Fakaʻilekitulōnika Pē: Kakai Lalahi Kei Talavoú
ʻOku ʻIkai Fie Maʻu ke Fakamāvahevaheʻi Kitautolu ʻe Hotau Ngaahi Faikehekehé
Naʻá ku fāifeinga ke tauhi hoku vā fetuʻutakí mo ha kaungāmeʻa naʻe ʻikai ke ma tui tatau. Naʻe fakahaaʻi mai ʻe he ʻofa ʻa e ʻOtuá ʻa e foungá.
ʻI he taimi ko ia ʻoku fāifeinga ai ke pukepuke e vā fetuʻutakí, ko e tali maʻongoʻonga taha kuo ʻomi maʻatautolú ne haʻu ia ʻi ha fōtunga ʻo ha Fakamoʻui: “He naʻe ʻofa pehē ʻa e ʻOtuá ki māmani, naʻá ne foaki hono ʻAlo pē taha naʻe fakatupú” (Sione 3:16; tānaki atu hono fakamamafaʻí).
Ko e taimi kotoa pē ʻoku ou lolotonga maʻu ai ha fehuʻi ʻoku hangē ʻoku ʻikai lava ʻo tali pe ʻikai fakafiemālié, ʻoku ou tafoki kia Sīsū Kalaisi pea ʻoku fakafiemālieʻi au ʻe he nonga mo e ʻofa ʻoku maʻu meiate Iá. ʻOku fakafonu au ʻe heʻene ʻofa kiate aú.
Ko e ʻofa ʻa Sīsū Kalaisí ʻa e tali naʻá ku maʻu ʻi he taimi naʻe talamai ai ʻe haku kaungāmeʻa ofi ʻe mavahe mei he Siasí. Kimuʻa ʻi he fili ko ʻení, naʻá ne vahevahe mai kiate au ʻa ʻene ngaahi fehuʻi fakamātoató, ʻo kolea ʻeku ngaahi fakakaukaú mo fakahā mai kiate au ʻa ʻene loto-mamahí. Naʻe moʻoni ʻene mamahí, naʻe ongo moʻoni ʻene ngaahi fehuʻí, pea ne u ongoʻi lāngilangiʻia ke u fakafanongo. Ka neongo ia, naʻe hangē naʻe ʻikai ke aʻu ki ai ʻa e ngaahi fakakaukau naʻá ku faʻa vahevahé.
Ne u mavahe mei heʻema ngaahi fepōtalanoaʻakí mo ongoʻi taʻepauʻia pe ʻe anga fēfē haʻaku poupouʻi ia. Lolotonga haʻama pōtalanoa ʻe taha, naʻá ne fai mai ha fehuʻi fakamātoato fekauʻaki mo ha meʻa naʻá ku ongoʻi taʻepauʻia fakataautaha ai peá ne talamai ne u tali fakamahamahalo ʻi heʻeku fāifeinga ke ʻilo pe te u tali fēfē iá. ʻOku ou manatuʻi ʻene pehē mai, “ʻE ʻEma, ʻoku ʻikai ke ke fuʻu tui ki ai. ʻOku ou ʻilo ʻoku ʻikai ke ke tui pehē.”
Naʻá ne moʻoni.
Hili e talanoa ko iá, naʻá ku ongoʻi ʻoku kamata ke u mavahe mei he feohi fakakaungāmeʻá. Naʻe ʻikai ke u ongoʻi fiemālie ke talanoa mo ia ki he ngaahi meʻa fakalaumālié peá u ongoʻi taʻefiemālie ʻi he kehekehe ʻema tuí mo e siʻisiʻi ʻeku ngaahi tali haohaoá. Naʻá ku ongoʻi kuo siva e ʻamanakí. Naʻe fakaʻau ke ʻikai te u toe fehuʻi ange fekauʻaki mo ʻene ngaahi fehuʻi kau ki he ongoongoleleí ko ʻeku manavasiʻi ʻi he ʻikai ke u maʻu ʻa e ngaahi talí. Naʻe kamata ke u fakakaukau naʻá ma fuʻu faikehekehe ke ma kaungāmeʻa.
Naʻe ʻosi ha ngaahi māhina siʻi peá u toki fakatokangaʻi ʻi heʻeku fekumi ko ia ki ha ngaahi tali ki heʻene ngaahi fehuʻí (mo ʻeku) ngaahi fehuʻí, naʻe ʻikai ke u toe sio ki he tali mahuʻinga tahá: Naʻe ʻofa pehē ʻa e ʻOtuá ki he māmaní—ʻoku ʻofa pehē ʻa e ʻOtuá ki hoku kaungāmeʻá.
