Na o le Faatekinolosi: Matua ma le Faamaoni

Tuuina atu Tausiga? Tausia Lelei Foi Oe Lava ia

Saunia e Koji Okumura

E alaala le tusitala i le Aai o Yamanashi Prefecture, Iapani.

O le tausiga o se isi tagata e mafai ona aveese ai ni mea se tele mai ia te oe, o lea e taua ai le toefaamalosia soo se taimi e te mafaia ai.

tamaitai talavou o loo fesoasoani i se tina matua

I Iapani, o le tu masani ai o le atalii po o le afafine matua e mautofi i le fale o latou matua ma tausi latou matua pe a oo ina toeaiina ma olomatutua. E lagona lava e le toalua o lenei atalii po o le afafine se tiutetauave e tausia o latou matua faaletulafono. E ui lava o lenei tu masani ua faaitiitia ma ua le taatele, ae o loo toatele lava aiga o loo ola pea i le ala lea. E mafai ona taitai atu ai i feeseeseaiga, tusa lava pe o iai le tausiga.

Lagonaina o le Vaivai e i Latou o loo Tuuina atu Tausiga

O le tulaga lena mo le tina o se paaga faigaluega sa i ai. O manaoga faifai pea ma faitioga mai le tina faaletulafono na faaitiitia ai le faaosofia o le tausimatua e auauna atu. Na amata ona le fiafia le tausimatua i le tina o le toalua, ma ua oo lava ina moomoo ia maliu o ia.

Na faasolosolo malie lava, ona faiifo le malosi faaletino ma le mafaufau o le tausimatua. Sa oo ina ma’i o ia. O se taunuuga, sa tele ina ave aso malolo totogi o la’u paaga pe toe fetuunaia ana faatulagaga ina ia mafai ai e ia, ona ia tausia lona tina. Sa avea o ia ma tausimatua i se tausimatua.

E ui lava e mafai ona oo le vaivai i soo se tausimatua po o se tausitama o soo se matua, ae o le faafitauli ua faapitoa lava le maaleale ia i latou ua silia ma le 65 tausaga, a o tausia e se tasi tagata matua le isi tagata matua, e pei o se tagata e tausia o latou taitoalua. Ua faailoa mai i suesuega o tagata o loo tausia isi e i le va o le tai 66–96 tausaga, o i latou o loo feagai ma le atuatuvale e 63 pasene le maualuga o le lamatia e le oti nai lo i latou e le o tausia isi.¹

Lagolagosua mo le Tuuina atu Tausiga

E manaomia e tagata e tausia le lagolagosua i taumafaiga latou te faia e fesoasoani ai i isi. E toatele aiga na aoaoina pe faapefea ona lagolagoina se tuuina atu tausiga i ni auala ofoofogia. Mo se faataitaiga, o matua o lou toalua sa nonofo latalata i le vasa i Chiba Prefecture, Iapani. Ae peitai, ina ua faasolo ina matutua, sa amata ona popole a latou fanau i lo la soifua maloloina.

Sa valaaulia i laua e se tasi o o la afafine matutua ina ia faalatalata atili atu i lona aiga, i Osaka, lea o le a avea ai o ia ma se e tuuina atu tausiga taua ia i la’ua. Peitai sa aufaatasi uma tamaiti e lagolago o latou matua ma o latou tuafafine — saili ma toe faafouina se fale, malamalama i manaoga o matua, ma le faaaloalo i lo la tutoatasi ina ia mafai ona la maua atoa le olioli ma le fiafia i lo la olaga fou i le nofoaga fou.

O le tama o lou toalua, o le ua galogalo mea, na amata ona auai i se nofoaga lata ane e totogi e nofo ai i le aso , lea e fiafia i ai le vaega o isi tagata matutua nai lo le feoai solo i lona pitonuu. E ui lava ina tatou mamao ese, ae o loo fiafia lou toalua i le faia o se talanoaga faaleaoaoga faavae faatasi ma ona matua i aso sa uma e ala atu i le Initoneti, lea latou te uunaia ai le tasi ma le isi ma faasoa atu le alofa. Ma e masani ona siaki e ia lona uso e vaai pe o faapefea mai le tausiga.

Popole e uiga i Tausimatua/Tausitama

O le tausimatua po o le tausitama e tupu i lalo ifo o le tele o tulaga eseese. I le tele o tulaga, e manaomia ai e tausimatua po o tausitama ona malaga e tuuina atu le tausiga. I nisi tulaga, o le tausia o tagata taitoatasi e mafai ona nonofo i le fale o le tuuina atu tausiga. O e tuuina atu o le tausiga e tele ina manaomia ai ni fetuunaiga i tulaga faaletino, faalemafaufau, ma tautupe ma i a latou sootaga ma o latou taitoalua, fanau, ma alalafaga.

