“O Le A Moni Lava, Le Migao?” Liahona, Mat. 2022.

O Le A Moni Lava Le Migao, ?

Saunia e Destiny Yarbro

A o tatou faalauteleina lo tatou malamalama i le migao, tatou te faateleina lo tatou tomai e migao ai e oo lava i tulaga e sili ona le talafeagai.

Ata

o se alii talavou o loo faia ni meafaalogo ma aveina se fata faamanatuga

Ona o nisi o aafiaga tulaga ese na ou oo i ai, sa ou mafaufau ai i le uiga o le migao. O le faauigaga lenei a Peresitene Dallin H. Oaks, Fesoasoani Muamua i le Au Peresitene Sili:

“O le tapuaiga e tele ina aofia ai faatinoga, ae o le tapuaiga moni e aofia ai se uiga faaalia faapitoa o le mafaufau.

“O le uiga faaalia o le tapuaiga e faaosofia ai i tatou i lagona e sili le loloto o le faatuatuaina, faaaloalogia, ma le maofa. O le tapuaiga e tuufaatasia ai le alofa ma le migao i se tulaga tuuto ma e aveina atu ai o tatou agaga ia latalata atu i le Atua.”¹

O le a le mea e oo mai i lou mafaufau pe a e mafaufau i le migao? Mata e mafaufauina ia ata faataitai nei o le migao po o le le migao i se sauniga faamanatuga?

O se tamaitiiti o loo tusitusi i lana tusi valivali.
O se alii talavou o loo tufaina le faamanatuga a o faia ni meafaalogo.
O se tamaloa o loo osooso ma talotalo solo ona lima.
O se tamaitai talavou o loo taalo i se taaloga i lana telefoni.
O se faifeautalai sa fai ma ee atu.
O se tamaitai e nofo i taimi uma i le faapaologa, e lei i ai lava i totonu o le falesa.
O se alii o loo taoto i se faamalu i le alasavali o le falesa.
O se vaega o tagata o le ekalesia o loo fegenoa’i ma pao leotetele.
O se teineitiiti talavou o loo nofo i lalo o lona nofoa.
O se fafine o loo fealuai solo i tua ma luma i tua o le falesa.

O le toatele o i tatou o le a malilie e faapea, o se faifeautalai e ee i le sauniga faamanatuga e leai se migao nai lo tamaiti o loo tusitusi ni ata e faapisi ai i latou lava. Ae sei o tatou faaaluina sina taimi e iloilo ai o tatou manatu e uiga i le migao e ala i le savalia o nei ata faataitai moni e 10--ua ou oo uma i nei mea taitasi i sauniga Lotu.

O se tamaitiiti o loo tusitusi ata i le lotu. O lenei faiga o se mea masani ma e toetoe o tagata uma o le ekalesia ua latou taliaina. Ua tatou iloa e masani lava e le faaaloalo lenei mea sei vagana ua tatou faatagaina i tatou lava ina ia faalavelaveina ai.
O se alii o loo tufaina le faamanatuga a o faalogologo i musika i ana meafaalogo. O lenei mea o le a matua le talafeagai lava i le tele o tulaga. Sei ou faasoa atu “le vaega o totoe o le tala”. Sa ou iloaina se alii e i ai sana molimau malosi ma sa auauna atu i se misiona ma taliaina ni valaauga eseese. Peitai, i tausaga talu ai nei, sa maua ai o ia i se faaletonu tau le mafaufau. O le faia o meafaalogo e faatagaina ai o ia e faalogologo i musika malu, musika toafilemu ma fesoasoani ai e poloka ese leo o loo i lona mafaufau. E mafai ona ia lagonaina le Agaga ma auauna atu ma le migao i isi faatasi ai ma le fesoasoani a ana meafaalogo.
O se alii talavou o loo osooso ma talotalo solo ona lima. O le vaega o totoe o le tala: O lenei uso e le magagana ona o le tulaga ese o lona faiai e fiafia lava i taimi uma na te vaai ai i le epikopo i luga o le tulaga. Na te faailoa atu lona naunautai e ala i le talotalo o ona lima ma osooso.

