Sailia o le Malamalama Pe A Siomia Oe e le Pogisa
Sa ou fefe ma sa ou le iloa pe faapefea ona ou faaauau pea, ae sa silafia e le Tama Faalelagi le mea sa ou manaomia.
I ni nai tausaga ua mavae, sa matou malaga ai ma a‘u uo i Aialani. A o matou i ai iina, sa avea a’u ma avetaavale mo le matou vaega. I le amataga, sa ou manatu o le a lofituina le ave o le taavale i le isi itu o le auala i se atunuu ese, o lea sa ou te‘i ai ina ua pei o se mea na masani ai le ave o le taavale i lea itu. E lei i ai se taimi i le malaga sa ou lagonaina ai le fefe a o aveina le taavle i auala vaapiapi, patupatu, ma matagi.
O lena mea, na suia ina ua oo i le aso na fuafua matou te toe foi ai i le fale.
O le matou vaalele sa fuafua e tuuvaa i le taeao po, o lea na matou faaaofiofi ai ma a‘u uo e toaono i le matou taavale i le 4:00 i le taeao. Pe a ma se itula i totonu o le taavale, sa na o a‘u le tagata na ala. Sa filemu, timuga, ma sa matuai pogisa lava, ma sa ou lagonaina se lagona lofituina o le fefe ua faatoilaloina ai a’u a o ou aveina le taavale, sa le mafai ona ou iloa atu le tele o le auala i o‘u luma atu. Sa ou matua nofouta lava sa i ai ni ola faapelepele se ono na ou taulimaina. Sa ou manao e faatafa i tua seia lelei le tau, ae sa le mafai, ona o le a matou misia le matou vaa.
Mauaina o le Malamalama
A o faatupulaia lo‘u fefe, sa ou faia le mea e tasi na mafai ona ou mafaufau i ai—sa ou tatalo.
Sa ou ta‘u atu i le Tama Faalelagi lo’u fefe tele ma ole atu ia te Ia e fesoasoani mai ia matou taunuu ma le saogalemu i le malaevaalele. Ae sa faaauau pea ona palasi malosi mai le timu.
O le taimi lava na maligi ai o’u loimata ma lagonaina ua le mafai ona ou faaauau, na faafuasei ona iloa atu poumolī o le auala, ua faamalamalamaina ai lo‘u ala. Sa vave ona ou mafaufau i lo‘u Faaola ma le tele o le malamalama na Ia aumaia i lo’u olaga. Sa ou iloaina e aunoa ma se masalosalo sa silafia a’u e Ia ma le Tama Faalelagi a o o’u lagonaina lo La alofa mutimutivale agamalu ia te a’u.
Sa La silafia o‘u popolega ma aveesea i latou i ni nai sekone i le malamalama.
I le faatumulia ai i se lagona faafouina o le mautinoa, sa ou faaauau ai i le auala. Peitai, i totonu o lagona e pei o ni sekone, sa faafuasei ona ou toe i ai i le pogisa, faatasi ai ma le malamalama ua mou atu i o‘u tua. O le mea e lelei ai, faatasi ai ma sina mautinoa itiiti na ou mauaina mai i poumolī, sa le toe i ai le pogisa.
Na avea lenei mea ma se mamanu i le vaega na totoe o le faigamalaga. O taimi uma sa ou tagi ai ma le fefe tele i lo‘u Tama Faalelagi, ma mafaufau, “E le mafai ona ou faia lenei mea,” e faaali mai le malamalama, ma mafai ai ona ou faaauau pea. Ma mulimuli ane, sa matou taunuu i le malaevaalele.
E Mafai Lava Ona Tatou Liliu Atu ia Keriso
O lenei aafiaga e faamanatu mai ai ia te au la tatou malaga i le olaga. Tatou te fetaiai ma o tatou lava timuga patino, pogisa, fefefe, o auala e le mailoa, ma le tuuatoatasi i nisi taimi. E i ai taimi tatou te lagona ai e le mafai ona tatou faaauau pea, e le mafai ona oo mai le malamalama ia i tatou, tatou te le gafatia, pe e leai se tasi e malamalama i le pogisa ua tatou oo i ai. Ae ou te fia faasoa atu ia te outou la‘u molimau patino o loo i ai se tasi e malamalama.
Iesu Keriso. “O le malamalama ma le ola o le lalolagi” (3 Nifae 9:18). O le na puapuagatia mo i tatou taitoatasi. Na te silafia oe, ma Na te silafia ou atuatuvalega. Ma ua faaloaloa mai Ona aao, ua saunia e fesoasoani ia te oe.
O taimi uma lava tatou te oo ai i le pogisa, pe ona o a tatou lava filifiliga po o filifiliga a isi po o tulaga e le oo i ai lo tatou malosi, e mafai ona faaauau pea ona tatou filifili e liliu atu ia te Ia. Ma o le a Ia saunia le malamalama mo i tatou. E ui atonu e le o taimi uma e vave ai lena malamalama, e pei o le taimi o lo‘u aveina o le taavale i Aialani, o loo faatasi pea Iesu Keriso ma i tatou ma o le a tuuina mai ia i tatou le malosi tatou te manaomia e faaauau ai pea ona agai i luma i lena malamalama.
I lo‘u taimi sili ona pogisa, sa tuuina mai ai ia te a’u le avanoa e faalagolago ai i le faamoemoe ma le faatuatua. Sa faamanatu mai ia te au e le o tuua na o au ma ona o Ia, e mafai ai ona ou faatoilaloina mea uma na oo mai i lou ala. Na molimau mai Elder Timothy J. Dyches o le Fitugafulu i le konafesi aoao ia Aperila 2021 e faapea “a o tatou faateteleina lo tatou faatuatua ia Keriso, tatou te maua le malamalama i le fuataga faateleina seia oo ina aveesea ai le pogisa uma e ono faapotopoto mai i o tatou autafa.”1
Ou te valaaulia outou ia faalolotoina lo outou faatuatua ma faalagolago i le Faaola. O loo i ai o Ia iina e auina mai le malamalama i lou olaga i soo se ituaiga o foliga e te manaomia. Ma e mafai ona Ia aveesea soo se pogisa e ono siomia ai oe. E pei ona faamanatu mai e Elder Jeffrey R. Holland o le Korama a Aposetolo e Toasefululua ia i tatou, “e le mafai ona e magoto maualalo ifo nai lo le malamalama e le iu o le Togiola a Keriso.”2
Na pau lava le mea e tatau ona tatou faia o le liliu atu ia te Ia.