Avea [ma se Tagata] Lelei Atu i le mavae ai ona Aafia i le Toatama’i
O se vaega o lenei faagasologa tiga ma le faamaonia ua tatou ta’ua o le olaga o le vaai lea pe o le a tatou fetaomi moni atu i luma.
Ata na tusia e David Green
O le Pa’ū o Atamu ma Eva na amatalia ai se tulaga vaavaaia lea o le a maua ai e fanau a le Atua le avanoa e tofotofoina ai “e vaai pe latou te faia mea uma o soo se mea e poloaiina ai i latou e le Alii lo latou Atua” (Aperaamo 3:25). I le lotolotoi o lenei tofotofoga tatou te lagona ai le fiafia ma le olioli ae faapea foi tofotofoga ma puapuaga, e pei o faaosoosoga, ma‘i, lē atoatoa, ma le lotovaivai.
Aisea e faavaivaia ai nisi i foliga o le pagatia, ae o isi e sili atu ona lelei pe a uma ona aafia i le toatamai? O upu a perofeta, faapea foi ma le saienisi o le maufetuunai, e fesoasoani e maua ai tali i lenei fesili.
O nisi e faauigaina le maufetuunai o le tomai e toe faaleleia ai pe fetuunai ai i se tulaga pagatia, faigata, po o suiga.1 O le Pa’ū o Atamu na aumaia ai suiga na fesoasoani e maua ai avanoa mo le maufetuunai—e agai ai i luma ma luga. O lenei vaega o le fuafuaga a le Tama Faalelagi na tatalaina ai le faitotoa mo i tatou e iloa ai le olaga faitino, lea tatou te oo uma ai i le olioli ma le faanoanoa—ma le tuputupu ae (tagai i le 2 Nifae 2:23).
O mataupu faavae nei e fa o le maufetuunai e fesoasoani ai pe a faatumulia lau malaga i le olaga nei i faigata.
Saili i Totonu
Pe a tatou oo i aso pogisa ma faigata, e mafai ona tatou saili i totonu e sue ai meaalofa ua saunia ai i tatou e le Tama Faalelagi.
Fesili ifo ia te oe lava, “O a meaalofa, malosiaga, ma taleni ua faamanuiaina ai au e le Atua e mafai ona ou utuvai mai ai i lenei taimi faigata?” Suesue lou faamanuiaga faapeteriaka ma vaavaai mo ni faaiteite i ou aafiaga i le olaga e mafai ona faaalia ai meaalofa ua tuuina mai e le Atua ia te oe. (Tagai i le Mataupu Faavae ma Feagaiga 46:11.)
O faigata ma luitau i o tatou aso e mafai ona lagona ai le tulaga ese ma le le lagolagoina. Sei vagana ua paleni ma le faatuatua, o le atuatuvale ma le popole e mafai ona faaitiitia ai la tatou vaaiga e taulai atu ia i tatou lava—o se taulaiga e manatu faapito ia i tatou lava, fefe, ma faanoanoa, ma tuua ai i tatou ia lagonaina le sili atu ona lofituina, popole, ma faanoanoa.
E mafai foi ona faaosoosoina i tatou e faatusatusa o tatou tulaga ma isi o e foliga mai e leai ni faafitauli. Ae o lenei ituaiga o faatusatusaga e faoa ai le olioli mai ia i tatou, ae o le lotofaafetai e faaleleia ai.
E mafai ona tatou faaleleia la tatou vaaiga e ala i le iloaina o meaalofa ua tuuina mai e le Tama Faalelagi ia i tatou. E pei ona fautua mai Peresitene Russell M. Nelson, “O le faitauina o o tatou faamanuiaga e sili mamao atu nai lo le toe faamatalaina o o tatou faafitauli.”2 O se mafaufau lelei ma le lotofaafetai e faamalosia ai lo tatou malosi ma le sogasoga, ma e mafai ona tatou vaai i mea mai se vaega e sili atu ona aoga, e aofia ai se taulaiga sili atu i mea e taua moni lava ma mea o loo tatou puleaina.
I taimi faigata, atonu e te fesili ifo ia te oe lava:
-
O i ai ni auala e mafai ona ou tausia lelei ai lo‘u tino ma le mafaufau i meaai, faamalositino, ma le moe? (Tagai i le Mataupu Faavae ma Feagaiga 88:124)
-
O ou liliu atu ea i le Tama Faalelagi ma Iesu Keriso mo le malosi ma le taitaiga, ma iloa ai le ala ua La faamanuiaina ai au i luga o le ala?
