Kōjeraam̧m̧an ko an Un̄n̄are Peid Make
Pejnej Eo Ej Eddōkļo̧k
Kam̧m̧oolol n̄an ta eo eaar katak ilo kulaaj in un̄n̄are peid make ko, n̄e juon kōjām eaar kilo̧k n̄an Teddy Reyes, juon eaar bar peļļo̧k.
PIJA JĀN Raul Sandoval
Ej 4:00 jibbon̄ ilo Santo Domingo, Dominican Republic, im Teddy Reyes ekar ruj wōt im jerbal. Elōn̄ men ej aikuji in kōm̧m̧ani rainin n̄an dāpij wōt eddōkļo̧k eo an pejnej eo an. Ej jino m̧wijm̧wij tōm̧ato im pilawe. Innām kōm̧m̧ane jo̧o̧j eo an emake wōt.
M̧okta jān 6:00 awa jibbon̄, ruo rijerbal ro rej jikrōk n̄an jipan̄ e, im kōppopo ko rej m̧ōkajļo̧k. M̧okta jān 8:00 awa jibbon̄, em̧ōj aer kōm̧m̧ane 300 jāānwūj ko, kajjojo kar kitimi ilo kein kitim būļajtiik im kar kanni ilo pāāk ko Bar jilijno rijerbal ro rej jedetok, im aolepān kumi eo raar ilo̧k n̄an wia kake.
M̧okta jān 9:00 awa jibbon̄, aolep ak ijello̧kin wōt jet—jilu ak emān me Teddy ej kakoņi n̄an najidik tiim eo an—em̧ōj wiāiki.
Pejnej em̧m̧an n̄an Teddy. Bōtaap men ko raar jab pidodo aolep iien. Ilo m̧ool, ium̧win iiō ko ļalem remootļo̧k, ejanin maron̄ kar elolo jerbal em̧m̧an ikijeen jeļā eo an—āinwōt juon lawyer.
Kōn menin ekōjkan an kar Teddy kōm̧m̧ane oktak eo jān kōkakpilōklōk armej ro an n̄an wiakake jāānwūj? Eaar bōk eļap jerbal, aaet, bōtaab eaar barāinwōt mejmejkaruo kōjerbal pedped in katak ko eaar ekkatak ilo kūlaaj ko kar liļo̧k jān Church’s Self-Reliance Service ko im̧aan tata.
Luuji Jerbal eo An
Ļalem iiō remootļo̧k, mour eo an Teddy eaar em̧m̧an kalimjōke. Eaar em̧m̧an jerbal eo an āinwōt juon lawyer ej kab m̧ōj an m̧are, im eaar peptaiji lio pāleen. “Bōtaap eaar wōr jet am apan̄ ko,” eaar ba, “ im iaar luuji jerbal eo aō.”
Ilo iiō ko tok emān Teddy eaar pen an elolo an jerbal. “Elukkuun lōn̄ jerbal imaron̄ kar kōm̧m̧ani, ak ejjeļo̧k rekar kōņaan kōļļāik eō. Iaar kajjieon̄ jino jerbal ko jet ippa make, ak eaar jab jerbal.”
Lio pāleen, Stephany, eaar wōr an jerbal em̧m̧an, ak kōļļā eo an make eban kar kōļļāik aolep piiļ ko. Ejjab to eaar wōr nejin ripālele ro. Raar lukkuun m̧ōņōņō, bōtaab eaar apan̄ļo̧k jāān ko aer. Raar luuji m̧weo m̧weer, raar aikuj wiakake wa eo waer, im kōjerbal aolepān joortok lik ko aer. Tokālik raar aikuj in em̧m̧akūt n̄an juon em̧ jidikdik m̧ōn jinen Stepheny.
Ak Teddy eaar jab ebweer. Ejjab to juon iien em̧m̧an jab kar kōtmene eaar make waļo̧k.
Kajoor eo an Un̄n̄are Peid Make
Ālkin iiō in apan̄ ko, Teddy eaar jeļā ke ekar iien oktak.
“Iaar jokālet n̄an bōk kūlaaj in un̄n̄are peid make ko an Kabun̄ in,” ej ba. “Iaar ron̄ kaki ak iaar lōm̧ņak rejjab n̄an n̄a. Iaar ļōmņak raar kōn kōm̧m̧ani men ko kōn kwe make. Kūlaaj ko raar lukkuun em̧m̧an.”
