Faaaogaina o le Feagaiga Tuai i Lou Olaga

Pe Patino Foi Faaaliga Faaperofeta ia te A‘u?

Saunia e Alison Wood

Mekasini a le Ekalesia

O faaaliga faaperofeta ua tuuina mai i le Ekalesia e faatatau i tagata uma, ae o faaaliga faaletagata lava ia e fesoasoani ia i tatou e iloa ai pe faapefea ona faaaoga na aoaoga.

Tamaitai talavou o loo matamata i le konafesi aoao

E tele mea e mafai ona tatou aoaoina e uiga i faaaliga faaperofeta ma faaaliga faaletagata lava ia mai ia Mose. Ina ua o mai Isaraelu ia Mose mo se fesoasoani, ma muimui ai ua na o le manai e aai ai, sa tagi atu Mose i le Alii, ma fai atu: “Ou te le lava lava e a’u e toatasi ona ave i le avega o lenei nuu uma, aua e mafatia ai a’u” (Numera 11:14).

I le tali atu i ai, na valaauina ai e le Alii toeaiina e toafitugafulu o Isaraelu e fesoasoani e tauave lenei avega, ma fetalai atu ia Mose: “Ou te avea foi nisi o le agaga o loo ia te oe, ma ou tuuina atu ia te i latou; ona latou tauave ai lea faatasi ma oe le avega o le nuu, ina ia e le avea toatasi” (Numera 11:17).

Ae na tele nisi mea na manao i ai Mose, “na ia mo’omo’o ia fai ma perofeta le nuu uma o Ieova, ma ia foaiina atu e Ieova lona Agaga ia te i latou!” (Numera 11: 29). I se isi faaupuga, sa manao Mose ia agavaa tagata e talia le Agaga Paia e taitai i latou.

O aso nei ua uuna’ia so’o i tatou e o tatou taitai e saili faaaliga faaletagata lava ia, e faaopoopo atu i mea ua tatou aoaoina mai perofeta. Na faamatala mai e Peresitene Russell M. Nelson, “o le a lē mafai ona ola ai faaleagaga e aunoa ma le taiala, taitaiga, faamafanafanaga, ma le faatosinaga faifai pea a le Agaga Paia.”¹ E tatau ona tatou iloa le auala e mulimuli ai i le fautuaga a le perofeta a’o sailia foi fautuaga mo o tatou lava olaga.

O ai e mafai ona mauaina Faaaliga Faaperofeta?

O nisi tagata o le Ekalesia o loo faigata ia i latou le eseesega i le va o faaaliga faaperofeta ma faaaliga faaletagata lava ia. Ae ua faamanino mai e le Alii, po o ai e faatagaina, ma po’o ai fo’i e lē faatagaina ona maua faaaliga mo le Ekalesia atoa, e pei ona faaalia i le Numera 12.

Sa amata ona masalosalo Arona ma Miriama i le matāfaioi a Mose o se perofeta, ma fesiligia ai “Pe na o Mose ea na fetalai mai i ai le Alii? Pe e le’i fetalai mai ea o ia iā te i tatou?” (Numera 12:2).

Na fetalai mai le Alii:

“O La‘u auauna o Mose … e faamaoni i lo’u aiga uma lava.

“Ma te faafesaga’i ona ma tautala ma ia” (Numera 12:7–8).

Sa faamanino mai e le Alii lenei mataupu faavae i le tele o tausaga mulimuli ane i le Mataupu Faavae ma Feagaiga 28, ma aoao mai e faapea o faaaliga i le Ekalesia atoa e na o le perofeta ua tofia e oo mai ai: “Ae, faauta, e moni, e moni, Ou te fai atu ia te oe, e leai se tasi e tofia na te mauaina poloa’iga ma faaaliga i lenei ekalesia vagana ai la’u auauna o Iosefa Samita, Laitiiti, ona e maua e ia poloaiga ma faaaliga e pei lava o Mose” (fuaiupu 2).

E faapefea ona galulue faatasi Faaaliga Faaperofeta ma Faaletagata Lava Ia

O fea la e talafeagai ai faaaliga faaletagata lava ia i nei mea uma? Na faamatala mai e Peresitene Dallin H. Oaks, Fesoasoani Muamua i le Au Peresitene Sili:

“O lenei laina patino o fesootaiga ma lo tatou Tama Faalelagi e ala mai i Lona Agaga Paia, o se puna o la tatou molimau o le upumoni, o lo tatou malamalama, ma lo tatou taitaiga patino mai se Tama Faalelagi alofa.

“… I lona atoaga, o le laina patino e lē galue tutoatasi.”²

O faaaliga faaperofeta ua tuuina mai i le Ekalesia e faatatau i tagata uma, ae o faaaliga faaletagata lava ia e fesoasoani tatou te iloa ai pe faapefea ona faaaoga na aoaoga i o tatou olaga. O faaaliga faaletagata lava ia mai le Alii e mafai ona faamautu ai mea o loo aoao mai e le perofeta; o le a lē feteena’i ma faaaliga Na te tuuina mai i Ana perofeta.

O ni nai faataitaiga nei o fautuaga faaperofeta e valaaulia ai faaaliga faaletagata lava ia:

O suiga na faia i faiaoga o aiga ma faiaoga asiasi. Ua fautuaina i tatou e o tatou perofeta ma aposetolo e uiga i sini tupito o le auaunaga, lea sa faatuina e sui ai faiaoga o aiga ma faiaoga asiasi i le 2018, ae o le mamanu e tuu atu ai le avanoa mo tagata e filifili ai pe faapefea ona auauna atu i tagata taitoatasi ma aiga patino.
Sau, Mulimuli Mai Ia Te A’u suesuega Ua faalauiloa mai e le Au Peresitene Sili i le Ekalesia Atoa i le 2018, ua tuuina mai e le tusi lesona ia i tatou se otootoga ma se laina fautuaina o suesuega, ae e fuafua e tagata taitoatasi ma aiga le auala e faatulaga ai a latou suesuega ina ia fetaui ma o latou manaoga patino.

O faaaliga o se meaalofa, ma e ala i le sailia o faaaliga faaletagata lava ia, e mafai ai ona tatou aoao pe faapefea ona faaaoga fautuaga faaperofeta i o tatou olaga.

Aoaoina o le Auala e Talanoa Mai ai le Agaga ia i Tatou

E matagofie faaaliga o ona po nei. O lona i ai o lona uiga e finagalo le Tama Faalelagi e fesootai mai ia i tatou, ma ua Ia saunia mo i tatou ni auala se tele e maua ai faaaliga mai ia te Ia. Ae e mafai ona faia se faataitaiga e aoao ai pe faapefea ona fetalai mai le Agaga ia i tatou ma mea e finagalo le Tama Faalelagi e faaali mai ia i tatou.

O le mea sili e mafai ona tatou faia, i upu a Peresitene Nelson, o le ole atu ma ia naunau ia maua: “O le a le poto ua e lē maua? O le a le lagona o se manaoga faanatinati ia iloa pe malamalama i ai? Saili se nofoaga filemu e mafai ona e alu soo i ai. Ia faamaualaloina oe lava ia i luma o le Atua. Liligi atu lou loto i lou Tama Faalelagi. Liliu atu ia te Ia mo ni tali ma le faamafanafanaga.”³

E finagalo moni lava le Alii e fetalai mai ia i tatou—e lē gata i o tatou mafaufau ma loto ma i le Ekalesia atoa e ala i Lana perofeta. A o tatou sailia faamanuiaga o faaaliga faaletagata lava ia, o le a taialaina i tatou i o tatou olaga atoa.