“O Le Auala e Maua ai le Fesoasoani i Ou Tofotofoga e Sili Ona Faigata,” Mo le Malosi o le Autalavou, Oke. 2021.
Sau, Mulimuli Mai ia te A’u
O Le Auala e Maua ai le Fesoasoani i Ou Tofotofoga e Sili Ona Faigata
Mataupu Faavae ma Feagaiga 121–122
E oo lava i se tasi o aafiaga sili ona faanoanoa o lona olaga, na maua e le Perofeta o Iosefa Samita le faamoemoe, fesoasoani, ma le faamalologa.
“Le Atua e, o fea o i ai oe?”
Atonu e telē se faaletonu e afua ai ona fai se fesili faatauanau faapena. Mo le Perofeta o Iosefa Samita, o le sa mafatia i le falepuipui i Liperate i Misuri, ISA, na faapena.
O le tausaga o le 1839. Sa i ai Iosefa ma ana uo i le falepuipui—ona o moliaga sese—mo le silia ma le fa masina. O le tau malulu sili lea ona malulu na faamauina, ma sa latou tau le maua ai se mea e faamafanafana ai. O lona aiga, o ana uo, ma le vaega atoa o le Ekalesia na tutuli faamalosi ese mai le nuu e ni tagata faatupu vevesi. Sa itiiti se fesootaiga a Iosefa ma i latou. O se tasi lea o taimi sili ona faigata i le soifuaga o Iosefa.
O Se Malamalama i le Pogisa
I se tasi taimi, na fesili atu ai Iosefa mai le taele o lenei falepuipui pogisa, “Le Atua e, o fea o i ai oe? Ma o fea o i ai le faapaologa ua ufi ai lou afioaga lafi? O le a le umi e taofi ai lou aao, ma silasila mai ai mai le lagi faavavau lou fofoga, ioe, lou fofoga manino, i sese ua faia i lou nuu ma au auauna, ma oo atu ai i ou fofoga-faafofoga a latou tagi?” (Mataupu Faavae ma Feagaiga 121:1–2).
E oo lava i se olaga e tumu i tofotofoga, o se mea e uiga i le falepuipui i Liperate e foliga mai ua faavaivaia ai Iosefa Samita e sili atu nai lo se isi lava faafitauli.
Peitai, i le taimi tonu lava na sili ona leaga, sa susulu mai ai se malamalama o le faamoemoe i totonu o lena potu malulu o le falepuipui. Sa maua e Iosefa ma isi pagota ni tusi e le’i faamoemoeina mai uo ma aiga—ma na faaitiitia ai le pogisa o lena aafiaga.
O Le Mana o le Faauooga
E uiga i lena taimi, na saunoa ai Iosefa Samita, “Sa matou maua ni tusi i le afiafi ua tuanai … na manavaina uma se agaga agalelei ma faamafanafana. … A o matou faitau i na tusi sa latou faafouina o matou agaga e pei o le malū o le ea.“1
I le aso 7 o Mati, 1839, sa tusia ai e Emma Samita se tusi i lona toalua, o Iosefa, o le sa faafalepuipuiina i le falepuipui o Liperate.
Ioe, o na tusi sa le’i faamafanafanaina ai le falepuipui. Latou te le’i aumaia ai se agalelei i leoleo, pe na tofo lelei ai meaai. Ae o tusi na faia ai le eseesega atoa i lagona o pagota. O lena faaalia faigofie o le lagolago mai uo ma aiga na fesoasoani ia Iosefa mai le mafaufau ai po o fea o i ai le Atua, i le mafai lea ona lagona upu faamafanafana a le Faaola, “Lou’ atalii e, ia filemu lou agaga” (Mataupu Faavae ma Feagaiga 121:1, 7).
Na tuuina mai e Iosefa Samita le manatu lenei: “O i latou e le’i auina atu i puipui o se falepuipui e aunoa ma se mafuaaga po o tuuaifuaina e mafai ona latou maua a’e na o sina manatu i le logomalie o le leo o se uo. O se tasi o faailoga o faigauo mai soo se punavai i soo se mea e fagua ai ma valaauina i faatinoga o lagona agamalu uma. “2
Atonu e te iloa se tasi o loo tauivi. Atonu e te le manatu o i ai se mea e mafai ona e faia e fesoasoani ai, ae o le aafiaga o Iosefa i le falepuipui i Liperate ua aoaoina ai i matou i se isi mea. O au upu e mafai ona i ai le aafiaga lava lea e tasi ia i latou e te alofa i ai e pei ona faia e tusi mo Iosefa. E mafai ona e auina atu se tusi po o se feau tusitusia, fai se valaau i le telefoni, pe asiasi atu.