Ata
o se vaega o tamaiti i le Peraimeri; o le tasi e i ai se taifau auauna atu, ae o le isi o loo i totonu o se taavale pepe
O se tamaitai talavou o loo taalo i se taaloga i lana telefoni. O le vaega o totoe o le tala: E faafetaiaia e lenei tuafafine lona popolega faaagafesootai e ala i le taalo lemu i taaloga i lana telefoni. O le mea moni, e sili atu ona mafai ona ia faalogo ma le migao ma maua savali a failauga aua o loo taulai atu lona popole i se isi mea.
Sa tele ina ee atu se faifeautalai. O le vaega o totoe o le tala: A o ou i ai i le nofoaga autu e aoao ai faifeautalai, sa i ai se faifeautalai i la‘u sone sa maua o ia i se tulaga faaletonu o neura ma tetete ai. Mai lea taimi i lea taimi, e faataio ai i le vasega, i le potu ai, ma sauniga a le Ekalesia. O lana ee sa lei vaaia o se le migao; sa vave ona matou vaaia ua saunia o ia e auauna atu, naunau e faasoa atu le talalelei, ma tumu i le Agaga.
O se tamaitai o loo nofo i le faapaologa i vaiaso taitasi ma e le‘i i ai lava i totonu o le falesa. O le vaega o totoe o le tala: A o ou faigaluega mo le Ekalesia i le Aai o Sate Leki, sa tusi atu se tuafafine i le ofisa o le Tautua mo Manaoga Faapitoa e uiga i lona aafiaga i le faaletonu o le atuatuvale ona o lana tautua faamiliteli. Ona o se tatagi o se telefoni feaveai po o se isi pao faafuasei e mafai ona faaosofia ai se toe tepa i tua, e le saofai lava o ia i totonu o le falesa ina ia le afaina ai se tasi ma le lei faamoemoeina.
O se alii o loo taoto i luga o se faamalū i le alasavali. O le vaega o totoe o le tala: Ina ua ou siitia atu i se uarota fou, sa ou tei i le vaaia o se uso i luga o se moega a le falemai i le falesa. Sa tele ni manaoga faapitoa o lenei alii ma sa na o le auala lea sa mafai ona auai i le lotu. Sa vave ona ou iloaina o se mea masani lenei mo lenei uarota, ma sa vave ona ou masani ai. O lona i ai iina sa le o se le migao ae, o le mea moni, o le faafeagai lava. Aua, pe lei faamaloloina ea e le Faaola se tagata sa tuutuu ifo i lalo lona moega e ana uo i totonu o se fale tumutumu? (tagai i le Luka 5:18–20).
O se vaega o tagata o le ekalesia o loo faia ni pao leotele ma ni taga faitino tetele. O le vaega o totoe o le tala: O faapotopotoga logonoa e mafai ona “leotetele” i le faalogo atu a tagata auai. Mo le nuu o le au logonoa, e le o se mea le faaaloalo mo se tasi le faia o ni leo, talie, pe tale leotele, ae ua manatu i ai o se le faaaloalo mo tagata o le au paia le faia o faailoga e uiga i mea faalelalolagi i le taimi o le sauniga faamanatuga.
O se teineitiiti talavou o loo nofo i lalo o nofoa. O le vaega o totoe o le tala: A o ou talavou, o se tasi o teineititi ma te tupulaga e nofo i lalo o lona nofoa i le vasega. O lenei tuafafine talavou sa ola ae i le tele o fale e tausi-ai ma na o se eria e tapunipuni e lagona ai le saogalemu. Talu mai lena taimi, ua ou iloa ai e le mafai ona tatou faamoemoe i tamaiti aoga e aoao pe a latou i ai i se tulaga e faatautee, fia sola, pe le mafai ona gaoioi. E tatau ona lagona e tamaiti aoga le saogalemu pe afai e tatau ona latou aoao ma, o le mea e sili ona taua, ia lagonaina le alofa o le Faaola.
O se fafine o loo savalivali i tua ma luma i le faapaologa. O le vaega o totoe o le tala: O le mea moni, o au lea. Sa ou tauivi ma le popole mo le silia ma le sefulu tausaga, ma ni faafitauli ogaoga o le atuatuvale ma isi faafitauli faalesoifua maloloina. I nei taimi, na pau lava le auala e mafai ona ou auai ai i le lotu o le, pe afai e mafai ona ou minoi. O le savalivali po o le taalo i se meataalo i o‘u lima o nisi taimi e na o le pau lea o le auala e mafai ona ou gauai atu ai i failauga ma lagona ai le Agaga.

E faateleina e Satani le mea moni e faapea tatou te le iloa i taimi uma le vaega o totoe o le tala, tatou te le iloa i taimi uma po o a luitau o loo feagai ma o tatou uso ma tuafafine i aso taitasi. E manao o ia ia galo ia i tatou o le toatele o tagata o le ekalesia o loo faia le mea sili latou te mafaia, po o le a lava le foliga i isi. O tulaga na ou lisiina atu i luga atonu e seasea tupu, ae e faatusa i le tele o tauiviga patino o loo faatautaia e o tatou uso a tagata i lo latou auai i le lotu.

