Autalavou Matutua
Pe a Masalosalo, Ia Tatala Pea le Faitotoa i le Faatuatua
E ui lava e i ai taimi tatou te masalosalo ai i o tatou aafiaga faaleagaga, ae e mafai ona oo faafuasei mai lo tatou mautinoa.
Pe na tatou ola ae i le Ekalesia pe na liliu mai mulimuli ane i le olaga, o le toatele o i tatou atonu sa oo i ni taimi o le tuufesili po o le masalosalo. Atonu na tatou maua ni aafiaga faaleagaga ofoofogia ae ua tatou toe mafaufau nei: Pe moi na aafiaga faaleagaga, pe sa na ona ou vaai faalemafaufau i le lagonaina o le Agaga? Ae faapefea pe afai e leai se tasi o nei mea e moni? Ae a au fesili e lei maua lava ni tali? E mafai faapefea ona ou tumau i le Ekalesia pe afai ou te le o toe mautinoa pe moni?
Mo a’u, sa ou ofo i le oo mai o nei fesili ina ua uma ona ou auauna atu i lau misiona! Sa ou iloaina le upumoni ma se talitonuga maumaututu o lea sa ou manao ai ou te alu e talai atu i isi mo se tausaga ma le afa—ae o lea ua ou masalosalo i mea uma na ou iloa ma aoao atu. Oka se maimau pe afai e leai ma se tasi o na mea e moni. Pe sa moni ea la, mea uma na ou aoaoina atu? Pe sa na ona ou manao lava ia moni? Ina ua uma ona vaaia ni uo o tuua le Ekalesia ma ao ou feagai ai ma la’u lava tauiviga o le faatuatua, sa ou mafaufau ai pe na ou faaseseina a’u lava.
I lena taimi, sa lei taofia lo’u alu i le lotu pe usitai i poloaiga ona sa i ai ni a’u fesili tetele. Nai lo lena, ona sa i ai a’u fesili, sa ou taumafai e mulimuli i le fautuaga a Peresitene Russell M. Nelson ina ia “faateleina [lo’u] malosi faaleagaga e maua ai faaaliga.”1
Na ou iloa, “e leai se mea na te tatalaina le lagi e pei o le tuufaatasiga o le faateleina o le mama a’ia’i, usiusitai sa’olele, saili ma le faamaoni, taumafa i aso taitasi i afioga a Keriso i le Tusi a Mamona, ma taimi faisoo e tuuto atu i le galuega o malumalu ma talafaasolopito o aiga.”2 Sa ou lagonaina e taua le faalatalata atu i le Atua. Aua o le mea moni lava, e na o Ia lava e i ai tali i a’u fesili.
Tala a Eunike
I se tasi aso a o ou faitau i le Au Paia: O Le Tala i le Ekalesia a Iesu Keriso i Aso e Gata Ai, na ou tau ai i se tala mataina e uiga i se tamaitai i le popofou o le Toefuataiga. Na foliga mai na tutusa a ma fesili ma popolega ma Eunike Franklin.
Na papatiso Eunike i Niu Ioka e se faifeautalai na igoa ia Elia Able. Sa liua moni o ia i le talalelei i lona papatisoga. Peitai, ina ua alu Elia i Kanata e talai ai, sa amata ona le mautonu Eunike i le talalelei ma le mea sa ia iloaina e moni. Sa amata ona ia mafaufau pe o Iosefa Samita o se perofeta moni ma pe o le Tusi a Mamona o se tusitusiga paia moni. E tele po na le moe ai o ia, i le mafaufau atonu ua faaseseina o ia.
Sa faaali e le Alii le tauiviga a Eunike ia Elia i se miti, ma sa vave ona ia toe foi atu i Niu Ioka. Ina ua ia tuitui i lona faitotoa, sa faateia Eunike—sa fuafua o ia e tau atu ia te ia pe a la toe fetaui ua ia le toe talitonu. Nai lo lena, sa ia faatagaina o ia i totonu [o lona fale]. Ina ua valaaulia o ia e Elia i lana lauga i lena afiafi, sa musu o ia ma sa lei fia alu. Peitai na iu lava ina ioe i ai ma sa alu e faalogologo i le mea sa ia fai mai ai.
