Tulimatai le Atoatoaga o Keriso
Saunia e Elder Jeffrey R. Holland
O Le Korama a Aposetolo e Toasefululua
Mai se saunoaga i le faigalotu mo le autalavou matutua faale-itu, “The Measure of the Stature of the Fulness of Christ,” na tuuina atu i Stanford, Kalefonia, ISA, i le aso 9 o Fepuari, 2020.
I lenei vaitau o le Eseta, ia agai atu ia Iesu Keriso ma saili Lona leo faamalosiau o le filemu.
Aua Tou te Matatau saunia e Michael Malm
Pe mafai ona ou ofoina atu ni nai mafaufauga e uiga i le sailiga patino o outou taitoatasi o le a faia i le sailiga “o le atoatoa” o le tulaga o Keriso (tagai Efeso 4:13). Ou te faamoemoe o le a avea ma se mea e taua ia te oe i lou olaga ma i tulaga e te maua ai outou lava.
O nisi o outou o i le mea e te fia i ai, po o lou silafia o le mea e te fia alu i ai i o outou olaga. O nisi o outou e foliga mai ua tele faamanuiaga ma filifiliga matagofie o loo i o outou luma. O nisi o outou e lagona, mo se taimi ma po o le a lava le mafuaaga, e le tagolima ma e itiiti ni auala faamanuiaina i o outou luma.
Ae po o fea lava e te alu i ai, ma e ui e te galue e ala i ou luitau e alu ai iina, ou te fai atu ia te oe e te sau i le Faaola, o Iesu Keriso, o le laasaga muamua lea i lou oo atu i lou lava taunuuga patino, i le sailia o lou fiafia ma le malosi atoa, ma i le ausiaina o lou taunuuga tupito ma le manuia (tagai 1 Nifae 10:18; 2 Nifae 26:33; Ominae 1:26; Mataupu Faavae ma Feagaiga 18:11).
O na mea uma e mafai ona fai mo oe pe afai o le tali i le fesili “O fea ua e alu i ai?” (Mose 4:15) e “Po o fea lava e te i ai, le Alii e.”
E mafai ona luitauina le olaga. Ua ia i tatou tiga ma faanoanoaga ma faafitauli moni e tatau ona galueaiina. Ua i ai a tatou faanoanoaga ma tiga, ituaiga uma o lugā ma lalō. Ae ua tele lava upu ua tau mai e le Alii ma perofeta, e uiga i le auala e fetaiai ai ma na faafitauli e faatumu ai se api talaaga e i ai tusitusiga ma ata.
“Ou Te Tuuina Atu ia te Outou le Manuia”
O le faamanuia a le Faaola i luga o Ona soo a o agai atu o ia i le tiga ma le ogaoga o Ketesemane ma Kalevaria o le mea aupito sili lea ona faamomoiloto o nei upu. I lena po, o le po o mafatiaga aupito maoae ua tupu i le lalolagi pe o le a i ai, na fetalai mai ai le Faaola: “Ou te tuuina atu ia te outou le manuia, o lo’u manuia ou te avatu ai ia te outou. … Aua le atuatuvale o outou loto, aua foi tou te matatau” (Ioane 14:27).
O se vaaiga ina a mataina o le olaga i itula pito sili ona faigata! E mafai faapefea ona Ia fai mai faapena, i le feagai ai ma mea ua Ia silafia o loo feagai ma Ia? E mafai ona Ia faapea mai ona o Ia o le Ekalesia ma le talalelei o le fiafia e faavavau! Mo i tatou, ua uma ona malo le manumalo. O loo ia te Ia le vaaiga e faavavau; O loo Ia faasoaina atu le ata tele.
