Mour Ej juon Ettōr Aitok
Jodikdik rein An Armej ro Rekwojarjar rainin rej jokwe ijo Rijilōk Paul eaar jokwe ie ilo kar iien ko an Kallim̧ur Ekāāl. Im rej mour kōn naan ko an.
“Em̧ōj aō kar ekkatak bwe gospel eo ejja āinwōt aolep jikin. Jokwe ilo laļ ko lo̧jet, iaar ekkatak n̄an kalimjōk wōt m̧ool ko an gospel eo im n̄an en̄jake Jetōb eo ijello̧kin m̧ad kōn m̧anit,” —Bryana W., 15 iiō
“Iaar je naan in keememej eo ilo kūlaaj eo aō n̄an keememej bwe aolep men raar waļo̧k ilo iiō in: FSY, Kāām eo an Doulul eo an Jiron̄ ro, jemenere. Ej jipan̄ eō keememej ia eo iaar itok jāne.” —Marie H., 17 iiō
“Ijeļā bwe n̄e ij etal n̄an jemenere imaron̄ en̄jake polel jeļā bwe ij kōm̧m̧anne ta eo ij aikuj kōm̧m̧ane, im ijelā bwe aolep men renaaj em̧m̧an.” —Lizzie T., 17 iiō
Loukia C., 15 iiō, eaar kwaļo̧k naan in kam̧ool eo an ej kab kein kajuon ilo kāām eo an Doulul eo an Jiron̄ ro im tokālik kar peptiaij.
“M̧ōttan eo em̧m̧an tata ippa ilo FSY kar ikkure ko, eeb, im kweilo̧k ko an kumi, me raar noko in jibbon̄ ko im etale. Eaar jipan̄ eō n̄an an ļapļo̧k aō jipan̄ im kijenmej im n̄an kam̧m̧oolol kōn jeje ko rekwojarjar.” —Haig T., 14 iiō
“Ilo FSY eo, kōm kar jino erom juon kumi im eaar kokajoorlo̧k kōm. Eaar jipan̄ ļōme im jete būrookuraam̧ eo an jodikdik ro ilo Greece kōnke em̧m̧anļo̧k am jeļā kajien doon.” —Alexis H., 18 iiō
“Al ioon stage eo ilo FSY eaar juon iaan menin iaar peran n̄an kom̧m̧ane im juon iaan iien ko rem̧m̧an iaar kōm̧m̧ane. Ilo iien eo, iaar ekkatak ewi jon̄an ad aorōk ilo laļ in aiboojoj.” —Irini S., 17 iiō
“Ilo kāām eo an Doulul eo an Jiron̄ ro iaar ekkatak bwe mour ej āinwōt juon ettōr aitok. Eaar jipan̄ eo kaddōkļo̧k tōmak eo aō, jeļā bwe jej aikuj wōnm̧aanļo̧k wōt ilo iaļ eo ejim̧we, āinwōt juon ettōr aitok En̄jake in ejipan̄ eō kaddōkļo̧k naan in kam̧ool eo aō im wōnm̧aanļo̧k wōt n̄an wōr tōmak im pād wōt ilo iaļ eo ejim̧we” —Winifred K., 14 iiō
“Iaar lukkuun kōņaan kar lale ekōjkan n̄an pād iturin jodikdik ro me tōmak ko aer rejja āinwōt. Iaar en̄jake āinwōt kōm aolep kar ekkejel ilo juon wāween ejenolo̧k, eļapļo̧k jān jeļā etan doon.” —Pavlos K., 15
“N̄aij m̧ōņōņō bwe eaar wōr aō kar iien em̧m̧an n̄an iioon jodikdik ro jet me rej bar iion ejja men ko ij iooni aolep raan.” —Joshua K., 17 iiō
“FSY eo im kāām eo an doulul eo an Jiron̄ ro wōr juon wōt en̄jake eo jekdo̧o̧n ia eo kwoj etal n̄ane ilo laļ in. Ekar em̧m̧an ippa kurup eo edikļo̧k an kāām eo an Doulul eo an Jiron̄ ro konke epidodoļok n̄an ekkejel ippān doon.” —Olivia H., 15 iiō
“Ijjab juon membōr in Kabun̄ in, ak n̄aij itok ilo aolep wiik n̄e imaron̄. Ij iakwe ta eo jodikdik ro rej jutak kaki.” —Irene C., 14 iiō
Jejjo allōn̄ remootļo̧k, juon jemenere kūlaaj kar ioon doon ilo Mars Hill, turin Athens, Greece, ijo Rijilōk Paul eaar kwaļo̧k juon ennaan ekajoor (lale Jerbal 17:22-34). Rijikuuļ ro raar kōnono kōn kareel eo an jemenere ilo mour ko aer, ekoba katak ko an Paul.
