Fakaʻilekitulōnika Pē: Kakai Lalahi kei Talavoú
Founga Ke Fakaʻaonga‘i ai kae ʻIkai Uesia ʻi he Mītia Fakasōsialé
Ko ha ngaahi founga ʻeni kuó u ako ke lava ‘o fakaʻaonga‘i ʻa e mītia fakasōsialé ko ha me‘angāue ki he leleí.
‘Oku ou tui ʻoku fa‘a lōmekina kitautolu he taimi ʻe niʻihi ‘i he mītia fakasōsialé, pe ko e faka‘ānaua ki ha fale haohoa he kahaʻú, feinga ke haohaoa e teuteú (makeup), pe fakaʻamu ke ʻeveʻeva hangē ko ia ne fai ʻe hotau kaungāngāue motuʻá. Neongo ‘e lava ke fakaʻaonga‘i e mītia fakasōsialé ki ha ngaahi ʻuhinga lelei, ka te ne lava ke fakamamahiʻi kitautolu ʻaki ʻene fakatupu maumau ki heʻetau loto-falalá, ʻo ne ʻai ʻetau ʻamanakí ke kiʻi fuʻu tōtuʻa pea fakalahi ai ʻetau ongoʻi loto-kovi ki he niʻihi kehé.
ʻI heʻeku hoko ko ha tokotaha tohi talanoa ʻi he ʻinitanetí, kuó u ʻiloʻi ʻa ʻeku mātuʻaki tuʻu laveangofua ki he niʻihi ʻo e ngaahi uesia fakatupu maumau ko ʻení. Kuó u ako ‘a e ngaahi founga ʻe lava ke u fakaʻaongaʻi ai ʻa e mītia fakasōsialé kae ʻikai tuku ia ke ne uesia ʻa e meʻa ʻoku ou tokanga taha ki ai ʻi he‘eku moʻui fakaʻahó. Ko e ngaahi me‘a ʻeni ʻoku ou fai ʻoku tokoni ia kiate au ke u faka‘aongaʻi ‘a e mītia fakasōsialé ko ha meʻangāue ki he leleí:
-
Fokotu‘u ha fakangatangata ki he lahi ‘o e taimi te ke fakamoleki ʻi he mītia fakasōsialé he ‘aho kotoa pē. Ka ‘ikai, ʻe ʻalu pē mei he ngaahi minití ki ha ngaahi houa.
-
ʻAi ke ‘i ai ha taumuʻa ‘o e ʻalu ki he mītia fakasōsialé. Kapau ‘okú ke ʻi he mītia fakasōsialé ʻo ‘ikai ha taumuʻa (hangē ko ʻení, ʻokú ke ʻi ai pē ke ʻi ai haʻo meʻa ʻe fai koeʻuhí ʻokú ke taʻeoliʻia), ko e taimi ia ʻe ngali lahi taha ai hoʻo fakamoleki noaʻia hoʻo taimí.
-
Manatu‘i e meʻa ʻoku mahuʻinga angé. Ko ha kakai tokolahi ‘i he mītia fakasōsialé ʻoku nau fakaʻasi mai pē ʻa e ngaahi konga ʻoku lelei ʻi heʻenau moʻuí, pea lava ke hangē ʻa e meʻa kotoa pē ʻoku nau aʻusiá ke fiefia mo lelei maʻu pē. Ka ‘oku ʻikai ke ke vakai ki he me‘a kotoa pē. ʻI he hili ange ko iá, mahalo ʻoku femoʻuekina pē mo ʻenau moʻuí ʻo hangē ko koé. ʻOua naʻá ke fakahoa koe ki he niʻihi kehé. ʻOkú ke maʻu pē ʻo feʻunga, pea ʻokú ke feʻunga pē. Na‘e fakamanatu mai kiate kitautolu ʻe ‘Eletā Keuli E. Sitīvenisoni ʻo e Kōlomu ‘o e Kau ʻAposetolo ‘e Toko Hongofulu Mā Uá, “ʻI heʻetau fakafehoanaki hotau tuʻunga fakaʻavalisí mo e moʻui haohaoa ʻo e niʻihi kehé ʻo hangē ko ia ʻoku fakafofongaʻi ʻi he mītia fakasōsialé, ʻoku tau faʻa ongoʻi loto-foʻi, meheka, pea taʻelavameʻa ai.”1
-
‘Oua ʻe fakaʻatā koe ki he koví. Kapau ‘oku ʻi ai ha me‘a ʻokú ne tukuhifo maʻu pē koe ki lalo, ʻoua ʻe saiʻia ai, ʻoua ʻe muimuiʻi, pe ʻoua ʻe kaungāmeʻa mo ia. ‘Oku ʻikai totonu ke tuku ‘e he mītia fakasōsialé koe ke ongoʻi loto-mamahi. Muimuiʻi, kaungāme‘a, mo saiʻia ‘i he kakai mo e ngaahi meʻa te ne tokoni ke ke lelei ange mo hoʻo mo‘ui fakaʻahó.
-
Fekumi ke ‘ofa, fakalotolahi, mo ue‘i fakalaumālie e niʻihi kehé. Feinga ke vahevahe ke tokoni ki he niʻihi kehé ke nau ongoʻi ʻofa mo mahuʻingaʻia, kae ʻikai ngāue ʻaki ʻa e mītia fakasōsialé ke ke ngali lelei ai. Vahevahe ‘a e leleí. ʻIloʻi ʻa e kakai te nau ngali fie maʻu ha kaungāmeʻa pea tokoni kiate kinautolu ke vahevahe ha pōpoaki langaki moʻui!
Naʻe pehē foki ʻe ʻEletā Sitīvenisoni: “Hangē ko ia ne fakamanatu mai ʻe Sisitā Poni L. ʻOsikāsoni … , ʻoku ʻikai makatuʻunga e lavameʻa ʻi he moʻuí ʻi he lahi ʻo e saiʻia (likes) pe tokolahi ʻo e ngaahi kaungāmeʻa (friends) pe kau muimui (followers) ʻoku tau maʻu he mītia fakasōsialé. Ka neongo ia, ʻoku felāveʻi ia mo e fetuʻutaki ʻaonga mo e niʻihi kehé pea tānaki atu e māmá ki heʻenau moʻuí.”2
ʻOku totonu ke hoko ia ko ʻetau taumuʻa taupotu taha ʻi he taimi ʻoku fakaʻaongaʻi ai ʻa e mītia fakasōsialé.
Manatu‘i ‘i heʻetau vakai ki he mītia fakasōsialé ‘aki e matasioʻata ʻo e ongoongoleleí pea feinga ke fakaʻaonga‘i ia ʻi ha ngaahi founga lelei, he ʻikai ke tau ʻefihia ʻi he ngaahi fakakaukau ʻo e fakafehoanakí pe loto-foʻí. Ka te tau mavahe mei he mītia fakasōsialé mo ha ongoʻi langaki hake mo e ueʻi ke fai lelei.