Digital Wōt
Kāālet eo: N̄an Erom̧ juon Ripija ak juon M̧am̧a Em̧m̧an?
Aolep rekar jiron̄ eō bwe eaar pen n̄an erom̧ juon eo em̧m̧an ilo men kein jim̧or. Bōtaab eaar ke?
Ij keememej an jab em̧m̧an aō en̄jake ilo aō kar katak ilo kaļōj kōn mour ko an ripija ro rem̧m̧an. Eaar āinwōt em̧ool ripija ro keememeji im rebun̄bun̄ raar erom̧ ripija ro reļļap jān kowaane baam̧le eo aer im kaarmejete wāween aer kōļmenļo̧kjeņ. Ripija ro rebun̄bun̄ raar pija ilo jibbon̄ in Kūrijm̧ōj ilo an ajri ro nejier kōpeļļo̧k menin leļo̧k ko aer. Juon eaar m̧are jiljino alen. Bar juon eaar m̧wijitiļo̧k lo̧jilin̄in im kar jilkinļo̧k n̄an ro eaar iakwe er. Im bar juon em̧ool eaar m̧an juon armej! Iaar jino ļōmņak eļan̄n̄e erom̧ juon ripija ebun̄bun̄ ilo aō barāinwōt erom̧ juon lio pālele em̧m̧an im m̧am̧a (aolep ilo aō dāpij wāween aō kōļmenļo̧kjeņ) eaar em̧ool maron̄.
Rūkaki in kaļōj ro aō raar katakin bwe eļan̄n̄e kōmij lukkuun kar kōņaan erom̧ bun̄bun̄, kōmij aikuj in kar kōm̧m̧ani kaarmejete ko n̄an e. Kōmij aikuj in kar buuļ jerbal eļapļo̧k jān bar jabdewōt. Kōmij aikuj in kar likūt pija m̧okta ilo mour ko am. Ekkā aō kijon̄ kajjitōk ippa make, “Bōtaab eļan̄n̄e juon ripija eaar kōjparok kien ko, likūt m̧okta men ko raorōk, im kōm̧m̧an bwe Jetōb eo an Irooj en tōl jerbal eo aer, renaaj kar maron̄ erom̧ bun̄bun̄ im bōlen em̧ool bun̄bun̄ļo̧k wōt?” Emakijkij aō kōn kar kajjitōk ippa make kajjitōk in ilo aolepān iien ekkatak ko aō.
Ilo iien eo ļeo pāleeō im n̄a kōmro kar jim̧or kadiwōjļo̧k, kōm kar m̧are ium̧win juon iiō. Elder Russell M. Nelson (ilo iien eo, eaar juon uwaan Doulul eo an Jon̄oulruo Rijilōk ro) eaar itok n̄an kōnono ilo kadiwōjļo̧k eo am. Juon kōraelep eaar kōm̧m̧an ālkin, im kar 16 wōt rijikuuļ ro raar kūr er n̄an pād. Ebwe an kōjak, kar kāālet jim̧or ļeo pāleeō im n̄a n̄an pād ijo. Ke iien ekōnono eo eaar peļļo̧k n̄an kajjitōk im uwaak ko. Iaar kajutak peiū, iaar kalimjōk mejān Elder Nelson, im kar kwaļo̧k n̄ūrbōktak ko aō kōn erom̧ jim̧or juon ripija im juon m̧am̧a. Ikar kanooj buuļ jerbal n̄an kalōk tōļan ko aō ilo jikuuļ, im ikōņaan wōnm̧aanļo̧k wōt n̄an buuļ jerbal im eddōkļo̧k, bōtaab iaar barāinwōt jeļā bwe eddo eo an m̧am̧a eaar ļapļo̧k an aorōk. Ewōr ke juon wāween n̄an kōm̧m̧ani jim̧or? Elder Nelson eaar kwaļo̧k an itok limo, “Ejjeļo̧k kajjitōk!” Eaar kōketak eō n̄an eddōkļo̧k ilo tōļan ko aō im n̄an jar n̄an Jemedwōj Ilan̄ kōn jipan̄ ilo jeļā ekōjkan aō maron̄ kōm̧m̧ani jim̧or im bwe kōn E, inaaj maron̄ in kōm̧m̧ane men ko ikōn juon iien kar ļōmņak reppen. Ilo m̧ool iaar bōk kapilōk eo.
