Ola “e Peiseai” Ua Faataunuuina Folafolaga a le Atua
O se fasifuaitau faigofie ua fesoasoani ia te au e vaai ai i auala e tausia ai e le Atua Ana folafolaga, e aofia ai ma folafolaga o loo i lou faamanuiaga faapeteriaka, e tusa lava pe le o tupu ia te au i le taimi nei.
Ata tusi mai le Getty Images
O nisi taimi o le i ai o se vaaiga e faavavau e mafai ona pei o se faamanuiaga ma se fetuu. E ui ina faamafanafanaina au i le iloa o le a iu lava ina lelei mea uma, ae e pei le faavavau o se taimi umi tele e faatalitali ai. Na aoao mai Elder Neal A. Maxwell (1926–2004) o le Korama a Aposetolo e Toasefululua e faapea “o loo soifua le Atua i se faavavau i le taimi nei lea o loo i ai pea i Ona luma le taimi ua tuanai, taimi nei, ma le lumanai.”1 O lenei aoaoga ou te manatu ai e le gata ina silasila mai le Atua ia te au o loo faatalitali mo folafolaga i le taimi nei ae o loo vaaia foi le aafiaga o le faataunuuina o na folafolaga i le faavavau. E ui e le o i ai sa‘u tane po o se fanau i lenei lalolagi i le taimi nei, ae ua silasila mai o Ia ia te a’u o se avā ma se tina. A o ou faaalia i aso taitasi vaivaiga faaletagata ma faaletonu, e silasila mai o Ia ia te au o se tagata faamamaluina, ma atoatoa. Ma talu ai Na te silasila mai ia te au i na matafaioi e faavavau, e mafai ona ou tulimatai atu i luma ma ola “e peiseai” (Iaroma 1:11) ua faataunuuina na mea.
O le ola “e peiseai” e manaomia ai le talitonu o le Atua o se tausi folafolaga. E ui o le “tagata tausi folafolaga” e le o se fasifuaitau faatusi paia, ae ua avea ma se tasi o faamatalaga ou te fiafia i ai e uiga ia te Ia. O tusitusiga paia o se tusi o folafolaga. O Lona malumalu paia o se maota o folafolaga. O a‘u feagaiga ma Ia o a’u folafolaga patino ia. O Lana galuega o se galuega o folafolaga. Ma o Ia o se tausi folafolaga o le ua naunau e sasaa mai faamanuiaga i luga o Lona nuu (tagai Mataupu Faavae ma Feagaiga 109:21). Na ia manatuaina Rasela, laveaiina Tavita, fafagaina le fafine Sarefata, taitai le fanauga a Isaraelu i se nuu folafolaina, ma taitai atu i le Toefuataiga ua loa ona folafolaina o Lana talalelei. Ma o le mea aupito sili ona taua o mea uma, na Ia auina mai Lona Alo Pele e Toatasi “ia aumaia le tino ola pea ma le ola faavavau o le tagata”(Mose 1:39). E moni lava, i tusitusiga paia “ua faaali mai e le Alii o Ia lava ma Lona uiga atoatoa … ina ia mafai ai e le mafaufau o le tagata ona tuu atu le talitonuga ia te Ia e aunoa ma le faatuai” (Bible Dictionary, “Faith”).
Ona o le Atua o se Atua o folafolaga, e i ai taimi e faigata ai ia te a‘u ona tuu faatasi pe aisea e lei faataunuuina ai nisi o folafolaga patino i lo’u olaga. Ua ou iloaina le toatele o isi na faapena o latou lagona pe a iloiloina o latou faamanuiaga faapeteriaka pe mafaufau foi i isi faamanuiaga faaleperisitua ma uunaiga mai le Agaga Paia. E faapefea la ona tatou ola “e peiseai” ua faataunuuina na folafolaga? Ou te fia faasoa atu ni manatu se tolu.