O ai e manaomia ona faalogo mai ia te oe i le asō? Tusi ni manatu i mea e mafai ona e fai atu ai:
O Faaaliga e Maua Gofie Lava
O le isi upumoni e mafai ona tatou aoao mai le Falepuipui i Liperate o le, e pei o Iosefa, e mafai lava ona e maua le mafanafana ma faaaliga mai le Tama Faalelagi ma le Faaola e tusa lava pe e te feagai ma se mea matautia.
Sa saunoa Elder Jeffrey R. Holland o le Korama a Aposetolo e Toasefululua e uiga i le Falepuipui o Liperate ma aoao mai: “Pe a tatau ai mo oe, e mafai ona e maua se aafiaga paia, faaaliga, aogā loloto i le Alii i soo se tulaga o e i ai. Ioe, sei ou fai atu lena mea ma sina malosi teisi atu: E mafai ona e maua se aafiaga paia, faaaliga, aogā loloto i le Alii i aafiaga aupito sili ona faanoanoa o lou olaga—i nofoaga sili ona leaga, a o onosaia faamasinoga le tonu aupito sili ona tiga, a o feagai ma mea e sili ona matautia le faigata ma le tetee ua e oo i ai.”3
A o e savalia aafiaga faigata e faaleleia ai oe, po o le faaaluina o au lava po i se ituaiga Falepuipui e pei o Liperate, atonu e faaosoosoina oe e mafaufau o loo mamao ese le Atua mai ia te oe. Ae o taimi na e ono latalata atili mai ai o Ia na i lo se isi lava taimi!
Ua i ai Faatasi i Lenei Mea
E pei ona faaalia i le taimi o Iosefa Samita i le Falepuipui i Liperate, e oo mai tofotofoga ia i tatou uma e tusa lava pe a tatou mulimuli ia Iesu Keriso.
O se isi faaaliga i le Falepuipui i Liperate na faamanatu atu ai ia Iosefa Samita e le o ia le tagata muamua na matua mafatia lava. Na fetalai mai le Alii, ina ua uma ona faamatalaina ituaiga uma o mafatiaga: “Na afio ifo le Atalii o le Tagata i lalo o i latou uma. Ua sili atu ea oe ia te ia?” (Mataupu Faavae ma Feagaiga 122:8).
E oo mai tofotofoga ia i tatou taitoatasi. Ae talu ai na puapuagatia le Faaola mo a tatou agasala ma tiga, e mafai ona tatou maua le mafanafana i le iloaina e mafai ona Ia fesoasoani ia i tatou e ala i o tatou mafatiaga. Sa fetalai le Alii ia Iosefa, “Aua le mataʼu i mea e mafai ona fai e tagata, aua o le a faatasi le Atua ma oe e faavavau ma faavavau lava.” (Mataupu Faavae ma Feagaiga 122:9). O loo avanoa le fesoasoani a le lagi mo i tatou uma.
O faapefea ona fesoasoani le Tama Faalelagi ma Iesu Keriso ia te oe i tofotofoga? Tusi e uiga i nisi o aafiaga:
Faaleleia ma Malosi Atu
Sa le’i fiafia le Perofeta o Iosefa Samita i ona aafiaga i le Falepuipui i Liperate. Ae sa tuputupu a’e o ia i na aafiaga. Ma o lesona sa ia aoaoina ma faaaliga na ia maua e musuia ai i tatou taitoatasi e ala i o tatou tofotofoga.
Sa aoao mai Elder Gary E. Stevenson o le Korama a Aposetolo e Toasefululua: “Ou te talitonu e i ai se aso, o le a outou toe tepa ai i tua i gaoioiga na faaleaogaina, le faanoanoa, lē fiafia, ma le tuuatoatasi ona o taimi faigata o loo tatou uia, e iloa ai na faamalumalu mai ai faamanuiaga silisili ma le faatuatua ma molimau ua faateleina. Ou te talitonu o lenei olaga, ma i le olaga a sau, o ou puapuaga, … o lau Falepuipui Liperate, o le a faapaiaina mo lou manuia. Ou te tatalo ia, faatasi ai ma Nifae, e mafai ona tatou talia ia mafatiaga i le aluga o o tatou aso a o iloaina foi e alofagia tele i tatou e le Alii.”4
Afai o loo e i ai i le ogatotonu o ou lava tofotofoga faamomoiloto i le taimi nei, faamolemole ia iloa, faatasi ai ma le fesoasoani a le Atua, o le a iu lava ina e sao mai lenei mea ma le malosi ma le paia sili atu.