ʻI heʻene lea ʻi he konifelenisi lahi ʻo ʻOkatopa 2020, naʻe fakamanatu mai ʻe Palesiteni Tāleni H. ʻOakesi, Tokoni ʻUluaki ʻi he Kau Palesitenisī ʻUluakí, “ʻOku makatuʻunga ʻa e akonaki ʻa e Fakamoʻuí ke [feʻofaʻakí] mei he foʻi moʻoni ko ia ko e kakai matelie kotoa pē ko e fānau ʻofeina kinautolu ʻa e ʻOtuá.” Naʻe fakaʻosi ʻene pōpoakí ʻaki ha fakamanatu fekauʻaki mo e fakakaukau ʻoku ʻomi ʻe he ʻilo ko ʻení: “ʻOku ʻomi ʻe he ʻilo ko ia ko e fānau kotoa kitautolu ʻa e ʻOtuá ha mahino fakalangi ki he mahuʻinga ʻo e niʻihi kehe kotoa pē.”1
Naʻe ongo kiate au ʻa e ngaahi lea ko iá. ʻIo, ko e akonaki ko ʻení ko ha foʻi moʻoni mahuʻinga. Ka neongo ia, naʻá ku fakatokangaʻi ʻi heʻeku tali ki he mavahe hoku kaungāmeʻá mei he Siasí, ne u tuku ki he tafaʻakí ʻa e moʻoni ko ʻení.
Naʻe hanga ʻe heʻeku ʻiloʻi ko hoku kaungāmeʻá—neongo pe ko e hā e ngaahi faikehekehe ʻi heʻema tuí—ko ha fānau ʻofeina ʻa e ʻOtuá ʻo liliu e meʻa kotoa pē kiate au.
Ne ʻosi atu ha ngaahi māhina mo ʻeku ongoʻi mamaʻo mei hoku kaungāmeʻá, ka naʻá ku telefoni kiate ia ʻi he hili pē ʻeku fakatokangaʻí, pea naʻá ku vahevahe ʻa e ʻofa ʻa e ʻOtuá mo ia. Naʻe lava ke u fakamatalaʻi ange ʻa e ʻuhinga naʻá ku fakamamaʻo ai meiate iá. Naʻá ku fakamahino e ʻuhinga ʻoku fakamamahi ai ke ongoʻi naʻe ʻikai fakaʻapaʻapaʻi ʻa e meʻa mahuʻinga fau kiate au. Meʻamālié, he naʻe mahino kiate ia, pea naʻá ma fakatou kole fakamolemole. Naʻá ma talanoa ki hono mahuʻinga ʻo ʻema feohi fakakaungāmeʻá pea mo e founga naʻe mālohi ange ʻa e ngaahi meʻa ʻokú ma faitatau aí ʻi homa ngaahi faikehekehé. Naʻá ku talaange ʻoku ou fie feohi mo ia ʻi he tuʻunga ʻokú ne ʻi aí lolotonga ʻeku tauhi ʻeku ngaahi tuʻunga moʻuí mo ʻeku tuí, pea naʻá ku ʻamanaki ʻe lava ke hokohoko atu ʻema fepoupouakí. Naʻá ku houngaʻia ʻaupito ʻi heʻene loto ki aí.
Hangē pē ko e hoko ʻa Sōlami “ko e kaumeʻa moʻoni” kia Nīfaí (2 Nīfai 1:30), ʻOku ou feinga ke hoko ko ha kaungāmeʻa lelei kiate ia, neongo homa ngaahi faikehekehé.
ʻOku ou fakafetaʻi ko e ʻofa ʻa e ʻOtuá—pea ʻoku ou fakafetaʻi ʻoku mātuʻaki haohaoa, mālohi, mo tuʻuloa ia ʻo lava ke ʻiate kitautolu ʻi he ngaahi fepōtalanoaʻaki faingataʻá. ʻOku ou houngaʻia ʻi he ʻatā ʻa e ʻofa ʻa e ʻOtuá ki he laumālie kotoa pē ʻo e faʻahinga ʻo e tangatá. ʻOku ou houngaʻia ʻi hono fakaʻatā kitautolu ʻe he ʻofa ʻa e ʻOtuá ke tau feʻofaʻaki kakató. Ko ha ʻofa fakalangi ʻoku ʻikai lava ke fakamatalaʻi.