Aua Nei Misia le Faigalotu Lenei
Faaaoga Tatau le Taimi
Mai se saunoaga i se faigalotu, “Ina Filemu, ma Ia Outou Iloa o Au lava O Le Atua,” na tuuina atu i tamaiti aoga i le Kolisi o Ensign i le Aai o Sate Leki, Iuta, ISA, i le aso 3 o Novema, 2020. Faitau le tusiga atoa i le ensign.edu.
O le auala e te faaaluina ai lou taimi, ma mea e te faaaluina i ai, e telē le taua.
Mai lava i ona po o Atamu ma Eva seia oo i aso o Iosefa ma Ema Samita, na suia lemu le lalolagi mai le tasi augatupulaga i le isi. E aunoa ma ni moli auala, moli tetele, ma le faaleagaina o le malamalama, sa fiafia tagata i le tele o le malamalama faalelagi moni. Peitai, i aai o aso nei e toetoe lava a le mafai ona vaai atu i le lagi i le po e pei ona sa faia e Aperaamo, Mose, Ruta, Elisapeta, Iesu, ma uluai Au Paia o Aso e Gata ai.
O tagata i taimi ua mavae sa fiafia foi i se filemu faalenatura. Ae o le asō, o le vavaō mai taavale, vaalele, ma musika ua lē lagona ai le lalolagi moni faalenatura. E oo lava i le vaomatua mamao, e masani lava ona solia le filemu i vaalele i le lagi o i luga.
Ma o tagata o aso ua mavae na oo i le mauaina o se to’afilemu i ni auala e le mafai ona tatou mafaufauina. O nei aso, e tusa lava pe tuuatoatasi i tatou, e mafai ona tatou i ai i alafesootaiga eseese i a tatou masini feaveai, komepiuta feaveai, ma televise. O le lalolagi lē tumau oloo tatou ola ai ua tumu i mea e faafiafiaina ai i tatou ma faaalu ai le taimi.
O i ai Sou Taimi?
I le avea ai ma se Aposetolo, ou te fesili atu nei ia te outou i se fesili: e i ai ni ou taimi filemu paganoa patino? Sa ou mafaufau pe o i latou o e na ola i le taimi ua tuanai na tele atu lo latou avanoa nai lo i tatou i le taimi nei e vaai, lagona, ma iloa le faatasi mai o le Agaga. Afai e le maua e lou olaga se taimi filemu, e mafai ona e amata i le asō e saili mo sia vaega?
E taua le filemu ma le faalogo ma mulimuli i le Agaga. E manaomia e tagata uma le taimi e mafaufau loloto ai ma tomanatunatu ai. E oo lava i le Faaola o le lalolagi, i le taimi o Lana galuega i le olaga nei, sa mauaina se taimi e faia ai: “Ma ina ua uma ona ia auina ese atu o le motu o tagata, sa alu ae o ia i luga o se mauga e tatalo ai: ma ina ua oo mai le afiafi, sa tuua na o ia” (Mataio 14:23).
E tatou te manaomia uma lava se taimi e fesili ifo ai ia i tatou lava ni fesili pe i ai se faatalanoaga patino masani ma i tatou lava. E tele taimi tatou te pisi ai ma e matua leotele le lalolagi ma e faigata ona faalogo i upu faalelagi “Ia filemu, ma ia outou iloa o Au lava o le Atua” (Salamo 46:10; tagai foi Mataupu Faavae ma Feagaiga 101:16). Tatou te manaomia lenei faamautinoaga.
O masini eletonika feaveai o se faamanuiaga, ae e mafai foi ona latou faalavelave ia i tatou mai le lagonaina o le “leo malu, itiiti.” E tatau ona avea i latou ma ni a tatou auauna, ae le o ni o tatou matai. Mo se faataitaiga, afai i se taimi o mulimuli mai i le po nei, e te faasoa atu ai ni mafaufauga musuia mai lenei faigalotu i luga o ala o faasalalauga faaagafesootai, o lau telefonipoto o se auauna. Afai e te matamata i soo se mea i le Initoneti—aemaise lava pe afai o loo e sailia ni anotusi e le talafeagai—o lau telefonipoto o lou matai lea.
Manatua le mea na aoaoina e Elia: “Sa lei i ai le Alii i le matagi: … sa lei i ai le Alii i le mafuie: … sa lei i ai le Alii i le afi,” ae na fetalai mai le Alii i le “leo filemu ma le itiiti” (1 Tupu 19:11–12).
O Faapefea Ona E Faaaluina Lou Taimi?
I le faamaoni lava, o le a le tele o le taimi e te faaaluina i aso uma i lau telefonipoto po o le tapeleti, e le o aofia ai mo galuega, aoga, po o le Ekalesia?
O le latou faaaogaina e talafeagai, ma o latou o ni faamanuiaga. Tainane, a amata ona faalavelave telefonipoto i a tatou fegalegaleaiga ma uo ma aiga--aemaise lava le mea e sili ona taua, o le Atua--e manaomia ona tatou faia se suiga. Mo nisi o outou, e itiiti se fetuunaiga; mo isi, atonu e tele.
