Digital Lamang
Mas Maayong Mag-uban Kita
Makakita kita og mas klaro kon kita makaamgo nga ang atong panglantaw limitado kon wala ang panglantaw sa uban.
Mipasakop ako sa Simbahan pinaagi sa akong kaugalingon sa sentro sa California, USA, sa dihang tin-edyer pa ko, ug sa 20-sobra pa nga mga katuigan sukad kaniadto, kanunay nga ako lamang ang Itom nga tawo sa akong ward o usa sa labing diyutay kaayo. Ako adunay pipila ka malisod nga mga kasinatian, bisan sa simbahan, kalabut sa akong mga kaliwat. Pasalamat, ako adunay pagpamatuod nga ang Dios nahigugma kanako ug nga adunay usa ka dapit alang kanatong tanan sa Iyang gingharian.
Ang Pagkalahi Malisod
Sa hingpit, ang simbahan mahimo nga sa usa ka dapit nga kadangpan alang kanato kon kita nanlimbasog ug nagkinahanglan sa suporta ug pakigdait sa mga tawo kinsa nakigbahin sa atong mga mithi. Bisan pa niana, kana nga pagbati sa kahilwasan ug suporta mahimong mawagtang kon gibati nimo nga wala giapil tungod sa imong mga kalainan. Ang pagkalahi mahimong malisod, ug kini malisod ang paghulagway kon sama sa unsa kini ngadto sa usa ka tawo nga wala nakasinati niini.
Samtang ang mga lider sa Simbahan nagtawag sa “tanan nga mga katawhan sa pagbiya sa mga kinaiya ug mga lihok sa dili makiangayong pagtagad ngadto sa bisan unsa nga grupo o indibidwal”,1 adunay pipila kinsa sa gihapon wala makakat-on unsaon sa pagbuhat niini. Akong nakita kana isip usa ka batan-ong single adult sa dihang naghunahuna ako kon mao ba kana kon ngano nga walay usa sa batan-ong mga lalaki interesado sa pakig-date kanako ug kon ako makabaton ba gayud og oportunidad nga maminyo diha sa templo tungod niini. Akong nakita kini karon kon ang usa ka tawo sa simbahan naghimo og sayop nga mga komentaryo mahitungod sa kaliwat nga naghimo kanako sa pagbati nga gituyo og pili, ingon og ang akong katakos gitimbang-timbang diha sa atubangan sa tanan. Ug kon walay usa nga mosulti sa pagkorihir niining sayop nga doktrina, ako magpabilin sa pagbuhat niini nga mag-inusara.
Dili komportable nga tutokan, nga hikapon sa mga tawo ang akong buhok nga walay pananghid, o dili tagdon. Ug kon ako mosulay sa paghisgot niini nga mga butang, makapasakit og maayo kon ako sultihan sa mga tawo nga akong gihigugma ug gisaligan nga ako naghimo-himo lamang niini, nagpakasensitibo kaayo, o naglihok sama sa usa ka biktima.
Nganong ako ug ang uban nagpakigbahin niining sakit nga mga kasinatian? Kini tungod kay ako gustong mahimo nga kabahin sa akong pamilya sa ward. Kini tungod kay akong nakita kon unsa ka dako ang akong matampo kon hatagan sa oportunidad. Apan akong gibati nga ako anaa sa gawas sa kinabuhi sa Simbahan—dili hingpit nga gipasilongan sa dangpanan nga kitang tanan nagkinahanglan. Kini tungod kay uban sa mas dako nga isig pagsinabtanay, kita makahimo og mas maayo kon magkauban.
Pagkalain-lain Makapalig-on Kanato
“Ang Dios wala diay ing pinalabi sa mga tawo” (Mga Buhat 10:34). Siya nahigugma sa tanan Niyang mga anak (tan-awa sa Juan 3:16) ug gusto nga modani tanan kanato ngadto Kaniya (tan-awa sa 2 Nephi 26:24).
Si Presidente Russell M. Nelson mipahinumdom kanato nga “ang Dios wala mahigugma sa usa ka kaliwat nga labaw kay sa lain.”2
Ang atong mga kalainan dili usa ka butang nga mahimo lamang nga dili nato tagdon. Kini importanting bahin sa plano sa Dios. Si Pablo mitudlo:
“Apan ingon nga mao karon, ang mga bahin gipahimutang sa Dios diha sa lawas, ang matag usa kanila sumala sa iyang gikahimut-an. …
“Ang mata dili makaingon sa kamot, wala ako magkinahanglan kanimo” (tan-awa sa 1 Mga Taga-Corinto 12:17–21).