1. Mafaufau i ni Folafolaga Eseese
O se tasi o ki i le talitonu o le Tama Faalelagi o se tausi folafolaga o le nofouta lea i folafolaga eseese ua Ia tuuina mai ia i tatou. O nisi folafolaga e foliga mai e sili atu ona manaia pe taua nai lo isi, ma o folafolaga na e masani ona tatou matele e taulai i ai. E ui ua tatou iloa o le tele o nei folafolaga o le a le faataunuuina i lenei olaga, ae tatou te faamoemoe ia maua sina vaega o na folafolaga i le olaga nei ma ola faamaoni ina ia maua i se aso le atoatoaga o na folafolaga. Mo se faataitaiga, tatou te tulimatai atu ia “oo mai le toetu i tagata uma”(2 Nifae 9:22), o le olioli i le aumaia o se “agaga e toatasi ia te [Ia]” (Mataupu Faavae ma Feagaiga 18:15), laveaiina mai “le mea matuitui i le tino” (2 Korinito 12:7), o se faaipoipoga ma se aiga e faavavau, ma mulimuli ane, o le faaeaga ma le avea e faapei o o tatou matua faalelagi.2
O isi folafolaga e mafai ona itiiti ma faatauvaa ma o nisi taimi e manatu faatauvaa i ai. O nei folafolaga e mafai ai ona maua le olioli i le olaga nei ma e aofia ai mea e pei o le mauaina pea o le “Agaga [o Keriso] e faatasi ma i[tatou]” (Mataupu Faavae ma Feagaiga 20:77), iloaina “[o Lona] alofa tunoa e lava lea” (2 Korinito 12:9), oo i le “filemu lea i le lalolagi lenei” (Mataupu Faavae ma Feagaiga 59:23), ma le “fiafia i soo se tulaga lava.”3 Ua folafola mai Keriso, “Ou te le tuua outou o matuaoti: ou te sau ia te outou” (Ioane 14:18).
O Ana folafolaga e le iu e pei o Lona mana ma Lona alofa. A o tatou faaaluina se taimi e iloa atoatoa ai mea ua Ia folafolaina mai, e mafai ona tatou faateleina le avanoa o le a tatou vaaia ai le tele o le faataunuuina o Ana folafolaga ma, o lea, ia faalagolago atili atu ia te Ia o se tausi folafolaga.
2. Iloa Lona Aao
Ou te manatu e tele taimi o le olaga na ou matuai taulai atu ai i folafolaga e foliga mai sa sili ona taua po o se folafolaga patino sa ou faamoemoeina na faapea ona ou misia ai le mea sa faia e le Alii mo au i le taimi nei. E matele lava ina tatou maua faamaoniga mo soo se mea o loo tatou sailia. Afai tatou te vaavaai mo le faamalieina, o le a tatou vaaia le mafutaga a le Alii i o tatou aso. O le a tatou vaai i faitotoa na Ia tatalaina mo i tatou. O le a tatou vaai i “tautinoga” (Alema 58:11) Na Ia auina mai ia i tatou.
O se tasi o auala na ou aoao ai e vaai i Lana mafutaga na sau mai ia Peresitene Henry B. Eyring, Fesoasoani Lua i le Au Peresitene Sili, o le sa aoao mai e uiga i le tausia o faamaumauga o aso taitasi i le ala ua tatou vaaia ai le aao o le Atua o aapa mai e faamanuia i tatou i aso taitasi.4 O lenei manatunatuga ma le tusifaamaumauina i aso taitasi atonu na suia ai a‘u e sili atu nai lo se isi lava mea e tasi. E ala mai i lenei mea, sa amata ai ona ou vaaia sa ma savavali faatasi ma le Alii i aso taitasi ma sa faataunuuina isi folafolaga e sili atu nai lo mea sa mafai ona ou mafaufauina.
Ua tatou ola i se lalolagi e toatele ua taulai atu i le ema o utiuti i o latou olaga. Ua toatele naua i tatou e amataina le aso i mafaufauga e le o lava ma faauma i le lagona e pei ua tatou toilalo. Atonu tatou te lagonaina e le o lava lo tatou taimi, tupe, malosi, lototele, faamoemoe, faatuatua, ma isi mea faapena. O lenei ituaiga o vaaiga e faigata tele ai ona vaai i soo se faataunuuga o folafolaga.
