“Sa Unsang Paagi nga ang Pagsaylo Nagsimbolo sa Pag-ula ni Kristo?” Liahona, Abr. 2022.
Dali, Sunod Kanako
Sa Unsang Paagi nga ang Pagsaylo Nagsimbolo sa Pag-ula ni Kristo?
The Passover Supper [Ang Panihapon nga Kasaulogan sa Pagsaylo], ni Brian Call
Ang Kasaulogan sa Pagsaylo naghandom sa pagluwas sa mga Israelita gikan sa Ehipto (tan-awa sa Exodo 12:27). Pinaagi sa mga simbolo, ang Pagsaylo makatudlo kanato karon nga sama nga ang Ginoo miluwas sa mga Israelita gikan sa pagkaulipon sa Ehipto, Siya usab mahimong moluwas kanato gikan sa pagkaulipon sa sala.
Mga Simbolo nga Ikonsiderar
Nating Karnero
Usa ka laki nga nating karnero nga walay buling o mansa giihaw ug gikaon sa kasaulogan. Ang Dios misakripisyo sa Iyang Bugtong Anak, sama “sa nating karnero walay buling o mansa” (1 Pedro 1:19), sa paghatag og kaluwasan sa Iyang mga anak.
Pait nga mga Utanon
Ang mga Israelita nangaon og pait nga mga utanon atol sa Pagsaylo aron sa paghinumdom sa kapait sa ilang pagkaulipon sa Ehipto (tan-awa sa Exodo 12:8). Pinaagi sa Iyang Pag-ula, giinom sa Manluluwas ang “pait nga kopa” (3 Nephi 11:11) aron Siya makatabang kanato nga mabuntog ang pagkaulipon sa sala.
Dugo diha sa mga Haligi sa Pultahan
Ang mga Israelita nga nagbutang og dugo sa nating karnero diha sa mga haligi sa ilang pultahan gisayloan gikan sa pisikal nga kamatayon atol sa kataposang kadaot (tan-awa sa Exodo 12:13). Sa unsang paagi nga ang dugo sa nating karnero nagrepresentar sa Pag-ula ni Kristo? Sa unsang paagi nga ang Manluluwas motabang kanato sa pagbuntog sa pisikal ug espiritwal nga kamatayon?
Ang Kasaulogan sa Pan nga Walay Patubo
Ang Ginoo misugo sa mga Israelita sa pagkaon og pan nga walay patubo aron sa paghinumdom sa Pagsaylo (tan-awa sa Exodo 12:15). Atol sa Kataposang Panihapon, si Jesus mikaon sa pan nga walay patubo ug midapit sa Iyang apostoles sa “pagbuhat niini … aron paghandom [Kaniya]” (1 Mga Taga-Corinto 11:24). Sa unsang paagi nga ang sakramento nagpahinumdom kanimo sa Manluluwas?