-
O ou te talitonu ea o le a faamanuiaina ma aoaoina au e le Tama Faalelagi ma Iesu Keriso pe a ou mulimuli ia i Laua—e tusa lava po o a ou luitau?
E tatau ona tatou iloa ma manatua le lelei i o tatou olaga. E le mafaitaulia suesuega ua faaalia ai le mana o le lotofaafetai mo o tatou loto ma mafaufau, mai le faaleleia atili o lagona ma le talitonu o le a lelei mea uma i le faaitiitia o le atuatuvale ma tiga. O le lotofaafetai e faatagaina ai le patipatia o le taimi nei, taofia ai lagona le lelei, ma faamalosia ai fesootaiga faaagafesootai.3
I taimi o faigata, pe a tatou taulai atu pea i le faalolotoina o lo tatou faatuatua ma le faalagolago i le Atua, e mafai ona tatou iloa se vaaiga tele i le olaga ma lagonaina le lagolagoina i o tatou tofotofoga, faafitauli, ma puapuaga (tagai Alema 36:3).
Liliu Atu i Isi
O se mataupu faavae lona lua o le maufetuuna‘i o le liliu atu lea i fafo—i tagata o loo siomia oe ma i punaoa ua tuuina mai e le Atua.
O le toatele o e na taulimaina ma le manuia ia luitau i o latou olaga ua fai mai o le ki e tasi o le mauaina lea o le malosi mai avanoa ma punaoa lata ane. O lena mea e mafai ona aofia ai mea e fiafia i ai; tusitusi i se apitalaaga; faatinoina; faitauina o tusitusiga paia ma isi tusi faagaeetia; talanoa ma se tagata o le aiga, uo, po o se faufautua; pe faaalu foi se taimi ma se fagafao. O nei mea uma ua faaalia e faaitiitia ai le popole ma le atuatuvale.4
Sa faalagolago uma Nifae ma le uso o Iareto i punaoa na “saunia e le Alii” (1 Nifae 17:5). Mai fua, fatu, laau, ma meli vao i oa ma maa e 16, na saunia ai e le Atua punaoa mo Lona nuu e faaaoga pe a latou feagai ma luitau i a latou malaga. O a punaoa ua saunia e le Atua mo oe e faamāmāina ai le avega i lau malaga?
O le liliu atu i fafo e faasino foi i le iloaina ma le tali atu i mafatiaga o isi tusa lava pe o tatou feagai ma luitau. Na valaaulia i tatou e Peresitene Henry B. Eyring, Fesoasoani Lua i le Au Peresitene Sili, e “matau puapuaga o isi ma taumafai e fesoasoani atu. O le a faigata tele lena mea aemaise pe afai o matua tofotofoina foi i tatou lava. Ae o le a tatou iloa pe a tatou siiina se avega a se isi, pe itiiti, o le a faamalolosia o tatou tua ma iloaina se malamalama i le pouliuli.”5
Ua faamamafa mai e Elder David A. Bednar o le Korama a Aposetolo e Toasefululua le taua o le fausiaina o uiga faaKeriso e ala i le liliu atu i fafo i le lotolotoi o o tatou lava tofotofoga: “O uiga tauleleia e faaalia … i le mana e iloatino ai mafatiaga o isi tagata pe a tatou mafatia i tatou lava; i le tomai e iloa ai le fiaaai o isi pe a tatou fiaaai; ma i le mana e aapa atu ai ma faalautele le agaalofa mo tiga faaleagaga o isi pe a tatou i ai i le lotolotoi o o tatou lava mafatiaga faaleagaga. O le mea lea, o uiga tauleleia e faaalia i le tilotilo, liliu atu, ma aapa atu i fafo pe a oo i le tali patino a le tagata natura i totonu o i tatou taitoatasi o le liliu mai lea i totonu ma le mata’ū ma le manatu faapito ia te oe lava.”6
Tepa i Lugā
A o tatou saili i totonu ma liliu atu i o tatou ala i le maufetuunai, e le tatau lava ona galo ia i tatou ona tepa i lugā ma aioi atu mo le filemu ma le taitaiga faalelagi. Ua folafola mai e le Tama Faalelagi afai tatou te le faamaaaina o tatou loto e faasaga ia te Ia i taimi o o tatou tofotofoga, o le a tatou liua ma faamaloloina (tagai Mataupu Faavae ma Feagaiga 112:13).
