Pe o Ou Faia Moni ea se Eseesega e ala i le Auaunaga?

Saunia e Paige Bryson

Pe a tatou galulue i le faatuatua ma le alofa, e taulia taumafaiga uma.

Ata

o tamaitai e toatolu o loo savavali i le auala

E tele mea tatou te talanoa ai e uiga i le auaunaga i le Ekalesia. Ma o le tele o taimi, o le manatu ua ou malamalama i ai e faatatau i le auaunaga e mafai ona toe faauigaina o le “saili se manaoga, faataunuu se manaoga.” O tala na sa tautalagia i le pulelaa i saunoaga o le konafesi aoao. O tala na ua avea ma faataitaiga lauiloa o auaunaga. Ma e ui ina tutupu nei tala, ae e le na o le pau ia o avanoa tatou te maua e auauna atu ai. I lo‘u aafiaga, e le o ni auala masani ia e auauna atu ai.

E masani lava, pe a tatou fesili atu ia i latou tatou te auauna atu i ai i mea latou te manaomia, o le a latou tali mai latou te le manaomia se mea; o loo lelei mea uma mo i latou. Mo se tasi o loo taumafai ma le faamaoni e faataunuu lo latou valaauga e auauna atu, e mafai ona avea ma se tali lototiga. I le aluga o taimi, atonu latou te amata ona lagona e leai se mea e mafai ona latou faia e auauna atu ai i lena tagata.

Ae faapefea pe afai tatou te mafaufau i tua atu o le na o le faataunuuina o manaoga ia tausia moni isi e pei ona sa faia e Iesu Keriso? Ae faapefea pe afai tatou te auauna atu e ala i le na o le mulimuli i uunaiga agamalu ma agaalofa e uiga ia i latou tatou te auauna atu i ai? Sa atoatoa lelei le tuuina mai e Elder Gerrit W. Gong o le Korama a Aposetolo e Toasefululua ina ua ia saunoa mai, “O aso taitasi, i le anoanoai o auala, tatou te manaomia ai taitoatasi ma e mafai ona ofoina atu le alofa ma le lagolago i auala laiti, faigofie, mamana, e suia ai olaga.”¹

Faatasi ai ma taitai o le Ekalesia o loo uunaia i tatou e saili ni auala laiti ma faatauvaa e auauna atu ai, o le a le mea o loo taofia i tatou? Ia, o nisi taimi o o tatou lava mafaufauga e mafai ona faalavelave ia i tatou. O se tasi o mea ua faalavelave i a‘u taumafaiga i le auaunaga o le le iloaina lea pe o a’u taumafaiga o le a “faitaulia.” Pe o faitaulia ea a tatou taumafaiga faaleauaunaga pe afai e le o ni faatinoga patino ma faamaoni e pei o le ofoina atu o se meaai po o se tietiega?

Ioe, e faitaulia i latou.

Pe o faitaulia ea a tatou taumafaiga faaleauaunaga pe afai e aunoa ma le faailoaina po o le toe tauia?

Ioe, e faitaulia i latou.

O taimi uma lava tatou te mulimuli ai i le Agaga e faatino ai, tatou te fafagaina mamoe a Keriso.

E pei ona ta’ua e Sister Jean B. Bingham, le Peresitene Aoao o le Aualofa, “O nisi taimi tatou te manatu ai e ao ona tatou faia se mea silisili ma toa e ‘faitaulia’ ai o se auaunaga i o tatou tuaoi. Ae o ni faatinoga faatauvaa o auaunaga e mafai lava ona i ai ni aafiaga loloto i isi—faapea ai foi ma i tatou lava ia.”²

O le auaunaga e amata i se manao faigofie e auauna atu i isi ma e masani ona aofia ai le faatinoina o uunaiga laiti faaleagaga. E mafai ona tatou tatalo i taimi uma mo se fesoasoani ia iloa le auala sili e auauna atu ai ia i latou tatou te auauna atu i ai, ae o ni nai auala nei e mafai ona tatou faatamaoaigaina ai aso o i latou o siomia i tatou:

Faasoa atu se alaleo.
Ave se taumafataga o le aoauli ia i latou i le galuega.
Valaaulia i latou e tafafao faatasi ma oe ma au uo.
Tuu atu ia i latou se kopi o le tusi e sili ona e fiafia i ai.
Amata se kulupu e aai faatasi i taumafataga o le afiafi, kulupu o tusi faitau, po o isi ituaiga o faapotopotoga.
Auai i se gaoioiga sa latou fuafuaina.
Mulimuli ia i latou ma fegalegaleai lelei ma i latou i luga o ala o faasalalauga faaagafesootai.
Saunia mo ma auai i se lesona o loo latou aoaoina i le lotu.

Ioe, e le o se lisi atoatoa lenei—e i ai auala e le muta e mafai ona tatou auauna atu ai, aemaise lava a o tatou sailia faaaliga ia malamalama ai i manaoga o i latou tatou te auauna atu i ai. E mafai ona tatou tatalo mo le Agaga e musuia i tatou i mafaufauga i auala e mafai ona tatou tausia ai tagata taitoatasi, pe e ala i le fausiaina o faigauo, atiina ae o le lotogatasi, po o le faateleina o se lagona o le auai.

A o tatou taumafai e auauna atu ma le mataalia i isi, ia tatou manatua foi e tuu atu i isi e auauna mai ia i tatou. Aua le avea ma se tasi e i ai le ituaiga mafaufau faapea “Ou te le manaomia se mea; O loo lelei mea uma”. Ia faailoa atu i ou uso po o tuafafine o auaunaga ia iloa oe ma taumafai ia iloa foi i latou. Vaavaai mo ni auala e lei faamoemoeina na auauna atu ai ia te oe ma faailoa atu ia i latou. Faalautele lou manatu faavae o le auaunaga, ma manatua, pe a e galue i le faatuatua ma le alofa, e faitaulia au taumafaiga.