“O E Sailia Keriso i Aso Taitasi?,” Liahona, Mat. 2022.
Autalavou Matutua
O E Sailia Keriso i Aso Taitasi?
O lo‘u aafiaga i le malumalu na fesoasoani ou te iloa ai e tatau ona ou saili ia maua Keriso i aso uma.
E alala le tusitala i Kuatemala.
A o ou laitiiti, sa masani ona ou fesili ifo ia te au lava fesili e pei o le “Pe tautala mai ea le Agaga Paia?” “Pe a ou alu i le lagi, pe o le a ou vaai ea i le Atua?”
O lea la ua fai si o‘u matua, e mafai ona ou toe tepa i tua ma vaai o loo taialaina pea a’u e le Tama Faalelagi ma faaali mai ia te a‘u faamaoniga sa i ai o Ia, ae sa le mafai ona ou iloaina i taimi uma Lona aao i lo’u olaga. Sa faamanuiaina au i le ola ae i se aiga faatasi ma le talalelei toefuataiina a Iesu Keriso, ae sa ou ola i se molimau nono mai mo se taimi umi lava. Sa faigata ia te au ona talitonu e moni lava le Atua.
I se tasi aso, ina ua tusa ma le 15 o‘u tausaga, sa faasilasila mai ai e lo’u epikopo se malaga i le malumalu a le uarota. Sa masani ona ou alu i le malumalu faatasi ma lo’u aiga, o lea ou te lei manatu ai o se mea tele lenei mea. Ou te lei maua moni lava se lagona ma ou te lei malamalama i le taua o feagaiga ma sauniga na faatinoina i le malumalu.
Ina ua oo mai lena aso, sa ou ulu atu i le malumalu ma sui i lo’u ofu soloatoa paepae. A o ou savali atu ma pasia se faaata, sa ou vaaia sina vaaiga o o‘u ofu papae ma se ataata i o’u foliga. A o ou faatalitali mo isi tagata uma o la‘u uarota, sa ou maofa. Sa ou mafaufau i le matagofie o le vai papatisoga ma atavali ina ua faafuasei, sa ou lagonaina le pa‘i malie mai o le Agaga i lo’u loto.
O le a le galo lava ia te a‘u upu na oo mai i lo’u mafaufau: “Osona, o le maota lenei o le Alii. E alofa o Ia ia te oe. E finagalo o Ia ia e suia lou olaga ma taumafai ia avea ma se tagata sili atu i sia mea itiiti ma sia mea itiiti.
Sa ou lagonaina le tele o le alofa i na upu ae sa faafuasei ona lofituina i le tausalaina. Ou te lei manatu mamafa i le malumalu seia oo mai i le taimi lea. O lea sa ou faia ai se tatalo i lo‘u loto, ma ole atu i le Tama Faalelagi e faamagalo a’u.
Ma sa ou iloaina sa Ia faafofogaina la‘u tatalo aua sa ou lagonaina le filemu tele i lo’u loto.
O lena aso, sa faalolotoina ai lo‘u faatuatua ma maua ai le molimau moni o le talalelei lea sa ou moomoo i ai. I lena aso, sa mafai ona ou fai atu ma le mausali e pei o na soo e toalua o Ioane: “Ua ou maua le Mesia” (tagai i le Ioane 1:41).
Auala Faigofie e Fesootai Ai
Talu mai lava lenei aafiaga, ua ou taumafai ai lava ia iloa atili le faatosinaga a le Tama Faalelagi i lou olaga e ala i le sailia o Iesu Keriso i aso taitasi. E ui e mafai e le lalolagi ona faafaigata ona faalogo i le siufofoga o le Faaola i nisi taimi, ae ua ou iloa nei e matuai moni lava o Ia ma o loo faatasi o Ia ma au.
