Na’o Tusiga Faatekinolosi: Autalavou Matutua
O Le Auauna Mai na Fesoasoani ia te A‘u e Faaloloto ai La’u Tautinoga i le Talalelei a Iesu Keriso
Ina ua ou auai i le Ekalesia, sa oo ina taua taumafaiga faaleauaunaga a tagata o le ekalesia e pei o lesona faatasi ma faifeautalai.
Atapue na faaalia e le au faataitai
Ina ua ou faatoa auai i le Ekalesia, e tele vaega sa fenumiai. Sa ou iloa mataupu faavae autu o le talalelei a Iesu Keriso, ia sa aoaoina ai au e faifeautalai lelei, ae e leai se tasi na aoaoina au e uiga i le faatulagaga o le Ekalesia. Korama a toeaina, Aualofa, inisitituti, ma le tele o isi polokalama ma mataupu faavae ou te lei iloaina. Sa na ona ou iloa lava e tatau ona ou sau i le lotu i Aso Sa, suesue i tusitusiga paia, ma tatalo.
E ui i lea, sa ou laki, i le i ai o ni uo sa fesoasoani ia te au e faatautaia lo‘u le mautonu i le popofou. Atonu na faailoa mai e faifeautalai ia te au le talalelei, ae e ala i auaunaga faaKeriso mai le toatele o tagata o le ekalesia sa mafai ai ona faaauau pea ona faamalosia lau molimau.
O nisi nei o tagata o e na faamanuiaina lo‘u olaga e ala i a latou taumafaiga faaleauaunaga.
1. O Le Aiga Na Faaaofiaina A‘u
O se tasi o aiga muamua na faia se uunaiga ia te au o ni tagata ua leva o le ekalesia i le paranesi sa ou auai i talaane o lo‘u fale i Meleisia. Pe a latou vaai mai ia te au i le lotu i Aso Sa taitasi, sa latou faafeiloaia au ma ni ataata lapopoa i o latou foliga. Sa latou taialaina foi au i vasega ma faaali mai ia te au le mea ou te alu i ai ma piki au ma ave i le lotu i nisi taimi. Na iu lava ina amata ona latou valaaulia foi au e fai se taumafataga o le afiafi i lo latou fale. Sa taliaina moni lava e lenei aiga le talalelei i o latou olaga, ma sa latou faaalia lo latou tuuto atu ia Iesu Keriso e ala i le tausiga moni ma le alofa mo au. Ona o le latou auaunaga, sa avea ai i matou o ni uo mamae, ma sa ou lagonaina le sili atu o le lotogatasi ma le paranesi ma e pei o i matou o se aiga tele e tasi.
2. O Autalavou Matutua O E Sa I Ai i Tulaga Talitutusa
Sa ou mauaina foi le tele o le fesoasoani ma le lagolago mai isi talavou nofofua matutua. Sa ou matua latalata lava i le toatele o i latou i lo‘u faatoa liliu mai ona o le toatele o i matou na o matou tagata o le Ekalesia i o matou aiga. Faatasi ai ma tulaga sa matou i ai, sa matou faalagolago le tasi i le isi mo le malamalamaaga ma saunia se malu saogalemu mo le tasi ma le isi. E masani ona matou feiloai mo taumafataga ma gaoioiga. O le i ai i le mafutaga a le tasi ma le isi, faasoa atu lo matou alolofa mo le talalelei, ma le lagolagoina o le tasi ma le isi na fesoasoani ia te au e faalolotoina ai lo‘u faatuatua ma tulimatai atu ai i nisi o vaega faaagafesootai o le ekalesia.
3. O Le Ulugalii Na Taliaina le Auaunaga e Sili Atu Nai Lo o se Valaauga
O taumafaiga faaleauaunaga a se tasi o ulugalii na ou lagona ai foi e pei na i ai ni tagata o lou aiga i le Ekalesia. Sa ou mafaufau ma le faamaoni ia i laua o ou matua matutua i le Ekalesia—sa la taulimaina au i le ala semanu la te taulimaina ai se tama a se fanau.
Ioe, o i laua sa faufautua i autalavou matutua i le itu ma o le la valaauga o le auauna atu i autalavou matutua, ae la te lei taulimaina lava lo la tiutetauave o se valaauga faatauvaa. Sa la o atu i luga ma talaatu e saili ni avanoa e vaavaaia ai i matou o ni autalavou matutua. Afai ou te manaomia po o soo se isi talavou matua i le eria se tasi e talanoa i ai, o se tasi e tuuina mai ia i matou se fautuaga, pe na o se tauau e faalagolago i ai, sa i ai iina lenei ulugalii mo i matou.
O se tasi o gaoioiga e faapitoa le aoga e faia e le tamaitai ia te au ae ou te lei alu i lau misiona o le tuuina mai lea ia i matou e faitau se lauga se tasi o le konafesi aoao i aso taitasi ma faasoa mai o matou manatu e uiga i ai. Sa ma faia lenei mea mo le tele o masina, seia oo i le aso ae ou te lei alu mo la‘u misiona. O aso e tau atu i le galuega faafaifeautalai e mafai ona tumu i le popole ma faigata, ae ou te talitonu o lona onosai ma le naunau e faia lenei gaoioiga faatasi ma au i aso uma na fesoasoani ia te au e oo atu ai i le mea ua ou i ai nei.
O Le Auaunaga e Faia se Eseesega
O auaunaga mataalia e mafai ona suia ai le olaga o se tagata e faavavau—o au o se faamaoniga o lena mea—aemaise lava pe a tatou naunau e talia le fesoasoani. E pei ona fai mai i le Alema 37:6, “O mea laiti ma faatauvaa e faataunuu ai mea tetele.” Ma e moni. O nai faatinoga laiti o le auaunaga na ou mauaina, e pei o le valaauliaina i se taligasua o le afiafi e lena aiga alofa i la‘u paranesi, mauaina o le lagolago mai isi talavou matutua, ma le mauaina o le avanoa e faitau faatasi ai ma lena tuafafine ia lauga o le konafesi, na faia ai le eseesega atoa. O le auauna atu e le faapea e faigata; o faatinoga faigofie o le alofa ma le agalelei lea e mafai ona suia ai le olaga o se tasi i le 180 tikeri.
Ona o le naunau o nei tagata e vaai i o‘u manaoga ma faaali mai ia te a’u le alofa, sa lava a‘u lagolago e fausia ai la’u molimau, ma o loo ou auauna atu i se misiona i le taimi nei. O upu a Peresitene Jean B. Bingham, Peresitene Aoao o le Aualofa, e moni: “A uma ona tautalagia ma faia o mea uma, o le auaunaga moni e faataunuuina taitoatasi ma le alofa o se uunaiga.”1 Ma ou te iloa a tatou faalagolago i le Agaga e taiala i tatou, e mafai ona tatou auauna atu e pei ona faia e Keriso ma aumai isi ia te Ia.