Ua Na’o Tusiga Faatekinolosi: Autalavou Matutua
3 Auala Faigofie (ma le Le Taufaafefe) e Faasoa atu ai le Talalelei i Isi
Sa masani ona ou fefe e faasoa atu le talalelei ona o le fefe i le teenaina, ae o ni nai aafiaga na fesoasoani ia te au e iloa ai le faigofie o lena mea.
A o ou laitiiti, sa ou fefe lava i taimi uma e faasoa atu le talalelei i a‘u uo.
Ae ina ua maua lo‘u valaauga i le misiona, sa iloa e a’u uo uma i le aoga o le a ou alu i Sepania pe a uma le faauuga, e ui o le toatele o i latou sa lei mautinoa lelei pe aisea. O lea sa ou faaaogaina ai a latou fesili e faamatala atili atu ai ia i latou e uiga i le Tusi a Mamona, e uiga i mea o le a ou faia o se faifeautalai, ma e uiga ia Iesu Keriso.
Sa iu ina ou tuuina atu ni kopi se lima o le Tusi a Mamona i au uo mamae ma e oo lava i ni nai faiaoga i le aoga a o lei oo i le faaiuga o le tausaga, ma e ui lava o le a tatavale lo‘u fatu i le fefe pe a ou faasoa atu ia i latou, o le a ou lagonaina le fiafia ma le malosi mai le Agaga i se taimi vave mulimuli ane.
O lena aafiaga na faaali mai ai ia te au o le faasoaina atu o a tatou molimau o le talalelei a Iesu Keriso e le faapea e tatau ona faamalosia pe taufaafefe pe le manaia foi. O le mea moni, e tele auala e mafai ona tatou faasoa atu ai mea o loo i o tatou loto pe a oo mai i lo tatou alolofa i le talalelei, pe patino pe faatekinolosi. Ona “o le talalelei ia Keriso … o le mana lava lea o le Atua e ola ai” (Roma 1:16), e mafai ona e to’afimalie, lototetele, ma lotomaualalo ao e faasoa atua.
O ni nai manatu nei mai o‘u aafiaga ma tusitusiga paia na fesoasoani ia te a’u.
1. Ia Faamaoni
A o ou i ai i Barcelona i la‘u misiona, sa ma savavali ma la’u soa i autafa o le matou falelotu ae ma vaaia se tamaitai talavou o savali mai ia i ma‘ua. Sa uunaia i maua e talanoa atu ia te ia, o lea na ma taofia ai o ia ma fesili atu i le tamaitai pe na ia vaai muamua i le tatou falelotu. Sa ma iloa o lona igoa o Maya (ua suia uma igoa), ma sa ou valaauliaina o ia e sau i se po taalo sa matou fuafuaina ma isi talavou matutua i le Aso Faraile na sosoo ai. Sa ia taliaina.
I le po o taaloga, ou te manatua pea le auala na talie faatasi ai Maya ma Alicia, o se ma uo ma o se tagata faatoa liliu mai. O Alicia o se uo lelei tele ia Maya. Sa ia fesili atu ia Maya e uiga i lona aiga, mea e fiafia i ai, ma ona talitonuga faalelotu ma sa fausia se faigauo ma Maya i le aluga o taimi. Sa matou aoao atili e uiga i le talaaga faalelotu o Maya ma lona tuuto atu i le Atua, ma sa ia faaalia foi lona fiafia e aoao atili e uiga i le ala tatou te fesootai ai ma le Atua.
I le aluga o taimi, a o matou iloa ma la‘u soa, Alicia, ma isi tagata uma o le uarota ia Maya ma valaaulia pea o ia ma faaali atu ia te ia le alofa, sa ia lagonaina le Agaga o le talalelei toefuataiina a Iesu Keriso ma filifili ai e papatiso. A o matou manatuaina le onosai ma le agalelei faaleuso (tagai i le Mataupu Faavae ma Feagaiga 4:6), ou te iloa o faigauo faamaoni na maua e Maya na faatosinaina ai lana faaiuga.
2. Tatalo ia Iloa Avanoa Faafaifeautalai
Ina ua toe foi mai la‘u misiona, sa ou tuua lo’u aiga i Kuatemala ma amata ona ou alu i le aoga i le Iunivesite o Polika Iaga i Iuta, ISA. Sa ou faanoanoa ma sa fai si ou lotovaivai i le me’i atu i se nofoaga lea e foliga mai o le a le tele ni avanoa ou te faasoa atu ai le talalelei. O lea sa ou tatalo ai ma le naunautai ia maua se tasi e manaomia ona faalogo i le upumoni.
Ina ua mavae ni nai vaiaso, sa ou savalivali i le tuua o le lotu ma vaaia se tamaloa umi o tilotilo i pepa lautele o i ai se savali i le lotoa. Sa vave ona ou lagonaina e tatau ona ou talanoa atu ia te ia. Sa ou popole ona sa tau faaleleia pea la‘u Igilisi ma sa ou matua le iloa le tala e fai atu. Sa ou savali atu ma pasia o ia ae sa ou faliu atu ma faailoa atu a‘u lava, ma faalagolago i le Tama Faalelagi e fesoasoani mai ia te a’u (tagai Mataupu Faavae ma Feagaiga 100:5–6).
Sa manaia le ma talanoaga, ma sa ia fai mai ia te au e le o ia o se tagata o le Ekalesia ae o ia o se tagata aoga ma sa maofa o ia i le auaunaga e faia e le Ekalesia mo tagata. Sa le mafai ona ou talitonu sa ou talanoa i se tagata e le auai i le ekalesia i le lotoa o le BYU! Sa faafesuiai a ma numera telefoni, ma mulimuli ane sa ou faailoa atu o ia i le toatele o tagata o le Ekalesia ma fesoasoani ia te ia e aoao atili e uiga i le talalelei.
