m̧ane ta eo Irooj eaar aikuji bwe en kōm̧m̧ane.
Bob:
Elōn̄ wāween ko n̄an jerbal n̄an Irooj āinwōt mijenede ro. Kōmij lukkuun tōmak ta eo Elder Jeffrey R. Holland ekar ba kōn jerbal in mijenede an ro rerūtto. Eaar ba, “N̄aij kallim̧ur bwe kwonaaj kōm̧m̧ani men ko n̄an [baam̧le eo am̧] ilo jerbal in jipan̄ eo an Irooj me, laļ ko ejjeļo̧k jem̧ļo̧kier, koban kar kōm̧m̧an eļan̄n̄e kwon kar pād wōt m̧weo im̧ōm̧ ippāer. Ta mennin leļo̧k eo eļapļo̧k ro jibum̧ im jimaam̧ remaron̄ leļo̧k n̄an ro ineer ijjeļo̧kin ad ba ilo kōm̧m̧an im ilo naan, “Ilo baam̧le in jej jerbale mijen ko!’ [“We Are All Enlisted,” Liaona, Nov. 2011, 46.]”