I Iapani, e leai se faiga o ni aso ma’i. Nai lo lena, o tagata tuuina atu tausiga latou te faaaogaina uma o latou aso livi malolo, Ona latou soalaupule lea mo lo latou pule e fetuunai ai o latou itula faigaluega, po o le tuua ai foi o a latou galuega ina ia mafai ona tuuina atu le tausiga i taimi uma. E tusa ai ma faamatalaga mai le malo o Iapani, i le 2017 e tusa ma le 90,000 tagata na faamavae mai a latou galuega ina ia tuuina atu le tausiga i le fale.²

E mafai ona utia ia tagata e tuuina atu le tausigai i le ogatotonu o le manao e fesoasoani atu a o loo manaomia foi e i latou lava le fesoasoani. Latou te le mananao e faitio pe faalotovaivaia i latou o loo latou tausia; o le mea moni, latou te lagonaina le uunaiga e taumafai e ausia o latou faamoemoega uma. E toatele e totogi atu taumafaiga ma osigataulaga e tele mo ni vaitaimi faaumiumi. A aunoa ma le lagolago faaleagafesootai, e ono taofia e tagata tausi latou mafatiaga ma le tiga i totonu. O nisi e pagatia ona o le popolevale, loto popole, ma le vaivai faaletino po o le vaivai o le mafaufau. O le tausiga e aafia ai le tulaga lelei o le olaga, ma faapea ai foi, e tusa ai ma sailiiliga, o le umi ai i le tausiga o le a iu ina oo i le lagonaina o le mafatia ma le faanoanoa.^le3

E taua mo e tuuina atu le tausiga po o tausimatua /tausitama ona malamalama e tatau ona latou:

Le lagonaina le maasiasi i le faasoaina atu o o latou atugaluga ma luitau i isi.
Aoao e faalagolago i tagata o le aiga ma punaoa i fafo atu.
Talia le lagolago mai punavai eseese.

Na taumafai tagata suesue e faailoa mai mea moni e faaitiitia ai le avega o le tausia ma iloa ai metotia o le a faaleleia ai lo latou soifua manuia faaletino ma le mafaufau. Ua latou iloa e fesoasoani nei mea:

Faasoa atu le malamalama i luitau taitasi o loo feagai ma e tuuina atu tausiga, e aofia ai se silafia o laasaga o le tuuina atu tausiga o le soifua maloloina na faaitiitia.
Ia faateleina le faalavefau o le aiga.
Ia malamalama ma faaaoga ia punaoa o alalafaga.
Faalagolago i le lagolago faaagafesootai, i totonu ma fafo o le aiga.
Faalogo ma le totoa i manao ma naunauga o tausimatua/tausitama.
Faaaoga tagata e toatele e faamama ai avega a tausimatua/tausitama.

O Poloaiga Muamua ma le Lona Lua

O le mea moni, o le Matai tuuina atu tausiga o lo tatou Faaola o, Iesu Keriso. Ma e mafai ona tatou aoaoina ni mea se tele e uiga i le tausiga FaaKeriso e ala i le suesueina o mea na Ia taua o poloaiga sili muamua ma le lona lua:

“Ona fetalai atu ai lea o Iesu ia te ia, E te alofa atu i le Alii lou Atua ma lou loto atoa, ma lou agaga atoa, ma lou manatu atoa.

“O le poloaiga muamua lena ma le sili.

“E faapena foi lona lua, E te alofa atu i le lua te tuaoi, ia pei o oe lava ia te oe” (Mataio 22:37–39).

I nei fuaiupu, ou te talitonu o loo tuuina mai e le Alii se taiala e patino lava e fesoasoani ia i latou o loo tausia isi. O le mea muamua lava, ia alofa i le Alii. Aua nei faatuatuanai i mea faigofie e fafagaina soo ai oe faaleagaga. Tatalo. Faitau tusitusiga paia. Ia maua le filemu i lou loto. Lagonaina o le mana ma le malosi o le alofa o le Tama Faalelagi mo oe.

Atonu ua faatumulia outou i le alofa mo o outou tuaoi—i le tulaga lenei, le tagata o loo e tausia. Ae pe o e alofa foi ia te oe lava, i se auala amiotonu? O le tausiga o se isi tagata e mafai ona aveese ai ni mea se tele mai ia te oe, o lea e taua ai le faaleleia o oe lava i soo se taimi e te mafaia ai. Afai e te faamaoni i le “alofa atu i le lua te tuaoi, ia pei o oe,” lava ia te oe o le a e manao e faafou lou malosi ina ia tumau ai lou malosi ma mafai ai ona faaauau lau auaunaga.

