E Na’o le Faatekinolosi: Talavou Matutua
O Le Auala na Fesoasoani ai le BYU–Pathway i Nei Talavou Matutua ia Faateleina lo Latou Faatuatua
O le a‘otauina o le vaifofo lea mo nei tamaiti aoga e toatolu e liliu le pouliuli i le malamalama.
Masalosalo. Pouliuli. Tatalaina o le Faaipoipoga. Atuatuvale. E toatolu talavou matutua mai le salafa o le lalolagi sa feagai ma nei tulaga faigata ina ua latou lesitala i le BYU–Pathway Worldwide. Ma e ala i le polokalama o faailoga maualuluga i luga o le initoneti, sa le gata ina latou faalauteleina a latou aoaoga, ae sa latou maua foi le filemu sili atu ma maua—pe toe maua foi—le malamalama o le talalelei.
Ua valaaulia i tatou e le Alii ina ia “saili i le aoaoina, e ala lava lea i le suesue ma le faatuatuafoi” (Mataupu Faavae ma Feagaiga 88:118; ua faaopopo le faamamafa). Faitau i auala na faia ai e nei talavou matutua lena mea ma pe na faapefea e le sailia o le aoaoina ma aoga maualuluga ona taitai atu ai i latou i se mana maualuga atu.
Faatumulia i le Malamalama
O Dwight (ogatotonu) ma lona tina ma lana uo o Jeff i le aso o lona papatisoga.
Ata mai faaaloaloga a Dwight G.
Sa ou ola ae i le aoaoina o tulaga faatauaina o le faaKerisiano. Sa ou iloa na foafoaina au e le Atua ma o le a Ia puipuia au a o ou tausia Ana poloaiga. Ae na iu lava ina ou se ese mai lo‘u talitonuga ma sa faatumulia i le masalosalo. I le 2020, sa faamalamalama mai ai e la‘u uo o Jeff, o se tagata o le Ekalesia, ia te au le BYU–Pathway Worldwide, le auala e mafai ai ona fesoasoani i tagata aoga e aoao le Igilisi ma maua ai se faailoga maualuga i luga o le initoneti.
Sa ou manao e iloa atili!
I lo‘u atunuu, o le toatele o tagata talavou e le gafatia ona o atu i fafo mo se aoaoga sili atu. O le BYU–Pathway o le vaifofo lea ou te lei iloaina sa ou manaomia. O lo‘u fefe i le lumanai na suia i se faamoemoega fou na susulu mai ia te a’u, ma sa ou iloa e lei tuulafoaia a‘u e le Atua.
Sa ou aoaoina le tele o mausa taua ma tomai i a‘u vasega, e pei o le auala e pulea ai a’u tupe, faaleleia la‘u Igilisi, ma avea ma se tagata faigaluega malosi. Sa vave ona ou iloaina o le BYU–Pathway e le gata o se malaga faaleaoaoga ae o se malaga foi faaleagaga. I a‘u vasega, sa ou aoao ai foi e uiga ia Nifae ma perofeta o aso nei ma sa oo ina ou iloa e moni a latou aoaoga. Ma sa ou iloaina, afai ou te manao e malamalama atoatoa i mea sa ou aoaoina, e manaomia ona ou aoao atili e uiga i le Ekalesia.
Sa ou faasoa atu o‘u lagona ia Jeff, ma sa vave ona ia faafesootaia faifeautalai faamisiona. O aso taitasi o suesuega sa ou faia ma faifeautalai na faatumulia ai au i se malamalama na faafiafiaina ai lau vaaiga i le lalolagi. Sa pei a‘u o se tamaitiiti na leiloa ua toe foi mai i le aiga. Sa ou iloaina o a‘u o se atalii o le Atua, ua ia te a‘u se faamoemoega, ma o loo i ai se isi tusi (o le Tusi a Mamona) na tusia e tagata anamua o e na tusia vavega na saunia e le Tama Faalelagi ma Iesu Keriso mo i latou.
Na iu lava ina ou papatiso ma faamauina o se tagata o le Ekalesia a Iesu Keriso. Ma o lo‘u faatuatua ia Iesu Keriso ua oo i se tulaga maualuga ou te lei mafaufauina lava e mafai.
Dwight G., Maritime, Togo
Toe Foi i le Ala Matagofie a le Alii
Ata mai faaaloaloga a Stefanie D.
Sa avea lava a‘u ma se tagata malosi o le Ekalesia, ae ina ua mavae le tatalaina o la’u faaipoipoga, sa leai se taulaiga o le ata o le faaolataga a le Tama Faalelagi ma lo‘u faatuatua. Sa ou feiloai i se tasi, ma sa amata ona ma nonofo faatasi. Na suia lo’u olaga. Sa ou lagonaina sa ou i ai lava i le pogisa, ma sa ou le toe auai i le lotu ona sa ou lagonaina e le o a‘u o se itutino iina.
Ae sa faaauau pea ona ou auai i le inisitituti. Ma i le taimi lea, o se faifeautalai auauna atu sa ou feiloai i ai i le inisitituti na valaaulia a’u e auai i le BYU–Pathway. Sa ou musu, ae sa ia folafola mai o le a suia ai lo‘u olaga. O lea sa ou filifili ai e faataitai mo se semesa e tasi. Peitai, e lei umi ae maua la‘u tama muamua ma ou te lei iloa pe faapefea ona taulimaina le avea ma se tina fou faatasi ai ma le tulitulimatagauina o se aoaoga, o lea sa ou faamaamulu ai.
