Mga Young Adult
Pagpadayon nga Magmatinuohon Taliwala sa Pagduhaduha
Kon kita adunay wala matubag nga mga pangutana, mahimo natong pilion ang hugot nga pagtuo.
Litrato pinaagi ni Judith Ann Beck
Pipila ka tuig ang milabay, miluhod ko aron mag-ampo sa unang higayon sa akong kinabuhi. Sayo nianang adlawa, una nako nga pakighimamat sa mga misyonaryo, ug sila mipakigbahin sa mensahe sa Pagpahiuli sa ebanghelyo ni Jesukristo ug migasa nako og Basahon ni Mormon.
Nahatagan sa akong unang kahigayonan sa pagpangutana sa akong Langitnong Amahan og bisan unsa nga pangutana, wala ko mangamuyo kon aduna bay tinuod sa bisan unsa sa akong nadungog o nabasa. Wala usab ako mangamuyo Kaniya kabahin sa makalibog ug makapahingawa nga mga hungihong nga akong nadungog kabahin sa Simbahan gikan sa ilado nga kultura.
Hinoon, ako nihangyo sa Langitnong Amahan sa pagpanalangin kanako og tinguha nga mahibalo nga tinuod ang unsa man nga gisulti sa mga misyonaryo kanako.
Ug pinaagi niana nga pag-ampo, ako nagiyahan ngadto sa kamatuoran—nga ang ebanghelyo ug Simbahan ni Jesukristo tinuod gayod nga napahiuli og usab sa kalibotan.
Pagpalawom sa Pagtuo
Si Presidente Russell M. Nelson mihulagway sa hugot nga pagtuo isip “ang kinadak-ang gahom nga atong magamit niini nga kinabuhi.” 1 Dili magsapayan kon kanus-a kita mipasakop sa Simbahan ni Jesukristo, lagmit aduna kitay mga pangutana o gamay nga mga pagduhaduha nga maoy makapugong sa atong abilidad sa pagdawat nianang gahom sa hugot nga pagtuo nga gihulagway ni Presidente Nelson.
Apan dili angay nga ang mga pangutana mo-limitar sa atong hugot nga pagtuo. Ang mga pangutana mahimong usa ka maanindot nga espirituhanong mga bloke [spiritual building blocks] nga mopalig-on sa atong mga pagpamatuod kon kita mohangop niini isip mga kahigayonan sa pagpalawom ug pagpakita sa atong hugot nga pagtuo.
Ania ang lima ka lakang nga nakatabang kanako nga magmatinuohon taliwala sa pagduhaduha dihang ako adunay mga pangutana:
1. Sugdi uban sa Tinguha
Ang pag-ampo nga akong gihalad human mahimamat ang mga misyonaryo mao ang akong una, apan siguradong dili maoy kataposan sa akong pag-ampo. Ang pangutana nga akong gipangutana adunay dakong impluwensiya sa akong pagpangita sa hugot nga pagtuo—kini nagsugod sa akong yano nga tinguha nga motuo. Ang pag-ampo alang sa tinguha nga motuo mopalambo sa atong hugot nga pagtuo nga ang atong mga pangutana mahimong tubagon (tan-awa sa Alma 32:27).
2. Sabta ang Imong Pagkatawo
Ang labing mahinungdanon nga kamatuoran nga angayng mahibaloan kon kita nangita og mga tubag ug mas hugot nga pagtuo mao nga kita gihigugma kaayo nga mga anak sa langitnong mga ginikanan. Ang labing makahatag kanato og kaayohan mao ang anaa sa kasingkasing sa Dios. Gusto Siya nga mogiya kanato. Ang pagsabot sa atong relasyon sa Langitnong Amahan ug ni Jesukristo makatabang nato nga magtinguha nga mahiusa ang atong pagbuot ngadto sa Ilaha ug mahibalo kon unsa ang angayng mga ipangutana.
3. Pagmapailobon
Daghan na kaayo ako og mga gipangutana pinaagi sa pag-ampo, ug ako nakadawat og mga tubag sa matag usa niini—bisan kon ang mga tubag yano ra kaayo, makahupay nga mga mensahe gikan sa Espiritu nga nagsulti kanako nga magbaton og pailob. Tingali dili kita makadawat og direkta nga mga tubag dihadiha dayon o bisan gani niini nga kinabuhi. Usahay magkinahanglan pa kita og panahon aron molambo sa dili pa kita maandam sa pagpaminaw sa mga tubag. Apan, “dili kinahanglan nga kita mangita sa mga tubag sa matag pangutana aron makadawat og pagpamatuod ug mobarog nga usa ka saksi sa kamatuoran.” 2 Ang Langitnong Amahan mohatag sa mga tubag sa Iyang tukma nga panahon.
4. Hatagi og Gahom ang Hugot nga Pagtuo—Dili ang Pagduhaduha
Sa pipila ka bulan human sa akong una nga pakighimamat sa mga misyonaryo, nakasugat ko og oposisyon ug mga pangutana nga mihulga sa akong huyang pa nga pagpamatuod. Ako nag-ampo alang sa tinguha dili lang motuo nga anaa ang Dios apan motuo nga tinuod ang Iyang mga gisulti. Imbes nga mopukos diha sa atong mga pagduhaduha ug mga pangutana, ang Langitnong Amahan makahatag kanato og mga kahigayonan sa “pagbansay sa usa ka tipik sa hugot nga pagtuo” (Alma 32:27). Kini nga mga kahigayonan moabot lamang kon kita adunay hugot nga pagtuo ug andam nga mosalig Kaniya imbes nga mangita og mga rason sa pagduda Kaniya. Sama sa gitudlo ni Elder Dieter F. Uchtdorf sa Korum sa Napulog Duha ka Apostoles, “Duhaduhai una ang inyong pagduhaduha sa dili pa mo magduhaduha sa inyong pagtuo.” 3
5. Pilia nga Motuo
Kon ikaw adunay mga pangutana nga nakahasol kanimo, ayaw pasagdahi nga dili matubag ug ayaw tugoti nga mograbe kini. Lihok uban sa hugot nga pagtuo. Pag-aktibo gayod sa pagpangita og mga tubag. Si Presidente Nelson mitambag: “Kon kamo adunay pagduhaduha … pilia nga motuo ug pagpabiling matinud-anon. Ipaabot ang inyong mga pangutana ngadto sa Ginoo ug sa ubang katuohan nga mga kapanguhaan. Magtuon dala ang tinguha nga motuo. … Hunonga ang pagdugang sa inyong mga pagduhaduha pinaagi sa paghisgot niini ngadto sa ubang mga maduhaduhaon. Tugoti ang Ginoo nga mogiya kaninyo sa inyong panaw sa espirituhanong panimpalad.” 4
Pagmahimong andam nga tugotan Siya nga mogiya kanimo. Tingali kinahanglan ka nga mohulat alang sa mga tubag o modawat og tubag gikan sa Langitnong Amahan nga dili kaayo mao ang imong gilaoman. Apan bisan asa ka man tingali sa imong panaw sa hugot nga pagtuo, ang Langitnong Amahan mogiya nimo ug mohatag nimo sa hingpit nga kalipay samtang magpadayon ka sa pagpili nga motuo.