Mauaina o le Filemu mo Oe Lava ma Isi i Taimi Faigata

Saunia e Alex Hugie ma Aspen Stander

Mekasini a le Ekalesia

O auala nei e valu e fesoasoani ia te oe ma isi ia lagona le filemu pe a o’o ina faigata le olaga.

Ata

hands letting birds go

Ata i tua ma ata tusi mai le Getty Images

O nisi taimi e faavevesi ai ma faanenefu i tatou e le olaga. Atonu e te popole e uiga i atugaluga o aiga, mataupu tau soifua maloloina, faafitauli i le aʻoga, po o le tele o faʻalavelave faigata i le lalolagi i aso nei. E mafai faapefea ona tatou maua le filemu faaletagata lava ia i se lalolagi o faigata? Pe o le leai o sou filemu e oo mai ona o mea e tutupu e le mafai ona e pulea pe mai i mea e mafai ona e pulea ma suia, o nisi nei o manatu e fesoasoani ia te oe e maua ai le filemu i totonu e ala mai ia Iesu Keriso.

Auala e 4 e Maua ai le Filemu mo Oe Lava

Taulai atu i le faavavau

E faigata ona e lagona le filemu pe a e taulai atu i popolega pupuu. Ae afai e te taulai atu i le ata tele, o le fuafuaga a le Atua o le fiafia, e mafai ona e mauaina le filemu i le iloaina o mea e tiga i le taimi nei o le a le tumau e faavavau. Mo se faataitaiga, o le malumalu e fesoasoani tatou te taulai atu ai i le faavavau. Sa aoao mai Peresitene Gordon B. Hinckley (1910–2008) o totonu o le malumalu “o le a e iloa ai lea se filemu e te le mafai ona e maua i se isi lava mea.”¹
Ia lafoai mea e le mafai ona e puleaina

A aveesea e se mea i fafo atu o lou malosi lou filemu, e faaosoosoina le lagona o le leai o se faamoemoe pe ita. Ae e le mafai ona fesoasoani lou tumau ai i mea e le mafai ona e suia. Nai lo lena, ia faalatalata atu i le Faaola e maua ai le filemu i totonu e tusa lava pe tuuina atu e le olaga ni luitau faigata. Na Ia folafola mai o le a auina atu ia te oe le Faamafanafana, le Agaga Paia (tagai Ioane 14:26–27).
Faamagalo atu i isi

E masani lava o le mea e sili ona faigata e lafoai o le le fiafia lea e te lagona pe a sese se tasi ia te oe. Ae ua aoao mai Elder Dieter F. Uchtdorf o le Korama a Aposetolo e Toasefululua: “O le a tatou maua le olioli o le faamagaloga i o tatou lava olaga pe a tatou naunau e tuuina fua atu lena olioli i isi. … O le taunuuga, o le a faatumulia e le Agaga o le Alii o tatou agaga i le olioli e o mai faatasi ma le filemu faalelagi o le lotofuatiaifo (tagai Mosaea 4:2–3).”² O le liliu atu i le Faaola e mafai ona fesoasoani e faasaoloto oe mai avega faalelagona ma faatumuina i le filemu.
Salamo ma faalagolago ia Keriso

E le afaina po o le a se isi mea o loʻo lelei i lou olaga, o le tauaveina o le avega o le agasala o le a faoa ai mai ia te oe i taimi uma le filemu. O nisi taimi tatou te manaomia ai lo tatou epikopo e fesoasoani ia tatou salamo atoatoa. Ae tatou te manaomia uma le salamo e le aunoa ma, e ala i le Togiola a Iesu Keriso, ia mama mai mea uma e taofia ai i tatou mai le avea atili e faapei o Ia.

Auala e 4 e Fesoasoani Ai i Isi ia Maua le Filemu

Faasoa atu le talalelei a Iesu Keriso

E pei lava ona tatou maua le filemu mo i tatou lava e ala i le taulai atu i le Faaola, e mafai ona tatou faasino atu isi ia te Ia “o le faavae o le filemu” (Mosaea 15:18). Mo se faataitaiga, e mafai ona e faasoa atu se mau po o se upusii mai se lauga o le konafesi aoao lea na fesoasoani ia te oe e aoao atili e uiga ia Iesu Keriso.
Ia avea ma se e faatupuina le filemu

Fesoasoani i uo ma ou tei e foia faafitauli. E pei o le au Aneti-Nifae-Liae i le tusi a Alema, e mafai ona tatou tanuina a tatou auupega o le taua—auupega e pei o le faitatala, taui ma sui, po o le manatu faapito—ma fesuiai i latou ma meafaigaluega o le filemu: tautatala atu ma le agalelei, usiusitai i poloaiga a le Atua, ma faamagalo atu i isi (tagai Alema 24:19).
Ia avea ma se tagata e faalogo lelei

O nisi taimi o tagata o loʻo tauivi e manaʻomia le talanoa faʻalautele e uiga io latou mafaufauga ma lagona nai lo le teuina i totonu. E le tatau ona tatou foia o latou faafitauli mo i latou, ae e mafai lava ona tatou faalogo atu i o latou popolega ma tuuina atu le lagolagosua, faaalia le alofa faaKeriso ma le malamalama.
Auauna atu ia i latou i totonu o lau uarota ma le alalafaga

E mafai ona e volenitia i se fale mo i latou e leai ni aiga, auauna atu o se faiaoga mo lau tupulaga, pe avatu ni meaai mama i se aiga fou i lou lotoifale. Fesoasoani i tagata e maua le filemu i mea laiti. O le i ai o se nofoaga tumau e ‘ai ma moe ai, o se faufautua faʻalagolagoina, poʻo se faʻamautinoaga laitiiti faapea e popole ma alofa se tasi e mafai ona fesoasoani mo se taimi umi.

Na fetalai Iesu i nei upu faamafanafana ia i latou uma e tauivi ina ia maua le filemu: “Ou te tuuina atu ia te outou le manuia, o loʻu manuia ou te avatu ai ia te outou: ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau” Ioane 14:27). Afai tatou te aumaia i tatou lava ma isi ia latalata atu ia Iesu Keriso, e mafai ona tatou maua le filemu e tusa lava pe faigata le olaga.