Fakaʻilekitulōnika Pē
Founga Ne Tokoni‘i Ai Au ʻe he Tohi ‘a Molomoná lolotonga e Mavahevahe Fakasōsialé
Kuó u lau tuʻo lahi e Tohi ‘a Molomoná, ka ko e taimí ni ne u ‘iloʻi lelei ange ‘a e mālohi kakato ʻe lava ke ‘omi ʻe he tohi ko ‘ení ki heʻetau mo‘uí.
Kuó u lau tuʻo lahi ‘a e ngaahi vahe ʻo Molonaí ‘i he Tohi ʻa Molomoná, ka ko e ta‘ú ni naʻá ku ongo‘i vāofi ʻaupito kiate ia. ‘I hono fakaʻosí, ne fakamavaheʻi ia mei he taha kotoa naʻá ne ‘ofa aí. Pau pē naʻá ne ta‘elata ʻaupito lolotonga hono ngaahi ‘aho fakaʻosí. Ka neongo ia ʻi he lotolotonga ‘o e tuenoá, naʻá ne manatu‘i ʻa e me‘a naʻe ako‘i ki ai ʻe he‘ene tamaí fekauʻaki mo e maʻu ha ngāue ke faí (vakai, Molonai 9:6). Na‘e ʻi he lolotonga ʻo e fehangahangai mo e kahaʻu ta‘epaú naʻá ne fakamatala‘i fakanounou ai e ngaahi lekooti ‘o e kau Sēletí pea fakakau ʻa e ngaahi pōpoaki fakalaumālie kiate kitautolu fekau‘aki mo e tuí, ʻamanaki leleí, mo e manava‘ofá.
Kuo ue‘i fakalaumālie au ʻe he loto-to‘a ʻa Molonaí koe‘uhi ko e ngaahi faingataʻa lahi kuo mamata ki ai ‘a e māmaní ʻi he ta‘u ní, kau ai e mahaki faka‘auha ʻo e COVID-19. Na‘e fakamālohiʻi ha tokolahi ʻo kitautolu he funga ʻo e māmaní ke mavahevahe fakasōsiale ‘i he taʻú ni, ko e ni‘ihi ʻo kitautolu ne fie maʻu ke tau fakamavaheʻi kitautolu mei he kakai ‘oku tau ʻofa taha aí. Ne pau ke u fakahoko foki mo au e fili faingataʻa ko iá.
Ko ha toketā au maʻá e fānaú, pea ʻoku ou ngāue ‘i he fuofua niʻihi ʻoku fehangahangai mo e ngaahi palopalemá ʻi hono ‘oange ki he fānaú ʻa e tokanga fakavavevave mo fakatuʻupakē ʻi Malengiou, Palāsila. ʻI he lolotonga ʻo e mahaki faka‘auhá ni, ne u fakahoko ʻa e fili faingataʻa ke faka‘ehiʻehi mei he fetu‘utaki fakaesino vāofi mo hoku husepāniti ʻofeiná, ʻofefine ta‘u uá, faʻē ‘i he fonó mo e ngaahi ʻilamutú (ʻa ia ʻoku nau nofo kotoa ‘i hoku ʻapí), fakataha mo e kotoa hoku ngaahi fāmili mo e kaungāme‘a ʻi he feitu‘u kehé. Na‘á ku nofo mamaʻo au ke faka‘ehiʻehi mei hano lava ke fetuku holo ʻa e mahakí.
Na‘e faingataʻa ‘a e mavahevahe fakasōsialé koeʻuhi ‘oku vāofi ʻaupito ‘a hoku fāmilí. ʻI he Sāpate kotoa pē ʻoku mau fakatahataha mai ke maʻu me‘atokoni hoʻatā. ʻOku mau toe fakahoko maʻu pē foki mo ha ngaahi efiafi ʻekitivitī fakafāmili. Ne vave ke u ʻiloʻi naʻá ku ongoʻi loto-mamahi mo taʻelata, ʻi he ʻikai ke nau ʻi aí. Ka neongo iá, ne u fakakaukau ke fakamoleki ha taimi lahi ki hono lau e Tohi ‘a Molomoná ke fakaafeʻi mai e Laumālié ki he‘eku moʻuí. Na‘á ku ako ʻoku tokoniʻi au ʻi hono ma‘u ʻa e Laumālie Mā‘oniʻoní ko hoku takaua ma‘u pē ke u tokanga taha ki he fakahoungaʻí mo e angaleleí, ʻoku fakahā mai kiate au ‘a e founga ke tokoniʻi ai e ni‘ihi kehé, peá ne ʻākilotoa au ʻaki e ‘ofa ʻa e Fakamo‘uí lolotonga e ngaahi taimi faingataʻá.
ʻOku ou fifili ʻi he taimi ʻe niʻihi pau pē ne fakafiemālie ia kia Molonai ke lau e ngaahi lea ʻene tamai ko Molomoná, hili ʻene mavahé. Ne u feinga ke ngāue ʻaki ‘a ʻene ngaahi leá kiate au: “ʻE hoku [ʻofefine] tui faivelenga kia Kalaisi; … ʻofa ke hiki hake koe ʻe Kalaisi”(Molonai 9:25). Kuó u ako te Ne fakahoko maʻu pē ia! ‘E lava ke ʻomi kiate kitautolu ‘e he Fakamoʻuí ha mālohi ‘oku lahi ange ʻi he ngaahi palopalema kotoa pē te tau ala fehangahangai mo ia ʻi he māmani fonu faingata‘á ni mo tokoni ke tau piki maʻu ki he ‘amanaki leleí.
Neongo e faingataʻa kuó u aʻu ki ai ʻi he ta‘u ní, ʻoku ou fakamālō kuo fakamālohia ʻe he aʻusiá ni ‘a ʻeku fakamo‘oni kia Sīsū Kalaisí mo akoʻi au ke tuku ‘a ʻeku falala kakató kiate Ia ‘o hangē ko ia naʻe fai ‘e Molonaí. ‘I heʻeku lau e fakamatala kia Sīsū Kalaisi ‘i he ongo ʻAmeliká, ne u fakatokanga‘i kimuʻa ‘i Heʻene a‘u atú, naʻe foua ‘a e fonua ʻo e kau Nīfaí ʻi he ngaahi liliu ma‘ongoʻonga mo faka‘ofoʻofa (vakai, 3 Nīfai 11:1). Ko hono moʻoní, kimuʻa pea toe hāʻele mai ʻa e Fakamoʻuí te tau foua kotoa ha ngaahi liliu, ʻi hono teuteuʻi kitautolu ke toe feʻiloaki mo Iá. ‘Oku ou ʻilo ko e ngaahi faingata‘a kotoa pē ʻoku tau a‘usiá ʻokú ne ʻomi e faingamālie ke tokoni ki heʻetau teuteu ke fe‘iloaki mo Iá.
ʻOku ou ʻiloʻi ko Sīsū Kalaisi ʻa hoku Fakamoʻuí. Ko Ia ʻa e maama ‘oku ou fie maʻu ke tataki au ‘i he taimi ʻoku taʻepau ai ‘a e halá. Pea ʻoku ou ʻilo ko e Tohi ʻa Molomoná ko ha fakamoʻoni ia kiate Ia. Ko e ngaahi mo‘oni ʻoku maʻu ʻi he tohi ko iá ‘e lava ke tokoni moʻoni kia kitautolu ke tau tafoki kiate Ia pea ke maʻu ‘a e mālohi mo e loto-toʻa mo e tui ‘i he ngaahi taimi ʻo e faingata‘á. ʻOku ou ʻilo kuo ʻosi hoko ia kiate au.