A o i ai i le loloto o le faanoanoa, sa ola i meaai eleelea ma taoto i luga o fola malulu i le Falepuipui o Liperate, sa filifili le Perofeta o Iosefa Samita e tepa i luga ma aioi atu mo se fesoasoani faalelagi.
Sa ia maua le faamautinoaga mai le Alii: “Lo‘u atalii e, ia filemu lou agaga; o lou tiga ma ou puapuaga o le a nao sina minute laitiiti” (Mataupu Faavae ma Feagaiga 121:7). Ona folafola atu lea e le Alii ia te ia, “Afai e te talitalia lelei, o le a faaeaina oe e le Atua i lugā; o le a e manumalo i ou fili uma” (Mataupu Faavae ma Feagaiga 121:8).
O le vaavaai atu i lugā e aofia ai le faalagolago i le taimi a le Alii ma le onosai ma le vaaiga i la tatou sailiga mo le filemu i afa o le olaga. O mafai ona e vaai i auala o loo faamanuiaina ai oe e le Atua i ou luitau?
Fetaomi Atu i Luma
I le Tusi a Mamona, o loo faamanatu mai ai Nifae e tatau ona tatou “fetaomi atu i luma ma le tumau ia Keriso, ma se susulu atoatoa o le faamoemoe, ma le alofa i le Atua ma tagata uma” (2 Nifae 31:20).
Pe a tatou lagonaina le mamafatu, pe a i ai o tatou aso faalotovaivaia, pe a le susulu atoatoa lo tatou faamoemoe, ma a tatou le alolofa i tagata uma, e mafai lava ona tatou filifili e fetaomi atu i luma. E le o tala ea na tatou te fiafia e faitau i ai—o le Au Paia faamaoni o e na aoaoina ma ola i mataupu faavae o le maufetuuna‘i? O nei faataitaiga o le faatuatua ma le lototele ua faaali mai ai ia i tatou le ala e mafai ai ona tatou fetaomi atu i luma ma le tumau ia Keriso.
Ioe, o le a i ai taimi tatou te lagona ai e le taliina tatalo i auala sa tatou faamoemoe i ai. O le a i ai pea faaipoipoga tatala, oti, faama‘i, ma le le fiafia, e ui lava i a tatou aioiga ma faananauga mo aso e sili atu. O le vaega o lenei faagasologa tiga ma le tofotofoina “e vaai pe [tatou] te faia mea uma o soo se mea e poloaiina ai i [tatou] e le Alii lo [tatou] Atua” (Aperaamo 3:25). Pe a pogisa le lalolagi, pe o le a tatou sailia pea le Malamalama?
I le talanoa ai e uiga i tofotofoga ma faigata, sa fesili ai Elder Jeffrey R. Holland o le Korama a Aposetolo e Toasefululua, “O le a le umi tatou te faatalitali ai mo se toomaga mai faigata e oo mai i o tatou luga? Ae ā le onosaia o tofotofoga patino a o tatou faatali ma faatali pea, ma foliga mai ua fai si telegese o le oo mai o se fesoasoani? Aiseā ua faatuai ai a o avega ua foliga mai ua mamafa atu nai lo mea e mafai ona tatou gafatia?” Ona ia faamautu mai lea ia i tatou, “O le faatuatua o le faalagolago lea i le Atua i taimi lelei ma taimi leaga, e tusa lava pe aofia i lena mea sina puapuaga se’ia oo ina tatou vaaia Lona aao [laveai] o faaalia mo tatou.”7
Sa le gata ina fatuina e lo tatou Tama alofa ma silafia mea uma se fuafuaga o le fiafia mo Ana fanau uma, ae sa ia saunia foi se aafiaga faalelalolagi e fetaui i o tatou manaoga ma gafatia mo le tuputupu ae ma le olioli. Ou te molimau atu e mafai ona tatou lelei atili pe a uma ona oo i le toatamai, a o tatou aoao e saili i totonu, liliu i fafo, tepa i luga, ma fetaomi atu i luma.