Toefaamalosia Oe Lava

Sa saunoa Elder Jeffrey R. Holland o le Korama a Aposetolo e Toasefululua:

“Mo outou o e saili ma le naunautai e tauave avega a le tasi ma le isi, e taua ona e toefaamalosia oe lava ma toe faatulaga oe lava pe a ua tele naua mea e faamoemoe mai e isi mai ia te oe, ma faapea ona tele naua ai lou malosi e alu ai. E leai se tagata e malosi naua e faapea ona latou le lagona ai le vaivai po o le le fiafia pe iloa ai le manaomia ona vaai faalelei i latou lava. …

“E tatau foi ona tausi faalelei i latou e tausia isi tagata. E tatau ona lava lau penisini i le tane ona faatoa mafai lea ona e fesoasoani i isi.”⁴

Ma sa saunoa mai Peresitene Henry B. Eyring, fesoasoani lua i le Au Peresitene Sili: “E ui lava e matua tauia le auaunaga faaloaloa atu ma le alofa i tagata, ae ua outou aoaoina o loo i ai ni tapulaa faaletino, faalelagona, ma mea tautupe i le mea e mafai ai. O le tagata e lava le umi e tuuina atu ai se tausiga e mafai ona avea ma se tasi e manaomia le tausiga.”⁵

O E Tuuina Atu Tausiga o ni Soo o Keriso

E tatau i taitai o le Ekalesia ma i latou e tuuina atu le tausiga ona galulue faatasi e faafetaiaia ia luitau faapitoa o aiga taitasi, e aofia ai galuega, luitau o le faaletino ma le mafaufau, ma faafitauli o le sootaga faaleaiga ma le faaipoipoga. E tatau ona fautuaina tagata e tuuina atu le tausiga e aua le soona faaaogaina lo latou gafatia ona o le atuatuvale ma taimi o faigata, ma e tatau ona faamanatu soo ia i latou e faaalu sina taimi e toe maua ai lo latou malosi.

I lo’u aafiaga, i le avea ai ma se fesoasoani ma i lo’u lava aiga, ua ou iloa ai o i latou o loo tausia isi e masani ona latou lagona faapea e tatau ona latou faia mea uma e i latou lava. Ae e le moni lea mea. O tagata e tuuina atu le tausiga e le taliaina le fesoasoani, e toetoe o taimi uma e uma ai le “malosi” i nisi taimi. E manaomia ona latou faatagaina isi e fesoasoani atu ia i latou. E manaomia lo latou fefautuaai ma aiga, uo, ma taitai o uarota po o paranesi ma uso ma tuafafine mo auaunaga. O i latou o e naunau e fesoasoani i se tasi o loo tuuina atu tausiga e manaomia le faaaloalo i manaoga o le o loo tuuina atu le tausiga e faamanuia ma leoleo e pele ia i latou.

O nisi nei o mea e ono fesoasoani e talanoaina faatasi:

O le a le lagolago o loo avanoa mai tagata o le aiga?
O le a se mea o le a maua ai ni avanoa mo le e tuuina atu tausiga e malolo ai mo ni nai minute, pe tasi se itula pe lua foi?
E faafia ona aoga asiasiga? O a ituaiga o asiasiga?
E mafai faapefea e le e tuuina atu tausiga ona maua le taimi e faafou ai feagaiga e ala i le auai i le malumalu, alu i le lotu, ma le mauaina o le faamanatuga?
E mafai faapefea ona manuia le e tuuina atu tausiga mai le na o le talanoa atu i se tagata?
Pe o i ai ea se manaomia mo se fesoasoani i meaai, femalagaaiga, po o polokalama a le malo?

I le avea ai ma tagata o le Ekalesia, tatou te saili ia avea ma soo moni o Iesu Keriso. Ou te manao ia outou faasoa atu a outou mea i e matitiva, ia taitasi le tagata ma faia e tusa ma mea ua ia te ia, e pei o le fafagaina o e ua fia aai, faaoofuina o e ua lē lavalava, asiasi atu i e mamaʼi ma auauna atu mo lo latou mapusaga, faaleagaga ma faaletino, e tusa ma o latou manaoga” (Mosaea 4:26). I le avea ai ma Au Paia o Aso e Gata Ai, tatou te fiafia e auauna atu. E ese le manaia o le vaai atu i fanau o tausi o latou matua. E matagofie foi le vaai atu i uso ma tuafafine mo auaunaga o loo fesoasoani atu ia i latou, siitia o latou agaga, ma tausoa a latou avega.

Ma i le taimi lava e tasi, o le tuuina atu o le tausiga ma i latou e fesoasoani atu e manaomia le “vaai ia faia nei mea uma i le poto ma le faatulagaga lelei; ona e le tatau i se tagata ona momo’e televave atu nai lo le malosi ua ia te ia” (Mosaea 4:27).