Fai mai le viiga “A o Tatou Fetagofi Nei i le Faamanatuga” “Matou te manatunatu i lou alofa tunoa tumau, lou alofa mama e le faatuaoia.”5 Mo le tele o tausaga, o au sauniuniga mo le faamanatuga na taulai atu i mea sese sa ou faia i le vaiaso na muamua atu ma le utiuti o mea na ou faatinoina. Na pau le mea na mafai ona ou vaai i ai o le mamao na ou i ai mai le avea e faapei o Keriso. Ina ua uma ona aoaoina au e le Agaga e ala mai i nei upu, sa amata ona ou taulai atu i le ala na ou vaaia ai Lona “alofa tunoa tumau” ma le “alofa mama e le faatuaoia” i le vaiaso ua tuanai. A o ou tomanatu, sa ou vaaia le faataunuuina o folafolaga. Sa ou vaaia sa Ia faatasi ma au. Sa Ia faamafanafanaina, faafaigofieina, ma faamalosia a‘u. Sa Ia tausia Ana folafolaga.
3. Fesoasoani ia te Ia e Tausia Ana Folafolaga i Isi
I ni Kerisimasi se lua ua mavae, sa tele ni o‘u aafiaga na faalolotoina ai lo’u malamalama i Lona finagalo e faataunuu Ana folafolaga i Lana fanau. Nai lo le fā’atu i se isi tuuatoatasi i le vaitau o aso malolo, sa ou filifili o le a ou taumafai e avea ma Ana meafaigaluega i soo se auala lava Na te manaomia ai au. O aso taitasi la ou te fesili atu ai ia te Ia po o ai e manaomia ona lagonaina Lona alofa i lena aso ma le auala sili e mafai ona ou faasoa atu ai lena alofa mo Ia. E ala mai i le Agaga Paia sa ou molimauina ai vavega ma lagonaina le olioli o le avea ma se meafaigaluega i Ona aao i le faataunuuina o ni folafolaga laiti ma faatauvaa. Ou te tatalo pea i aso uma ia avea ma lena meafaigaluega mo Ia.
Pe a tatou filifili e faalagolago i le Atua ma ola “e peiseai” ua faataunuuina folafolaga, tatou te maua le malosi e aluese ai mai le moega, ola faamaoni, ma faatalitali ma le onosai e tusa lava pe faigata ona fai. E pei o Sara, tatou te filifili e “[faamasino] o ia e faamaoni mai o ia na folafola mai” (Eperu 11:11). E pei o Aperaamo, tatou te saili ia “le [masalo vale] i le mea na folafolaina e le Atua” (Roma 4:20) a o “faamoemoe (a ua leai se mea e faamoemoe i ai” (Roma 4:18).
O le ola “e peiseai” o le a eseese foliga mo tagata uma. Ia te au lava ia, o lona uiga ou te salamo vave ma e le aunoa, ma le faatuatuaina o au taumafaiga o loo fesoasoani ia te au ia avea e faapei o Ia. Ou te tausia feagaiga ua uma ona ou osia, ma le iloaina o filifiliga ou te faia i le taimi nei o le a manuia ai lo‘u toalua ma le aiga. Ou te aioi atu mo le malosi ia “le … ma‘e’e‘e” (Mataupu Faavae ma Feagaiga 19:18) mai le tuuatoatasi, ma ou te vaavaai mo avanoa e siitia ai isi. Ou te fatuina se fale i le taimi nei lea o le a ou maua ai se lagona lelei e uiga i le tausiaina o fanau.
O le faalagolago i Ana folafolaga e le o se filifiliga faigofie i taimi uma. O le faatalitali i le Alii e manaomia ai se faatuatua ia Iesu Keriso lea e mafai ona lagonaina, i nisi taimi, e pei e toetoe lava a sili atu nai lo mea e mafai ona tatou aoina mai. Ae na molimau mai Alema, “Ona o le a Ia faataunuuina ana folafolaga uma ia o le a Ia faia ia te oe, ona ua ia faataunuuina ana folafolaga ia na ia faia i o tatou tamā” (Alema 37:17). E mautinoa lava folafolaga a le Atua, ma ou te iloa o le a ofoina mai e le Faaola soo se fesoasoani ma se lagolago tatou te manaomia a o tatou saili ia iloa ma faalagolago i lo tatou Tama oi le Lagi, o lē o le a faamaonia “lana afioga … i mea uma taitasi” (Alema 25:17). Aua e moni “e leai se Atua e tusa ma oe, i le lagi i lugā, po o le lalolagi i lalo nei, o loo e tausia le feagaiga ma le alofa i au auauna o e savavali i ou luma ma o latou loto atoa” (1 Tupu 8:23).