Autalavou Matutua
O le Tumau Malosi a o Tuua e e Pele le Ekalesia
Sa ou te’i ina ua filifili lou uso e tuua le Ekalesia, ae sa ou maua ni auala e faaauau ai pea se mafutaga alofa ma tausia malosi ai lau lava molimau.
E lei leva ona ou foi mai i le fale mai la’u misiona ae tau mai e ou matua ia te au e le o toe fia alu lou uso e 19 tausaga le matua i le lotu. Sa ou tei — ou te lei vaai faalemafaufau o le a tuua e lou uso le Ekalesia.
Ou te manatua le imeli atu ia te ia e uiga i autu o le talalelei a o ou i ai i lau misiona ma fesili atu ia te ia pe manao e auauna atu i se misiona. Sa lei mautinoa e ia, ma o le toe tepa i tua i nei imeli, na ou iloa ai o loo i ai ni faailoga sa lei mautinoa e ia e uiga i le talalelei.
Sa amata ona ou mafaufau e uiga i mea sa atonu e mafai ona ese lo’u faatinoina. Ma sa ou fesiligia pe aisea na tupu ai lenei mea i le taimi lenei. Sa ou le fiafia ona sa ou manao lava ia maua se molimau mo ia lava, ae sa ou iloaina foi sa ou manao i ai mo au. Sa ou manao ia te ia ma te o faatasi i le lotu, faapea foi ma le alu i se misiona, ina ia mafai ai ona matou talanoa faatasi e uiga i o ma aafiaga. O se luitau la mo au ina ua ia le manao i se tasi o na mea.
Sa na o le lua tausaga na ou faaaluina i lau misiona e talanoa ai e uiga i mea tau lotu ma talitonuga i tagata, o lea sa ou le malamalama ai pe aisea na matua faigata ai ona talanoa atu i lou lava uso e uiga i nei mea, ae sa faapena. Na luitauina ai lou faatuatua i se auala fou. I lau misiona, o le luitau o le galue malosi, ia fiafia i aso uma, ma ia faatuatua o le a lelei mea uma. Ae mo lou uso, sa matuai ese lava le lagona.
Sa aoaoina au i lau misiona e fai atu ni fesili musuia ma ole atu mo se malamalamaaga. Ae ou te lei iloa tagata sa ou aoaoina muamua i lau misiona. Na pau lava la’u mafutaga ma i laua o le aoao atu ma le fesoasoani ia i latou e latalata atili atu ai ia Keriso. Sa ou iloaina lou uso mo lona olaga atoa, ma e lei i ai lava se mafutaga o le taumafai e fesoasoani e aumai o ia ia latalata atili atu ia Keriso.
Ou te manatua se ma talanoaga i se aso sa ou fesili ai ia te ia e uiga i le Ekalesia. Sa fai mai o ia e le o i ai sana molimau e uiga i nisi o aoaoga. Ana faapea o se tasi lea o tagata sa ou feiloai i ai i lau misiona, o lau tali atu o se tasi o le faaaloalo ma le taliaina e le na o lona lei saunia i le taimi nei, ma atonu foi o nisi faifeautalai o le a aoaoina i latou i se taimi mulimuli ane. Ae ona o lou alofa mo lou uso, sa sili atu ai ona faigata ona faaali atu lena lava tulaga o le malamalama. Sa na ona ou manao ia ona iloa le mea na ou iloa, ma sa ou manao ia ona lagonaina le Agaga lava lea e tasi ma le alofa mai le Atua e pei ona sa ou lagonaina. Sa faigata ona ou taliaina e lei filifili e ia le talalelei.
Na alu sina taimi ou te faamasani ai i le mea ua tupu, ae o le taimi nei, ua toeitiiti atoa le lua tausaga talu ona ou foi mai i lau misiona, o loo lelei lava le ma mafutaga ma lou uso. Ma te le talanoa tele e uiga i le talalelei, ae ma te talanoa e uiga i isi mea. Ou te moomoo pea ina ia mafai ona tutusa le talalelei ia i maua, ae e tele isi mea ma te tutusa ai. Ma te tafafao lava ma faia faatasi isi mea, ma ou te alofa ia te ia mo le tagata ua i ai o ia, aua o ia o se alii lelei tele.
O Mea na Ou Aoaoina
I lenei taimi atoa, e i ai nai mea ua ou aoaoina atonu e aoga pe afai o loo e tauivi ma se pele ua tuua le Ekalesia, ina ia fesoasoani ia te oe ia le gata i le faatumauina o se sootaga lelei ma i latou ae ia tausisia foi ma le malosi lau molimau i mea atonu e avea ma se taimi faigata faaleagaga mo oe.
-
Ia manatua e i ai i tagata uma lo latou faitalia ma e le o oe le mafuaaga pe a aluese se tagata mai le Ekalesia.
-
Faamalosia lou sootaga ma i latou. Faaali atu e le aunoa ia i latou le alofa. Taumafai e aua le faatagaina la latou sootaga ma le Ekalesia e aafia ai lou sootaga ma i latou.
-
Faaalu faatasi le taimi e faia ai mea e te lua fiafia uma i ai.
-
E ui lava e le mafai ona e faia filifiliga mo isi tagata, ae e mafai ona avea oe ma se faataitaiga ma lagolagoina latou.