“Jokwe ilo Greece ekōm̧m̧an an Kallim̧ur Ekāāl āinwōt, elukkuun jejjet” Alexis H ej ba., 18 an iiō. “Em̧m̧an ippān jema etal n̄an ijo rejorrāān Paul eaar katakin ie im enaaj kwaļo̧k juon eoon ak bwebwenato n̄an kōm kōn ia eo iien eo eaar waļo̧k ie.”
Ejja āinwōt an kar Paul jelm̧ae apan̄ ko ilo tōre eo an, jodikdik ro ilo Greece rej barāinwōt jelmae, jekjek ko an ikitōltōl, kien, im menin jeraam̧m̧an. Kweilo̧k ko an Jodikdik im Kāām an Doulul eo an Jiron̄ ro rōjeja aer kōm̧m̧an ilo Greece, im em̧ool pād ilo jemenere emaron̄. Mekerta men kein im apan̄ ko jet, jodikdik ro in Greece rej kōjerbal naan in rejan̄ eo an Paul n̄an “jutak ilo juon wōt jetōb, im kōn juon wōt ļōmņak kom̧ij jim̧or kate kom̧ kōn tōmak eo in gospel” (Pilippai 1:27).
Jokwe ilo Greece ej meļeļe in membōr jodikdik rein rej m̧ōņōņō kōn katu eo, bok in parijet ko, m̧ōn̄ā, in eb. Rej barāinwōt lukkuun m̧ōņōņō ilo aiin doon ippān doon. Ilo aer ioon doon ilo jemenere im makūtkūt ko an branch, rej erom kajoorļo̧k ilo tōmak im jemjerā.
Jemenere ilo Mars Hill
Kurup in jemenere eo ilo im̧aan m̧ōn jar eo ilo Athens.
Pija ko jān Leeann Heder
Ke eaar ijjino jemenere ilo Greece jejjo iiō remootļo̧k, ekar wōr ļalem wōt rijikuuļ. Raar ioon doon jilu jibbon̄ ilo juon wiik, ippān jet rej koba kōn video conference ilo online. Rej bar ioon doon ilo ālkin rālep in Wōnje ko n̄an jemenere, ālkin wōt kōn juon m̧akūtkūt. Em̧ōj aer epaakļo̧k doon im erom meram n̄an ro m̧ōttaer, ro rej kile waanjon̄ak eo aer. N̄e ro m̧ōttaer rej kajjitōk kajitōk ko, jodikdik ro rebūktok n̄an jemenere im m̧akutkut ko an Mutual.
Juon likao, Pavlos K., 15 an iiō ej ba, “Etal n̄an jemenere ej juon wāween em̧m̧an n̄an jino juon raan im ejipan̄ eō kajoor wōt. Ej jipan̄ eō kalimjōk wōt n̄an erom juon waanjon̄ak n̄an ro jet. Ej jipan̄ eō jino juon raan ļōmņak kōn Jisōs Kraist.
Ilo an jodikdik ro eddōkļo̧k ilo kajoor im juon wōt, kōjeraam̧m̧an ko im iien ko rem̧m̧an rej itok. N̄an waanjon̄ak ilo 2017 eo raar jeraam̧m̧an n̄an pād ilo kweilo̧k an jodikdik ro eo eļap an laļ ko m̧ōttan laļ en N̄an Kōkajoorļo̧k Jodikdik ro (FSY) Jiron̄ ro raar bōk kuņaer ilo kāām eo an Doulul eo an Jiron̄ ro jino in tata ilo Greece. Āinwōt juon tōprak, em̧ōj aer eddōkļo̧k em̧ool epake doon āinwōt juon kumi, im ruo jiron̄ ro raar kobatok ilo Kabun̄ in.