Ang matag usa kanato mao ang resulta sa dili maihap nga mga pagpili ug mga kasinatian nga mihulma sa atong piho nga mga pagtuo, ug adunay katahom ug kalig-on nga naangkon gikan sa atong panaglahi.
Ang atong pagkalain-lain naghimo kanato nga mas maayo, dili lamang tungod kay kitang tanan adunay lain-laing mga kalig-on apan tungod kay kita kinahanglang magtinabangay sa pagtrabaho diha sa panaghiusa nga mapanalanginan pinaagi niadto nga mga kalig-on. Sa tinuod, ang atong panaglahi nagtabang kanato sa pagkat-on ug paglambo samtang kita nagpadayon sa unahan nga nag-uban, nangandam alang ni Kristo nga moanhi pag-usab.
Asa Kita Magsugod?
Samtang kita magtinabangay sa pagpangita og mas dakong panaghiusa, kini dili kanunay sayon. Nagkinahanglan kini kanato nga magpaubos igo sa pag-ila og lain-laing mga panglantaw, pagkat-on gikan niadtong kinsa lahi kanato, ug sa pag-usab kon mahibaloan nato nga kita nasayop.
Makahimo kita niini pinaagi sa pagpalapad sa atong pundok sa mga higala ug sa pagpangita og dugang nga mga panglantaw pinaagi sa kasaligan nga mga kapanguhaan. Kita kinahanglan nga maminaw niadtong atong makita nga lahi gikan kanato ug moila sa ilang mga kasinatian ingon nga matarong. Aron masabtan ang usag usa, kita kinahanglan nga maminaw sa usag usa. Sa usa ka artikulo alang sa Simbahan, si Darius Gray miingon, “Kon ang atong matinuorong pagtutok mao ang pagtugot kanila sa pagpakigbahin sa ilang mga kinabuhi, ilang mga kasaysayan, ilang mga pamilya, ilang mga paglaom ug mga kasakit, dili lamang kita makabaton og mas dakong pagsabot, apan kini nga praktis makatabang sa pagkab-ot nga mamaayo ang mga samad sa dili patas nga pagtagad sa kaliwat.”3
Ako gustong mohatag sa mga tawo og oportunidad nga makaila kanako, busa naningkamot ako nga mahimong mahigalaon ug matinuoron ug mabination ngadto sa tanan nga akong ikahimamat. Naningkamot ako sa pagsugod og mga pakighigala pinaagi sa pagdapit og mga tawo sa paniudto ug sa pagsugod og mga panagsultihanay. Naningkamot ako sa pagmugna og luwas nga luna alang sa pagkamatinuoron, pagkahuyang, ug paghigugma, ug paggahin og panahon alang sa ubang mga tawo sa paagi nga ako manghinaot nga sila mohimo og panahon alang kanako. Ako naningkamot nga mahimong higala nga ako gustong aduna—nga naglakip sa pagpaninguha sa pagsabot sa mga kasinatian nga ang uban aduna nga ako wala makasinati.
Ako mibati nga nakita ug giapil pinaagi sa yanong mga buhat sa pagkamabination ug pagtabang. Ako mobati nga naapil kon ang mga tawo naghimo og paningkamot nga magbaton og tinuod nga pakigsinultihanay uban kanako, naggahin og oras alang kanako, o nagdapit kanako sa paggahin og oras uban kanila. Nindot kaayo ang bation kon ang mga tawo nagpakita nga sila gusto nga magpaduol kanimo.
Kita Mahimong Mas Labaw Pa
Si Elder Quentin L. Cook sa Korum sa Napulog Duha ka Apostoles miingon: “Ang panaghiusa ug pagkalahi-lahi dili mga katugbang. Makakab-ot kita og mas dakong pagkahiusa samtang nag-amuma kita og kahimtang sa paglakip ug pagtahod sa pagkalahi-lahi.”4
Kon kita mopili sa paggahin og panahon sa pagsabot sa usag usa nga mga kasinatian sa kinabuhi—bisan kon kini dili sayon alang kanato sa pagbuhat sa ingon—ug pilion ang pagtinabangay sa paggamit sa unsay gihatag kanato sa pagserbisyo sa Ginoo ug sa usag usa, kita labaw kalig-on kay sa kinatibuk-an sa tanang mga bahin.