Mulimuli ane, sa ou manatuaina le maoae o o‘u lagona i lena semesa e tasi. Sa ou lagonaina le latalata tele i le Tama Faalelagi ma sa ou manao i lena lagona e toe foi mai. O lea i se tausaga mulimuli ane, sa ou toe amataina ai le BYU–Pathway, ma na tele faamanuiaga na oo mai i lou olaga i le taimi lava na ou toe amata ai.
Sa ou amataina se faagasologa matagofie o le salamo, faaipoipo i le tamaloa sa ou nofo ai, ma mauaina la‘u pepa faataga o le malumalu. Mulimuli ane, sa valaauina a‘u e avea ma peresitene o le Aualofa. O lea la ua ou auauna atu o se faiaoga inisitituti ma fiafia i ai! Sa aoao atili foi lo‘u toalua e uiga i le talalelei a Iesu Keriso.
O le a mafai ona tatou faaaogaina uma le malamalama tatou te aoaoina i le olaga a sau (tagai i le Mataupu Faavae ma Feagaiga 130:18–19). O le BYU–Pathway ua le na o se aoaoga—na toe aumaia ai a‘u i le ala matagofie a le Alii.
Stefanie D., Wanica, Suriname
Mai le Pogisa i le Talitonuga
Ata mai faaaloaloga a Dane W.
I le aoga maualuga, sa ou tauivi ai ma le tele o le popole ma le atuatuvale, o lea na iu ai ina ou faamaamulu. Pe tusa ma le lima tausaga, sa ou taumamao ese ai mai le Ekalesia ma mai le aiga. Pe tusa o lena taimi, sa amata ai foi ona ou faaaogaina fualaau faasaina ma le ava malosi e taulima ai le tuuatoatasi na ou lagonaina.
O se taimi e peiseai sa pouliuli ma faigata lea.
I se tasi taimi, sa faalogo ai lo‘u tina e uiga i le BYU–Pathway Worldwide ma amata ona uunaia a‘u e auai. O se aoaoga o se mea sa ou manao lava i ai i taimi uma, ae o o‘u aafiaga muamua i le aoga na olopalaina ai lo’u talitonuga.
Sa ou teena muamua le ofo a lo’u tina, ae i lena vaiaso, sa ou sueina le BYU–Pathway i luga o le initoneti. Sa foliga mai o se mea lelei tele mo a‘u. E ui lava i o‘u masalosaloga, ae sa ou filifili lava e alu i ai. I le taimi lava lea, sa amata ai ona ou toe galue e faaogatusa lo‘u olaga ma le talalelei.
Ina ua ou faatoa amataina a‘u kosi, sa ou lagonaina le le mautonu ma le le fetaui mo a’u. Ou te lei toaga i le Lotu mo le tele o tausaga, ae o tagata i au vasega sa omai i savaliga uma o le olaga ma faaali mai ia te au ou te le manaomia ona atoatoa ina ia ou i ai iina.
E lei umi ae amata ona ou lagonaina atili le Agaga ma e pei oloo agai atu mea uma i le itu sa‘o. I le taimi muamua, sa ou lagonaina e pei ua ou toilalo i mea uma i le olaga. Ae mo le taimi muamua i se taimi umi lava, sa ou lagona ai e pei ua ou alualu i luma faaleaoaoga ma le faaleagaga.
O le lagonaina o le Agaga i a‘u aoaoga na fesoasoani ou te toe ogatasi ai ma la’u molimau ma aumaia ai le manino i lo‘u mafaufau. Ona sa ou iloa sa faatasi mai le Tama Faalelagi ma Iesu Keriso ia te a’u, sa ou maua le lototele e faia ai mea ou te lei manatu e mafai ona ou faia muamua ina ua siomia au e le pogisa. I le mavae ai o mea uma sa ou oo i ai, ou te lei lagonaina lava o le mauaina o se aoaoga sa i totonu lava o lo‘u aapa atu—na suia e le BYU–Pathway lena mea mo a’u ma fesoasoani ia te a‘u ia maua le faatuatua ia te a’u lava ia ma ia Iesu Keriso.
Dane W., Iuta, ISA
Na fautua mai Peresitene Russell M. Nelson:
“Tulitulimatagau lau aoga o se faamuamua o le faatulagaga aupito maualuga. Ia saili i aoaoga uma e te gafatia. Faatasi ai ma i tatou o ni Au Paia o Aso e Gata Ai, o le aotauina o se tiutetauave faalelotu. …
“O lou atamai patino—lou faasinomaga patino—e faavavau ma paia (tagai i le Mataupu Faavae ma Feagaiga 93:29).”1
E faaopoopo atu i le BYU–Pathway Worldwide, e tele avanoa mo aoaoga i totonu o le Polokalama o Aoga a le Ekalesia po o la outou eria i le lotoifale. Po o le a lava le auala faaleaoaoga e te filifilia, o le sailia o avanoa e faamalosia ai lou mafaufau ma le faatuatua o le a faamanuiaina ai oe ma lou aiga, e le gata i lenei olaga ae i le faavavau!