“Anaa sa Balaan nga Dapit,” Liahona, Abr. 2022.
Anaa sa Balaan nga Dapit
Sa dihang ang batan-ong lalaki hinayhinay nga militok sa matag pulong sa pag-ampo sa sakramento, mibati kami og gamhanang pagsaksi sa gugma sa Dios.
Paghulagway pinaagi ni Dilleen Marsh
Bag-o pa kami sa Dunwoody Ward sa dihang una ming nagkita ni Billy. Sa dihang misugod na ang panagtigom alang sa sakramento, nakabantay ko niya nga naglingkod sa lamesa sa sakramento.
Human ang ward miambit sa pan, si Billy misugod sa pag-ampo sa sakramento alang sa tubig, apan nagkangakanga siya ug nanlimbasog sa matag pulong. Ang kasagaran nga normal nga mga makabalda ug mga tingog sa gagmay nga mga bata nangahilom. Ang tanan daw mihunong, naghulat kang Billy.
Ang mga pulong nga sa kasagaran hanoy ug mubo nga pag-ampo sa sakramento nahimo sa hinay nga pagkalitok, matag pulong gilitok ug mapaningkamutong gipahayag. Sa sinugdanan, mibati kog kahingawa alang sa batan-ong lalaki. Ang akong kasingkasing napuno sa kalooy alang kaniya.
Dayon ang tanan nausab.
Sa paghuman niya sa unang hugpong sa mga pulong sa pag-ampo—usa ka pag-ampo nga nadunggan na nako sa makadaghan na nga higayon—usa ka bag-o nga pagbati miabot sa kwarto. Hilabihan gayod ang among kahilom, ug nasayod kami nga anaa kami sa usa ka balaan nga dapit. Si Billy wala lang nagbasa sa mga pulong sa pag-ampo apan kinasingkasing nga nag-ampo ngadto sa iyang Langitnong Amahan, kinsa mitubag kaniya uban sa masanapon nga pagbubo sa Espiritu.
Ang pagbati sa gugma sa Dios alang niining batan-on nga lalaki gamhanan kaayo, ug mibati kami nga mapasalamaton nga nahimong kabahin niining talagsaong espiritwal nga ordinansa.
Si Billy mipadayon ug sa kataposan mikompleto sa pag-ampo. Dili ko gusto nga mahuman siya tungod kay gusto ko nianang sagrado nga pagbati nga magpadayon. Apan ang mainiton nga gasa sa Espiritu nagpadayon samtang gipasa ang sakramento ngadto sa kongregasyon. Tinuod kadto nga pagbag-o sa mga pakigsaad sa paghinulsol, mahimong mas maayo, ug moserbisyo sa Ginoo sa mas hingpit nga paagi.
Sa pagtapos sa miting miadto ko sa lamesa sa sakramento sa pagpasalamat sa batan-ong lalaki. Nakita nako nga siya adunay Down syndrome. Nagkangakanga siya, “Walay sapayan,” nga may dakong pahiyom.
Paglabay sa katuigan sa laing ward, nakahinumdom gihapon ko ni Billy. Ang panagtigom alang sa sakramento mas makahuloganon sa akong pagpanlimbasog, sama ni Billy, sa pagkab-ot ngadto sa Langitnong Amahan uban sa yano, mainiton nga hugot nga pagtuo ug pag-ampo.
Ang tagsulat nagpuyo sa Florida, USA.