Seksiyon 35
Pagpadayag nga gihatag ngadto ni Joseph Smith ang Propeta ug kang Sidney Rigdon, didto sa Fayette, New York, Disyembre 7, 1830. Niining higayona, ang Propeta nagtrabaho hapit kada adlaw sa paghubad sa Biblia. Ang paghubad gisugdan sukad pa sa Hunyo 1830, ug sila si Oliver Cowdery ug John Whitmer nakaserbisyo isip mga tigsulat. Sanglit gitawag na sila karon sa laing mga katungdanan, si Sidney Rigdon gitawag pinaagi sa balaanong katungod sa pagserbisyo isip ang tigsulat sa Propeta niini nga buhat (tan-awa sa bersikulo 20). Isip pasiuna sa talaan niini nga pagpadayag, ang kasaysayan ni Joseph Smith namahayag: “Niadtong Disyembre si Sidney Rigdon miabot [gikan sa Ohio] aron sa pagpangutana sa Ginoo, ug kauban niya nga miabot si Edward Partridge. … Sa wala madugay human sa pag-abot niining duha ka igsoon nga lalaki, namulong ang Ginoo.”
1–2, Unsaon sa mga tawo nga mahimong mga anak sa Dios; 3–7, Si Sidney Rigdon gitawag sa pagbunyag ug sa pagtugyan sa Espiritu Santo; 8–12, Ang mga timailhan ug mga milagro mahimo pinaagi sa pagtuo; 13–16, Ang mga sulugoon sa Ginoo moayag sa kanasoran pinaagi sa gahom sa Espiritu; 17–19, Si Joseph Smith naghupot sa mga yawe sa mga misteryo; 20–21, Ang pinili makalahutay sa adlaw sa pag-anhi sa Ginoo; 22–27, Ang Israel maluwas.
1 Paminaw sa tingog sa Ginoo nga inyong Dios, gani ang Alpha ug ang Omega, ang sinugdanan ug ang kataposan, kansang katuyoan nagsubay sa usa ka mahangtorong agianan nga walay pagkausab, ang karon sama ra sa kagahapon, ug sa kahangtoran.
2 Ako si Jesukristo, ang Anak sa Dios, kinsa gilansang sa krus alang sa mga sala sa kalibotan, gani kutob sa motuo sa akong ngalan, nga sila mamahimong mga anak nga lalaki sa Dios, gani mahiusa ngari kanako sama nga Ako nahiusa sa Amahan, ingon nga ang Amahan nahiusa ngari kanako, nga kita mahiusa.
3 Tan-awa, sa pagkatinuod, sa pagkatinuod, sultihan ko ang akong sulugoon nga si Sidney, ako nagtan-aw kanimo ug sa imong mga buhat. Nakadungog ko sa imong mga pag-ampo, ug nag-andam kanimo alang sa mas mahinungdanon nga buhat.
4 Bulahan ka, kay ikaw mobuhat og mahinungdanong mga butang. Tan-awa ikaw gipadala, gani sama ni Juan, aron moandam sa agianan sa dili pa ako, ug sa dili pa si Elijah moabot, ug wala ikaw mahibalo niana.
5 Ikaw nagbunyag pinaagi sa tubig ngadto sa paghinulsol, apan sila wala makadawat sa Espiritu Santo;
6 Apan karon mohatag ko kanimo og sugo nga ikaw mobunyag pinaagi sa tubig, ug madawat nila ang Espiritu Santo pinaagi sa pagpandong sa mga kamot, gani sama sa mga apostol sa karaan.
7 Ug mahitabo nga adunay mahinungdanon nga buhat dinhi sa yuta, gani taliwala sa mga Hentil, kay ang ilang kabuang ug ang ilang mga pagkasalawayon ipakita sa mga mata sa tanang katawhan.
8 Kay ako ang Dios, ug ang akong bukton wala mapamubo; ug magpakita ako og mga milagro, mga timailhan, ug mga kahibulongan, ngadto sa tanan nga motuo sa akong ngalan.
9 Ug kadtong mangayo niini sa akong ngalan pinaagi sa pagtuo, makapapahawa sila og mga yawa; makaayo sila sa masakiton; mahimo nila ang mga buta nga makakita, ug ang bungol makadungog, ug ang amang makasulti, ug ang bakol makalakaw.