I lana lauga, na sii mai ai e Elia le 1 Peteru 4:12, lea e fai mai “aua tou te manatu e le o se mea e ese i le tofotofoga mu e tofotofoina ai outou.” O le tofotofoga mu lea sa saili e faaumatia le faatuatua o Eunike sa le mafai ona faamanuiaina—a o faalogologo Eunike i le lauga a Elia, na mouese atu ona masalosaloga. Sa faamatalaina e le Au Paia i le ala lenei: “O le mautinoa lea sa ia lagonaina muamua na toe lolofi mai.”3
Ua Toe Lolofi Mai le Mautinoa
O le aafiaga o Eunike na taia ai a’u, ma na ou mafaufau pea lava pea i ai. E pei lava o Eunike, sa ou aoao mai i upu faigofie ma le mamana a Elia. E tatau ona tatou “manatu e le se mea ese” le i ai o ni fesili e uiga i lo tatou faatuatuaga. E leai se afaina. E ui atonu na i ai se taimi na liligi ifo ai mai le lagi le upumoni, ae o le a i ai ni taimi mulimuli ane tatou te lagonaina ai se matelaina faaleagaga. Atonu tatou te mafaufau pe na tatou lagonaina moni lava le timu. O le leai o ni tali po o ni faamautinoaga ua tuuina mai, e mafai ona tatou faaauau pea ona tatalo mo le timu o faaaliga. E mafai ona tatou saili atu i se molimau ia iloa o mea na moni ananafi o loo moni pea i le taimi nei. Na aoao mai Elder Jeffrey R. Holland o le Korama a Aposetolo e Toasefululua: “Afai na sa’o a o e tatalo i ai ma faatuautaina ma ola ai, e sa’o la i le taimi nei. … Faafetaia’i ou masalosaloga. Pulea ou atuatuvalega.”4
O le toe tatalaina o le faitotoa i lana uo faifeautalai, e tusa lava pe na ia mafaufau pe aisea e tatau ai, na toe tatalaina ai e Eunike lona loto. E mafai e le Alii ona toe oo atu ia Eunike ma fesoasoani ia te ia e lagonaina se faamautinoaga o mea uma sa ia iloaina muamua. I se auala foi faapena, e mafai e i tatou taitoatasi ona tatala ai pea le faitotoa i le faatuatua e tusa lava pe o tauivi ma ni masalosaloga. E mafai ona tatou faia pea le mea sa’o ma saili atu i faaaliga—e tusa lava pe tatou te le o mautinoa pe aisea ua tatou faia tonu ai.
Tatou te faaauau pea le tatalaina o le faitotoa e fai mea iti ua uma ona fetalai mai le Atua ia i tatou e lelei mo o matou agaga. Tatou te tausia le aso Sapati ia paia ma auai ia tatou sauniga. Tatou te faitau i tusitusiga paia, e tusa lava pe na o le tasi le fuaiupu i le taimi. Tatou te faalogologo i se viiga po o se lauga o le konafesi. Tatou te talanoa atu i le Tama Faalelagi e uiga i o tatou atugaluga ma faamoemoega ma ole atu ia te Ia e fesoasoani mai ia tatou iloa le upumoni. Tatou te tausia poloaiga, salamo, ma sailia le mafutaga a le Agaga Paia.
Afai e le mafai ona tatou maua se mea e sili atu nai lo se manao e talitonu, e mafai lava ona tatou faia pea ni mea iti ma tuu le manao e galue i totonu o i tatou. E mafai ona tatou faasaoina sina avanoa i o tatou loto mo nisi talitonuga e tuputupu ae ai. (Tagai i le Alema 32:27.)
O Mea ua Ou Iloa
E ui lava e i ai taimi sa ou mafaufau ai, feseseai, ma faavaivai ai, ae sa ou aoaoina ma toe aoaoina mo a’u lava o le Ekalesia lenei a Keriso. E ui lava o Iosefa Samita atonu o se tagata e le atoatoa, ae ou te iloa o ia o se perofeta musuia a le Atua o le sa ositaulagaina mea uma, ma faia le mea silisili na ia mafaia. Ua ou iloa foi o le Tusi a Mamona o se faamaumauga moni anamua ma o tusitusiga paia na faasaoina mo na o i tatou i o tatou aso. O loo faaauau pea ona faamaonia mai e le Tama Faalelagi nei upumoni ia te a’u i aso uma. Ma ou te fiafia ona na Ia faamaonia foi nei upu moni ia Eunike Franklin.
Ou te iloa a tatou tatalaina pea a tatou faitotoa ma loto i le upumoni, o le a fesoasoani mai le Atua ia i tatou ia lagona mea moni ma mea e le moni e ala mai i le Agaga Paia. O le a le mafai ona faafitia o tatou aafiaga faaleagaga i lena taimi. Ma taimi uma lava pe a maea lena, pe a tatou lagonaina le toe fetolofi mai o le masalosalo i totonu, e mafai ona tatou faamanatu ia i tatou lava pe na faapei o tatou lagona. E pei lava ona faia mo Eunike, o le a lolofi mai lo tatou mautinoa e uiga i upumoni o le talalelei.
Tatou te le tau ola i se lamala o le masalosalo mo se taimi umi pe a tau lava ina tatou taofimau i o tatou aafiaga faaleagaga. Ua saunoa mai Elder Neil L. Andersen o le Korama a Aposetolo e Toasefululua ina ia “fusimau i ou manatuaga paia. … Talitonu na oo mai ia te oe mai lou Tama Faalelagi ma Lona Alo Pele. Tuu atu latou te aumaia le onosai i ou masalosaloga ma le malamalama i ou tulaga faigata. Ou te folafola atu a e aloaia ma le naunautai ma faapelepele ma le faaeteete ia mea e tutupu musuia faaleagaga i lou olaga, o le a tele atu isi mea e oo mai ia te oe.”5
Ou te iloa mo i latou o e taumafai e faia ni aafiaga faaleagaga fou ma faaali le faatuatua ia Keriso, e moni ai lenei folafolaga: “O lē faatuatua foi ia [Keriso] e le toe fia inu ia” (Ioane 6:35). O le a oo mai tali tatou te manaomia. E mafai ona tatou sao ese i tofotofoga mu e tauai mai e Satani i lo tatou ala. Ma e mafai ona tatou tumau faamaoni i lo tatou Atua alofa i o tatou aso uma.