Ou te popole foi i le teletele o agafesootai i feau tusitusia, Facebook, tweet, ma le Instagram ua suitulaga i le talatalanoa. O le uiga o lau tala o le talanoa ma le faamaoni, faafesaga’i o le tasi i le isi. O le uiga o lau tala o le talanoa i le tatalo ma lo tatou Tama Faalelagi. O le uiga o lau tala o le talanoa e uiga i mea e sili ona taua i le olaga.
O le tele o taimi, e i ai faatasi autalavou i se potu e tasi ma aiga po o uo ae pisi i le fesootai atu i se tasi o lē e lē o i ai iina. Ua latou misia se avanoa e fefaasoaai atu ai ia i latou o latalata mai. Pe a e vaai i lenei mea o tupu, atonu e manaomia ona e auina atu ia i latou se feau tusitusia ina ia toe gaua’i atu ai!
O nisi o mea e sili ona taua ua ou aoaoina i lou olaga na oo mai i le faalogo atu ia i latou o loo i ai ni aafiaga maoae, o i latou o e sa umi atu o latou soifua ma aoaoina le tele o mea taua e tatau ona ou iloa. Faamolemole ia faaaoga avanoa e asiasi atu ai ma talanoa ma ou matua, uso ma tuafafine o ou matua ma matua o ou matua a o latou faatasi pea ma outou.
Pe E te Faaaloalo i Taimi Paia?
Ou te popole foi o nisi o outou o loo siaki au imeli, Facebook, Twitter, po o le Instagram pe auina atu ni savali tusitusia i le taimi o le faapotopotoina aupito sili ona taua i le Ekalesia toefuataiina a Iesu Keriso o le Au Paia o Aso e Gata Ai—o la tatou sauniga faamanatuga paia. I lenei sauniga taua e tatau ona tatou taulai atu i le Alii e ala i le tatalo, usuina o viiga, ma le aai i faatusa o Lona tino ma le toto.
O le sauniga faamanatuga e le o le taimi lea e siaki ai ala o faasalalauga faaagafesootai, o talafou, po o ‘ai o se taaloga afeleti. E le mafai ona e fesootai atu i le Agaga i le taimi o le faatinoga o le faamanatuga a o e vaavaai i ai pe auina atu se savali i luga o lau telefonipoto po o lau tapeleti. E te manaomia se fesootaiga faaleagaga lea e manaomia ai le Malamalama o Keriso, ma faamautu mai i o outou mafaufau i o outou loto ma le alofa mumu ma le tuuto.
Ou te iloa o le toatele o outou o loo i ai a outou tusitusiga paia ma isi punaoa a le Ekalesia i luga o a outou telefoni ma tapeleti, ma o nisi o matua ma taitai o le Ekalesia o loo popole e uiga i lenei atinaega, a o a’u e leai. Ua faaaogaina pea e le Ekalesia faaleleiga i tekinolosi e uunai ai le galuega a le Alii i luma, aemaise lava i le galuega faafaifeautalai.
Mo se faataitaiga, i le taimi nei o le 98 pasene o misiona i le lalolagi atoa o loo i ai ni faifeautalai e faaaoga ai le telefonipoto o se vaega o a latou galuega. O lenei mea o se faamanuiaga tele, aemaise lava i le lotolotoi o le faamai o le KOVITI-19. Ua matua faaleleia ai lo latou gafatia e fesootai ai ma isi a o latou galulue e saili, aoao atu, ma papatiso. Ua faamanuiaina faifeautalai i ni auala faavavega.
E mataina lava auala e toe tutupu ai vaega na tutupu muamua i le talafaasolopito. I le taimi ua tuanai, sa faasaoina ai e Isaraelu upu a perofeta i luga o tusitaai. I se isi itu, sa faaaoga ai e le au Kerisiano anamua le codex, o le uluai lomiga o le tusi i ona po nei.
Ua tatou i ai nei i le 2,000 tausaga mulimuli ane, ma o loo faitau e tagata ia tusitusiga paia i luga o telefonipoto po o tapeleti—o le faitauina o tusitusiga paia e pei lava ona sa faia e Iesu ina ua tuuina atu ia te Ia se tusi taai a Isaia e faitau mai i Nasareta. E mafai foi ona e “faasolo” (tagai i le Luka 4:17) e sue ai mau, ae faamolemole, aua nei “faasolo” i mea faalavefau i le taimi o le sauniga o le faamanatuga. E talitonu lava, i nai na minute e mafai ai ona e taulai atu i le Togiola a le Faaola a o e saili atu i le Agaga o le Alii e faamanuia oe mo le vaiaso a sau.
Mafaufau e tuu lau telefonipoto po o lau tapeleti i le tulaga mo vaalele mo le poloka o le aso sa atoa. O le a e mauaina pea tusitusiga paia, lauga o konafesi aoao, viiga, ma tusi lesona i le polokalama o le Potutusi o le Talalelei, ae o le a le faalavelaveina oe e ala i feau tusitusia po o isi faasilasilaga.