10 Ug ang panahon sa dili madugay moabot nga ang mahinungdanong mga butang ipakita ngadto sa katawhan;
11 Apan kon walay pagtuo walay bisan unsang butang nga makita gawas sa mga kalaglagan sa Babilonia, ang maong nasod nga nakapainom sa mga nasod sa bino sa kapungot sa iyang pakighilawas.
12 Ug walay bisan usa nga nagbuhat og matarong gawas kanila nga andam sa pagdawat sa kahingpitan sa akong ebanghelyo, nga akong gipadala ngadto niini nga henerasyon.
13 Mao nga, ako nagtawag sa huyang nga mga butang sa kalibotan, kanila nga mga walay alamag ug dinaog-daog, sa pag-ayag sa kanasoran pinaagi sa gahom sa akong Espiritu;
14 Ug ang ilang bukton mao ang akong bukton, ug ako ang ilang taming ug ang ilang panagang sa bukton; ug ako mobakos sa ilang mga bat-ang, ug sila makig-away nga maisogon alang kanako; ug ang ilang mga kaaway pagatumban sa ilang mga tiil; ug akong itugot nga mahulog ang espada alang sa ilang kaayohan, ug pinaagi sa kalayo sa akong kasuko panalipdan ko sila.
15 Ug ang kabos ug ang maaghop masangyawan sila sa ebanghelyo, ug magpaabot sila sa panahon sa akong pag-anhi, kay kini haduol na—
16 Ug makat-onan nila ang sambingay sa kahoy nga igos, kay gani karon hapit na moabot ang ting-init.
17 Ug napadala na nako ang kahingpitan sa akong ebanghelyo pinaagi sa kamot sa akong sulugoon nga si Joseph; ug diha sa kahuyang gipanalanginan ko siya;
18 Ug gihatag ko na kaniya ang mga yawe sa misteryo niadtong mga butang nga naselyohan na, bisan ang mga butang sukad pa sa katukoran sa kalibotan, ug ang mga butang nga moabot sukad karon nga panahon hangtod sa panahon sa akong pag-anhi, kon siya magpabilin kanako, ug kon dili, adunay lain nga akong ibutang sa iyang dapit.
19 Mao nga, bantayi siya nga ang iyang pagtuo dili mawala, ug igahatag kini sa Maghuhupay, ang Espiritu Santo, nga nasayod sa tanang butang.
20 Ug hatagan ko ikaw og usa ka sugo—nga ikaw mosulat alang kaniya; ug ang mga kasulatan ihatag, sama nga kini anaa sa akong kaugalingong dughan, ngadto sa kaluwasan sa akong kaugalingong pinili;
21 Kay maminaw sila sa akong tingog, ug makakita kanako, ug dili makatulog, ug makalahutay sila sa adlaw sa akong pag-anhi; kay himoon sila nga putli, sama nga ako putli.
22 Ug karon, sultihan ko ikaw, magpabilin ka uban kaniya, ug siya mopanaw uban kanimo; ayaw siya og isalikway, ug sa pagkatinuod kining mga butanga matuman.
23 Ug sa panahon nga dili kamo magsulat, tan-awa, hatagan siya og katakos sa pagpanagna; ug imong isangyaw ang akong ebanghelyo ug gamiton ang mga pulong sa balaang mga propeta aron sa pagpamatuod sa iyang mga pulong, kay kini ihatag kaniya.
24 Tumana ang tanang sugo ug mga pakigsaad nga kinahanglan nimong sundon; ug akong himoon nga ang kalangitan mouyog alang sa imong kaayohan, ug si Satanas mokurog ug ang Zion magmaya sa ibabaw sa kabungtoran ug mouswag;
25 Ug ang Israel pagaluwason sa akong gitakda nga panahon; ug pinaagi sa mga yawe nga akong gihatag sila pagagiyahan, ug dili na gayod malibog pa.
26 Ibayaw ang inyong mga kasingkasing ug pagmaya, ang inyong katubsanan nagsingabot na.
27 Ayaw kahadlok, gamay nga pundok, inyo ang gingharian hangtod sa akong pag-abot. Tan-awa, ako moabot sa kalit lang. Ug ingon niana ang mahitabo. Amen.