Mauaina o Au Lava Faaaliga
I le taimi o le faama‘i pipisi o le KOVITI-19, sa filifili ai se tasi o failautusi a le uarota e faasoa atu ni mafaufauga faaleagaga faalevaiaso i tagata o lana uarota talu ai sa le mafai ona latou feiloai faatasi. O se tasi lea o tusi na ia faasoa mai e uiga i ona aafiaga i faaaliga faaletagata lava ia o se talavou matua.
Uo pele i le uarota,
I le vaiaso ua tea, na taunuu mai ai le mekasini “fou” o le Liahona a le Ekalesia. A o amata ona ou faitauina, sa ou matauina sa toe talanoa mai le perofeta, o Russell M. Nelson, e uiga i le manaomia o faaaliga faaletagata lava ia.1
Sa faamanatu mai ai ia te a‘u aafiaga ma faaaliga patino i lo’u lava olaga. Ina ua ou alu atu i le Iunivesite o Polika Iaga, sa ou alofa ai i se tamaitai talavou e igoa ia Kathy (ua suia le igoa). Sa ma maua faatasi i taimi uma le fiafia tele. Sa atamai tele o ia ma aulelei. Sa fiafia o ia ia te a’u, ae sa ou alofa ia te ia.
Ina ua mavae le lua tausaga, o le a faauu o ia ma alu ese atu. Sa ou tatalo ma ole atu i le Alii pe tatau ona ou fesili atu ia Kathy e faaipoipo ia te a’u. O le tali na ou mauaina o se ioe malosi, ma sa ou matuai fiafia lava. Ina ua ou fesili atu ia te ia, sa ia fai mai ia te a’u e tatau ona ia tatalo e uiga i ai. Sa ou iloa o le a ia manaomia foi lana lava molimau. Ae o se mea na faateia ai a’u ina ua ia faailoa mai ia te a’u sa ia tatalo ma anapogi ma o le tali na tuuina mai e le Alii ia te ia e leai.
Sa ou tigā, ita ma maasiasi. Sa ou ita tele i le Atua. Aisea na Ia faia ai lenei mea ia te a’u? Sa ou savalia auala pogisa, na ufitia i le kiona e talanoa i le Tama Faalelagi mo se taimi umi lava. Ona Ia fetalai mai lea: “Sa tonu mo oe le fesili atu ia te ia, ma sa sa‘o o ia i le fai atu e leai.”
Sa faateia a’u. Afai o le ioe mo a‘u, o lona uiga la o le ioe mo ia! Pe o so’u manatu lea.
Sa ou aoaoina se lesona e matua taua lava: E mafai e ni tagata eseese se toalua ona maua ni tali eseese se lua i le fesili lava e tasi. O le mea e sa‘o mo le tagata e toatasi e le o taimi uma e sa’o ai mo le isi tagata.
I se taimi mulimuli ane sa ou malamalama ai i lenei mea na tupu ma se vaega o le mafuaaga mo lena mea. Ina ua uma ona ou faauu ma toe foi atu i lo‘u nuu o Houston, Texas, ISA, sa ou maua se valaau mai ia Kathy. Sa tonu ia te ia e saili se faailoga o le matuaofaiva—i Houston. Sa ia maua foi se fale mautotogi i le lotoa lava lea sa ou nofo ai.
O le eseesega ona sa ou tafao faamasani ma Marjorie i lena taimi. Sa ou alofa ia te ia ma iloa sa ou manao e faaipoipo ia te ia. Ae sa ou alofa foi ia Kathy. Semanu e faigata tele ma le mautonu mo au le faia o le faaiuga e fesili ia Marjorie e faaipoipo ia te au pe ana faapea ou te lei faatinoina lava na uunaiga e uiga ia Kathy i tausaga ua mavae. O lo‘u aafiaga i lena po o le kiona i Iuta na fesoasoani ou te le maluelue ai pe mate faalua ai la’u faaiuga. Ma e lei leva, ae ma faamau ma Marjorie ona ma faaipoipo lea.
Sa maua e tagata uma a latou lava faaaliga. Sa patino ma taitoatasi. Sa tuuina mai ia te a‘u le tali sa sa’o mo a‘u, ma sa tuuina mai ia Kathy le tali sa’o mo ia.
Ua ia i tatou taitoatasi le aia tatau i faaaliga. O isi, e pei o o tatou taitoalua, o tatou matua, po o na taitai o le Ekalesia i lalo o ana mea-tausi tatou te i ai, e mafai foi ona musuia, ae o la tatou tiutetauave le faamautuina o faaaliga uma mo i tatou lava.
I tausaga ua mavae, sa ma galulue faatasi ai ma se tasi i se galuega faatino. Sa ou i ai i le aoga o faailoga maualuluga, ua faaipoipo ma se fanau laiti e toatolu. Ina ua faaiuiu le semesa, sa ou ta‘u atu i lenei tagata sa ou mafaufau e tatau ona ou tuua le aoga. I ni nai aso mulimuli ane, sa ia tau mai ia te au sa ia tatalo e uiga i ai ma lagonaina e tatau ona ou nofo i le aoga. Sa ia ofo mai foi e fesoasoani ia te au i mea tautupe. O se ofo agalelei, ae a o ou tatalo e uiga i ai mo a‘u lava ia, sa ou lagonaina o le mea o le a sili ona lelei mo a’u ma lo‘u aiga e mo a’u e toe foi atu e faigaluega tumau.
Sa oo ina ita tele lenei tagata ia te au aua ou te lei taliaina le “faaaliga” na ia mauaina mo au. O le mea sa ia ofoina mai ua na o se fautuaga, ma o le taimi lava na ou fetuunai ai a’u filifiliga uma, sa ou iloa ai e le o le mea lea sa manaomia e lo‘u aiga po o le mea na finagalo le Alii ou te faia. Sa silafia e le Tama Faalelagi le mea o le a oo mai. I se taimi puupuu mulimuli ane, sa ma’i Marjorie ma manaomia se taotoga. Semanu e faatamaia i matou pe ana faapea o a’u o se tagata aoga e aunoa ma ni inisiua o le soifua maloloina.
O faaiuga o se mea e patino tele. O se mea matagofie. E mafai e i tatou uma ona maua. E manaomia ona sau mai le Alii, ma e manaomia ona tatou faamautu atu o le mea lea e finagalo ai o Ia mo i tatou. A o tatou mulimuli i Ana faaaliga patino ia i tatou, o le a matua faamanuiaina lava i tatou. Ou te iloa sa faapena foi au.
Faamoemoe o le a lelei lo outou vaiaso.
—Mareko