E ui i lea, ou te manatu o nisi o i tatou, e tatau lava ona i ai pea se vaega o le tupuaga faa Puritana o loo faapea mai ua sese le faamafanafanaina po o le fesoasoani, e faapea e tatau ona tatou faanoanoa i se mea i taimi uma. Ou te gauai atu ina ia “loto tele” (Ioane 16:33) i le sailiga “o le fua o le ua matua ma le atoatoa o Keriso” (Efeso 4:13) atonu o le poloaiga lena ua i ai, e oo lava i loto o isi o le Au Paia o Aso e Gata ai faamaoni, toeitiiti lava a le usitaia i se tulaga lautele; ae e mautinoa lava e leai se mea e sili atu ona mamafa i le finagalo alofa o le Alii.
E pei ona ou popole pe a ou i ai i se mea i o latou olaga, o se tasi o laʻu fanau na matua popole lava pe le fiafia pe le usiusitai, ae ui i lea o le a sili atu ona ou matua faanoanoa tele pe a ou lagonaina i se taimi faapena, le lē mafai lea e lena tamaitiiti ona talitonuina au e fesoasoani pe manatu foi o mea e fiafia i ai e le taua ia te au pe le saogalemu i la’u tausiga.
I lena lava manatu e tasi, ua ou mautinoa ai e leai se tasi o i tatou e mafai ona talisapaia le loloto o manua o le loto alofa o le Atua le Tama po o lona Alo, le Faaola o le lalolagi, pe a la iloa e le lagona e tagata le talitonu i lo Laua tulaga po o le malupuipuia i o Laua aao po o le faatuatua i a Laua poloaiga. Au uo e, mo lena lava mafuaaga, ua i ai so tatou tiute ina ia fiafia!
“Ua Lava Lona Alofa Tunoa”
O se tasi o fautuaga e uiga i le sailia o Keriso ma le fua o Lona atoatoaga na tupu ina ua uma ona faia e Iesu le vavega o le fafagaina o le 5,000 mai potoi areto e lima ma i’a e lua (tagai i le Mataio 14:13–21). (O lea foi, aua le popole i le uma o vavega a Keriso e fesoasoani ai ia te outou. O Lona “alofa tunoa e lava lea” [2 Korinito 12:9]. O se lesona faaleagaga lena e faavavau o lenei vavega. E tele naua Ana faamanuiaga mo tagata uma ma e le uma faamanuiaga! Ia talitonu ma olioli i Lana ofo “o le areto o le ola”! [Ioane 6:35].)
Ina ua uma ona fafagaina e Iesu le motu o tagata, sa Ia tuuina atu i latou e o ma auina atu Ona soo i totonu o se vaa fagota e sopoia atu i le isi itu o le sami o Kalilaia. Ona Ia “maliu ae lea ua na o ia i le mauga e tatalo” (Mataio 14:23).
A o i ai le au soo i totonu o le vaa, ua lata i le afiafi, ma sa sousou le po. Atonu na malosi le matagi mai le amataga. Ona o le matagi, atonu o le a le mafai ai lava e nei alii ona sisi a latou la ae sa faaaoga na o le apefoe—ma o se galuega faigata.
Ua tatou iloa lenei mea ona e oo mai i le taimi o le “leoleoga e fa o le po” (Mataio 14:25)—i se mea i le va o le 3:00 ma le 6:00 i le taeao—sa na o ni nai maila na latou faimalaga ai (tagai Ioane 6:19). E oo atu i le taimi lena, na i ai le vaa i se afa matautia.
Peitai, e pei ona masani ai, sa leoleoina i latou e Keriso. I le vaaia ai o latou faigata, na faigofie ai lava i le Faaola ona agai sao i le latou vaʻa, na savali i luga o galu e fesoasoani ia i latou.
Finisher of Faith, saunia e J. Alan Barrett
“Aua Tou Te Matata’u”
I se taimi o lo latou atuatuvale tele, sa latou vaai atu ai ma iloa se foliga i le pogisa ma se ofutalaloa o loo lelea, o savali agai atu ia te i latou i galugalu o le sami. Sa latou alalaga atu i le fefefe i lea vaaiga, ma le mafaufau o se aitu o loo savali i luga o galu. Ona oo lea, i le afa ma le pogisa—ina ua foliga mai ua matua sou lava le sami ma sa foliga mai ua laitiiti tele lo latou vaa—sa oo mai ai le leo sili ma le faamautinoaga o le filemu mai lo latou Matai: “O a’u lava; aua tou te matatau”(Mataio 14:27).