Kar kallim̧ur n̄an Jibadbad ko An
Ļeo pāleeō im n̄a kiiō ewōr emān ajri ro nejim. Kōm kar ekkatak ewi wāween am kōm̧m̧ani jerbal ko rellōn̄ an m̧am̧a im baba. Ilo jino in, iaar ijjino enan̄in aolep raan ilo 4:00 jibbon̄ n̄an kōm̧m̧ane jet jin̄a ko m̧okta jān an ajri ro nejū ruj. Iaar kajjieon̄ jin̄a jiljino raan juon wiik, jekdo̧o̧n eļan̄n̄e ilo jet raan ko kar 30 wōt minit ko. Iaar ijjino kajjojo m̧wen̄an jin̄a ko kōn jar, jeļā bwe ejjeļo̧k tokja ilo an ejjeļo̧k jipan̄ an Irooj. Iaar jar ejjab wōt n̄an maron̄ ilo pija ko aō ak barāinwōt n̄an jeļā ta eo eaar aorōk tata ilo raan jab eo im kar kallim̧ur n̄an likūt m̧oktata jibadbad ko An. Wōnm̧aanļo̧k eo eaar jab m̧ōkaj, bōtaab eaar jab m̧ujkōk.
Kōm̧ōkaj m̧aantak n̄an 12 iiō ko jān raan in kadiwōjļo̧k eo aō. Eaar wōr juon aō iien eaar kabweerer. Mour eaar āinwōt etōr jān jon̄an. Eddo an m̧am̧a eaar ļapļo̧k an apan̄ jān aō kar anto̧o̧ne. Iaar jijet im jan̄ ilo kein kajutak pija ko aō, ļōmņak eļan̄n̄e inaaj kar lukkuun maron̄ erom̧ ripija eo ebun̄bun̄ iaar lukkuun in kōņaan erom̧. Iaar en̄jake im̧we n̄an kanōk nam̧ōjtak jōōnōļ eo aō em̧or jān jikin bok eo, im kar ālōkļo̧k n̄an iien eo iaar jeje ilo Eprōļ 30, 2006 eo, raan eo ālkin kadiwōjļo̧k eo aō. Iaar lukkuun in meļo̧kļo̧ke en̄jake eo aō ekabwilōn̄lōn̄ ippān Būreejtōn Nelson! Ilo jet wāween poub ko an mour renan̄in kar kōm̧m̧an bwe in meļo̧kļo̧k iien jab eo. Im̧aaō eaar naan ko jān rikanaan eo ad rainin, “Ejjeļo̧k kajjitōk!” Dān in kōmjaaļaļ ko raar oktak n̄an ko an kam̧m̧oolol ilo aō reilikļo̧k n̄an aolep men ko iaar maron̄ kōttōbraki jān kar iien jab eo, im iaar barāinwōt reim̧aanļo̧k kōn kōjatdikdik.
Kōm̧m̧ane Men eo Epen
Jet allōn̄ ko tokālik, iaar bōk juon kūr jān juon iaan Ensign māākjiin designer ro, kajjitōk eļan̄n̄e remaron̄ kar kōjerbal juon iaan pija ko aō n̄ai iutlowaan kōbar eo an māākjiin eo an Nobōm̧ba 2018 kweilo̧k eo eļap. Eaar ļo̧kjenaō! Rūttoļo̧k, men eo im̧aan tata ikōn aolep iien kōm̧m̧ane n̄e ij bōk māākjiin ko an Kabun̄ in kar lale aolep pija ko. Ejjeļo̧k juon iaan jerbal ko aō rekōn pād ie! Innām, ke kar jiron̄ eō bwe raar kōņaan kobaik pija eo aō ippān naan ko jān Būreejtōn Nelson, imaron̄ kar lo pein Anij an kōketak eō n̄an wōnm̧aanļo̧k.
Ej aitok wōt iaļ in n̄an n̄a n̄an ilo̧k ilo iaļ in pija in aō, bōtaab eļap aō kam̧m̧oolol kōn kōjatdikdik eo an Būreejtōn Nelson ilo Irooj im ilo kōj. Ij kam̧m̧oolol kōn kōjatdikdik eo an im lōke eo an. Ijeļā bwe ilo ad kōjerbal tōmak ilo Irooj jenaaj maron̄ in kōm̧m̧ani men ko reļļap, jekdo̧o̧n men ko juon iien jaar ļōmņak repen. “Bwe ejjeļo̧k naan jān Anij enaaj m̧ōjņo̧” (Luke 1:37).