O le toatele o i tatou e i ai aso tatou te lagona ai sina latalata teisi atu i le lagi nai lo le mea e masani ai. E i ai foi o tatou aso faigata pe a tatou tauivi ia lagona Lana faatosinaga e tusa lava po o le a le faigata tatou te taumafai ai pe pisi i aso e le lava ai se taimi tatou te sailia ai o Ia. Ae ou te iloa afai e i ai so tatou manao faamaoni e saili atu ia te Ia, o le a tatou vaaia Lona aao i o tatou olaga.
Pe a e lagonaina ua le fesootai ma le Faaola, fesili ifo ia te oe lava, Pe o o‘u taumafai e sue le Mesia i aso taitasi?
A o tatou saili ia faapei o Aposetolo anamua, tuua a tatou upega (tagai i le Mataio 4:20) ma isi tiutetauave ma mea e fiafia i ai mo sina taimi e liliu atu ai ia te Ia, o le a tatou maua o Ia.
O loo i ai punavai o le mana faaleagaga e mafai ona fesoasoani ia i tatou. Ua faamanatu mai e le perofeta o Alema ia i tatou “o mea laiti ma faatauvaa e faataunuu ai mea tetele” (Alema 37:6). O nai faatinoga laiti o le faatuatua ma faiga faaleagaga tatou te faia i aso taitasi e mafai ona fesoasoani ia i tatou e faateleina ai lo tatou gafatia e iloa ai le Alii i o tatou olaga.
O nisi o nei meafaigaluega faaleagaga atonu o ni mea faapenei:
-
Tatalo i le faatuatua
-
Suesueina o tusitusiga paia ma le loto i ai ma le anoa
-
Auauna atu i isi ma le le manatu faapito
-
Faasoaina atu o lau molimau i se uo
-
Faalogologo i viiga po o musika faaleagaga
-
Auai i le Inisitituti
-
Tausia o le aso Sapati ia paia
-
Anapogi
-
Auai atu i le malumalu e le aunoa
E tele mea e mafai ona fesoasoani ia i tatou e maua ai Iesu Keriso, ae o ki o le faaauau pea ona sailia o Ia. Na aoao mai Peresitene Russell M. Nelson, “A o tatou saili e avea ma soo o Iesu Keriso, o a tatou taumafaiga ia faalogo ia te Ia e manaomia ona matua faia ma le faamoemoe sili i ai. E manaomia ai le lotofuatiaifo ma taumafaiga tumau e faatumu o tatou olaga i aso taitasi i Ana afioga, Ana aoaoga, ma Ana upumoni.”3
Ua E Maua o Ia i le Asō?
E tusa lava pe e te le o mauaina uma tali o loo e sailia i le taimi nei, faaauau pea! Tau lava o le saili atu ia Keriso ma filifili ia faatuatua ia te Ia. Afai o le a e taumafai e sue o Ia i aso uma e ala i nai faatinoga laiti, ou te iloa o le a e lagonaina Lona opo mai le lagi. Ou te iloa e moni lenei mea aua ua ou lagonaina.
E silafia e le Tama Faalelagi a tatou taumafaiga. E le popole tele o Ia i le tele o mea tatou te faia e faagaeetia ai o tatou agaga pe afai e mafai ona tatou fai atu i aso taitasi ma le mausali ma le mautinoa: “O le asō ua ou maua ai le Mesia!”
Ou te tatalo ina ia tatou iloa ma alolofa i lo tatou Faaola i aso taitasi. O le a tatou faia e pei ona fautuaina mai e Moronae ma “saili lenei Iesu” (Eteru 12:41). Tau ina ia tatou maua, e oo atu i le faaiuga o aso uma, le tagata lea na tusia e Mose ma isi perofeta: o Iesu le Nasareta. I le sailia o Keriso, o le a tatou vaaia ai le aao o le Atua i o tatou olaga. Ma o le tele o lo tatou sailia o Keriso i aso taitasi, o le tele foi lena o lo tatou mauaina o Ia ma mafai ona iloa Lona siufofoga, taitai ma taialaina i tatou i o tatou olaga atoa.