Ua faamanatu mai ia i tatou e lenei tala i tusitusiga paia, o le o mai ia Keriso, o le sailia o Lona atoatoaga, po o Lona afio mai e aumaia ai i tatou i le atoatoa, o le laasaga muamua lava e mafai ona faatumuina i tatou i se mea e pei lava o le tele o le fefe. E le tatau, ae o nisi taimi e tupu. O se tasi o mea uigalua maoae o le talalelei e faapea, o le punavai tonu lava o le fesoasoani ma le saogalemu lea ua ofo mai ia i tatou, o le mea lea atonu o loo tatou sosola ese mai ai ona o le puupuu o la tatou vaai faaleolaga nei.
Po o le a lava le mafuaaga, ua ou vaai i tagata sailiili ua alo ese mai le papatisoga. Ua ou vaai i faifeautalai ua alo ese mai i se valaauga faamisiona. Ua ou vaai i manamea ua alo ese mai i faaipoipoga. Ua ou vaai i tagata o le ekalesia ua alo ese mai valaauga faigata. Ma ua ou vaai i tagata ua alo ese mai le latou auai ai i le Ekalesia.
Ua tele naua taimi tatou te alo ese ai mai mea tonu o le a laveaiina ai i tatou ma faatoafilemu ai i tatou. Ua tele taimi tatou te vaai ai i tautinoga o le talalelei o se mea e fefe ai ona tuulafoaiina ai lea.
Na saunoa Elder James E. Talmage (1862–1933): “E oo mai i olaga o tagata matutua uma ni aafiaga e pei o le tauivi o le au malaga folau o le afa i matagi eseese ma le sami taufaamatau; o le masani ona o le po o le tauiviga ma le matautia, e matua maualuga atu lava a o lei faaali mai le fesoasoani; ma, o le tele o taimi o le fesoasoani e faasaoina ua faaseseina mo se mata’u tele. [Ae,] e pei o le o mai i [nei soo] i le lotolotoi o vai faigata, e oo mai ia i latou uma o e e galulue i le faatuatua, le leo o le Laveai — ‘O A’u lava; aua e te matatau.’”1
O Mai ia te Ia
O le mea ofoofogia e uiga i lenei valaaulia ina ia maua le Faaola, ia omai ia te Ia ma tulimatai atu i le atoatoaga o Lona lava tulaga, e mafai e soo se tagata ona faia. E le faapea la o tagata uma e te iloa e manao e tausi poloaiga, pe o le a tausia foi e tagata uma o loo outou feiloai atu i ai ia poloaiga. Ae o le uiga o lena mea, e mafai ona tausia poloaiga e aunoa ma se meaalofa faapitoa po o se tofi e faia ai.
Ou te aioi atu mo le faatuatua lea “susulu ma malamalama ma mama aiai ma tiotio,” ia aumaia Keriso i “inisi uma o la tatou aganuu,”2 ma mo le tulaga o Keriso ia i ai i le fuataga atoa i o tatou olaga (tagai i le Efeso 4:13).
O le a luiina oe e le olaga. O le a oo mai faigata. O le a oo mai le loto nutimomoia. O le a maliliu e e pele. O lea la, po o fea lava e te alu i ai, ia muamua ona e alu atu ia Iesu Keriso. Ia manatua o Ona puapuaga ma le Toetu e mafai ai ona tatou manumalo mai faigata ma le oti. Ia faia a outou feagaiga ma Ia ma tausia i latou ao outou faimalaga ai pea.
I o’u vaivaiga uma, lea ou te faailoa atu ai, ou te moomoo ina ia tatou ausia “le fua o le ua matua e tatau ma le tumu o Keriso.” Ou te fia sau ia te Ia. Ou te manao ia te Ia, afai e mafai, ia sau ia te au. Ou te manao moni lava i lena faamanuiaga mo outou uma.