Autalavou Matutua
Ausiaina o Ou Gafatia e ala i le A’otauina
Ua faaalia e se tasi o talavou matua mai Papua Niu Kini le auala e fesoasoani ai le sailia o avanoa e aoao ai tatou te ausia ai o tatou gafatia.
Ata na tusia e Julia Yellow
E te iloa le tagata e te manao e avea ai oe? E te iloa le mea o le a fesoasoani ia te oe e te oo ai iina? Na aoao mai Elder Joseph W. Sitati o le Fitugafulu, “Afai e mafai ona e atiina ae se vaaiga manino o le mea e mafai ona avea ai oe, o le a tatalaina e le Alii auala mo oe.”1
O loo fesoasoani le a‘otauina ia Christina Augerea mai Hula, Papua Niu Kini, e ausia ana sini. Talu mai lava lona laitiiti, sa fiafia lava o ia e faitautusi ma le sini o le aoga i le iunivesite. O lona fiafia e faitautusi o le mea lea na taitai atu ai o ia i le Ekalesia.
“A o ou i ai i le vasega lima, sa leai ni a matou tusi i lau aoga,” o lana tala lea. “O lo‘u faiaoga o se tagata o le Ekalesia. Sa leai ni ana tusi, o lea na ia tuuina mai ai ia i matou le Tusi a Mamona.”
I ni tausaga mulimuli ane, sa auauna atu Christina i se misiona i Filipaina ona amata ai lea ona auai i le Iunivesite o Polika Iaga–Hawaii, lea o loo galue ai o ia agai atu i le aoga faaloia ma se taulaiga muamua i ni mataupu e lua i le saienisi faaupufai ma le pulega faapisinisi ma se taulaiga laitiiti i le Meneterini.
O le tala a Christina na toe suia atoa ina ua faamalosia o ia e le faama’i pipisi o le KOVITI-19 e toe foi i le fale. I se tasi aso a o asiasi atu i lona nuu, sa ia iloa ai o le faletusi i lana aoga maualalo sa tumu i meaola faalafuā ninii. Faatasi ai ma le fesoasoani a faalapotopotoga i le lotoifale ma le Ekalesia, sa vaaia ai e Christina le fausiaina o se faletusi fou, faatasi ai ma polokalama ua faatulagaina lea o le a faaauau ai pea ona faagaoioia mo le tele o tausaga.
E pei ona fiafia o ia ona sa mafai ona ia fesoasoani i lona nuu, na faamalamalama mai e Christina e tele le faatuatua ma le galuega na manaomia e oo atu ai i le mea o loo i ai nei o ia. “Ou te iloa le lagona o le leai o se mea ae o loo e manao e suesue,” o lana tala lea. Ma e ala i ona aafiaga uma, ua tele mea ua ia aoaoina e uiga i le taua ma le faamoemoega o le aotauina.
Sili Atu Na i lo Togi
E masani ona aoao mai o tatou taitai o le Ekalesia e taua le sailia o soo se aotauina tatou te mafaia. “Ua uunaia pea e le Alii ma Lana Ekalesia ia le aotauina ina ia faateleina ai lo tatou tomai e auauna atu ia te Ia ma fanau a lo tatou Tama Faalelagi,” na aoao mai ai Peresitene Henry B. Eyring, Fesoasoani Lua i le Au Peresitene Sili.2
Ae, e pei ona faasoa mai e Christina, o le aotauina e sili atu nai lo na o le saofai i totonu o se potuaoga. “Sa tau mai e se tasi o a‘u polofesa ia i matou o le aoaoina e le na o le mauaina o togi, se tusi pasi, po o le mauaina o se galuega i le iuga. E faatatau i le malamalama i manatu.” Ma ina ia mafai ona faia e le a‘otauina se eseesega i lou olaga, o mea ua e aoaoina e tatau ona avea ma se vaega o oe. “E tatau ona e fiafia e aoao,” o le faaopoopo mai lea a Christina.
E tele auala e mafai ona aotauina ai i tatou. “E le na o le aoga tatou te aoao ai,” o le tala lea a Christina. “Tatou te aoao foi i totonu o le Lotu. Tatou te aoao i le fale. E mafai ona tatou aoao i soo se mea.” A o tatou faaaogaina avanoa e faalautele ai lo tatou malamalama, o le a sili atu lo tatou aotauina, ma avea atili ai le faagasologa o le aoaoina ma totonugalemu i o tatou olaga.
E Fesoasoani le A‘otauina ia i Tatou e Auauna Atu Ai
Ua molimau mai Christina o le malamalama o le ki lea i le fesoasoani ia i tatou taitoatasi ia “saunia ai e feiloai ma le Atua” (Alema 34:32). “E mafai ona tatou tuputupu ae ma ausia o tatou gafatia e ala i le aoaoina,” o le tala lea a Christina. A o tatou sailia ma le lotomaualalo le malamalama, e avea atili i tatou e faapei o lo tatou Tama Faalelagi ma Iesu Keriso ma saunia e toe nonofo faatasi ma i Laua.
O le tatalaina o o tatou gafatia faaletagata lava ia, e faateleina ai foi e le aotauina lo tatou tomai e auauna atu ai i isi. Ua faapea mai Peresitene Nelson, “O le aotauina o le eseesega lea i le va o le moomoo maimau pe ana mafai ona e fesoasoani atu i isi tagata ma le mafai ona fesoasoani atu ia i latou.”3
O se tasi lenei o faamanuiaga sili ua vaaia e Christina mai le aotauina. “O le a‘otauina ou te maua ai le mautinoa e iloa ai e mafai ona ou aoao atu tomai i isi,” o lana tala lea. “E oo lava i le faiaoga i le Ekalesia o se tiutetauave tele foi. O lea la o le i ai o le lototele e aoao ai tamaitai talavou po o le autalavou e ofoofogia.”
O Le A Fesoasoani le Atua ia i Tatou
O le mauaina o le aotauina e manaomia ai le finafinau ma le malosi—ae e mafai. I le taimi muamua, sa lei iloa e Christina pe o le a faapefea ona ia ausia ana sini. “Ou te lei iloa po o fea o le a ou maua ai le tupe,” o lana tala lea. Ae na iloa e Christina afai e te faalagolago i le Atua ma saili Lana fesoasoani, o le a Ia fesoasoani ia te oe e faataunuu mea e finagalo o Ia e te faia.
“Faatasi ai ma a‘u miti ma fuafuaga uma, e lua mea na ou ole atu ai i taimi uma i le Tama Faalelagi, ia aoaoina a’u i mea e mafai ona ou faia ma pe mafai faapefea ona ou faia. Ma Na te lei tuua lava a‘u. Sa Ia silafia sa i ai se mea e sili atu mo au, ma sa Ia taialaina au. Sa ou iloaina i na taimi uma sa faatasi le Tama Faalelagi ma au ma o loo Ia faatasi mai pea.”
Ma a o tatou sailia le fesoasoani a le Tama Faalelagi, o le a Ia faamanuia i tatou i avanoa e maua atili ai le a‘otauina ma le malamalama.
Ua iloa e Christina o le mauaina o le aotauina e aoga ai taumafaiga. “Ou te ta‘u atu i tagata o e manatu e le mafai ona latou faia ia manatua le gafatia tele ua tuuina mai e le Atua ia i tatou. E mafai ona tatou tatalaina lena gafatia e ala i le talitonu ua Ia tuuina mai ia i tatou.”