-
Tatalo e uiga i le tulaga. E silafia e le Tama Faalelagi Ana fanau, o lea e mafai ai ona e mautinoa o le a sili atu lona silafia o le auala e fesoasoani ai ia te oe e foia lenei mea.
-
Sailiili i tusitusiga paia. Na fesoasoani tele faataitaiga mai tusitusiga paia ia te au, ma sa ou iloaina o loo taatele lava lou tulaga. E oo lava i tusitusiga paia, o le toatele o aiga e toatasi pe sili atu foi tagata e lei talitonu pe sa tetee foi i le Ekalesia, ae sa faaalia pea e lo latou aiga le alofa agai ia i latou.
-
Talanoa faalauaitele e uiga i ou lagona ma tagata o lou aiga o e ua malolosi i le talalelei. Atonu o le a latou maua foi na manatu, ma atonu latou te manaomia se tasi e faasoa mai foi. Fesoasoani le tasi i le isi.
-
Ma le mea mulimuli, aua nei faatuatuanai lou lava faaleagaga.
Tausia Ia Malosi Lau Molimau
A tuua e e pele ia te oe le Ekalesia, e mafai ona avea o se luitau mo lo outou lava faatuatua, aemaise lava pe afai o le tagata lea na tuua o se tasi na e taulai atu ai i luga i se faatulagaga o le talalelei. Atonu e te amata ona fesiligia vaega patino o lau molimau. Ou te iloa sa ou tauivi ma ni fesili i le taimi na o ese ai lou uso. Ae o le mea lena e taua tele ai le vaai lelei o oe lava ma lau molimau. Afai e te fausia ma faatumauina lau lava molimau, e te le manaomia ona matau po o a filifiliga e faia e isi.
Ia manatua tatou te tau fai fiafia i le faavaivaia o lo tatou faatuatua pe afai tatou te le galulue e faamalosia. O le toatele o tagata e le o ese mai le malosi i se aso ina ia tuua ai le Ekalesia i le isi. Ae afai e galo ia te oe ona faia ni mea laiti e faamalosia ai lau molimau i aso uma, atonu o le a e toe tafetafea atili ai ma aveesea mai le talalelei e aunoa ma le iloaina. O le alu i le faavae i autu e pei o le suesue i au tusitusiga paia, tatalo i aso uma, ma le faatinoina o na faatinoga laiti o le faatuatua ma le tapuai e mafai ona i ai se uunaiga mamana i lau molimau.
O le mea e sili ai, afai o le tuua ai e lau pele le Ekalesia o loo aafia ai lau lava molimau ma mafua ai masalosaloga po o fesili i lou mafaufau, ia manatua le fautuaga poto e “masalosalo i ou masalosaloga ae e te lei masalosalo i lou faatuatua”1 ma ia “taofi mau i mea ua uma ona e iloa.”2
Saili e le Aunoa e Faalogo ia te Ia
Ou te manatu e taua mo le autalavou matutua le faia o se fuafuaga mo o latou olaga, e pei o le iloaina o nofoaga e fia o i ai ma mea latou te mananao e fai. Ae e tatau ona tatou mafaufau loloto ma faaaofia ai le Alii i na fuafuaga ma i o tatou olaga i aso taitasi. E mafai ona faigata ona fai pe a i ai le tele o isi a tatou tiutetauave i aso taitasi, ae e mafai lava ona tatou faaavanoaina e le aunoa le taimi mo le Tama Faalelagi ma Iesu Keriso. Ma afai tatou te faia lena mea, o le a mafai lava ona tatou tatalia pea afa o le olaga. ‘Ou te mafaufau i le mau i le Roma 8:31: “Afai ua ‘au ma i tatou le Atua, o ai se faasaga tau mai ia i tatou?”
Sa aoao mai e Peresitene Russell M. Nelson le auala i aso a sau, o le a le mafai ai ona tatou ola faaleagaga e aunoa ma le Agaga ma le mauaina o faaaliga patino mo o tatou lava olaga.3 Sa ou iloaina lava o le mauaina o faaaliga patino e taua, ae e lei avea lava au ma se mea sili i le sailia. Ou te iloa e mafai ona sili atu mea ou te faia i le valaauliaina o le Agaga i lou olaga i aso taitasi.
O faaaliga faaletagata lava ia e tutusa lava le faamatalaina — ae e patino lava. Ma e mafai ona tatou amata aoaoina le auala e fetalai mai ai le Alii ia i tatou e ala i le ole atu ia te ia mo se fesoasoani ia iloa ai lona siufofoga ma lona aao i o tatou olaga. O Ia o le faiaoga sili.
E le mafai ona tatou pulea i taimi uma ia faatinoga a isi, ae maise lava pe a oo i mataupu o le faamalolosia o lo tatou faatuatua po o le ola ai i le talalelei. Ae ou te iloa e tusa lava pe o i latou ua sili lo tatou alolofa i le lalolagi e i ai luitau o le faatuatua, pe a tatou faamuamua le Atua ma mulimuli i lona finagalo ma taumafai e faalogo ia te ia, o le a faamanuiaina pea lava i tatou i tali, faatasi ai ma se molimau malosi, faatasi ai ma le faaaliga faaleagaga tatou te manaomia pea ona mulimuli ai ia te Ia.