E Mafai ona e Maua se Taimi mo le Sulufaiga?
E le gata i le mauaina o le taimi e mafaufau loloto ma manatunatu loloto ai, e manaomia foi ona tatou maua se nofoaga, e pei ona taua i le Mataupu Faavae ma Feagaiga, o le a avea ma “se puipuiga, ma … se sulufaiga mai le afa” (Mataupu Faavae ma Feagaiga 115:6).
Tatou te manaomia se taimi faapitoa ma se nofoaga o le sulufaiga lea e mafai ai ona tatou tapeina a tatou masini eletonika ina ia mafai ai ona tatou fesootai atu i le Agaga o le Atua.
O se tasi o nofoaga e sili ona lelei e fesootai ai ma le Agaga o totonu o le malumalu— le maota o le Alii. E moni lava, o le vaega lava lea e tasi e mafai ona ta’ua e uiga i o tatou fale faapaiaina o le Ekalesia, e aofia ai potuaoga o le seminare ma le inisitituti. E mafai ona tatou maua le sulufaiga i totonu o o tatou fale po o fale mautotogi pe a tatou filifili e tau lava o le tapunia o mea ma ia filemu ma ia iloa mea a le Atua.
Ina ia fesoasoani ia i tatou ia iloa le lalolagi lea na mauaina ai e Atamu ma Eva, Aperaamo ma Sarai, ma Iosefa ma Maria le Atua, ma ina ia fesoasoani ia tatou maua se nofoaga e lagona ai ma faalogo i le siufofoga o le Alii i le asō, ou te valaaulia outou e o i le malumalu. Matou te tulimatai atu i le taimi e mafai ai ona toe tatalaina malumalu mo sauniga sui uma. O le taimi lava e matala ai, ou te valaaulia outou ia o i soo se taimi lava e mafai ai ma tape a outou telefonipoto ma teu ese a o lei ulufale atu i le lotoa o le malumalu.
I sauniga uma i totonu o le maota o le Alii, o le a e faalogo ai i gagana matagofie, upu, ma folafolaga na tuuina mai e le Alii i Ana fanau. Ua na o le pau lea o le nofoaga e mafai ona e lagonaina ai na upu matagofie ma le musuia.
Afai e te le o agavaa mo se pepa faataga o le malumalu i le taimi nei, ou te valaaulia oe e saunia oe lava ia e agavaa mo se pepa faataga o le malumalu ma sau i le malumalu i se taimi vave e te mafai ai. Tau ina ia e maua se manao e maua se pepa faataga ma auai soo i le malumalu.
Ou te faamautinoa atu ia te outou taitoatasi a o e alu i le malumalu pe asiasi i le lotoa o le malumalu, o le a e savali i le eleele ua faapaiaina ma e paia. O le a e faalogo i le leo filemu ma le itiiti o le Agaga i totonu o le malumalu po o ona lotoā paia i ni auala e le mafai ona e faia i faleoloa tetele, i faleaiga, ma i nofoaga faitele. O le mea moni, o le malumalu o se nofoaga matagofie e maua ai tali i au tatalo.
E Mafai ona E Faaaluina se Taimi i le Asō?
O le lalolagi o loo tatou ola ai ua vave ona se’e ese mai i aoaoga a Keriso i ana tulafono ma ana agaifanua. O loo galue faasoloatoa Satani e faaluafesasi ai atalii ma afafine o le Atua ma taitaiese mai e ua filifilia mai le faataunuuina o o latou tiute ma le mauaina o se atoaga o faamanuiaga a le Alii.
Ua manao Satani ia outou mafaufau e le lava le taimi mo mausa lelei na outou aoaoina i le fale, i le seminare ma inisitituti, ma i tou misiona — e pei o le i ai o suesuega o tusitusiga paia i aso taitasi, tatalo i aso taitasi, ma le agavaa e taumafa i le faamanatuga i vaiaso taitasi, ma tuuina atu o auaunaga faamaoni, mai le loto. E na te manao foi ia e faatafa ese mai le taua o aso nei ma taua e sili ona ogaoga, ma lē auai ma le naunautai.
Ae ia manatua, o loo tatou i ai i se taua—o se faaauauga o le taua lea na amata i le muai olaga. Aua le na o le tu i le autafa. Faaalu se taimi mo na mausa taua i aso taitasi. “Ia faaofuina le ofutau atoa o le Atua,” e pei ona valaaulia tatou e Paulo ia fai. “Auā tou te le tau ma tagata, a o alii sili, ma faipule, ma alii o le pouliuli o lenei lalolagi, atoa ma agaga leaga i mea o i le lagi.” (Tagai Efeso 6:11–12)
I le avea ai ma se Aposetolo a le Alii o Iesu Keriso, ou te valaaulia outou ina ia faaalu se taimi e auai ai i le taua. Oofu i le ofutau o le Atua, ma fai i le aso lenei. (Tagai Alema 34:32.) Aua le faatali seia oo ina e faaipoipo, amata lau galuega mo le olaga, po o le faasolo ina matua. O loo manaomia oe e le Alii i le taimi nei!