Pagbuntog sa Diskriminasyon sa Kaliwat ug Pagkamahukmanon: Kita Makatukod og mga Taytayan

Samtang kita motabang sa pagpundok sa Israel ug sa pagtukod sa Zion, kita mahimong mopasiugda og pagtahod alang sa tanang anak sa Dios.

Usa sa gamhanang mga kamatuoran sa gipahiuli nga ebanghelyo — usa nga may dakong kalabotan — mao nga “ang matag usa kanato adunay usa ka balaan nga potensyal tungod kay ang matag usa anak sa Dios. Ang matag usa managsama diha sa Iyang panan-aw.”¹

Samtang ang mga miyembro sa Simbahan magtinguha sa pagsunod sa sugo nga maghiusa (tan-awa sa Doktrina ug mga Pakigsaad 38:27) ug sa pagdala ug pagtukod sa kahimoan sa Zion (tan-awa sa Doktrina ug mga Pakigsaad 6:6), si Presidente Russell M. Nelson midapit kanato “nga manguna sa pagbiya sa mga kinaiya ug mga binuhatan sa pagkamahukmanon” ug mipakigbahin sa pipila ka mga paagi nga kita mahimong “[mo]awhag og pagtahod sa tanang anak sa Dios.”² Miawhag siya kanato, samtang kita magtukod sa Zion, sa pagtukod usab og mga taytayan sa panaghigalaay, kooperasyon, ug pagsabot.³

“Konektado kitang tanan, ug kita adunay hinatag sa Dios nga responsibilidad nga motabang nga himoong mas maayo ang kinabuhi alang niadtong naglibot kanato,” siya miingon. “Dili kita kinahanglan nga managsama o tan-awon nga managsama aron maadunay paghigugma sa usag usa. Dili gani kita kinahanglan nga mouyon sa usag usa aron nga mahigugma sa usag usa. Kon kita naglaom nga makab-ot ang pakigdait ug panglantaw sa mga katawhan, kini kinahanglan magsugod sa matag usa kanato, usa ka tawo matag usa ka higayon.”⁴

Adunay Luna alang sa Matag Usa

Si Presidente Nelson miawhag kanato sa “pagpalapad sa atong sirkulo sa gugma sa paghangop sa tibuok tawhanong pamilya.”⁵ Sa unsang paagi kita isip mga miyembro sa Simbahan makatabang sa pagmugna og usa ka tibuok kalibotan nga komunidad sa mga Santos nga ang tanan mobati nga giabi-abi ug naningkamot sa pagpuyo diha sa kalinaw ug panag-uyon sa usag usa bisan unsa pa ang kaliwat, tribo, kultura, sekswal nga oryentasyon, edad, sekso, edukasyon, socioeconomic nga kahimtang, lebel sa abilidad, o bisan unsa nga kalainan?

Ang tubag mao, siyempre, pinaagi sa atong Manluluwas nga si Jesukristo. Sama sa giingon ni Presidente Dallin H. Oaks, Unang Magtatambag sa Unang Kapangulohan, “Ang ebanghelyo lamang ni Jesukristo ang makahiusa ug makahatag og kalinaw sa katawhan sa tanang kaliwat ug nasyonalidad.”⁶ Si Jesukristo makapausab sa atong mga kasingkasing (tan-awa sa Mosiah 5:2). Siya adunay “gah[o]m sa pag-ayo” (Marcos 3:15).

Kon kita mismo ang moduol ngadto kang Kristo, kita makaangkon og mas lawom nga pagsabot sa lawom nga kamatuoran nga gitudlo ni Presidente Nelson, nga ang Ginoo “nagdapit sa tanan nga moduol ngadto Kaniya.”⁷

Adunay luna diha sa Simbahan sa Manluluwas alang sa tanan kinsa andam sa pagsunod Kaniya ug “[mo]himo nga magpatigbabaw ang Dios” diha sa ilang kinabuhi. Ang [atong] kahimtang atubangan sa Dios dili magdepende sa mga kaliwat, kolor sa atong panit, o uban nga mga ilhanan apan sa atong debosyon ngadto Kaniya ug sa atong kaandam sa pagtuman sa Iyang mga sugo.⁸

Kita Mahimong Makagiya sa Pagtabang

Kon kita makakita diha sa atong mga kaugalingon og bisan unsa nga nagpakita sa kinaiya o pamatasan nga gibase sa pagkamahukmanon, kinahanglan natong biyaan kini alang sa atong mga paningkamot nga mahimong usa, tungod kay kon kita dili magkahiusa, kita dili Iya (tan-awa sa Doktrina ug mga Pakigsaad 35: 2; 38: 27). “Ang mga miyembro sa Simbahan kinahanglan nga mangulo sa pagpasiugda og pagtahod alang sa tanang anak sa Dios. … Naningkamot sila nga mahimong maayo sa tanan, nga likayan ang paghukom sa bisan unsa nga matang.”⁹

Isip mga miyembro sa “lawas ni Kristo” (1 Mga Taga-Corinto 12:27), kita nagkinahanglan sa usag usa, “aron dili magkabahinbahin ang lawas; kondili ang tanang bahin niini may samang pagtagad alang sa usag-usa. Ug kon ang usa ka bahin sa lawas mag-antos, ang ubang bahin mag-antos usab” (1 Mga Taga-Corinto 12:25–26).

Ang pag-ampo, pagtuon ug mapainubsanong pamalandong makatabang kanato nga makakita kon sa unsang paagi kita mas makahigugma sa Dios ug sa tanan Niyang anak. Ang pag-establisar og panagdait mahimong nagpasabot sa pagbuntog sa atong kaugalingong mga opinyon, mga pangagpas, o mga naandan samtang kita makig-istorya sa usag usa. Ang pagpaningkamot nga makasabot sa mga kasinatian niadtong kinsa dili sama nato makaabli sa atong mga mata sa lain-lain apan importante nga mga panglantaw.

Si Presidente Oaks miingon usab nga ang “katahap o gani ang panagbingkil maghatag og agianan ngadto sa panaghigalaay o bisan gani paghinigugmaay kon ang personal nga mga panagkita mosangp[o]t sa pagsinabtanay ug respeto sa usag usa.”¹⁰

Sa mosunod nga mga pahina, imong makita ang mga kasinatian, mga naamgohan ug mga panabot mahitungod sa pagtukod og mga taytayan samtang kita magtukod sa Zion.