Ou te talitonu e manao Satani ia tatou talitonu o la tatou tapuaiga e faalaleagaina e tauiviga, eseesega, po o vaivaiga o isi. O le mea moni, ua ou iloa o le taimi tonu lava lea e foliga mai ai ua faalavefauina au, ae e sili ona aoaoina ai au e uiga i le alofa o lo‘u Faaola.

O Mea Ua Ou Aoaoina e uiga i le Migao

Ata

tamaitai o loo faaaogaina le gagana fai faailoga

1. O le migao o se filifiliga ma se tomai.

E pule lava a’u pe lagonaina le migao. O le tele o taimi ou te le lagona ai le migao aua ua ou faatagaina au lava ia faalavelaveina. A o ou atiina ae la‘u aoaiga faaleagaga ma aoao lo’u agaga e taulai atu i mea e sili ona taua, o le a sili atu ona mafai ona ou tauaveina le tiutetauave atoa mo lo‘u sootaga ma lo’u Tama Faalelagi.

2. O le migao e le o se mea e tutusa lelei mo tagata uma.

O se uo a le aiga sa i le falepuipui mo le 17 tausaga sa faafeiloaia le Agaga i totonu o lona sela e ala i le fausiaina o ni faatusa faigata o malumalu mai pepa. E mafai ona i ai le migao i soo se tulaga pe afai tatou te taliaina le Agaga.

3. E mafai ona uunaia le migao ae o se filifiliga patino a le tagata lava ia.

O le migao e oo mai e ala i se tautinoga i totonu e faafailele se “uiga faaalia o le tapuai.” E na o le pau le ala e mafai ai ona i ai pe a tatou lagonaina ma le faamaoni ma faaali atu lo tatou alolofa mo le Alii ma isi tagata o le ekalesia. Sa ta‘u mai e lo’u tama ia te au i se tasi taimi e faapea, pe a tatou taliaina le tiutetauave mo lo tatou migao, o le a suia la tatou vaaiga mai le “Ua e faalavelave i la‘u tapuaiga iinei!” i le “O loo LELEI lava oe. E talileleia oe iinei. E te le o faalavelaveina lo‘u migao aua ua ou filifili ia migao.” Ona tatou iloa ai lea o aga a isi e le faapea o le a faalavelaveina ai la tatou sootaga patino ma lo tatou Faaola ma le Tama Faalelagi. Ioe, o le tauaveina o le tiutetauave patino mo lo tatou lava migao e le faapea e tatau ona tatou le amanaiaina le ala e ono aafia ai aafiaga o isi ona o a tatou amioga. O a tatou taumafaiga i le migao faaletagata lava ia e mafai ona avea ma se faatelega o lo tatou alofa mo i latou o ni o tatou uso ma tuafafine.

O Le Misiona a le Faaola

I se faataitaiga matagofie o le auaunaga, sa agaalofa le Faaola i le tagata sa i ai i le anoanoai o agaga leaga. E ui ina sa ee le tagata ma sa femaliuai ma le le lavalava o lona tino, ae sa lei musu Iesu e faamalolo o ia. Sa na o le taimi lava na faamaloloina ai sa mafai ai e lenei tagata ona nofo “i vae o Iesu, ua ofu ia, ma ua atamai,” ma ole atu ina ia mafai ona nofo o ia faatasi ma le Alii. (Tagai i le Luka 8:27–39; tagai foi Mareko 5:1–20.)

E faapena foi, e lei ta‘u atu e Iesu i le tamaitiiti ma le agaga le mama e taofi le taafilifili, le fauā, ma le lilivau a o lei faamaloloina o ia e Ia (tagai Mareko 9:17–27). Sa ia vaai i nei tulaga o ni aafiaga faaletino, ae le o ni faaletonu faaleagaga. Sa na o le au Faresaio na Ia liliuese ai ona o lo latou faafiamiotonu ma le faamaualuga na taofia ai le faamalologa.

A o tatou faalauteleina la tatou faauigaga o le migao, o le a sili atu ona mafai ona tatou aoao atu ma auauna atu i le ala a le Faaola. O le a tatou manatua le taua o agaga taitoatasi i le silafaga a le Atua (tagai i le Mataupu Faavae ma Feagaiga 18:10). O le a mafai ona tatou migao e oo lava i tulaga e sili ona le talafeagai.

Atonu o le migao i fofoga o le Alii e itiiti sona uiga i le nofo filemu ma tautala lemu ae tele i le faatoafilemu o o tatou mafaufau ma le agamalu o o tatou loto.

E alaala le tusitala i Texas, ISA.