Lo an Jema Al
Maria Oka
California, USA
Kōmeļeļe jān Allen Garns
Iaar pād ilo mijen eo aō ilo Honolulu, Hawaii, USA, ium̧win emen im jimettan allōn̄ ko ke iaar bōk juon nan̄inmej in dibūbbūb eļap im kar ilo iien eo lo bwe ewōr aō nan̄inmej in kōmelij (epilepsy). Allōn̄ ko tokālik iaar kōm̧m̧ani loļo̧k ko aō n̄an aujpitōļ, rekar kōm̧m̧ani elōn̄ kakōlkōl ko, im juon uno kāāl kōn un ko waļo̧k jāne rōkainepata.
M̧ae iien eo, eaar mootļo̧k aō ilo jerbal in mijenede jon̄an iaar jab on̄, bōtaab jān tōre eo iaar dibūbbūb, iaar būrom̧ōj. Iaar būrom̧ōj kōn jinō im jema im kar en̄jake aō ajimakeke jekdoon n̄e iaar pād turin armej ro rem̧m̧an im rejeļā lale armej. Iaar jab kōņaan ro̧o̧k n̄an ijo jikū, bōtaab iaar kōņaan en̄jake aenōm̧m̧an.
Kōn mālim eo an mijen būreejtōn eo aō, iaar kōnono ippān jinō im jema ilo taļboon kōn uno ko n̄aij bōki. Jema, eo ej kab m̧ōj an kakūrm̧ool ettōņak eo an ilo aolepān mour eo an n̄an kobaļo̧k ippān Taberacle Choir ilo Temple Square eo, kar kallim̧uri n̄a bwe enaaj kar al kōn ijo em̧m̧antata ilo e n̄an n̄a ilo kweilo̧k eo eļap, eo ekar jino raan eo tok juon.
Jibbon̄ōn eo tok juon, iaar kanooj jar kōn aenōm̧m̧an eo iaar lukkuun in aikuji. Iaar bōk uwaak ko n̄an kajjitōk ko reinjuon ilo kweilo̧k eo eļap m̧oktaļo̧k, im iaar lōke ke inaaj bar bōk tōl eo. Ke eaar ijjino kweilo̧k eo, choir eo eaar al “Dearest Children, God Is Near You” (Hymns, no. 96 ). Ilowaan wōt minit eo kein kajuon, iaar lo jema ilo TV eo. Pija eo eaar kepaakļo̧k mejān ilo juon iien ebwe an itok.
Dān in kōmjaļaaļ eaar itok n̄an meja barāinwōt juon en̄jake ekabwilōn̄lōn̄ an aenōm̧m̧an eaar kobrak eō. Iaar jeļā bwe Anij eaar iakwe eō. Eaar kanooj jeļā ta eo iaar aikuji ilo raan eo—juon jeļā eļam waan bwe Eaar pād epaak im eaar jeļā kōn n̄a. Iaar en̄jake iakwe an Anij, im barāinwōt, iakwe eo an baam̧le eo aō, ro m̧ōttan ilo mijen, im mijen būreejtōn eo aō. Ijello̧kin en̄jake in eddodo, kiiō iaar lo juon iien em̧m̧an n̄an epaakeļo̧k Irooj.
Nan̄inmej eo aō eaar jab jako. Eaar aikuji in kar m̧ōkaj aō ro̧o̧l jān mijen eo aō ālkin men otemjej, ak iaar jeļā bwe Anij eaar pād ijo im bwe Eaar iakwe eō. Kam̧ool in eaar pād wōt ippa ilo ekanooj bar lōn̄ mālijjon̄ ko im kar letok n̄an eō kōjatdikdik ilo iien ko reppen tata. Jet remaron̄ ņa etan jide, ak ijeļā bwe loe an jema al kōn iakwe eo an Anij eaar juon kabwilōn̄lōn̄ edik ilo iien aō aikuj.