Digital Lamang: Mga Young Adult
Pagpangita og Tabang alang sa mga Panlimbasog sa Kahimsog sa Pangisip
Ako nahadlok sa dihang misugod ako sa pagsinati og kabalaka, apan dayon ako midangop ngadto sa Ginoo—ug Siya mitabang kanako sa pagpangita sa tabang ug mga kapanguhaan nga akong gikinahanglan aron masugdan ang pagkaayo.
Usa ka adlaw pipila ka tuig ang milabay, akong gibati ang hilabihang kaluya diha sa tren gikan sa trabaho. Ang akong hunahuna napuno sa kabalaka ug makahadlok nga mga hunahuna. Kini dili mao ang unang higayon nga ang ingon nga mga hunahuna misulod sa akong ulo, apan kini mitungha og mas kanunay na, ug niini nga higayon, ako nahadlok.
Sa kalit, gibati nako ang hilabihan nga kasakit sa akong dughan, ug misugod ako sa pagginhawa og lisod. Misugod ako sa pagkataranta. Nagkubakuba ang akong dughan. Sa dihang ako miabut sa estasyonan sa tren duol sa akong panimalay, milingkod ako sa usa ka bangko, dili na makahimo og laing lakang.
Sa wala madugay diha na ako sa ambulansya padulong sa ospital, nasiguro nga ako mamatay.
Mibati og Kaulaw
Pipila ka bulan sa wala pa kini nga hitabo, ako nasanapan sa pipila ka gidaghanon sa mga panghitabo sa akong kinabuhi, ug ang akong kahimsog sa pangisip misugod sa pag-antos. Ako kanunay nga mibati nga magul-anon ug daghang kasilag sa kaugalingon. Kanunay akong nakigkita og usa ka magtatambag, apan nahibalo ako nga nagkinahanglan ako og mas dugang nga tabang. Bisan pa niana, ako wala makahimo sa pagdala sa akong kaugalingon sa pagpakita ngadto sa usa ka doktor. Dili lamang ako gusto nga pagahukman o makita ingon nga huyang, ug akong gibati ang kaulaw sa unsay akong nasinati.
Gibati ko kini nga paagi tungod kay sa Japan, ang mga tawo dili kanunay maghisgot mahitungod sa mental ug emosyonal nga mga isyu, ug kon sila naghimo, ang mga isyu dili hisgutan sa gawas sa kaugalingon nga pamilya.
Didto sa ospital, nakahukom ang mga doktor nga ako dili himatyon—gisinati ko lamang ang usa ka pag-atake sa kalisang. Busa ako gipapauli sa dihang maayo na ang akong pamati.
Apan sa pagkasunod adlaw, ang mga pagpitik sa akong kasingkasing nahitabo gihapon. Nasayud ako nga kini tingali konektado ngadto sa nagkaubos nga kahimsog sa pangisip, busa sa katapusan mipakita akog kaisog sa paghimo og usa ka pakigkita sa usa ka psychiatrist.
Ako nahiling nga adunay nanobra kaayo nga kabalaka sa inadlaw-adlaw nga mga panghitabo sa kinabuhi, ug ang doktor miresita og tambal alang kanako.
Sa tinuoray, lisud nga dawaton kini nga resulta sa sinugdanan. Apan sa samang higayon, nahupay ako sa dihang ang doktor mipasabut nga kini dili usa ka kahuyang—kini usa ka kahimtang nga nagkinahanglan nga tambalan.
Pagkab-ot sa Langitnong Amahan ug sa Manluluwas
Nagtuo ako nga mas dali akong mamaayo, apan dili kana mao ang nahitabo. Ang liyok sa balik-balik nga pagbati nga mas naarang-arang ug unya mobalik ngadto sa kahimtang sa pagkanaguol makapasagmuyo.
