Fekumi ki he Māmá ʻi he Taimi ʻOku ʻĀkilotoa Ai Koe ʻe he Fakapoʻulí
Naʻá ku ilifia pea ʻikai ke u ʻilo pe ʻe founga fēfē nai haʻaku hoko atu, ka naʻe ʻafioʻi ʻe he Tamai Hēvaní ʻa e meʻa naʻá ku fie maʻú.
ʻI he ngaahi taʻu siʻi kuo hilí, ne u folau mo hoku ngaahi kaungāmeʻá ki ʻAilani. Lolotonga ʻemau ʻi aí, ne u hoko ko e fakaʻuli ki heʻemau kulupú. ʻI he kamataʻangá, naʻá ku fakakaukau ko ha meʻa fakailifia ke fakaʻuli ʻi he tafaʻaki ʻe taha ʻo e halá ʻi ha fonua muli, ka naʻá ku ʻohovale ʻi he fakanatula pē ʻeku anga ki he fakaʻulí. Ne teʻeki tuʻo taha ke u ongoʻi manavasiʻi ʻi heʻeku fakaʻuli atu ʻi he ngaahi hala fāsiʻi, faingataʻa mo havilí.
Kae tālunga mo e ʻaho ne pau ai ke mau foki ki ʻapí.
Naʻe mavahe ponigpongia homau vaka fokí, ko ia ne mau fakaʻefihi fiemohea atu pē mo hoku ngaahi kaungāmeʻa ʻe toko onó ki heʻemau kaá ʻi he 4:00 hengihengi. ʻI he hili nai ha houa ʻe taha mei ai, ko au toko taha pē naʻe kei ʻaá. Naʻe lōngonoa, ʻuhoʻuha, pea fakapoʻuli ʻaupito, pea ne u ongoʻi ha ilifia lahi ʻi heʻeku fakaʻulí, ʻi he ʻikai ke u lava ʻo sio ki he konga lahi ʻo e hala ʻi muʻa ʻiate aú. Naʻá ku ʻiloʻi lelei naʻe ʻi ai ha moʻui mahuʻinga ʻe ono ʻi hoku nimá. Naʻá ku loto ke afe kae ʻoua kuo maʻa e ʻeá, ka naʻe ʻikai ke u lava he te mau tōmui ki homau vaká.
Fekumi ki he Māmá
ʻI he fakaʻau ke lahi ange ʻeku ilifiá, naʻá ku fakahoko ʻa e meʻa pē taha naʻe lava ke u fakakaukau ki aí—naʻá ku lotu.
Naʻá ku fakahā ki he Tamai Hēvaní ʻeku manavasiʻí peá u kole ange ke Ne tokoniʻi kimautolu ke mau aʻu lelei ki malaʻe vakapuna. Ka naʻe kei tō mālohi mai pē ʻa e ʻuhá.
ʻI he taimi ne kamata ai ke u tangi mo ongoʻi hangehangē he ʻikai ke u toe lava ʻo hoko atú, fakafokifā pē kuo ʻasi mai ha fuʻu hala, fonu ʻi he ngaahi māma hala ʻo fakamāma hoku fonongaʻangá. Naʻá ku fakakaukau leva ki hoku Fakamoʻuí mo e lahi ʻo e māma naʻá Ne ʻomi ki heʻeku moʻuí. Naʻá ku ʻiloʻi taʻe-toe- veiveiua naʻá Ne ʻafioʻi au mo e Tamai Hēvaní ʻi heʻeku ongoʻi ʻEna ʻaloʻofa ongongofua kiate aú.
Naʻá Na ʻafioʻi ʻeku manavasiʻí pea fakangaloki atu ia ʻi ha ngaahi lau sēkoni pē ʻaki ʻa e māmá.
Naʻe toe fakafoʻou ʻeku loto falalá peá u hoko atu ʻi he halá. Neongo ia, ʻi ha lau sekoni pē kuó u ongoʻi kuó u toe ʻi he fakapoʻulí, pea fakaʻau ke mole atu ʻa e māmá ʻi hoku tuʻá. Ko e meʻa mālié, he naʻe ʻikai toe fakaʻau ke lahi ange ʻa e fakapoʻulí ʻi heʻeku maʻu e loto falala ko ia ne u maʻu mei he ngaahi tuʻuʻanga māmá.