International FSY Kweilo̧k eo
Ilo FSY kweilo̧k eo, jipeeļe naan eo “Ask,” jen Jemes 1:5.
Kweilo̧k eo, kar kom̧m̧ane ilo Germany, eaar kakuktok ippān doon jodkdik ro Armej ro Rekwojarjar Ilo Raan-ko Āliktata jān aolepān Europe. Jodikdik ro jān Greece im Cyprus kar itok jān jibuki m̧aiļ ettoļo̧k, im en̄jake an kweilok eo ekar wōr kajoor ioer. N̄an Maximos A., 14 iiō, “Men eo ekakeememej tata ilo FSY ekar iien eo me kōm kar kwaļo̧k naan in kamool ko am. Aolep raar en̄jake Jetōb eo, im ekar im̧we eō n̄an kōkajoorļo̧k naan in kam̧ool eo aō make.”
“Ilo kar jino in, kar emān wōt jodikdik ro rekar tōn etal,” Loukia C., 15 iiō ej kakobaba, “bōtaab ilo jem̧ļo̧kin, ekar wōr 15 rekar pād—kar lōn̄ tata n̄an Greece—koba 3 rejjab membōr.”
“Elukkuun kar em̧m̧an n̄an koba ippān doon juon jikin ijo kwoj kwaļo̧k ejja gospel eo wōt im kwo jab oktak jān ro ipeļakūūm̧. Kōm kar aolep ippān doon, im kōm kar en̄jake ejja Jetōb eo wōt. Men kein rej jipan̄ eō.”
“Jema ejjab membōr im ekōn jab kōtļo̧k eō bwe in etal n̄an FSY ak n̄an peptaij,” Jesiana, 16 iiō ej ba. “Ak ke membōr ro an branch eo raar jitlo̧k kōn n̄a, im būbū eaar kōnaan ippān jema. Ālkin menin eaar ba imaron̄ etal!”
Ilo FSY eo, eaar en̄jake elōn̄ men ko ej kab kein kajuon, ko āinwōt “bōk kuņaan ilo katak ko im m̧akūtkūk ko im kwaļo̧k naan in kam̧ool eo aō eaar jipan̄ eō meļeļe ta eo ej lukkuun in āinwōt n̄an en̄jake Jetōb kwojarjar eo. Ijan̄in kar en̄jake Jetōb m̧okta, im iaar lukkuun m̧ōņōņō im laudin̄din̄. Iaar kwaļo̧k naan in kam̧ool eo aō ej kab kein kajuon.”
N̄an kakobabaļo̧k n̄an m̧ōn̄ā ilo jetōb, jodikdik ro raar kakkije im limo ippān doon ilo kweilo̧k eo. Haig T., 14 iiō eaar itok n̄an kweilo̧k eo jān Cyprus. “Iaar ekkatak kōļapļo̧k iaaio, n̄an lukkuun jemjerā im n̄an limo, mekarta ilo iien ko reppen.”
Kāām an Doulul eo an Jiron̄ ro
Jiron̄ ro ilo ettōr eo aitok, Greece.
Kāām eo an Doulul eo an Jiron̄ ro eaar wōr an ejja en̄jake eo wōt. Jon̄oulruo jiron̄ raar ioon ritōl ro aer ilo turin juon kar jikin jiāe ettōr aitok in etto. Raar pād ippān doon jilu raan ko, ekkatak lōke doon n̄an kōkajoorļo̧k im kōketak.
“Ke eaar 12 aō iiō,” Loukia ej ba, “Ekar kein kajuon in aō etal n̄an jar im iaar lukkuun m̧ōņōņō, bōtaab iien eo iaar kile bwe kar n̄a wōt ded jab eo aō. Kiiō, ruo iiō tok ālik, ekar kanooj lōn̄ am jiron̄ ro ej kab kein kajuon kōm kar maron̄ kōm̧m̧an kāām eo an Doulul eo an Jiron̄ ro.” Ke raar kweilo̧k ippān doon, liin ej ba, “Iaar kile ta meļeļe in n̄an erom juon Armej Ekwojarjar ilo Raan-ko Āliktata. N̄e jej mour kōn gospel eo, meram ej kabool kōj.”
