Katakin Jodikdik ro im Ajri ro Reddikļo̧k
Jelm̧ae Būrom̧ōj
Kiiō wōt ak tokālik, ajri renaaj ioon jerata, mekarta epaak ak ettoļo̧k jān kapijuknen eo. Bōtaab “jekdo̧o̧n n̄e laļ in ej pād ilo aen̄wān̄wā ej pād ipeļaakūd, jemaron̄ bōk kōjeraam̧m̧an eo an aenom̧m̧an itulowa.”1 Erkein jet men komaron̄ kōm̧m̧ani n̄an jipan̄ ajri ro en̄jake aenōm̧m̧an jab in.
Kijn̄en̄e
N̄e juon men ekabūrom̧ōjm̧ōj ej waļo̧k, ajri ro remaron̄ en̄jake āinwōt laļ eo aer ejjab jokkuun wōt juon. Kwon juon waanjon̄ak in kijn̄en̄e n̄an er. Kōnono ilo jokane im lōke kōn jekjek eo. Kōm̧m̧ani men ko ekkā am̧ kōm̧m̧ani jon̄an wōt am̧ maron̄. Kōm̧m̧ane aolep men komaron̄e n̄an kōm̧m̧ane wōt nokon in jota an baam̧le, ekkatak jeje ko rekwojarjar, jar, im iminene ko jet an baam̧le. Kōn iien, ajri ro remaron̄ katak bwe jekdo̧o̧n n̄e mour eo aer em̧ōj an oktak, gospel eo ej kōm̧m̧an bwe jān ļōmņak kōn ndeeo im mour ej wōnm̧aanļo̧k wōt.
Kautiej
Kwaļo̧k kautiej n̄an en̄jake ko an ajri. Ron̄jake ajri ro im kile ekōjkan aer en̄jake. Kwaļo̧k n̄an er ke kwoj bōk abņōņō ko aer ilo m̧ool. Jab kipel er n̄an ekōnono bōtaab kwaļo̧k n̄an er kwoj pojak n̄e rej pojak n̄an ekōnono. Ilo m̧ool uwaaki kajjitōk ko ilo aer walōn̄tak ilo tōre eo renaaj meļeļe. Kwaļo̧k n̄an ajri ro nejūm̧ remaron̄ kōnono n̄an kwe kōn mijak im inepata ko aer.
Tōl
Ajri ro nejūm̧ remaron̄ kajjitōk, “Etke Anij ej kōtļo̧k bwe men ko renana ren waļo̧k?” Kōm̧eļeļeik bwe ilo iien ko rem̧m̧an im iien ko renana jim̧or rej m̧ōttan mour im karōk eo an Anij n̄an indeeo. Ej kōtļo̧k an kajjojo armej kōm̧m̧ane kālet ko aer make, im jet iien armej rej kōm̧m̧ani kāālet ko rebōd im me rej kōm̧m̧an en̄taan. Iien ko jet, jerata ko rejjab an juon bōd ak ej m̧ōttan mour in. Jekdo̧o̧n ta, Jemedwōj Ilan̄ ej pād n̄an kōj. Kōn jipan̄ eo An, jemaron̄ ekkatak im eddōkļo̧k, mekarta jān en̄jake ko rekōmmetak. Jemaron̄ oktakļo̧k n̄an E im loe aenōm̧m̧an.
Kanemkwoje
Kwaļo̧k n̄an ajri bwe ewōr ippāer kajoor eo n̄an kōm̧m̧an oktak kōn leļo̧k n̄an er juon wāween n̄an jipan̄. N̄an waanjon̄ak, remaron̄ jipan̄ aiin menin jipan̄ kon̄an ro rej ļanootot an jorrāān eo, loļo̧k rinan̄inmej ak ro eo m̧ōttan ejorrāān ilo aujpitōļ, kam̧ōņōņōik juon eo ej jelm̧ae jako eo juon uwaan baam̧le eo an, ak jar kōn ro rej apan̄. Jejjab maron̄ kōm̧m̧an aolep men, bōtaab ewōr ippād maron̄ eo n̄an kōm̧m̧an eļap em̧m̧an, im “jej jerbal kōn aenōm̧m̧an jabdewōt iien jej jipan̄ joļo̧k en̄taan ko an doon.”2
Kaenōm̧m̧an
Kakeememej ajri ro nejūm̧ bwe Anij ej iakwe er im bwe kwoj iakwe er. Jab kōm̧m̧ani kallim̧ur ko rebōd bwe en ejjeļo̧k men enana enaaj walo̧k n̄an er, bōtaab kwaļo̧k n̄an er ke rej pād ilo kōjpārok kiiō im bwe kwonaaj kōm̧m̧ane aolep men n̄an kōjpārok er. Kallim̧uri er bwe Jemedwōj Ilan̄ enaaj jipan̄ er elļā jān jabdewōt māllejon̄ me ej itok n̄an er.
N̄e kwoj lo eok make būruom̧ōj kōn apan̄, keememej bwe ilo jem̧ļo̧kin, em̧m̧an enaaj anjo̧ ioon nana. “Jej tariņae ņae jerawiwi, … bōtaab jejjab aikuj ebbweer,” Būreejtōn Thomas S. Monson eaar katakin (1927-2018). “Ej juon tariņae jemaron̄ im jenaaj anjo̧. Jemedwōj ilo Ilan̄ eaar letok n̄an kōj kein jerbal ko jej aikuji n̄an maron̄ kōm̧m̧ane menin. Anij Ej pād ilo jōbwe eo. Ejjeļo̧k me eņ jej aikuj mijake.”3