E lei auai le alii i le Ekalesia, ae e ala mai i lena aafiaga sa ou aoaoina ai afai tatou te mananao e faamanuia olaga o isi tagata, o le a fesoasoani mai le Atua ia i tatou e faaaoga avanoa uma o loo siomia ai i tatou (tagai Mataupu Faavae ma Feagaiga 4:3). O nei la, ou te le tatalo mo ni avanoa faafaifeautalai—ou te tatalo ia maua mata e vaai ai i avanoa faafaifeautalai o loo i o‘u luma.
3. Faaali Atu le Alofa Atoatoa o Keriso i Isi
Ina ua ou faaipoipo, sa asiasi mai Maria, o so’u tauaiga vavalalata ia te au. Sa filifili talu ai Maria e tuua le Ekalesia ae faaauau se mafutaga ma se isi tamaitai. Ou te le ioe i ana filifiliga uma, ae ou te alofa ia Maria ma faaaloalogia lona faitalia, o lea sa ou taumafai ai e faatumauina se sootaga lelei ma ia.
Ina ua asiasi mai Maria ma Kristen, sa ou maua le avanoa e tuuina atu ai ia i laua uma ni faamanuiaga faaleperisitua, a o la sailia le taitaiga e ala i nisi o tauiviga i o laua olaga. E masani ona tali atu le Faaola i le faatuatua o i latou o e sa i fafo atu o le feagaiga pe sa lei tausia Ana poloaiga (tagai Mataio 8:5–13; Mareko 7:24–30; Luka 7:36–50). E ui lava sa ou le mautinoa po o le a lau tala o le a fai atu, ae sa fai o’u ofu ma saunia e tuu le mana o le Atua e tafe atu e ala ia te au.
I le taimi o faamanuiaga, sa uunaia au e faasoa atu ni fautuaga patino ia Maria ma Kristen ma ia faia ni folafolaga patino. O le a le galo lava ia te au le Agaga malosi sa matou lagonaina uma. Ou te talitonu na suia ai i matou uma mo le lelei sili atu.
Ona o lo matou alolofa mo le tasi ma le isi, ua mafai ai ona ou faasoa atu o‘u lagona e uiga i le talalelei ia Maria i se auala atonu na te le taliaina mai isi. O le alofa e agavaa ai i tatou e faia Lana galuega e ala i le tatalaina o faitotoa e faasoa atu ai Lana talalelei ma e ala i le valaauliaina o Lana fesoasoani i a tatou taumafaiga (tagai i le Mataupu Faavae ma Feagaiga 4:5). I le alofa atoatoa, sa faasoa atu ai e le Faaola upumoni i le fafine i le vaieli, e ui ina sa agasala o ia ma o se Samaria (tagai Ioane 4). Sa ia lagonaina le alofa ma upumoni sa Ia faasoa atu ia te ia ma sa suia ai e faavavau i Lana savali.
Ma e tusa lava pe le taliaina a tatou valaaulia e ola i le talalelei, o le faasoaina atu o le alofa o le Atua i isi e mafai lava ona faia se eseesega tumau i o latou olaga.
E Mafai Ona Tatou Maua le Lototele Pe a Fesoasoani Atu i Isi ia Agai atu ia Keriso
E faatatau i le galuega faafaifeautalai, na aoao mai ai Elder Dieter F. Uchtdorf o le Korama a Aposetolo e Toasefululua.
“Faatuatua o le a faia e le mana o le Alii Ana vavega. Ia malamalama e le o sau galuega le liuaina o tagata. O le matafaioi lena a le Agaga Paia. O lau matafaioi o le faasoa atu o mea o loo i totonu o lou loto ma ola e tusa ma ou talitonuga.
O lea, aua ne’i e lotovaivai pe afai e lē taliaina vave e se tasi le savali o le talalelei. …
“O le mea lena e i le va o le tagata ma le Tama Faalelagi.
“Ae o oe, ia alofa i le Atua ma ou tuaoi, o Ana fanau.
“Talitonu, alofa, fai.
“Mulimuli i lenei ala, ma o le a faia e le Atua ni vavega e ala atu ia te oe e manuia ai Ana fanau faapelepele.”1
Pe a tele atu lo tatou alolofa i isi nai lo lo tatou fefefe i le teenaina, o le a tatou vaai i faamanuiaga matagofie a Keriso o faaalia a o tatou taumafai e faapotopoto Isaraelu. O le talepeina o na papupuni a o ou talavou na fesoasoani ia te au e fausia ai se molimau malosi i le taua o le galuega faafaifeautalai i lo‘u olaga. E mafai ona tatou valaaulia isi e o mai ia Keriso e ala i auala faalenatura, laiti, ma faatauvaa, aemaise lava e ala i le iloaina o i latou, ofoina atu le fesoasoani, ma alolofa ia i latou.
E le o a‘u taumafaiga uma e faasoa atu mea o loo i lo’u loto na taitai atu ai i le liua, ae ou te iloa a ou maua le lototele e faasoa atu ai le talalelei, o loo ou fesoasoani i isi ia faia se laa agai ia Keriso, ma o loo ou puna foi i luma i lau lava malaga i luga o le ala o feagaiga. O le mea moni, e mafai ona tatou maua le fiafia sili atu ma faamanuiaga pe a tatou taumafai e avea e faapei o Iesu ma aumai isi ia te Ia.