Sa usa ka piho nga malisod nga adlaw, nakahukom ako nga modangop ngadto sa Ginoo. Ug samtang kini akong gibuhat, misugod ako sa pagkakita sa proseso sa akong pagkaayo isip usa ka oportunidad nga magpaubos sa akong kaugalingon, mag-abli sa akong hunahuna sa katinuod sa mga panlimbasog sa kahimsog sa pangisip, magbansay sa pagdawat ug sa pagpailub, ug mas mosalig sa Langitnong Amahan ug sa Manluluwas.
Nagtuo nga Sila makaayo kanako, misugod ako sa makugihon nga pag-ampo alang sa kalig-on ug alang sa giya ngadto sa kapanguhaan nga makatabang kanako. Gibati ko usab ang kadasig sa paghangyo sa akong tigpangalagad nga kaigsoonang mga lalaki alang sa mga panalangin sa pagkapari sa tinuod nga malisud nga mga adlaw. Bisan og ako dili hingpit nga naayo diha-diha dayon, sa matag higayon nga ako makadawat og panalangin sa pagkapari, nakahimo ako sa pagbati og kalinaw diha sa akong kasingkasing, direksyon, ug paglaom.
Ako sa tinuoray mibati nianang “diha-diha nga kaayo sa Dios” nga makausa gipamulong ni Elder Kyle S. McKay sa Seventy. “Samtang mapailubon kitang naghulat sa Ginoo,” miingon siya, “adunay pihong mga panalangin nga moabut kanato diha-diha dayon.”1
Pagkaplag sa Pagkaayo
Ako wala gayud maghunahuna nga ako manlibasog sa mga hagit sa kahimsog sa pangisip. Hinoon, pinaagi niini nga kasinatian, akong nakat-unan pag-usab nga ang Ginoo nahibalo sa matag usa kanato.
Akong nasaksihan kini sa dihang mihukom ako nga mobakasyon gikan sa trabaho aron sa pagtabang sa akong hunahuna nga mamaayo. Sa pagpakig-istorya sa akong boss, nasorprisa ako kon unsa ka dako nga kalooy ug pagsabot ang iyang gipakita kanako. Siya usab misulti kanako nga siya sertipikado sa pagtambag sa kahimsog sa pangisip.
Gibati nako nga kini dili sulagma nga ako mitrabaho alang niini nga tawo, ilabi na sa makitang kamatuoran nga ang kahimsog sa pangisip dili dayag nga gihisgotan sa Japan. Nahimo akong mas labaw ka mabinantayon sa kalooy ug sa impluwensya sa Langitnong Amahan diha sa mga detalye sa atong mga kinabuhi.
Ang mga problema sa kahimsog sa pangisip dali rang mahitabo ngadto ni bisan kinsa, ug kini walay angay nga ikaulaw. Kini kinahanglang matambalan, sama lamang sa ubang medikal nga mga kondisyon o mga sakit.2 Karon nga kini usa ka bahin sa akong kinabuhi, ako mobati og kalooy ug gugma alang sa uban kinsa nagsinati og susama nga mga panlimbasog.
Ako nakaamgo nga bisan og daghang mga tawo naglibot kanako ang wala makasabut sa mga hagit sa kahimsog sa pangisip, ang Manluluwas nakasabot. Ug sa katapusan Siya miandam og paagi alang kanako sa pagbuntog niini nga hagit. Uban Kaniya, bisan ang labing malisod nga mga panahon sa kinabuhi makahimo alang sa atong kaayohan ug alang sa atong espirituhanong paglambo (tan-awa sa Mga Taga-Roma 8:28).
Ako sa gihapon nagpaayo, apan ako nakadiskobre nga ang akong mga pagsulay makatabang kanako sa pag-ila sa gugma nga ang Langitnong Amahan ug si Jesukristo aduna alang sa matag usa kanato. Nasayud ako nga samtang nagsalig kita sa atong Amahan sa Langit ug sa Manluluwas, Sila kanunay nga mosuporta kanato sa atong mga panlimbasog ug mopadayon sa pagtabang kanato sa pagkaplag og paglaom ug pagkaayo.