Naʻe hoko ʻeni ko ha sīpinga ʻi he toenga ʻo ʻeku fonongá. Ko e taimi kotoa pē naʻe ʻamanaki ke u tangi ai ʻi he fuʻu ilifia lahi ki heʻeku Tamai Hēvaní, ʻo fakakaukau, “He ʻikai ke u lava ʻo fai ʻeni,” ne hā mai ha māma, ʻo malava ai ke u kei hoko atu pē. Pea faifai pē ʻo mau aʻu ki he malaʻe vakapuná.
Te Tau Lava Maʻu Pē ʻo Tafoki kia Kalaisi
ʻOku fakamanatu mai ʻe he aʻusia ko ʻení ʻa ʻetau fononga ʻi he moʻuí. ʻOku tau fehangahangai fakatāutaha mo ha ngaahi ʻuha, fakapoʻuli, ilifia, hala taʻeʻiloa, mo e taʻelata ʻi ha ngaahi taimi. ʻOku ʻi ai ha ngaahi momeniti ʻoku tau ongoʻi ai he ʻikai ke tau lava ʻo hoko atu, he ʻikai lava ke aʻu mai ʻa e māmá kiate kitautolu, ʻoku ʻikai ke tau malava, pe ʻoku ʻikai mahino ki ha taha ʻa e fakapoʻuli ʻoku tau ʻi aí. Ka ʻoku ou fie vahevahe mo kimoutolu ʻeku fakamoʻoni fakatāutahá ʻa ia ʻoku ʻi ai ha taha ʻokú ne maʻu ʻa e mahinó.
Sīsū Kalaisi. “Ko e maama pea mo e moʻui ʻo e māmaní” (3 Nīfai 9:18). Ko e tokotaha naʻe faingataʻaʻia maʻa kitautolu fakatāutaha. ʻOkú Ne ʻafioʻi koe, pea ʻokú Ne ʻafioʻi hoʻo ngaahi manavasiʻí. Pea ʻoku mafao atu Hono toʻukupú, ʻo mateuteu ke tokoniʻi koe.
Ko e taimi kotoa pē ʻoku tau ʻi he fakapoʻulí ai, ʻo tatau ai pē pe ko ʻetau ngaahi filí pe ngaahi fili ʻa e niʻihi kehé pe ngaahi tūkunga ʻoku ʻikai ke tau lava ʻo mapuleʻí, te tau lava ʻo hokohoko atu ke fili ke tafoki kiate Ia. Pea te Ne ʻomi ha māma maʻatautolu. Neongo he ʻikai ke faʻa hoko ʻa e māmá he taimi pē ko iá, ʻo hangē ko ʻeku fakaʻuli ʻi ʻAilaní, ka ʻoku ʻiate kitautolu maʻu pē ʻa Sīsū Kalaisi pea te Ne ʻomi maʻu pē ʻa e mālohi ʻoku tau fie maʻú ke tau laka atu ai ki muʻa ki he maama ko iá.
ʻI hoku taimi fakapoʻuli tahá, ne u maʻu ha faingamālie ke falala ki he ʻamanaki leleí mo e tuí. Naʻe fakamanatu mai kiate au naʻe ʻikai ke u tuenoa pea te u lava fakataha mo Ia ʻo ikunaʻi ʻa e meʻa kotoa pē ne hoko kiate aú. Naʻe fakamoʻoni ʻa ʻEletā Tīmote J. Teisesi ʻo e Kau Fitungofulú ʻi he konifelenisi lahi ʻo ʻEpeleli 2021 “ʻI hono fakatupulaki ʻetau tui kia Kalaisí, ʻoku tau maʻu ai ha maama ʻoku tupulaki maʻu ai pē kae ʻoua kuó ne kapusi kotoa atu ʻa e fakapoʻuli ʻe ala takatakai ʻiate kitautolú.”1
ʻOku ou fakaafeʻi koe ke loloto ange hoʻo tui mo falala ki he Fakamoʻuí. ʻOkú Ne ʻi ai ke ʻoatu ha maama ki hoʻo moʻuí ʻi ha faʻahinga founga pē te ke fie maʻu. Pea te Ne lava ʻo kapusi ha faʻahinga fakapoʻuli pē ʻokú ne ʻākilotoa koe. Hangē ko ia ne fakamanatu mai ʻe ʻEletā Jeffrey R. Holland ʻo e Kōlomu ʻo e Kau ʻAposetolo ʻe Toko Hongofulu Mā Uá kiate kitautolu, “He ʻikai malava ke taʻe aʻu atu kiate koe e maama taʻengata ia ʻo e Fakalelei ʻa Kalaisí.”2
Ko e meʻa pē ʻoku fie maʻu ke tau fakahokó ko e tafoki kiate Ia.