Faavae o le Talalelei

E Finagalo lo Tatou Tama Faalelagi Ina ia Tatou Fiafia

Ao tatou manatua le fuafuaga o le fiafia a le Atua, e mafai ona tatou maua le olioli e tusa lava pe faigata le olaga.

Ae tatou te lei fananau mai i le lalolagi, sa tatou mau faatasi uma ma le Tama Faalelagi o ni Ana fanau agaga. Sa Ia tuuina mai se fuafuaga e fesoasoani ai i Lana fanau e aoao ma tuputupu ae. E ala i Lana fuafuaga, e mafai ai ona tatou avea atili e faapei o Ia ma agavaa ai e olioli i le ola e faavavau. Ua mafai ona faataunuu lenei fuafuaga ona na afio mai le Alo o le Atua, o Iesu Keriso, i le lalolagi ina ia puapuagatia mo a tatou agasala, o se osigataulaga ua ta’ua o le Togiola.

O le fuafuaga a le Tama Faalelagi ua ta’ua o le fuafuaga o le

fiafia (tagai i le Alema 42:8),
faaolataga (tagai i le Mose 6:62),
togiolaina (tagai i le Iakopo 6:8), po o le
alofa mutimutivale (tagai i le Alema 42:15).

E pei ona faaalia e nei mau ma isi , e finagalo le Tama Faalelagi ia tatou avea faapei o Ia, ma toe foi atu ia te Ia, ma ia fiafia moni (tagai Mose 1:39).

Ua Tatou O Mai i le Lalolagi e Aoao ma Tuputupu A’e

Na auina mai i tatou e le Atua i le lalolagi, ia mafai ona tatou maua ai se tino faaletino (tagai i le Kenese 1:26–27). Sa tatou manaomia ni tino e fesoasoani ia tatou ola ai i le lalolagi.

Na silafia e le Atua o le a tatou le lagonaina le fiafia i taimi uma. Tatou te oo i le le fiafia, tiga, e oo lava i le oti. Ae e ala i luitau o le olaga, e fesoasoani mai ai le Tama Faalelagi ia tatou aoao ma tuputupu ae.

Ua tuuina mai foi e le Atua ia i tatou le faitalia, po o le mafai lea ona filifili i le va o le lelei ma le leaga. Ua Ia faataga i tatou e filifili mo i tatou lava i mea tatou te mafaufau i ai ma mea e fai. Ua Ia tuuina mai ia i tatou tusitusiga paia ma perofeta soifua e fesoasoani tatou te aoao ai e filifili le mea sao (tagai i le Aperaamo 3:25).

Taumafai ia Avea e Faapei o Iesu Keriso

E lei auina mai i tatou e le Atua i le lalolagi e aunoa ma se faataitaiga e mulimuli ai (tagai i le Ioane 13:15). Na Ia auina mai Lona Alo, o Iesu Keriso, e faaali mai ia i tatou le ala. Ina ia iloa le auala e mulimuli ai ia te Ia, e mafai ona tatou faitau i tusitusiga paia e iloa ai pe o ai o Ia ma mea na Ia faia ao soifua o Ia i le lalolagi. E mafai foi ona tatou faia le mea sili tatou te mafaia e avea ai faapei o Keriso e ala i le usiusitai i le Atua ma alofa atu i isi.

Pe a tatou faia ni mea sese, tatou te ole atu mo le faamagaloga ma utuvai mai i le mana o le Togiola a Iesu Keriso e fesoasoani ia tatou sui ai. E mafai ona tatou fiafia a o tatou taumafai i aso taitasi ia avea atili e faapei o Ia.

O le Oti E Le o le Mutaaga lea

Pe a tatou feoti, e o atu o tatou agaga i le lalolagi o agaga. O iina o le a faaauau ai ona tatou aoao a o tatou sauniuni mo le Toetutu.

I le taimi o le Toetutu, o le a toe tuufaatasia ai o tatou tino ma agaga. O le a atoatoa o tatou tino, ma o le a tatou le toe mafatia lava i le oti po o faama’i. (Tagai Alema 11:44–45.) E pei lava ona maliu Iesu Keriso ma toe soifua mai, o le a tatou toe ola uma foi.

A faamasino i tatou e le Atua, o le a Ia faaaogaina a tatou amioga ma o tatou faanaunauga. Afai sa tatou taumafai e tausi poloaiga ma folafolaga na tatou faia i le Tama Faalelagi, ona mafai lea ona tatou toe nonofo faatasi ma Ia.

Olaga Faatasi ma le Atua ma O Tatou Aiga i le Lagi

I le malo selesitila, o le a tatou nonofo faatasi ma le Atua ma Iesu Keriso. O le a mafai foi ona tatou ola ai iina ma o tatou aiga e faavavau pe afai ua faamauina i tatou ia i latou. O le a tatou maua ai le filemu, fiafia, ma le mapusaga (tagai i le Mosaea 2:41).

O lo tatou olaga i lenei lalolagi atonu e faigata i nisi taimi, ae afai tatou te mulimuli ia Iesu Keriso, e mafai ona tatou maua le olioli i lenei olaga ma le fiafia e faavavau i le olaga a sau.

Fai Mai e a Tusitusiga Paia e uiga i le Fuafuaga o le Fiafia?

O le ala o loo tatou ola ai e taua. O le a faamasino ma tauia i tatou e le Atua e tusa ai ma o tatou manatu ma amioga (tagai Alema 41:3).

O Satani o le fili lea o lo tatou fiafia. Na te faaosoosoina i tatou ia faaaoga sese lo tatou olaga i le lalolagi ma ia agasala. E manao o ia ina ia tatou le fiafia e pei o ia (tagai i le 2 Nifae 2:27).

A tatou faatuatua i le fuafuaga a le Atua mo i tatou, e mafai ona tatou maua le filemu e tusa lava po o a tofotofoga tatou te feagai. E mafai ona tatou tulimatai atu i le mafuta e faavavau faatasi ma le Atua. (Tagai Mataupu Faavae ma Feagaiga 59:23.)

O faatufugaga uma, vagana ai le [ata] i le itu taumatau mamao, na saunia e J. Kirk Richards