Jinoin, Teddy eaar kobaļo̧k ilo juon kurup in Personal Finances. Innām iaar kobalok ilo juon kurup in Start and Growing My Business. Kūlaaj kein raar jipan̄ Teddy ilo jeļāļo̧kjen in pejnej eo an make im bar jipan̄ e eddokļo̧k ilo jetōb.
“Bōk kūlaaj kein raar ukōt aolep men,” ej ba. “Iaar kālet n̄an kōm̧m̧ane aolep men ko rekar katakin. Im jāān ko aō raar m̧ōkaj aer oktak. Iaar jino kōļļa juon m̧ōttan jon̄oul, jar aolep raan, ekkatak jeje ko rekwojarjar, im kojerbal tōmak. Aolep men raar oktak—Iaar jino kakkoņ jāān im kōkwojarjar raan in Jabōt. Aolep pedped in katak kar kōjeraam̧m̧an eō.”
Ilo Starting and Growing My Business kurup eo an, Teddy eaar katak ekōjkan kile juon m̧weiuk n̄an wia kake me emaron̄ kōjeraam̧m̧an armej ro rej wia ippān ro ijoko rej jokwe ije. Ilo an kar etale ta ko armej rej kappok, im̧we kar jino jiibtok. Ilo jikin eo an, armej raar kōņaan jāānwūj ko rekāāl, bōtaab rebar kōņaan bwe ren m̧ōj kadede n̄an wortar—im bokļo̧k n̄an er.
“Elōn̄ jikin m̧ōn̄ā ko ewōr aer jo̧o̧j eo ej make wōt me ej kōm̧m̧an bwe m̧ōn̄ā ko aer ren jenolo̧k,” Teddy ej ba. “Innām iaar ejaake juon aō make jo̧o̧j n̄an jāānwūj ko aō.
Kaddōkļo̧k Pejnej eo An
“Juon raan eaar jino pejnej eo an, Teddy eaar kōm̧m̧ane 30 jāānwūj ko.
“Jiln̄uul minit ko tokālik, iaar bar rool n̄an m̧weo,” ej ba. “Lio pāleeō eaar abņōņō ke ej lo eō ioon kauj eo. Eaar kajjitōk ij ita ilo m̧weo—iaar jab aikuj wia kake jāānwūj ke? Em̧ōj aō wia kaki aolep!”
Ilo wiik ko jejjo tok ālik, Teddy eaar kōnono ippān pejnej ko im jikuuļ ko. Elōn̄ raar m̧ōņōņō in wiaiki jāānwūj ko an, im pejnej eo an eaar jino eddokļo̧k. Eaar m̧ōkaj an jeļā wāween kōjpārok pejtebōļ ko an bwe en to aer pād. Ebar āinwōt jeļā lukkuun ewi toon an naaj jo̧o̧j ej make wōtan enno wōt. Eaar wōrtari im būki bilawe ko an aolep jota. Ej wiaiki pejtebōļ ko redik wōņāer ilo Jādede, me kar dik wōņaer im nej em̧m̧an wōt n̄an M̧ande.
Ejjap to eaar bōk wōrtar ko kōn kain jāānwūj rōt, im em̧ool oran nōm̧ba ko reļļap n̄an iien ko raorōk. Eaar aikuj jipan̄ im kar jino ebbōk an rijerbal.
Ilo an ejaak jemjerā eo em̧m̧an ippān jikuuļ ko im pejnej ko, Teddy eaar maron̄ ejaak juon jar in wia ko ekutkut aer wia. Ilowaan emān allōn̄ ko, eaar wōr rualitōk an rijerbal im kar wia kaki 300 jāānwūj ilo juon raan, ļalem raan ilo juon wiik. Tiim in wia kake eo an eaar lukkuun tijem̧ļo̧k jon̄an raar wia kake aolep jāānwūj jekdoon iien rak n̄e ej ejjeļo̧k jikuuļ. Kiiō Teddy ej pojak in bar kōļapļo̧k.
Kōnke eaar bok kūlaaj in un̄n̄are pein make ko, kar im̧we e n̄an waļōn̄tak kōn ļōmņak in pejnej kōn jāānwūj eo. “Kōn tōl in jān Kabun̄ in im kōjeraam̧m̧an ko iaar būki,” ej ba, “ewōr aō naan in kamool ekajoor kōn Kabun̄ in im Jisōs Kraist.