Kāām eo an Doulul eo an Jiron̄, 2017—ej kab kein kajuon ilo Greece.
N̄an Bryana W., 15 iiō, FSY im Kāām an Doulul eo an Jiron̄ ro eaar jipan̄ e kobaļo̧k m kōnono ippān ro jet. ”Ekutkut an baam̧le eo aō etal jān jikin n̄an jikin, im eaar pen aō kōm̧m̧an jemjerā ko ippān ro jet kōnke ijookok,” ej ba. “Bōtaap kōnke iaar jino epaakeļo̧k doulul eo am ilo FSY, iaar m̧ōttaik jet ro rem̧m̧an. Ilo kweilo̧k in kwaļo̧k naan in kam̧ool eo, kōm kar kwaļo̧k en̄jake ko am, im iaar kile bwe jet raar bar en̄jake ejja wāween eo wōt iiar en̄jake.”
Marie H., 17 iiō, ej keememej m̧ato eo an kāām eo, “Mour ej juon ettōr aitok, ejjab juon ettōr m̧ōkaj.” Jiron̄ ro im ritōl ro aer raar ekōnono kōn aorōk eo an niknik in kam̧ōj ettōt eo, ej ba. “Eaar kakeememej n̄a bwe imaron̄ niknik, pād ilo m̧ōkajin eo aitok kitien, im kalimjōk wōt mejān kajjik eo. Innām imaron̄ kam̧ōj men ko me Jemedwōj Ilan̄ ej aikuji bwe in kōm̧m̧ani.”
“Alooje an aļ tak eaar boktok juon jetob emeļak, eaiboojoj.” —Lizzie T.
Juon iaan men ko rem̧m̧an ilo kāām eo eaar nokon eo ilo joraanlo̧k ioon bok ilo jibbon̄ōn eo āliktata. Lizzie T., 17 iiō, ej ba, “Kōm kar bōk jeje ko rekwojarjar am, kōm̧m̧ane nokon eo am, im alooje an aļ tak. Kōm aolep kar en̄jake iakwe eo an Anij. Eaar juon jem̧ļo̧k eo em̧m̧an n̄an iien eo kōm kar joļo̧k ippān doon.”
Jelm̧ae Iliju im Jaklej ilo Ejjeļo̧k Mijak
“Jen FSY im Kāām eo an Doulul eo an Jiron̄ ro, iaar ekkatak eļap kōn gospel eo im ekōjkan an maron̄ jipan̄ ilo mour eo aō,” Irini S., 17 iiō ej ba. “Iaar m̧ōttāik elōn̄ ro m̧ōtta im kar ekkatak ewi aorōk in n̄an kwaļo̧k ļōmņak ko aō im en̄jake ko. Iaar en̄jake Jetōb Kwojarjar eo ilo m̧wilaļ in im iakwe eo an Rilo̧mo̧o̧r ad, Jisōs Kraist.”
Pād ipeļaakin jodikdik ro an Armej ro Rekwojarjar ilo Raan-ko Āliktata, liin ej ba, eaar kōkajoorļo̧k lōke eo an. “M̧okta jān FSY iaar jap maron̄ lo men ko rem̧m̧an im aiboojoj me Anij eaar kōm̧m̧ani n̄an kōm im karōk ko Ej kōm̧m̧ani wōt n̄an kōj.”
“Jejjab aikuj kōtļo̧k an jabdewōt armej ak jabdewōt men ipeļaakid me remaron̄ kajjieon̄ kanōkļo̧k kōj jen mour kōn gospel eo, ” Manasseh A., 17 iiō ej ba. “Gospel eo ejja āinwōt aolep jikin im jej aikuj iien otemjej pād wōt ilo iaļ eo ejim̧we.”
Im jekdo̧o̧n n̄e ej ilo Greece ak jabdewōt jikin ilo laļ in, bōk ejja iaļ eo wōt ippān doon ej kōtļo̧k bwe jen erom juon wōt ilo jetōb.