O Uluai Tamaitai o le Toefuataiga

Faatuatua i le Alii

Saunia e Brent M. Rogers

Matagaluega o Talafaasolopito a le Ekalesia

Aua sa ia iloa le Alii e ala i tusitusiga paia, o le faatuatua loloto o Mary Ann Young sa taofimau ai ona lagona “ia toafilemu i le afa atoa.”¹

Mary Ann Angell Young in her garden

Ata na tusia e Toni Oka

Na laki Mary Ann Angell i le ola ae i se aiga na faamuamua ai le faitauina o tusitusiga paia. Sa faapitoa lona fiafia i aoaoga a le Faaola.² Sa vave ona ia aoaoina i lona olaga, e mafai ona ia lagonaina le siufofoga o le Alii e ala i tusitusiga paia ma maua ai le toomaga i Ana aoaoga.

Sa faalogo o ia o talai atu le talalelei toefuataiina a Iesu Keriso i le Motu o Rhode, ISA, i le 1831, ma ina ua uma ona faitauina le Tusi a Mamona, sa liliu mai Mary Ann i le talalelei.

Sa siitia atu o ia i Katelani, Ohaio, i le tusa o le 1833, lea sa ia feiloai ai ia Polika Iaga, o lē sa ia faaipoipo i ai i le amataga o le 1834. Mo le isi 48 tausaga na sosoo ai, e ala i le tele o suiga i mea e nonofo ai ma tofotofoga, na faaauau ai ona faalogo Mary Ann Angell Young i le Alii e ala i tusitusiga paia, ma tuu atu lona faatuatuaga le maluelue ia te Ia.

Mo se faataitaiga, sa malaga ese atu lona toalua mo se misiona i Peretania Tele i le 1839 i le na o le 10 aso talu ona fanau mai le la tama teine o Alesi. Mo le 20 masina na sosoo ai, na tauivi ai Mary Ann ma le la fanau e toaono. Sa latou mafatia i ma’i ma na ola i falaoa sana, susu, ma ni nai fualaau faisua laiti.³ Sa iu ina maua e Mary Ann se galuega laitiiti e tausi ai lona aiga ma tausi ai o ia lava ma lana fanau mamai. Ae na fesoasoani mai lava le Alii ia i latou i nei tofotofoga. “O se mea maoae lena,” sa ia tusi atu ai i lona toalua, o le “faatuatua i le Alii.”⁴

I le faalagolago ai i lona malamalama i tusitusiga paia, na foliga mai na malamalama ai Mary Ann ma se talitonuga loloto e faapea, sa i ai lava e le aunoa le Alii ma ia, alofa ia te ia, ma na malamalama ia te ia, aemaise i le tele o ona tofotofoga. “Tau ina ia taitaia i tatou e le Alii i mea uma ma tautala atu le faamafanafanaga i itula aupito sili ona pogisa ma faigata” o lana tatalo lea.⁵

Faamatalaga

1. O le tusi a Mary Ann Angell Young ia Polika Iaga, 30 Iuni, 1844, faila o le Ofisa a Brigham Young, 1832 – 1878, Faletusi o Talafaasolopito o le Ekalesia, Aai o Sate Leki (CHL).

2. Tagai “Biography of Mrs. Mary Ann Young,” Woman’s Exponent, Sept. 1, 1887, 53–54; Emmeline B. Wells, “In Memoriam,” Woman’s Exponent, July 15, 1882, 28–29.

3. Tagai Matthew C. Godfrey, “‘You Had Better Let Mrs Young Have Any Thing She Wants’: What a Joseph Smith Pay Order Teaches about the Plight of Missionary Wives in the Early Church,” BYU Studies, vol. 58, no. 2 (2019), 63–64.

4. O le tusi a Mary Ann Angell Young ia Polika Iaga, Apr. 15, 1841, Brigham Young Office Files, 1832–1878, CHL.

5. O le tusi a Mary Ann Angell Young ia Polika Iaga, Mar. 21, 1840, George W. Thatcher Blair Collection, 1837–1988, CHL.

Ata na tusia e Toni Oka